సాయిభక్తుల అనుభవమాలిక 708వ భాగం....

---

ఈ భాగంలో అనుభవాలు:

1. వేడుకున్నంతనే జ్వరం నుండి ఉపశమనాన్ని ప్రసాదించిన బాబా
2. కోవిడ్ భయాన్ని తొలగించిన బాబా
3. ప్రార్థించినంతనే ఆటంకాలు తొలగించిన బాబా

---

వేడుకున్నంతనే జ్వరం నుండి ఉపశమనాన్ని ప్రసాదించిన బాబా

సాయిభక్తురాలు శ్రీమతి సునీత తనకు బాబా ప్రసాదించిన అనుభవాన్ని మనతో పంచుకుంటున్నారు.

ముందుగా ఈ బ్లాగ్ నిర్వహిస్తున్న సాయికి మరియు నా తోటి సాయిభక్తులందరికీ నా ధన్యవాదాలు. నా పేరు సునీత. నేను ఇంతకుముందు ఎన్నో అనుభవాలను మీతో పంచుకున్నాను. ఇప్పుడు మరో అనుభవాన్ని పంచుకోబోతున్నాను. ఇలా బాబా ప్రసాదించిన అనుభవాలను తోటి భక్తులతో పంచుకోవడం చాలా ఆనందంగా ఉంటుంది. అలాగే, నేను ప్రతిరోజూ ఈ బ్లాగులో ప్రచురిస్తున్న సాయిభక్తుల అనుభవాలను చదవనిదే నాకు ఆరోజు ముగియదు. ఇక నా అనుభవానికి వస్తే.. 

ఒకరోజు మావారికి ఉన్నట్టుండి చలి, జ్వరం, ఒళ్ళునొప్పులు రావటంతో చాలా బాధపడ్డారు. జ్వరం, ఒళ్ళునొప్పులు తగ్గటానికి తనకు ఇంజక్షన్ కూడా చేయించాము. కానీ రెండు రోజులైనా తనకు జ్వరం తగ్గలేదు. అప్పుడు నేను బాబాకు నమస్కరించుకుని, “బాబా! మావారికి రెండు రోజుల నుండి జ్వరం తగ్గడం లేదు. త్వరగా తనకు జ్వరం తగ్గేలా అనుగ్రహించండి. మీ దయతో తనకు జ్వరం తగ్గిపోతే నా అనుభవాన్ని సాయి మహారాజ్ సన్నిధి బ్లాగులో పంచుకుంటాను” అని అనుకున్నాను. బాబా అనుగ్రహంతో మావారి జ్వరం వెంటనే తగ్గిపోయింది. అయితే, కొన్ని సమస్యల వల్ల నా అనుభవాన్ని బ్లాగులో పంచుకునే విషయం మర్చిపోయాను. ఇంతలో మావారికి మళ్ళీ జ్వరం వచ్చింది. బాబాకు మాటిచ్చి మర్చిపోయిన నా తప్పును గ్రహించి, నన్ను మన్నించమని బాబాను ప్రార్థించి, మావారికి ఆరోగ్యాన్ని ప్రసాదించమని బాబాను వేడుకున్నాను. ఇక ఆలస్యం చేయకుండా నా అనుభవాన్ని మీతో పంచుకుంటున్నాను. 

నేను శ్రీసాయిసచ్చరిత్ర పారాయణ ప్రారంభించాను. సచ్చరిత్ర చదువుతుంటే మనసుకు ఎంతో ప్రశాంతంగా ఉంటోంది. “బాబా! నాకు మనోధైర్యాన్ని ప్రసాదించండి. ఎలాంటి సమస్యనైనా ఎదుర్కోగలిగే శక్తిని ఇవ్వండి బాబా. మీరు నా వెంట ఉంటే నాకు భయమెందుకు?” అలాగే, నేను మా బాబు కోసం 21 వారాల సాయిదివ్యపూజ మొదలుపెట్టాను. మా బాబు తాననుకున్నది సాధించాలని ఆ సాయినాథుని వేడుకుంటున్నాను. నా సాటి సాయిభక్తులందరికీ పేరుపేరునా వందనాలు చెబుతున్నాను. మీరు కూడా మా బాబు గురించి బాబాను వేడుకోండి. “బాబా! మా పిల్లలు వేరే వేరే ఊళ్ళలో ఉంటున్నారు. వారికి మీరు తోడుగా ఉండండి బాబా. అందరినీ కాపాడే దైవం మీరు. ప్రతి ఒక్కరికీ మీరు అండగా ఉండండి బాబా. మావారికి ఆరోగ్యాన్ని ప్రసాదించండి బాబా!”

సాయినాథ్ మహరాజ్ కీ జై!

---

కోవిడ్ భయాన్ని తొలగించిన బాబా

సాయిభక్తురాలు శ్రీమతి శైలజ తనకు బాబా ప్రసాదించిన అనుభవాన్ని మనతో పంచుకుంటున్నారు.

అందరికీ నా నమస్కారం. ముందుగా ఈ బ్లాగ్ నిర్వహిస్తున్నవారందరికీ నా హృదయపూర్వక వందనాలు. నా పేరు శైలజ. బాబా మమ్మల్ని ఎల్లవేళలా కాపాడుతూనే ఉన్నారు, ఎన్నో అనుభవాలు ప్రసాదిస్తూనే ఉన్నారు. వాటిలోనుండి ఒక అనుభవాన్ని ఇప్పుడు మీతో పంచుకుంటాను.

2021, ఫిబ్రవరి నెలలో ఒకరోజు మావారు మీటింగ్ ఉందని బైటికి వెళ్లారు. రెండు రోజుల తరువాత తనకు తీవ్రమైన గొంతునొప్పి, ఒళ్ళునొప్పులు వచ్చాయి. ఆ లక్షణాలను బట్టి తనకు కరోనా సోకిందేమోనని అందరం చాలా భయపడ్డాము. దాంతో మావారు కరోనా టెస్ట్ చేయించుకున్నారు. మావారి వయస్సు 58 సంవత్సరాలు. పైగా తనకు థైరాయిడ్ సమస్య కూడా ఉంది. అందువల్ల టెస్ట్ రిజల్ట్ ఎలా వస్తుందోనని ఎంతో ఆందోళనపడుతూ, బాబాను ప్రార్థించి, క్వశ్చన్&ఆన్సర్స్ వెబ్‌సైట్‌లో బాబాను అడిగితే, “ఏమీ భయంలేదు, నన్నే తలచుకో, ఊదీ పెట్టు” అని బాబా సమాధానిచ్చారు. 'భయపడవద్ద'ని బాబా సమాధానమిచ్చినప్పటికీ నాకు చాలా భయంగానే ఉంది. అప్పుడు నేను బాబాకు నమస్కరించుకుని, “కోవిడ్ టెస్ట్ రిపోర్టులో మావారికి నెగిటివ్ వస్తే నా అనుభవాన్ని సాయి మహరాజ్ సన్నిధి బ్లాగులో తప్పకుండా పంచుకుంటాను, ప్లీజ్ బాబా, మమ్మల్ని రక్షించు తండ్రీ!” అని మ్రొక్కుకున్నాను. బాబా అనుగ్రహంతో మరుసటిరోజు మావారికి కోవిడ్ నెగిటివ్ అని రిపోర్టు వచ్చింది. బాబా దయవల్ల మావారు ఆరోగ్యంగా ఉన్నారు. “బాబా! మమ్మల్ని ఎల్లప్పుడూ ఇలాగే కాపాడుతూ ఉండు తండ్రీ!”

---

ప్రార్థించినంతనే ఆటంకాలు తొలగించిన బాబా

 

సాయిభక్తురాలు శ్రీమతి అరుణదేవి తనకు బాబా ప్రసాదించిన అనుభవాన్ని మనతో పంచుకుంటున్నారు.

ముందుగా సాయి మహారాజ్ సన్నిధి బ్లాగ్ నిర్వాహకులకు నా ధన్యవాదాలు. సాయి భక్తకోటికి నా నమస్కారాలు. నా పేరు అరుణదేవి. నాకు బాబా ప్రసాదించిన అనుభవాన్ని మీతో పంచుకోవడం చాలా సంతోషంగా వుంది. మేము సొంత ఇల్లు కట్టుకోవాలని అనుకున్న దగ్గరనుండి ఏదో ఒక ఆటంకం వస్తూ మా ప్రయత్నం ఆగిపోతోంది. ఎవ్వరూ మాకు సహకరించడం లేదు. మేము చాలా బాధపడ్డాము. అప్పుడు నేను బాబాకు నమస్కరించుకుని, మా బాధను విన్నవించుకుని, “బాబా! మీరే మాకు సహాయం చేయాలి. మా భారాన్ని మీ మీదనే వేస్తున్నాం. మీరే ఈ పనిని ముందుకు నడిపించాలి బాబా” అని బాబాను మనసారా వేడుకున్నాను. బాబాను ప్రార్థించిన వెంటనే టౌన్ ప్లానింగ్ పర్మిషన్, కరెంట్, ఇసుక, నీళ్ళు అన్నీ ఒక్కరోజులోనే మాకు సమకూర్చారు బాబా. అడిగిన వెంటనే మాకు ఇంత సహాయం చేసిన బాబాకు కృతజ్ఞత నిండిన మనసుతో మనసారా ధన్యవాదాలు తెలుపుకున్నాను. “మా సంతోషాన్ని మాటల్లో చెప్పలేము బాబా. మీరు మా వెంటనే ఉండి మమ్మల్ని ఇంతగా ప్రేమిస్తున్నారు. ఏ జన్మ పుణ్యమో, మేము మీ పిల్లలుగా ఉన్నాము బాబా. మీ కరుణ ఎప్పటికీ మా పైన వుండాలని కోరుకుంటున్నాము సాయీ! మాకు రావలసిన ధనం కూడా సకాలంలో మాకు అందేలా అనుగ్రహించండి బాబా. మీ దయవల్ల ఎటువంటి అప్పూ లేకుండా మా ఇల్లు పూర్తయితే మళ్ళీ నా అనుభవాన్ని ఈ బ్లాగులో పంచుకుంటాను బాబా!”

 ఓంసాయి శ్రీసాయి జయజయసాయి

సాయినాథ్ మహరాజ్ కీ జై!

---