సాయిభక్తుల అనుభవమాలిక 726వ భాగం....

---

ఈ భాగంలో అనుభవం:

• సాయి అనుగ్రహధారలు

---

హైదరాబాదు నుండి సాయిభక్తుడు N.సూర్యనారాయణమూర్తి తనకు బాబా ప్రసాదించిన అనుభవాలను మనతో పంచుకుంటున్నారు.

ఓంసాయి శ్రీసాయి జయజయసాయి

నా పేరు సూర్యనారాయణమూర్తి. మేము హైదరాబాదులోని విజయనగర్ కాలనీలో నివసిస్తున్నాము. నేను ఇంతకుముందు పంచుకున్న నా అనుభవాలు (నా అమెరికా ప్రయాణానికి బాబా సాయం) 2020, నవంబరు 10వ తేదీన ఈ బ్లాగులో ప్రచురితమయ్యాయి. ఆ లింకును ఈ క్రింద జతపరుస్తున్నాను.

https://saimaharajsannidhi.blogspot.com/2020/11/588.html

అందులో, మా అమ్మాయి సుఖప్రసవానికి బాబా చేసిన సహాయం గురించి కూడా చెప్పాను. ఇప్పుడు నేను అమెరికాలో ఉన్న 5 నెలల సమయంలో బాబా ఏవిధంగా మా ప్రక్కన నిలబడి మమ్మల్ని రక్షించి, తిరిగి 2021, మార్చి 5వ తేదీన హైదరాబాదుకు క్షేమంగా చేర్చారో మీతో పంచుకోబోతున్నాను.

మొదటి అనుభవం:

కరోనా మహమ్మారి తీవ్రంగా విజృంభించి ఉన్నవేళ బాబా మాకు ప్రసాదించిన మా రెండవ అమ్మాయి సాయిలీలకు పుట్టిన రెండవ పాపను బాబా తమ అక్కున చేర్చుకుని అణువణువునా ప్రతిక్షణం కాపాడుతున్న తీరుకి ఎన్ని జన్మలెత్తినా బాబా ఋణం తీర్చుకోలేము. మేము అక్కడ ఉన్నన్ని రోజులూ బాబా నామం చెప్పుకుంటూ ఆ పాపను పెంచాము. “బాబా! మీకు శ్రమ కలిగిస్తున్నందుకు నన్ను క్షమించండి” అని బాబాను ప్రార్థిస్తే, “నా అవతార ముఖ్యాంశము భక్తరక్షణమే” అనీ, “దిగులు వదలి ఉండమ”ని నాకు స్వప్నంలో విశ్వరూపదర్శనం ప్రసాదించారు బాబా. ఆ స్వప్నంలో అన్ని లోకాలూ బాబా దివ్యహస్తములో ఇమిడివున్నాయి.

2వ అనుభవం:

అమెరికాలో మేము అతిశీతలకాలంలో ఉన్నాము. కేవలం ఊదీ సహాయంతో అక్కడ కలిగిన అనేక బాధల నుంచి బాబా విముక్తి కల్పించారు. ఆ విపరీతమైన చలికి మేము భయపడుతున్నప్పుడల్లా సాయి మహరాజ్ సన్నిధిలో తగిన సందేశాలిచ్చి మమ్మల్ని ధైర్యవంతులను చేశారు బాబా. అట్టి బాబా సందేశాలలో ఒకటి...

3వ అనుభవం:

ఒకరోజు మా మనవరాలిని తీసుకుని పడకగదిలోకి వెళ్ళి అక్కడున్న బాబా ఫోటోకు నమస్కరించుకుని, “సాయీ! ఈరోజు పాప కొంత సమయం పాటు నిద్రపోయేలా చూడు తండ్రీ!” అని ప్రార్థిస్తే, కాలరూపుడైన సాయి నేను అడిగినంత సమయం పాపకు సుఖనిద్రను ప్రసాదించారు. అంతేకాదు, ఇప్పటికీ కరోనా తీవ్రంగా ఉన్న ఆ దేశంలో మా కుటుంబసభ్యులందరికీ చక్కటి ఆరోగ్యం ఉండేలా ఆశీర్వదించారు.

4వ అనుభవం:

ఒకరోజు నేను బాబాకు నమస్కరించుకుని, “బాబా! మమ్మల్ని అమెరికా నుండి ఇండియాకు త్వరగా పంపించే ఏర్పాటు చేయండి” అని అడిగాను. ఆ మరునాడు బాబా నుండి ఈ క్రింది సందేశం వచ్చింది.

“నీవు ఇక్కడే ఉండు. నా గురించిన విషయాలు ధ్యానించు. అక్కడ వ్యవహారములు నేను చూసుకుంటాను”. ఆ సందేశాన్ని చూసి నేను సంతోషంతో బాబాకు కృతజ్ఞతలు తెలుపుకున్నాను.

5వ అనుభవం:

ఒకరోజు మా అపార్టుమెంటులో ఫైర్ అలారం మ్రోగింది. అది మ్రోగితే అందరూ వారి వారి పాస్‌పోర్టులు మాత్రమే తీసుకుని క్రిందికి వెళ్ళిపోవాలి. ఆరోజు అక్కడి ఉష్ణోగ్రత -26 డిగ్రీల సెంటీగ్రేడ్ తో విపరీతమైన చలిగా ఉంది. చంటిపాపతో ఏం ఇబ్బందిపడాలో అనుకుని, పరిస్థితిని చక్కదిద్దమని బాబాను ప్రార్థించుకుని సాయినామం జపించటం ప్రారంభించాను. ప్రార్థించిన 10 నిమిషాలలో అంతా సద్దుమణిగేలా చేసిన దైవం మన బాబా.

6వ అనుభవం: 

నా అమెరికా పర్యటనలో నాకు రెండుసార్లు తీవ్రమైన పంటినొప్పి రాగా బాబా ఊదీ ధరించి, “సాయీ! నా పంటినొప్పి తగ్గించండి. పంటినొప్పి తగ్గగానే నా అనుభవాలలో దీనిని కూడా చేర్చి బ్లాగులో పంచుకుంటాను” అని మ్రొక్కగానే తిరిగి ఇండియా వచ్చేవరకు పంటినొప్పి రాకుండా చేసిన అపర ధన్వంతరి మన సాయి.

7వ అనుభవం:

ఈ అమెరికా పర్యటనలో ఉండగానే తనకు బాబా చేసిన సహాయం గురించి సాయినామ ప్రచారకులు కీ.శే. డి.శంకరయ్యగారి రెండవ పుత్రిక శ్రీమతి సాయీశ్వరి చెప్పిన బాబా లీలను కూడా ఇక్కడ పొందుపరుస్తున్నాను.

సాయీశ్వరి కెనడాలో గత 15 సంవత్సరాలుగా ఉంటున్నారు. అక్కడ కూడా ఆమె తన తండ్రి బాటలో నడుస్తూ, తన భర్త, కుమారుని సహాయంతో వారాంతపు సెలవులలో విరామం లేకుండా సాయినామ సంకీర్తనలు చక్కగా నిర్వర్తిస్తున్నారు. వారు కెనడాలోని వాంకోవర్ రాష్ట్రం డెల్టా ఏరియాలో ఉంటున్నారు. ఈ కరోనా సమయంలో అడుగడుగునా, పదేపదే బాబా ఆ కుటుంబసభ్యులకు తన ఆశీస్సులను ప్రసాదించి అదే ప్రాంతంలో వారు క్రొత్త ఇల్లు కొనుక్కునేలా అనుగ్రహించారు. దానికి తగిన సహాయ సహకారాలను ప్రత్యక్షముగానూ, పరోక్షముగానూ బాబా అందించారు. చివరికి, గృహప్రవేశానికి ముందు పెట్టుకున్న రిజిస్ట్రేషన్‌కు కావలసిన డబ్బులో 15,000 డాలర్లు తక్కువైతే ఎప్పుడో 10 సంవత్సరాల క్రితం వాళ్ళ అబ్బాయికి రావలసిన పాఠశాల రుసుము రిఫండ్ సరిగ్గా 15,000 డాలర్లు వారి బ్యాంకు అకౌంటుకి ట్రాన్స్‌ఫర్ అయిన లీల గురించి ఆమె కన్నీళ్ళతో నాకు ఫోనులో చెప్పి, ‘ఈ లీలను కూడా బ్లాగులో వచ్చేలా చూడండి’ అని చెప్పింది. “సద్గురువును నీవు ఏమీ కోరవద్దు. కేవలం భక్తితో ధ్యానించు, నిర్మలంగా ఉండు” అని ఆమెకు సందేశమిచ్చిన మన బాబా లీలలు అద్భుతం.

8వ అనుభవం:

చివరిగా, అమెరికా నుండి మా తిరుగు ప్రయాణానికి కావలసిన కరోనా టెస్ట్ ఏర్పాటు చేసి, నెగిటివ్ రిపోర్టు మా చేతికి వచ్చేలా అనుగ్రహించి, తన దివ్యహస్తమును మా దంపతులకు అందజేసి ఎటువంటి ఇబ్బందీ కలుగకుండా 2021, మార్చి 5వ తేదీనాటికి నేను కోరిన విధంగా కాకడ ఆరతి ప్రారంభ సమయానికి హైదరాబాదులోని మా ఇంటికి చేర్చిన సాయికి వేల లక్షల కోట్ల నమస్కారాలు తెలుపుకుంటున్నాను.

సాయిభక్తుల అనుభవాలను ప్రచురించి సాయి దివ్యకీర్తిని ప్రపంచం నాలుగు చెఱగులా చేరేలా చేస్తున్న సాయి మహారాజ్ సన్నిధి బ్లాగ్ వారికి సాయి ఆశీస్సులు సదా ఉండాలని ప్రార్థిస్తున్నాను.

---