- బాబా అనుగ్రహాశీస్సులు
- ఊదీతో చేకూరిన ఆరోగ్యం
బాబా అనుగ్రహాశీస్సులు
సాయిబంధువులకు నమస్కారం. సాయిభక్తులకు, బ్లాగ్ నిర్వాహకులకు నా అభినందనలు. "సాయిబాబా! ఎల్లవేళలా నీడలా నాతో ఉండండి. నేను ఎలాంటి తప్పుడు పనులు చేయకుండా నా చేయి పట్టుకొని నన్ను ఆపండి. సదా మాతో ఉండి మమ్మల్ని ఆశీర్వదించండి బాబా".
నా పేరు విజయ. నేను ఢిల్లీలో నివాసముంటున్నాను. నేనిప్పుడు నా అనుభవాలను మీతో పంచుకోవాలనుకుంటున్నాను. ఇదివరకు నేను నొప్పులతో ఎంతో బాధపడుతూ ఇంటిపనులు చేసేందుకు ఆసక్తి చూపలేకపోయేదాన్ని. మా అత్తగారితో, నా భర్తతో నాకున్న చేదు అనుభవాల వలన నాలో చికాకు, ప్రతికూల భావనలు ఉండేవి. సాయిబాబా మహాపారాయణ ప్రారంభించినప్పటినుండి నా కోపం అదుపులోకి వచ్చింది. అంతేకాదు, అతి తక్కువ సమయంలోనే నేను నా పనులన్నీ చక్కగా చేసుకోగలుగుతున్నాను. ఇంకా కొన్ని సమస్యలున్నప్పటికీ డాక్టర్లను సంప్రదించాల్సిన అవసరం లేకుండా బాబా నన్ను జాగ్రత్తగా చూసుకుంటారు. ఆయన ఊదీ అత్యంత అద్భుతమైనది. నేను ఎప్పుడూ నా బాధను, చేదు అనుభవాలను బాబాతో చెప్పుకుంటాను. ఆయన నుండి నాకు సమాధానం కూడా లభిస్తుంది. ఒకసారి నా సోదరి వసుంధరకు ఆరోగ్య సమస్య వచ్చినప్పుడు, బాబాకు చెప్పుకున్నాను. ఆయన దయవల్ల ఇప్పుడు నా సోదరి ఆరోగ్యంగా ఉంది.
మరో అనుభవం:
ఇటీవల మా అబ్బాయి పవన్ చైతన్య తన 9వ తరగతి పరీక్షలు వ్రాసి ఇంటికొచ్చాక, "అమ్మా! నాకు లెక్కల్లో 58%, సైన్సులో 60% వస్తాయి. దయచేసి నాకు మంచి రిజల్ట్ వచ్చేలా అనుగ్రహించమని బాబాను ప్రార్థించు" అని చెప్పాడు. ఎందుకంటే, బాబా ఆశీస్సులతో గత సంవత్సరం వరకు తనకు ఎప్పుడూ మొదటి ర్యాంకు వస్తుండేది. నేను ప్రతిరోజూ సాయి సచ్చరిత్రలో ఒక అధ్యాయం చదివి, "దయచేసి నా బిడ్డను చూసుకోండి" అని బాబాను ప్రార్థించేదాన్ని. 2021, ఏప్రిల్ 3న ఫలితాలు వెలువడతాయనగా ముందురోజు నేను, "బాబా! రేపు ఫలితాలు వెలువడనున్నాయి. దయచేసి నన్ను నిరాశపరచవద్దు" అని బాబాతో చెప్పుకున్నాను. మరుసటిరోజు ఉదయం గం. 9-40 ని.లకు మేము మా అబ్బాయి చదివే స్కూలుకి వెళ్ళాము. నా కొడుకుని చూసి తన క్లాసు టీచర్ సంతోషంగా, "పవన్! నీకు నా హృదయపూర్వక అభినందనలు. నువ్వు మొదటి ర్యాంక్ సాధించావు. గుడ్, ఎప్పుడూ ఇలాగే కొనసాగించు" అని చెప్పారు. అది విని నాకు నోటమాట రాలేదు. ఎంతో ఆనందంగా బాబాకు కృతజ్ఞతలు తెలుపుకున్నాను. నేను కొన్ని విషయాల గురించి బాబాను ప్రార్థించాను. ఆయన ఆశీస్సులతో అవి నెరవేరగానే ఆ అనుభవాలను కూడా నేను మీ అందరితో పంచుకుంటాను. "బాబా! దయచేసి మీ ఆశీస్సులు ఇలాగే మాపై కురిపించండి. నేను మిమ్మల్ని మనస్ఫూర్తిగా వేడుకుంటున్నాను, 'ప్రస్తుత కరోనా పరిస్థితికి ప్రజలంతా భయపడుతున్నారు. దీనినుండి రక్షించగలిగేది మీరు మాత్రమే. నాడు కలరాను నిర్మూలించినట్లు దయచేసి ఈ కరోనాను కూడా నిర్మూలించండి బాబా. ఎప్పుడూ మాతో ఉంటూ మాకు హితం చెప్పండి. మేము చెడుమార్గంలో వెళ్తున్నప్పుడల్లా మా చేయి పట్టుకొని ఆపి మంచిపనులు చేసేలా సూచించండి".
ఊదీతో చేకూరిన ఆరోగ్యం
పేరు వెల్లడించని ఒక సాయిభక్తురాలు తనకు బాబా ప్రసాదించిన అనుభవాలను మనతో పంచుకుంటున్నారు.
సాయిబంధువులందరికీ నమస్కారం. ఈ బ్లాగును నిర్వహిస్తున్న సాయికి నా ధన్యవాదాలు. తోటి సాయిభక్తుల అనుభవాలు చదువుతుంటే ఒక రకమైన ఆనందాన్ని అనుభూతి చెందుతున్నాను. నేనిప్పుడు బాబా నాకు ప్రసాదించిన కొన్ని అనుభవాలను మీతో పంచుకోబోతున్నాను.
మొదటి అనుభవం:
ఒకసారి నాకు కుడిచేయి చాలా నొప్పిగా అనిపించింది. అదే తగ్గుతుందిలే అని నేను దాని గురించి అంతగా పట్టించుకోలేదు. కానీ రెండు రోజుల తర్వాత నా ఛాతీ భాగంలో గడ్డలా గట్టిగా ఉండి బాగా నొప్పిగా అనిపించింది. దాంతో నాకు చాలా భయం వేసింది. ఆ భయం వలన ఎన్నో అనుమానాలు నన్ను చుట్టుముట్టాయి. అప్పుడు నేను బాబాకు నమస్కరించి, "బాబా! నాకు నువ్వే దిక్కు" అని ప్రార్థించి, గడ్డలు, నొప్పి ఉన్న ప్రాంతంలో ఊదీ రాశాను. తరువాత, "మీ దయవలన నాకు నయమైతే నా అనుభవాన్ని బ్లాగులో పంచుకుంటాను" అని బాబాకు మ్రొక్కుకున్నాను. నాలుగు రోజులపాటు క్రమం తప్పకుండా బాబా ఊదీ రాసేసరికి బాబా దయవలన గడ్డలు తగ్గిపోయాయి. "ఇదంతా మీ దయే బాబా. మీకు శతకోటి ధన్యవాదాలు. నా చెయ్యినొప్పి కూడా మీరే తగ్గిస్తారని నమ్ముతున్నాను తండ్రీ!”
రెండవ అనుభవం:
ఒకరోజు రాత్రి గ్యాస్ట్రిక్ సమస్య బాగా ఎక్కువై నిద్రపట్టక నేను చాలా బాధపడ్డాను. వెంటనే బాబా ఊదీ నీళ్ళలో కలుపుకొని త్రాగి, "నా ఈ బాధ తగ్గితే నా అనుభవాన్ని బ్లాగులో పంచుకుంటాన"ని మ్రొక్కుకున్నాను. వెంటనే గ్యాస్ట్రిక్ సమస్య తగ్గిపోయి నాకు చక్కగా నిద్రపట్టేసింది. "థాంక్యూ బాబా. నా అనారోగ్య సమస్యలన్నీ పటాపంచలయ్యేలా అనుగ్రహించు తండ్రీ. నా మనసులో ఉన్న పెద్ద కోరిక మీకు తెలుసు. అది వెంటనే నెరవేరేటట్లు అనుగ్రహించండి బాబా".
