సాయిభక్తుల అనుభవమాలిక 727వ భాగం....

---

ఈ భాగంలో అనుభవాలు:

1. బాబాను ప్రార్థిస్తే మనల్ని సమస్యల నుంచి గట్టెక్కిస్తారు
2. బాబాను ప్రార్థించినంతనే విజయవంతమైన కోడ్

---

బాబాను ప్రార్థిస్తే మనల్ని సమస్యల నుంచి గట్టెక్కిస్తారు

పేరు వెల్లడించని ఒక సాయిభక్తురాలు తనకు బాబా ప్రసాదించిన అనుభవాన్ని మనతో పంచుకుంటున్నారు.

సాయిబంధువులకు నా నమస్కారం. ఈ బ్లాగ్ ఓపెన్ చేస్తే బాబా నాకు సమాధానం చెప్తున్నట్లు నాకు ఎన్నోసార్లు అనుభూతమైంది. నేను ఇదివరకు కూడా ఈ బ్లాగులో నా అనుభవాలను కొన్నిటిని పంచుకున్నాను. ఇప్పుడు బాబా మాకు ప్రసాదించిన మరో రెండు అనుభవాలను మీతో పంచుకుంటాను. మేము విదేశాలలో ఉంటున్నాము. మావారు డాక్టరుగా పనిచేస్తున్నారు. మాకు ప్రతి సంవత్సరం సెలవులు ఇస్తారు. ఒకసారి మావారు “ఈ డిసెంబరు నుండి మనం కొద్ది రోజులు సెలవులు తీసుకోవచ్చు” అని చెప్పారు. అప్పటినుంచి నేను, “అయితే ఈ డిసెంబరు నుండి సెలవులు తీసుకోండి. ఇప్పుడున్న కరోనా పరిస్థితుల వల్ల ఎలాగూ ఇండియాకి వెళ్ళలేము. అందువల్ల ఈ సెలవులలో ఇక్కడే చక్కగా పిల్లలతో ఆనందంగా గడపవచ్చు” అని తనను చాలా బలవంతపెట్టేదాన్ని. కానీ మావారు మాత్రం డిసెంబరులో తీసుకోకుండా ఫిబ్రవరిలో సెలవులు తీసుకున్నారు. తను సెలవులు తీసుకున్న రెండవరోజే నేను క్రిందపడటం వల్ల మోకాలికి బాగా దెబ్బ తగిలింది. ఒక ఆర్థోపిడీషియన్‌కి ఫోన్ చేసి విషయం చెబితే, పూర్తిగా బెడ్ రెస్ట్ తీసుకోమన్నారు. దాంతో నేను, “ఏంటి బాబా ఇలా జరిగింది? దేశంకానిదేశంలో చిన్నపిల్లలతో ఇలాంటి సమస్యేంటి?” అని చాలా బాధపడ్డాను. అప్పుడు ఒక సాయిభక్తురాలి ద్వారా “తగ్గుతుంది” అని సమాధానమిచ్చారు బాబా. అయినప్పటికీ నొప్పి ఎక్కువగా ఉండటం వల్ల రాత్రి 11.30 గంటలకి హాస్పిటల్‌కి వెళ్ళాము. (ఇక్కడ ఏదైనా ఆరోగ్య సమస్య వస్తే ట్రీట్‌మెంట్ వెంటనే కావాలంటే ఎమర్జెన్సీకి వెళ్ళాలి. అక్కడ కోవిడ్ పేషెంట్స్ కూడా ఉంటారు.) అక్కడ నా కాలికి ఎక్స్-రే తీసి, “ఫ్రాక్చర్ ఏమీ లేదు, కానీ సాఫ్ట్ టిష్యూ ఇంజ్యూరీ ఏమైనా ఉండవచ్చు, ఒక వారంలో నొప్పి తగ్గకపోతే MRI స్కానింగ్ చేయాల్సివుంటుంది” అని చెప్పారు. దాంతో నాకు ఆందోళన మొదలైంది. “ఏంటి బాబా నాకు ఈ బాధ?” అని నేను బాబా వద్ద ఎంతో ఏడ్చాను. తరువాత ఈ బ్లాగ్ ఓపెన్ చేయగానే బాబా ఇలా సమాధానం చెప్పారు: “నీవు ధైర్యం వదలకు. ఏమీ చింతపడకు. నీవు బాగవుతావు. దయాళువైన ఫకీరు నిన్ను సంరక్షిస్తాడు. స్థిరంగా ఇంటిలో కూర్చో. నిర్భయంగా, నిశ్చింతగా ఉండు. నా మీద విశ్వాసముంచు” అని. బాబా సందేశం చూసేసరికి ఒక్కసారిగా నేను ఏడుపు ఆపేసి, “ఇది బాబా నాకే చెప్తున్నార”ని ధైర్యం కలిగింది. ఇక కాలికి కట్టుతో చిన్న చిన్న పనులు చేసుకుంటూ ఉండేదాన్ని. అయితే ఒక వారమైనా నొప్పి తగ్గకపోయేసరికి MRI తీశారు. రిపోర్టులో సమస్యేమీ లేదని వచ్చింది. నేను చాలా సంతోషించాను. “కొన్ని రోజులు మందులు వాడి, బ్యాండేజీ వేసుకుంటే సరిపోతుంది” అని చెప్పారు. నేను ప్రతిరోజూ "నా కాలినొప్పిని త్వరగా తగ్గించమ"ని బాబాను ప్రార్థించి, బాబా ఊదీని మోకాలికి రాసుకుని, కొద్దిగా ఊదీని నీళ్ళలో వేసుకుని త్రాగేదాన్ని. “నా కాలినొప్పి తగ్గిన తరువాత సాయి మహారాజ్ సన్నిధి బ్లాగులో నా అనుభవాన్ని పంచుకుంటాను” అని బాబాకు చెప్పుకున్నాను. కొద్దిరోజులకు బాబా అనుగ్రహంతో నా కాలినొప్పి పూర్తిగా తగ్గిపోయింది. బాబాకు మాట ఇచ్చినట్లే నా అనుభవాన్ని ఇప్పుడు మీతో పంచుకున్నాను. 

ఇప్పుడు చెప్తున్నాను వినండి సాయిబంధువులారా! బాబాకు జరగబోయేవన్నీ తెలుసు కాబట్టే నేను ఎంత అడిగినా మావారు డిసెంబరులో సెలవులు తీసుకోకుండా ఫిబ్రవరిలో తీసుకున్నారు. నా కాలికి దెబ్బతగిలిన సమయంలో గనక మావారు ఇంట్లో ఉండి నన్ను, పిల్లలను చూసుకోకపోతే ఈ దేశంకానిదేశంలో మేము చాలా ఇబ్బందిపడేవాళ్ళం. కాలికి దెబ్బతగిలి విశ్రాంతి తీసుకుంటున్న సమయంలో నేను ఒక వారం సచ్చరిత్ర పారాయణ కూడా చేశాను. ఇదే సమయంలో మహాపారాయణ గ్రూపు నిర్వహించేవారు నా పేరున ఒక క్రొత్త గ్రూపు కూడా ప్రారంభించారు. నేను ఎంతో సంతోషించాను. కాలికి దెబ్బతగిలి నేను బాధపడుతుంటే బాబానే “నీకు నేనున్నాను” అని నా పేరు మీద మహాపారాయణ క్లాస్ ప్రారంభించేలా చేశారని అనుకున్నాను. ఇదే సమయంలో నాకు సాయిభక్తురాలి ద్వారా ‘తగ్గుతుంది’ అని సమాధానం వచ్చినప్పుడు కూడా సాయిబాబా ఆన్సర్స్ ఓపెన్ చేస్తే, ‘స్త్రీ సలహా పాటించు’ అని బాబా చెప్పారు. నాకు అప్పుడు అర్థమైంది, ఆమె ద్వారా బాబానే నాతో మాట్లాడారు అని. ఈ విధంగా బాబా ఎంతో దయచూపించి నాకు చాలా సహాయం చేసి నా సమస్యని గట్టెక్కించారు. “బాబా! నీ ప్రణాళికకి, నీ దయకి నా శతకోటి వందనాలు. సదా నీ స్మరణ చేస్తూ, నీయందు భక్తి ప్రేమలతో ఉండేలా నన్ను, నా కుటుంబాన్ని ఆశీర్వదించు బాబా!”

మరో అనుభవం:

ఒకసారి మా పాప తన గోరుతో మా బాబు కంటిలో గుచ్చింది. దాంతో మా బాబుకి కన్ను తెరవడానికి కూడా వీలుకాలేదు. ఎంతో ఏడుస్తూ ఆ రాత్రి బాబును తీసుకుని డాక్టర్ వద్దకు వెళితే, ‘కన్ను బాగా గీసుకుపోయింది’ అని చెప్పి కొన్ని మందులు ఇచ్చి వాడమని చెప్పారు. ఆ రాత్రంతా నొప్పితో మా బాబు ఏడుస్తూనే పడుకున్నాడు. మరుసటిరోజు ఉదయం “కన్ను అసలు తెరవలేకపోతున్నాను” అంటూ బాబు బాగా ఏడ్చాడు. నాకు చాలా బాధేసింది. అప్పుడు ఒక సాయిభక్తురాలు చెప్పడం వల్ల వెంటనే బాబాకు ముడుపుకట్టి మ్రొక్కుకున్నాను. బాబా ముందు కూర్చుని ఏడుస్తూ, “బాబా! మా బాబు కంటిసమస్యని తగ్గించండి. వాడి చూపుకి ఏమీ కాకుండా ఉండేలా అనుగ్రహించండి” అని బాబాను ఎంతో ప్రాధేయపడ్డాను. ఆ తరువాత ఇంకో డాక్టర్ వద్దకు బాబుని తీసుకువెళితే, “నయం కావటానికి కొంత సమయం పడుతుంది” అని చెప్పారు. కొన్ని రోజులకి బాబా దయవల్ల మా బాబు కంటిసమస్య నయమైంది. మనం బాబాను ప్రార్థిస్తే ఆయన ఏదో ఒకరకంగా సమాధానమిచ్చి మనల్ని సమస్య నుంచి గట్టెక్కిస్తారు. “మీకు చాలా ధన్యవాదాలు బాబా!”

---

బాబాను ప్రార్థించినంతనే విజయవంతమైన కోడ్

పేరు వెల్లడించని ఒక సాయిభక్తుడు తనకు ఇటీవల బాబా ప్రసాదించిన ఒక అనుభవాన్ని మనతో పంచుకుంటున్నారు.

ప్రియమైన సాయిభక్తులందరికీ అనేక ప్రణామాలు. బాబా లీలలను ప్రచురిస్తూ అద్భుతమైన సాయిసేవను చేస్తున్న ఈ బ్లాగ్ నిర్వాహకులకు నా ప్రత్యేక ధన్యవాదాలు. ఈ అనుభవాలన్నిటినీ ఆధునిక సాయిసచ్చరిత్రగా పేర్కొనవచ్చు. ఇక నా అనుభవానికి వస్తే...

నేను సాఫ్ట్‌వేర్ డెవలపర్‌గా పనిచేస్తున్నాను. నేను ఇటీవల ఒక కోడ్‌ను విజయవంతం చేసే ప్రయత్నంలో ఎంతో కష్టపడ్డాను. కానీ, రోజులు గడుస్తున్నా ఆ కోడ్‌ను విజయవంతం చేయడం నాకు సాధ్యం కాలేదు. చివరికి నేను హృదయపూర్వకంగా బాబాను ప్రార్థించి, "ఆ కోడ్ విజయవంతమయ్యేలా సహాయం చేయమ"ని అర్థించాను. కోడ్ విజయవంతమైతే నా అనుభవాన్ని ఈ బ్లాగులో పంచుకుంటానని బాబాతో చెప్పుకున్నాను. బాబాను ప్రార్థించినంతనే ఆ కోడ్ విజయవంతమైంది. నిజంగా ఇది అద్భుతం. "థాంక్యూ, థాంక్యూ సో మచ్ బాబా". బాబాపై విశ్వాసం ఉంచండి, శ్రద్ధ-సబూరిలను అలవర్చుకోండి. బాబా సర్వవ్యాపి. ఆయన అనుగ్రహం మనపై సదా వర్షిస్తూ ఉంటుంది. మనం దేనికీ చింతించాల్సిన, భయపడాల్సిన పనిలేదు.

సాయినాథ్ మహరాజ్ కీ జై!

---