సాయిభక్తుల అనుభవమాలిక 497వ భాగం....

---

ఈ భాగంలో అనుభవాలు:

1. అతి భయానక ప్రమాదం నుండి కాపాడిన బాబా
2. బాబా ఊదీ అద్భుతంగా పనిచేస్తుంది

---

అతి భయానక ప్రమాదం నుండి కాపాడిన బాబా

నా పేరు చంద్రశేఖర్. ముందుగా బాబాకు, బాబా ప్రియభక్తులందరికీ నా నమస్కారాలు. కొన్ని సంవత్సరాలుగా మా కుటుంబసభ్యులందరం బాబా భక్తులం. 2020, జూలైలో నేను మా బంధువు సహకారంతో సాయి మహారాజ్ సన్నిధి బ్లాగుకి సంబంధించిన ‘సద్గురు సాయి’ వాట్సప్ గ్రూపులో భాగస్వామినయ్యాను. ఆ గ్రూపులో చేరిన దగ్గరనుండి ప్రతిరోజూ గ్రూపు అడ్మిన్ పోస్ట్ చేసే సాయి వచనాలు మరియు భక్తుల అనుభవాలను శ్రద్ధాభక్తులతో చదువుతున్నాను. అలాగే నేను కూడా బాబా ప్రసాదించిన ఒక అనుభవాన్ని బాబా భక్తులందరితో తొలిసారిగా పంచుకోవాలనుకుంటున్నాను.

2020, జూన్ 23న ఆరేళ్ళ మా మేనకోడలి పుట్టినరోజు సందర్భంగా మా చెల్లి, బావ వాళ్ల పిల్లలతో మా ఇంటికి వచ్చారు. ఆరోజు మా కుటుంబసభ్యులందరం కలిసి మా మేనకోడలి పుట్టినరోజు వేడుక జరుపుకుని ఎంతో సంతోషించాము. ఆ మరుసటిరోజు జూన్ 24(బుధవారం)న మా అమ్మ వంట చేస్తున్న సమయంలో ప్రమాదవశాత్తూ గ్యాస్ స్టవ్ దగ్గర పైప్ కట్ అవటం వల్ల గ్యాస్ బయటకు వచ్చి పెద్ద శబ్దంతో మంటలు చెలరేగాయి. అప్పటివరకు మా అమ్మ చుట్టూ తిరిగి ఆడుకుంటున్న పాపను అంతకుముందే నేను ప్రక్కకు తీసుకుని వెళ్ళాను. మేమిద్దరం ప్రక్కకు వెళ్ళగానే పెద్ద శబ్దంతో మంటలు చెలరేగాయి. మా అమ్మ వెంటనే బాబాను తలచుకుని ఆ మంటలలో నుండే వెళ్ళి సిలెండర్‌కి ఉన్న రెగ్యులేటర్ ఆపేసింది. దాంతో మంటలు ఆరిపోయాయి, కానీ మా అమ్మ చీర కాలిపోయి తనకు చిన్న చిన్న గాయాలయ్యాయి. అవి అతి స్వల్పమైన గాయలు మాత్రమే, కానీ జరిగిన సంఘటన మాత్రం అతి భయంకరమైనది. ఆ శబ్దానికి వీధిలో ఉన్నవారందరూ మా ఇంటికి వచ్చి ‘ఏం జరిగింద’ని అడిగారు. అంత పెద్ద ప్రమాదం జరిగినప్పటికీ మా అమ్మ అంత స్వల్పగాయాలతో బయటపడటం అందరినీ ఆశ్చర్యచకితుల్ని చేసింది. కేవలం ఆ బాబా చల్లని చూపువల్లే ఆ ప్రమాదం తప్పిందని మాకు తెలుసు. నిరంతరం మా అమ్మ చేసే సాయి నామస్మరణ వల్ల తను ఆ ప్రమాదం నుండి బయటపడింది. మా కుటుంబసభ్యులందరికీ ఆరోజు అంతటి భయంకరమైన అనుభవం ఎదురైనా బాబా దయవల్ల అంతా చక్కబడింది. బాబా ఇలాగే ఎప్పుడూ మాకు తోడుగా ఉండి మా కష్టసుఖాల్లో తోడునీడగా ఉండాలని మా కుటుంబమంతా ఆశిస్తోంది. "ధన్యవాదాలు బాబా".

  

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

---

బాబా ఊదీ అద్భుతంగా పనిచేస్తుంది

సాయిబంధువులందరికీ నమస్కారం. నేను ఒక సాయిభక్తురాలిని. 2020, జూలైలో మా పాపకు బాగా జ్వరం వచ్చింది. జ్వరం తగ్గటానికి టాబ్లెట్ వేసి, పాపకు జ్వరం తగ్గించమని బాబాను ప్రార్థించి, బాబా ఊదీ నీళ్ళల్లో కలిపి తనచేత త్రాగించాను. ఊదీ మహిమతో రెండు రోజుల తర్వాత జ్వరం పూర్తిగా తగ్గిపోయింది. మా కుటుంబంలో ఎవరికి ఏ నొప్పి ఉన్నా, అలసట ఉన్నా బాబా ఊదీని నీళ్లలో కలిపి త్రాగుతాము. ఊదీ చాలా అద్భుతంగా పనిచేస్తుంది. మా పాప రోజూ బాబా ఊదీని తింటూ ఉంటుంది. బాబా మాకు ఎన్నోసార్లు చాలా సహాయం చేశారు. బాబా ఆశీస్సులు మా మీద ఎల్లప్పుడూ ఉండాలని, బాబా ఎప్పుడూ మాతో ఉండాలని శిరస్సు వంచి ప్రణామాలు అర్పిస్తూ బాబాను వేడుకుంటున్నాను. 

ఓం శ్రీ సాయినాథాయ నమః 

ఓం శ్రీ సాయి ఆరోగ్య క్షేమదాయ నమః. 

ఓంసాయి శ్రీసాయి జయజయ సాయి.

---