1. బాబా దగ్గరకొస్తే మన మూడ్స్కి మూడుతుంది2. IELTS పరీక్షలో స్కోర్ చాలా తక్కువ వచ్చినా యూకేలో అడ్మిషన్ ఇప్పించిన బాబా
బాబా దగ్గరకొస్తే మన మూడ్స్కి మూడుతుంది
శ్రీసాయినాథాయ నమః!!! నా పేరు నీలవేణి. మాది విశాఖపట్టణం. నాకు 20 సంవత్సరాల వయసున్న అమ్మాయి ఉంది. తను డిగ్రీ రెండవ సంవత్సరం చదువుతున్నప్పుడు(2022 చివరిలో) తన స్నేహితుల చేతుల్లో డబ్బుల విషయంగా మోసపోయి వాళ్లతో గొడవపడింది. అప్పటినుండి తను మోసపోయానన్న అపరాధభావాన్ని తట్టుకోలేక, పరిస్థితిని ఎదుర్కోలేక ఒత్తిడికి గురై బాగా డిప్రెషన్కి లోనైంది. ఎప్పుడూ చిరాకుగా, అసహనంగా, విసుగ్గా, నిరుత్సాహంగా ఉంటుండేది. తనతో ఎవరు, ఏం మాట్లాడినా ఇంటా బయటా గొడవపడేది. చివరికి ప్రేమతో మాట్లాడినా ప్రతికూలంగానే తీసుకునేది. నిత్యం ఫ్రెండ్స్తో ఫోన్లో గట్టిగా అరుస్తూ, తిడుతూ, పచ్చిబూతులు మాట్లాడుతుండేది. ఇరుగుపొరుగువారు వింతగా, అసహ్యంగా చూస్తుండేవారు. అమ్మాయి ఫోనులో మాట్లాడుతుందంటే నా పరిస్థితి భయంగా, గందరగోళంగా, వణుకుగా ఉండేది. నేను ఏమీ చేయలేక మనసులో ప్రతి దేవుడిని ప్రార్థించుకుంటుండేదాన్ని. కానీ ఆరు నెలలు వరకు పరిస్థితి అలానే కొనసాగింది. అలా ఉండగా 2023, మే నెలలో నేను ఫేస్బుక్లో 'సాయి మహరాజ్ సన్నిధి' తెలుగు బ్లాగులోని సాయిభక్తుల అనుభవాలు, బాబా మహిమలు చదివాను. అలా వరుసగా 15 రోజులు బాబా మహిమలు చదివిన తర్వాత నా మనసులో బాబాని తలచుకొని, "నా బిడ్డ ఫోన్ మాట్లాడినప్పుడు అరుపులు, కేకలు, బూతులు మాట్లాడకుండా చేయి తండ్రీ. అమ్మాయి మారితే మీ అనుగ్రహాన్ని బ్లాగులో పంచుకుంటాను" అని బాబాకి శరణువేడాను. అదేమి విచిత్రమో కానీ, ఆ క్షణం నుండి నేటివరకు, అంటే ఈ అనుభవం వ్రాసే సమయానికి 15 రోజులు, అమ్మాయి ప్రశాంతంగా ఉంది. ఫోన్ మాట్లాడినా బూతులు లేవు, అరుపులు లేవు, కేకలు లేవు. నాతో కూడా ప్రేమగా ఉంటోంది. పెట్టింది తింటోంది, సమయానికి కాలేజీకి వెళ్లి తిరిగి ఇంటికి వస్తోంది. ఆ సాయినాథుని దయవలనే ఇంత మార్పు వచ్చింది, ఇంకా మారుతుందని ఆశిస్తున్నాను. ఈ మార్పు అంతటికీ కారణమైన సాయినాథుని పాదాలకు నా నమస్కారాలు. ఇంత దయచూపిన ఆ సాయినాథునికి నేను ఎల్లవేళలా ఋణపడి ఉంటాను.
శ్రీసాయినాథ్ మహరాజ్ కీ జై!!!
IELTS పరీక్షలో స్కోర్ చాలా తక్కువ వచ్చినా యూకేలో అడ్మిషన్ ఇప్పించిన బాబా
సాయిబంధువులకు నమస్కారాలు. నా పేరు ప్రసన్న. నేను హైదరాబాద్ నివాసిని. ఈ బ్లాగులోని ఎందరో సాయిబంధువుల అనుభవాలు చదువుతుంటే సాయితండ్రి పదకొండు వచనాలు అనుభవమవుతున్నాయి. ముఖ్యంగా 'నా సమాధి నుండియే నేను సర్వ కార్యములు నిర్వహింతును' అన్న బాబా మాట ప్రతి సాయిభక్తునికి అనుభవం. ఆ తండ్రి చూపుతున్న దివ్యకరుణాకటాక్షాలను తలచుకుంటే చాలా ఆనందం కలుగుతుంది. ఇక అసలు విషయానికి వస్తే.. మా చెల్లి సాయిభక్తురాలు. తనకి బాబా మీద చాలా నమ్మకం. తను అనుక్షణం సాయినామస్మరణ చేస్తుంటుంది. తన కొడుకు హైదరాబాద్లో BBA పూర్తిచేశాడు. తను మిగతా పిల్లలతో పోలిస్తే కాస్త నెమ్మదస్తుడు, భయస్తుడు. చదువులో యావరేజ్ స్టూడెంట్. అయినప్పటికీ పరీక్షలకు చాలా బాగా ప్రిపేర్ అవుతాడు, స్నేహితుల డౌట్స్ క్లియర్ చేస్తాడు. కానీ పరీక్షల్లో సరిగా వ్రాయలేడు. మా చెల్లికి వాడి గురించి చాలా టెన్షన్. తను అకాడమిక్ లైన్లో ఉద్యోగం చేసున్నందున వాడికి అన్ని విషయాలలో జాగ్రత్తగా గైడ్ చేస్తుంటుంది. తనకి వాడిచేత విదేశాల్లో MBA చేయించాలని చాలా కోరిక. అలాగైనా వాడు కొంచెం ఇంప్రూవ్ అవుతాడేమోనన్న ఆశ. కానీ వాడికి IELTS పరీక్షలో స్కోర్ చాలా తక్కువ వచ్చింది. మా చెల్లి కన్సల్టెంట్స్ని సంప్రదిస్తే వాళ్లు, "IELTS పరీక్షలో స్కోర్ తక్కువగా ఉంది కాబట్టి అవకాశాలు చాలా తక్కువ ఉంటాయి. సీటు రావడం చాలా కష్టం" అని అన్నారు. పోనీ, బాబుచేత మళ్ళీ IELTS పరీక్ష వ్రాయిద్దామంటే రిజల్ట్స్ వచ్చేటప్పటికి ఈ సెమిస్టర్ అడ్మిషన్ టైమ్(2023, సెప్టెంబర్) అయిపోతుంది. కాబట్టి నెక్స్ట్ సెమిస్టర్ (2024, జనవరి) వరకు ఆగాల్సి వస్తుంది. ఇటువంటి స్థితిలో మా చెల్లి, 'సమస్యని బాబాకి వదిలేస్తే, ఆయన ఏది మంచిదో అది చేస్తార'ని 'సాయి దివ్యపూజ' మొదలుపెట్టింది. ఒక్క వారంలో బాబా అద్భుతం చేశారు. కన్సల్టెన్సీవాళ్లు "ఒకసారి యూకే యూనివర్సిటీలో ట్రై చేస్తాము. వాళ్ళు IELTS స్కోర్ తక్కువ ఉన్నా కన్సిడర్ చేస్తారేమో!" అని అప్లికేషన్ ఫార్వర్డ్ చేశారు. మా చెల్లి బాబా మీద పెట్టుకున్న నమ్మకం వృధా పోలేదు. కన్సల్టెన్సీ వాళ్ళు మళ్ళీ ఫోన్ చేసి, "యూకేలో ఒక యూనివర్సిటీ మీ బాబుకి వచ్చిన IELTS స్కోరుని ఆమోదించింది" అని చెప్పారు. మా చెల్లెలు, మేము బాబాకి మనసారా ధన్యవాదాలు తెలుపుకుని ఆయన అనుగ్రహంతో ప్రాసెస్ అంతా ఏ విఘ్నం లేకుండా జరగాలని దివ్యపూజ కొనసాగించాము. మన అందరిపై బాబా అనుగ్రహం ఇలాగే ఎల్లవేళలా ఉండాలని, మన ప్రతీ చిన్నాపెద్దా సమస్యలకు బాబా పరిష్కారం చూపుతూ ఉండాలని వేడుకుందాము.
