- బాబా ఊదీ - దివ్యౌషధి
- బాబా అనుగ్రహముంటే ఏ కష్టమూ ఉండదు
బాబా ఊదీ - దివ్యౌషధి
నా పేరు లక్ష్మి. మేము బెంగుళూరులో ఉంటున్నాము. ముందుగా సాయినాథునికి మనఃపూర్వకంగా నమస్కరిస్తున్నాను. 2021లో మా పెద్దబ్బాయి పన్నునొప్పిగా ఉంటే రూట్ కెనాల్ చేయించుకున్నాడు. తరువాత దవడ దగ్గర వాపు, నొప్పితోపాటు జ్వరం కూడా వచ్చేసరికి డాక్టరును సంప్రదిస్తే, "చిన్న ఇన్ఫెక్షన్" అని చెప్పి మందులు వ్రాసిచ్చారు. మందులతో తగ్గకపోగా వాపు కాస్తా గట్టిపడి బిళ్ళలా తయారైంది. దాంతో మళ్ళీ డాక్టరుని సంప్రదిస్తే, ఫిజీషియన్‌ని, సర్జన్‌ని కలవమన్నారు. వాళ్ళను సంప్రదిస్తే, "చిన్న సర్జరీ చేయాల"ని చెప్పి మాత్రలు ఇచ్చి రెండురోజులు వాడమన్నారు. నాకు భయమేసి బాబాకు మ్రొక్కుకొని, ఆ వాపుపై బాబా ఊదీని పూస్తూ, కొంత ఊదీని నీళ్లలో కలిపి రోజుకి రెండు, మూడుసార్లు మా అబ్బాయికి ఇవ్వసాగాను. క్రమంగా వాపు, నొప్పి, జ్వరం తగ్గి మామూలు స్థితికి వచ్చింది. దాంతో సర్జన్ "తగ్గుతోంది కదా, ఇక సర్జరీ వద్దు" అని అన్నారు. ఇదంతా ఆ సాయి మహరాజ్ అనుగ్రహం కాక ఇంకొకటి కాదు. "శతకోటి వందనాలు బాబా".
2021, మార్చి నెల మొదట్లో మా చిన్నబ్బాయి పాదంలో నొప్పి కారణంగా సరిగా నడవలేక కుంటుకుంటూ చాలా ఇబ్బందిగా నడుస్తూంటే నేను సాయీశునికి నమస్కరించుకుని, "తప్పైతే క్షమించమ"ని చెప్పుకొని మా అబ్బాయి పాదానికి ఊదీ రాసి, మరికొంత ఊదీని నీళ్ళలో కలిపి ఇచ్చాను. అలా 3 రోజులు చేసేసరికి మందులు అవసరం లేకుండా తనకు నొప్పి పూర్తిగా తగ్గిపోయి హాయిగా ఉన్నాడు. "సాయినాథా! ఇలాగే మా సమస్యలన్నీ దూరంచేసి మా అందరినీ కాపాడుతూ ఉండండి. ధన్యవాదాలు బాబా".
బాబా అనుగ్రహముంటే ఏ కష్టమూ ఉండదు
సాయిభక్తులందరికీ నా నమస్కారం. నేను ఒక సాయి భక్తురాలిని. ఒకసారి ఉద్యోగాన్వేషణ నిమిత్తం నేను, నా భర్త మా బాబును(అప్పుడు వాడు చాలా చిన్నవాడు) తీసుకొని బయటకి వెళ్ళవలసి వచ్చింది. అవి కోవిడ్-19 పరిస్థితులు అయినందువల్ల బయటకి వెళ్లాలంటే చాలా భయం వేస్తుండేది. పైగా మేము వెళ్లాల్సినచోట జనసమ్మర్ధం చాలా ఎక్కువగా ఉంటుంది. కానీ తప్పనిసరిగా వెళ్లాల్సిన పరిస్థితి. అందువలన వెళ్లేముందు నేను బాబాకు నమస్కరించుకొని, "వెళ్లే చోట మాకు ఎలాంటి సమస్యలూ లేకుండా చూడండి" అని బాబాతో చెప్పుకున్నాను. బాబా అనుగ్రహం వలన మాకు ఎలాంటి సమస్యలూ ఎదురుకాలేదు. "థాంక్యూ సో మచ్ బాబా!"
నా భర్తకి తరుచూ కాలునొప్పి వస్తుండేది. డాక్టరుని సంప్రదిస్తే, "మొత్తం శరీరానికి స్కానింగ్ చేయించాలి" అని అన్నారు. ఇంకా "స్కానింగ్ చేయిస్తే, 7 రోజులకి రిపోర్టులు వస్తాయి" అన్నారు. అప్పుడు నేను బాబాతో, "నా భర్తకి ఏ సమస్యా లేకుండా రిపోర్టు నార్మల్‌గా వచ్చేలా చేయండి" అని చెప్పుకున్నాను. బాబా దయవలన రిపోర్టులో అంతా నార్మల్ అని వచ్చింది. ఎంతో ఆనందంగా బాబాకు కృతజ్ఞతలు తెలుపుకున్నాను.
