ఈ భాగంలో అనుభవాలు:
- మా కుటుంబంపై బాబా అనుగ్రహం
- బాబా పాదతీర్థంతో త్వరగా కోలుకున్న భక్తురాలు
- బాబా దయ
మా కుటుంబంపై బాబా అనుగ్రహం
నా పేరు లక్ష్మి. నేను బెంగుళూరు నివాసిని. 2011లో మా చిన్నబ్బాయికి మెడమీద కణితి వచ్చింది. డాక్టర్లు ఆపరేషన్ చేసి ఆ కణితిని తొలగించి దాన్ని బయాప్సీ చేశారు. మరో రెండు రోజుల్లో రిపోర్ట్ వస్తుందని చెప్పారు. ఆ సమయంలో నేను తప్పనిసరిగా ఒక ఫంక్షనుకి హాజరవ్వాల్సి వచ్చి హైదరాబాదుకు వెళ్ళాను. మనసు బాగాలేక బాబాను స్మరించుకుంటూనే ఫంక్షన్ హాలుకు వెళుతూ ఉంటే, ముందు వెళ్ళే వాహనాల మీద సాయిబాబా ఫోటోలు కనిపించసాగాయి. బాబా నాకు తోడున్నారని నా మనస్సుకు అనిపించి, బాబాపై నమ్మకంతో రిపోర్ట్ కోసం ఎదురుచూస్తూ ఫంక్షనుకు హాజరై తిరిగి బెంగుళూరు చేరుకున్నాను. ఆ మర్నాడు, అంతా నార్మల్‌గా ఉందని, థైరాయిడ్ సమస్య కొంచెం ఉందని రిపోర్టు వచ్చింది. అది చూసి నా మనసుకు చాలా ప్రశాంతంగా అనిపించింది. ఎంతో సంతోషంతో బాబాకు ధన్యవాదాలు చెప్పుకున్నాను.
మా చిన్నబ్బాయి తన కుటుంబంతో 2020, జూలై 26వ తేదీన తన వదినగారి కూతురి పెళ్ళికి హైదరాబాదు వెళ్ళాడు. కరోనా సమయం కదా, నాకు చాలా ఆందోళనగా అనిపించి, వాళ్ళు పెళ్ళికి వెళ్ళి వచ్చేవరకు నేను సాయి నామాన్నే స్మరిస్తూ గడిపాను. బాబా దయవలన వాళ్ళు ఏ ఇబ్బందీ లేకుండా తిరిగి ఇంటికి చేరుకున్నారు. ఒక వారం రోజులపాటు క్వారంటైన్లో ఉన్నారు. బాబా అనుగ్రహంతో ఇప్పుడు అంతా క్షేమంగా ఉన్నారు. ఈ కరోనా మహమ్మారి నుండి అందరినీ బాబా కాపాడాలని కోరుకుంటున్నాను.
బాబా పాదతీర్థంతో త్వరగా కోలుకున్న భక్తురాలు
నా పేరు శ్రీకాంత్. భద్రాద్రి కొత్తగూడెం జిల్లాలోని అశ్వారావుపేటలో ఉండే సాయిబంధువులు చీమకుర్తి సత్యనారాయణ, శ్రీమతి తులసీ అన్నపూర్ణ దంపతుల కుమార్తె రోజాకు యాక్సిడెంట్ అయినప్పుడు బాబా అద్భుతమైన అనుభవాన్ని ప్రసాదించారు. 2008లో 10వ తరగతి పరీక్షలు వ్రాసిన తరువాత జూన్ నెలలో రోజాకు యాక్సిడెంట్ అయింది. యాక్సిడెంట్ కారణంగా తను మంచం మీద ఉన్నప్పుడు ఆ కుటుంబానికి పరిచయస్థుడైన తులసీరాం అనే అబ్బాయి ప్రతిరోజూ ఉదయం 6 గంటలకు బాబా మందిరానికి వెళ్ళి, బాబాకు అభిషేకం చేసి, బాబా పాదతీర్థం తీసుకొచ్చి వాళ్ళకు ఇచ్చేవాడు. అలా 41 రోజుల పాటు బాబా పాదతీర్థాన్ని ఇచ్చాడు. అలా తులసీరాం తెచ్చిన బాబా పాదతీర్థాన్ని ప్రతిరోజూ త్రాగటం వలన బాబా అనుగ్రహంతో రోజా చాలా త్వరగా కోలుకుంది. రోజా అంత త్వరగా కోలుకోవడం చూసిన డాక్టర్లు తమ కళ్ళను తామే నమ్మలేకపోయారు. “41 రోజుల పాటు బాబా మందిరం నుండి పాదతీర్థం తెచ్చి ఇచ్చేలా తులసీరాంను బాబానే ప్రేరేపించటం, బాబా పాదతీర్థాన్ని సేవించి రోజా అంత త్వరగా కోలుకోవటం ఎప్పుడు తలచుకున్నా చాలా అద్భుతంగా ఉంటుంది. మా కుటుంబసభ్యులమంతా బాబాకు, తులసీరాంకు చాలా చాలా ఋణపడివుంటామ”ని సత్యనారాయణగారు ఎంతో ఉద్వేగంగా చెబుతుంటారు. అదేకాకుండా, రోజా కోలుకున్నాక బాబా అనుగ్రహంతో మంచి IIIT కాలేజీలో ఫ్రీ సీటు వచ్చింది. ఇలా వారి కుటుంబానికి బాబా చాలా అనుభవాలను ప్రసాదించారు.
బాబా దయ
సాయిబాబాకు నా వందనాలు. నా పేరు అరుణ. మేము విజయవాడలో నివాసముంటున్నాము. బాబా దయవల్ల మాకొక అద్భుతం జరిగింది. 2020లో మా పక్క ఫ్లాట్‌లో ఉండేవాళ్ళకి కరోనా పాజిటివ్ వచ్చింది. దాంతో మాకు చాలా భయమేసింది. దానికి తోడు నాకు తీవ్రమైన తలనొప్పి, రుచి తెలియకపోవడం, విపరీతమైన కాళ్ళనొప్పులు వచ్చాయి. నాకు చాలా ఆందోళనగా అనిపించి బాబాను తలచుకొని, "నాకు ఏమీ ఉండకూడదు బాబా" అని ప్రార్థించాను. బాబా దయవల్ల మరుసటిరోజుకి నాకు ఏమీ లేవు. అంతా బాబా దయ.
