సాయిభక్తుల అనుభవమాలిక 514వ భాగం....

---

ఈ భాగంలో అనుభవాలు:

1. బాబా అనుగ్రహంతో తీరిన చింతలు
2. సాయిపూజకు చిగురించిన తమలపాకుల తీగ 

---

బాబా అనుగ్రహంతో తీరిన చింతలు

నా పేరు అంజలి. ఇటీవల బాబా నాకు ప్రసాదించిన అనుభవాన్ని మీతో పంచుకుంటాను. 2020, జూలై 23వ తారీఖున ఆఫీసులో ఒక క్రొత్త వర్క్ పూర్తయింది. ఆరోజు ఆఫీసుకి మా ఆఫీసర్లందరూ వచ్చారు. తరువాతిరోజు ఉదయం మా ఆఫీసులో పనిచేసే ఉద్యోగి నాకు ఫోన్ చేసి, “నాకు డెట్టాల్ వాసన రావటం లేదు, కోవిడ్ పరీక్ష చేయించుకుంటాను” అని చెప్పాడు. అంతకుముందు రోజు ఆఫీసులో అందరం ఒకేచోట కలిసి పనిచేశాము. ఉన్నతాధికారులు కూడా ఉన్నారు. దాంతో నాకు చాలా ఆందోళనగా అనిపించి, “బాబా! అతనికి కోవిడ్ నెగిటివ్ వచ్చేలా చేయండి, లేదంటే అతని వలన అందరం ఎఫెక్ట్ అవుతాము” అని బాబాను కోరుకున్నాను. మన బాబా లీల చూపించారు. అతను కోవిడ్ పరీక్ష చేయించుకోగా రిపోర్టు నెగిటివ్ వచ్చింది. అంతా బాబా దయ. ఆయన తలుచుకుంటే కానిది ఏముంది? అందరం హాయిగా ఊపిరి పీల్చుకున్నాం. నా ప్రార్థన మన్నించినందుకు బాబాకు మనస్ఫూర్తిగా కృతజ్ఞతలు తెలుపుకున్నాను.

మరో అనుభవం: 

నేను ప్రతి నెలా మొదటి తారీఖున ఆఫీస్ లాప్ టాప్ లో రీడింగ్స్ తీయాలి. అలాగే ఈసారి కూడా రీడింగ్ తీస్తుంటే ఒకచోట మధ్యలో ఆగిపోతోంది. ఎంత ప్రయత్నించినా రీడింగ్ రావటం లేదు. దాంతో నేను బాబాను వేడుకున్నాను, ‘ఎలాగయినా ఈ రీడింగ్ వచ్చేలా చూడు బాబా’ అని. అప్పటివరకు రాని రీడింగ్స్ నేను బాబాను కోరుకున్న వెంటనే వచ్చాయి. అంతా బాబా అనుగ్రహమే. సంతోషంగా బాబాకు ధన్యవాదాలు తెలుపుకున్నాను.

మరో అనుభవం: 

ఈ సంవత్సరం శ్రావణ శుక్రవారం నాడు వరలక్ష్మీవ్రతం చేసుకున్నాను. బాబా దయవలన వ్రతం బాగా జరిగింది. ప్రతి సంవత్సరం బంగారపు లక్ష్మీరూపుని పూజలో పెట్టుకొని, పూజ పూర్తయిన తరువాత మెడలో వేసుకుంటాను. ఈసారి కూడా అలాగే వేసుకున్నాను. మరుసటిరోజు ఆఫీసుకి వెళ్ళేటప్పుడు ఆ లక్ష్మీరూపు మెడలోనే వుంది. సాయంత్రం ఆఫీసునుండి వచ్చి స్నానం చేసి కూర్చొని మెడలో చూసుకుంటే లక్ష్మీరూపు కనపడలేదు. చాలా బాధపడ్డాను. ఎంత వెతికినా ఎక్కడా కనపడలేదు. ‘నా పూజలో ఏం లోపం జరిగిందో ఇలా అయింది’ అని అనుకున్నాను. బాబాకు చెప్పుకుని బాధపడ్డాను. బాబా తన భక్తుల బాధ చూడలేరు కదా. బాబాకు చెప్పుకున్న తరువాత నేను హాల్లోకి వెళ్లి కుర్చీలో కూర్చోబోతుంటే అదే కుర్చీలో లక్ష్మీరూపు కనపడింది. అంతా బాబా దయ. ఆయన దయ మా కుటుంబం మీద, ఇంకా అందరి మీదా ఇలాగే ఎల్లప్పుడూ వుండాలని కోరుకుంటున్నాను. “లవ్ యు సో మచ్ బాబా! మీరు ఎల్లప్పుడూ మాతో ఉండండి” 

ఈ అనుభవాలన్నింటినీ ఈ బ్లాగులో పంచుకుంటానని బాబాతో చెప్పాను. “కాస్త ఆలస్యంగా ఈ అనుభవాలను పంచుకుంటున్నందుకు నన్ను క్షమించండి బాబా!” మరలా మరికొన్ని అనుభవాలతో త్వరలోనే మీ ముందుకు రావాలని కోరుకుంటున్నాను. 

ధన్యవాదాలు బాబా...

ప్రేమతో మీ భక్తురాలు.

---

సాయిపూజకు చిగురించిన తమలపాకుల తీగ 

సాయిభక్తురాలు శ్రీమతి విజయ ఇటీవల తనకు కలిగిన అనుభవాన్ని మనతో పంచుకుంటున్నారు.

ముందుగా బాబా మాకు ప్రసాదించిన అనుభవాలను, తద్వారా మేము పొందిన ఆనందాన్ని తోటి సాయిభక్తులతో పంచుకునే అవకాశం కల్పిస్తున్న 'సాయి మహారాజ్ సన్నిధి' బ్లాగ్ నిర్వాహకులకు నా కృతజ్ఞతలు.

నేను చాలా వారాలుగా నవగురువార వ్రతం చేస్తున్నాను. ప్రతి గురువారం వ్రతం చేసి బాబాకు పాలకోవాతోపాటు కేసరి లేదా ఇంకేదైనా స్వీట్ నైవేద్యంగా పెడుతున్నాను. వాటితోపాటు బాబాకు తాంబూలం కూడా సమర్పిస్తున్నాను. ఇదివరకు మేము బెంగళూరులో ఉన్నప్పుడు బయట షాపులో తమలపాకులు కొని బాబాకు తాంబూలం సమర్పించేదాన్ని. అలా బయట తీసుకొస్తున్న ప్రతిసారీ, 'ప్రొద్దుటూరులో అత్తవారింట ఉంటే ఎంత బాగుండేది! ఇంటిలోనే తమలపాదు ఉంది కాబట్టి ఎంచక్కా తాజా తమలపాకులు బాబాకు సమర్పించుకొనేదాన్ని కదా!' అని అనుకుంటూ ఉండేదాన్ని. అయితే కోవిడ్ కారణంగా ఎటూ వెళ్లలేక 11 వారాల పూజ బెంగళూరులోనే చేశాను. తరువాత ప్రొద్దుటూరుకి వచ్చేశాము. కానీ ఇక్కడికి వచ్చాక చూస్తే, తమలపాదు తెగులు పట్టి పూర్తిగా ఎండిపోయి కనిపించింది. దాంతో నేను, "తాజా తమలపాకులతో మనసారా మీకు తాంబూలం సమర్పించుకుందామంటే ఇలా అయ్యిందేమిటి బాబా" అని చాలా బాధపడ్డాను. భక్తులు ప్రేమతో ఏదైనా చేయాలనుకుంటే బాబా తప్పక అనుగ్రహిస్తారని మనకు తెలిసిందే కదా! ఆయన అద్భుతం చూపించారు. శనివారంనాడు పూర్తిగా ఎండిపోయి కనిపించిన తమలపాకుల తీగ మరుసటి గురువారానికి, అంటే సరిగ్గా 5 రోజుల్లోనే తీగనిండా ఆకులతో దర్శనమిచ్చింది. నా సంతోషానికి అవధులు లేవు. తాజా తమలపాకులతో ప్రేమగా బాబాకు తాంబూలం సమర్పించి చాలా ఆనందించాను. తీసివేయాలనుకున్న తమలపాకుల తీగ మళ్లీ బాబా కోసమే చిగురించిందని నా విశ్వాసం. "బాబా! మీకు చాలా చాలా ధన్యవాదాలు".

---