సాయిభక్తుల అనుభవమాలిక 2125వ భాగం....

---

ఈ భాగంలో అనుభవాలు:

1. ఎప్పుడూ తోడుగా ఉండి రక్షణనిచ్చే బాబా

2. బాబా దయ

---

ఎప్పుడూ తోడుగా ఉండి రక్షణనిచ్చే బాబా 

ఓంసాయి శ్రీసాయి జయజయసాయి. నా పేరు మణిదీపిక. బాబా నా వెంటే ఉన్నారని చెప్పే చాలా సంఘటనలు నా జీవితంలో జరుగుతూ ఉన్నాయి. నా జీవితంలోనే అతి పెద్ద బాబా ఆశీర్వాదం ఏంటి అంటే, నేను మొదటిసారి సహజంగా గర్భవతినవ్వడం. నాకు పెళ్ళై 4 సంవత్సరాలవుతున్నా నేను గర్భవతిని కాలేదు. నేను ఎన్నోసార్లు బాబాని "నేను గర్భవతినవ్వాల"ని ప్రార్థించాను. అయితే అప్పుడప్పుడు నాకు నెలసరి సక్రమంగా రాని సమస్య ఉంది. అందువల్ల నాకు మొదటినుంచి కాస్త ఎక్కువగానే భయం ఉండేది. కానీ ఎక్కడో ఒక చిన్న నమ్మకం కూడా ఉండేది - 'బాబా ఎలాంటి కష్టం రాకుండా చూసుకుంటారు' అని. ఇలా ఉండగా ఇంట్లోవాళ్ళు, "4 సంవత్సరాలు అవుతుంది కదా! ఇక హాస్పిటల్స్‌కి వెళ్లి చెకప్ చేయించుకోండి" అని చెప్పడం మొదలుపెట్టారు. ఇంకా మేము కూడా ఆ బాబాకి నమస్కారం చేసుకుని, ఇక చెకప్‌కి వెళ్దామని అనుకున్న సమయంలో హఠాత్తుగా మా జీవితంలో పెద్ద మిరాకిల్ జరిగింది. నేను గర్భవతినని నిర్ధారణ అయింది. దానికి మేము ఎప్పుడూ ఆ బాబాకి కృతజ్ఞులుగా ఉంటాము.

నాకు ఇర్రెగ్యులర్ పీరియడ్స్ సమస్య ఉందని చెప్పాను కదా! దానికి సంబంధించి నేను నా భర్తతో కలిసి ఎండోక్రైనాలజిస్ట్ దగ్గరకి క్రమం తప్పకుండ వెళ్తుంటాను. నేను గర్భవతినని నిర్ధారణ అయ్యాక కూడా ఆ డాక్టర్ అప్పోయింట్మెంట్ ఉండటంతో గైనకాలజిస్ట్ దగ్గరకి వెళ్ళడానికన్నా ముందు ఎండోక్రైనాలజిస్ట్ డాక్టర్ దగ్గరకి వెళ్ళాము. చెప్పాలంటే, అది రొటీన్ చెకప్పే. కానీ ఆరోజు ఆ డాక్టర్ హఠాత్తుగా నా మెడ చూసి, థైరాయిడ్ గ్లాండ్ ఉండే చోట టచ్ చేసి, "కొంచెం వాపు ఉంది" అని చెప్పి, "అక్కడ వాపు ఒక్కోసారి థైరాయిడ్ గ్లాండ్ దగ్గర నాడ్యూల్స్(తిత్తి) లాంటివి ఉంటే అలా కనిపిస్తుంది. ఒక్కోసారి అవి క్యాన్సర్‌ అయ్యే అవకాశం కూడా ఉంది. అయినా అసలు అది నాడ్యూల్స్‌ అవునా, కాదా అని నిర్ధారించడానికి అల్ట్రాసౌండ్ చేయాలి" అని చెప్పింది. మేము ఆమె దగ్గరకి దాదాపు 3 సంవత్సరాల నుంచి వెళ్తున్నాము. కానీ ఆరోజు వరకు తను అలా ఎన్నడూ చెప్పలేదు. అలాంటిది మేము అస్సలు ఊహించని వార్త తను చెప్పేసరికి నాకు చాలా ఏడుపొచ్చింది. దానివల్ల నా ప్రగ్నెన్సీకి, కడుపులో బిడ్డకి ఏమైనా సమస్య ఉంటుందా అని భయపడ్డాను. ఇంటికి వచ్చిన తర్వాత బాబా దగ్గర, "ఎందుకు నాకే ఇలా అవుతుంది?" అని చాలాసేపు ఏడ్చాను. మా అమ్మకి కాల్ చేసి కూడా ఏడ్చాను. ఆ తర్వాత ఒకరోజు మా అమ్మ ఈ 'సాయి మహారాజ్ సన్నిధి' బ్లాగు చదువుతుంటే, ఒక లీల కనిపించిందట. అక్కడ ఒక భక్తురాలు డాక్టర్ చెకప్‌కి వెళ్తే, తన బ్రెస్ట్‌లో తిత్తి(నాడ్యూల్)లా ఉందని, అది క్యాన్సర్ కారకమయ్యే అవకాశం ఉంది కాబట్టి, బయాప్సీ చేయాలని అన్నారని, తను ఇంటికి వచ్చి బాబా దగ్గర ఏడ్చి, బాబా చరిత్ర సప్తాహం చేస్తానని సంకల్పించుకుని చదవడం మొదలుపెట్టారని, సప్తాహం పూర్తయ్యేలోపు బయాప్సీ రిపోర్ట్ నార్మల్ వచ్చిందని పంచుకున్నారట. మా అమ్మ ఆ లీల చదివి, నాకు షేర్ చేసి, "బాబా చరిత్ర పారాయణ మొదలుపెట్టి బాబా మీద నమ్మకముంచు. అంతా సెట్ అయిపోతుంది" అని చెప్పింది. నేను వెంటనే బాబాకి దణ్ణం పెట్టుకుని బాబా చరిత్ర పారాయణ మొదలుపెట్టాను. నేను సగం పారాయణ చేసేసరికి నా థైరాయిడ్ అల్ట్రాసౌండ్ రిపోర్ట్ 'అంతా నార్మల్‌గా ఉందని, ఎలాంటి నాడ్యూల్స్ లేవని' వచ్చింది. అప్పుడు నేను పొందిన సంతోషాన్ని మాటల్లో చెప్పలేను. ఆ బాబా నాతో ఎప్పుడూ ఉన్నానని, నన్ను రక్షిస్తున్నానని ఈ అనుభవం ద్వారా మరోసారి తెలియజేసారు.

ఒకరోజు హఠాత్తుగా నా ఎడమకాలు వెనకవైపు నరం లాగుతున్నట్లుగా నొప్పి  మొదలైంది. నేను అది మామూలుగా ప్రెగ్నెన్సీ సమయంలో వచ్చే నొప్పి ఏమో అనుకున్నాను. కానీ 2 వారాలు అయినా కూడా ఆ నొప్పి తగ్గలేదు. డాక్టర్ దగ్గరకి వెళ్తే, తను నా ఎడమకాలు పట్టుకుని చెక్ చేసి, 'ఏదైనా బ్లడ్ క్లాట్ ఉందేమో చూద్దామని' ఆమె కూడా లెగ్ అల్ట్రాసౌండ్ టెస్ట్ వ్రాసి, "ఒకవేళ బ్లడ్ క్లాట్ అవ్వడం వల్ల నొప్పి వస్తుంటే, బ్లడ్ థిన్నర్ ఇంజెక్షన్స్ ఇవ్వాలి" అని చెప్పింది. అది వినగానే నేను షాకై, "ఏంటి బాబా, నాకు ఈ పరీక్షలు?" అని అనుకొని ఆయన మీద భారమేసి అల్ట్రాసౌండ్‌కి వెళ్లాను. రిపోర్ట్‌లో బ్లడ్ క్లాట్ ఏమీ లేదని వచ్చింది. అంతా బాబా దయ.  బాబాని నమ్ముకుంటే ఎన్ని సమస్యలున్నా వాటినన్నింటినీ చిటికెలో తీసేస్తారు. ఇదంతా చూస్తుంటే, నా ఈ ప్రెగ్నెన్సీ కాలంలో బాబా నన్ను, నా బిడ్డని ఎన్ని సమస్యల నుంచి కాపాడుతున్నారో అనిపించి బాబాకి ఎంతో కృతజ్ఞతగా ఉన్నాను. నాలాంటి పరిస్థితుల్లో ఉన్న వారికి నా ఈ అనుభవం బాబాపట్ల నమ్మకాన్ని కలిగిస్తుందని అనుకుంటున్నాను.

ఓంసాయి శ్రీసాయి జయజయసాయి.

---

బాబా దయ

సాయిభక్తులందరికీ నా నమస్కారాలు. నా పేరు వెంకటేష్. బాబా నాకు ప్రసాదించిన రెండు చిన్న అనుభవాలు పంచుకుంటున్నాను. నా మలద్వారం పక్కన ఒక గడ్డలా వచ్చి 10 రోజులైనా తగ్గలేదు. దాంతో ఏంటిది తగ్గలేదని నాకు భయమేసింది. ఇలాగే మా అబ్బాయికి కూడా వచ్చి తగ్గకపోతే ఆపరేషన్ చేసారు. 1,50,000 రూపాయలు ఖర్చు అయింది. ఇదే సమస్య నా సహోద్యోగికి కూడా వస్తే, సర్జరీ చేసారు. అందువల్ల నేను భయంతో విషయం ఆర్ఎమ్‌పి డాక్టర్ అయిన మా తమ్ముడికి చెప్తే, "అన్నా! పెద్ద ఫిస్టుల్లా వుంది" అని చెప్పి మందులిచ్చి, "తగ్గకపోతే డాక్టరుకి చూపిద్దాం" అన్నాడు. అప్పుడు నేను బాబాని వేడుకుంటే, ఆయన దయవల్ల మందులతో ఆ గడ్డ తగ్గిపోయింది.

ఒకరోజు నా ఫోన్ క్రిందపడి డిస్‌ప్లే, టచ్ పనిచేయలేదు. రిపేర్ చేయిస్తే, కేవలం 5 రోజులకే మళ్ళీ టచ్ పనిచేయలేదు. అప్పుడు నేను, "బాబా! మొన్ననే ఫోన్ రిపేర్ చేయించాను. మరల ఇదేంటి బాబా? మీ దయవలన డబ్బులు ఖర్చు కాకుండా ఫోన్ రిపేర్ అవ్వాలి తండ్రి" అని బాబాకి చెప్పుకున్నాను. బాబా దయవలన డబ్బులు ఖర్చు అవ్వకుండా ఫోన్ రిపేర్ అయింది. "ధన్యవాదాలు బాబా".

---