సాయిభక్తుల అనుభవమాలిక 1518వ భాగం....

---

ఈ భాగంలో అనుభవాలు:

1. దారి చూపిన బాబా

2. ఫంక్షన్‌కి వెళ్ళడానికి అనుమతి వచ్చేలా దయచూపిన బాబా

---

దారి చూపిన బాబా

సాయి భక్తులందరికీ నా నమస్కారాలు. నా పేరు పవన్. నేను కర్నూలు నివాసిని. 2010 నుండి 2014 వరకు నేను బ్యాంకు మేనేజరుగా పని చేశాను. ఆ సమయంలో నేను చేసిన కొన్ని తప్పిదాల వలన నేను నా ఉద్యోగం కోల్పోయాను. అది నా స్వయం కృతాపరాథమైనందున ఎవరినీ నిందించక దేవుణ్ణి నమ్ముకున్నాను. ఒక సంవత్సరంపాటు ఏ ఉద్యోగం లేక ఖాళీగా ఉన్నాను. ఆ సమయంలో నా ధర్మపత్ని నాకు చాలా సపోర్ట్ ఇచ్చింది. మరల బ్యాంకు ఉద్యోగంలో చేరడానికి ప్రయత్నించాను కాని, నా ప్రయత్నాలన్నీ నిష్ప్రయోజనలయ్యాయి. తరువాత బాబా దయతో నాకు ఒక దారి చూపించారు. 2015లో కర్నూలులోనే నాకు ఇంకొక ఉద్యోగం దొరికింది. 2021లో మంచి హోదాతో ఉద్యోగం పెర్మనెంట్ కూడా అయ్యింది. దీనికి నేను బాబాకు సదా కృతజ్ఞుడిని.

తరువాత బాబా నాపై చూపిన ఒక అనుగ్రహాన్ని ఇప్పుడు చెప్తాను. నేను బ్యాంకులో పనిచేసేటప్పుడు నా ఇంటి డాక్యుమెంట్లు పెట్టి హౌసింగ్ లోన్ తీసుకొన్నాను. ఆ లోన్ క్లోజ్ చేసే స్థోమత ప్రస్తుతం నాకున్నప్పటికీ బ్యాంకువాళ్ళు నా ఇంటి డాక్యుమెంట్లు తిరిగి ఇస్తారన్న నమ్మకం లేదు. ఎందుకంటే, సాధారణముగా ఏ బ్యాంకు ఉద్యోగిపైనైనా అభియోగాలు ఉంటే వాళ్లకు సంబంధించిన డాక్యుమెంట్లు రిలీజ్ చేయడానికి బ్యాంకువాళ్ళు అనుమతి ఇవ్వరు. అదే సంశయంతో నేను బాబాను ప్రార్థిస్తే, ఆయన మా ఫ్రెండ్ రూపంలో నా సమస్య పరిష్కరానికి దారి చూపారు. ఆయన అనుగ్రహంతో నా అదృష్టం కొద్ది ఇక్కడ జొనల్ మేనేజరుగా నా ఫ్రెండ్ వచ్చాడు. నేను బాబాను ప్రార్థించి మా ఫ్రెండ్‌తో నా డాక్యుమెంట్ల గురించి చెప్పాను. తను, "వెంటనే ఒక లెటర్ బ్యాంకు మేనేజర్ ద్వారా పంపించమ"ని చెప్పాడు. తను చెప్పినట్లే నేను ఆలస్యం చేయకుండా నా హౌసింగ్ లోన్ క్లోజ్ చేసి నా డాక్యుమెంట్లు నాకు ఇవ్వవలసిందిగా లోకల్ బ్యాంకు మేనేజరుకు లెటర్ పెట్టాను. అలాగే దానికి తగిన విధంగా నా ఎస్‌బి అకౌంటులో బ్యాలన్స్ పెట్టాను. ఆశ్చర్యం కలిగేలా బాబా దయతో అన్నీ చకచకా జరిగి పోయాయి. నా ఫ్రెండ్ హెడ్ ఆఫీసులో ఫాలో అప్ చేస్తే వాళ్ళు వెంటనే డాక్యుమెంట్ల రిలీజుకు పర్మిషన్ ఇచ్చారు. అది నిజంగా బాబా లీలనే. తర్వాత ఒక నెలలో నా హౌసింగ్ లోన్ ఖాతా క్లోజ్ అయ్యి, నా డాక్యుమెంట్లు నాకు వచ్చాయి. "బాబా! నేను మీకు చాలా ఋణపడి ఉన్నాను. మీ దయ మాపై సదా ఉండాలని ప్రార్ధిస్తున్నాను. మీ దయతో నా కూతురికి మంచి ప్యాకేజీతో ఉద్యోగం వచ్చింది. తనకి మంచి పెళ్ళి సంబంధం కుదిరేలా చూడు స్వామి. అలాగే నా కొడుకు చదువు పూర్తవుతూనే తనకి మంచి ఉద్యోగం దొరికేలా చూడు తండ్రి. నేను కేసు నుంచి కూడా త్వరగా బయటపడేలా చూడు బాబా. సదా మీపై నాకు ప్రేమ తగ్గకుండా చూడు బాబా".

ఓంసాయి శ్రీసాయి శరణం శరణం సాయి!!!

ఓం శ్రీ సమర్థ సద్గురు సాయినాథ్ మహరాజ్ కీ జై!!!

---

ఫంక్షన్‌కి వెళ్ళడానికి అనుమతి వచ్చేలా దయచూపిన బాబా

నేను ఒక సాయి భక్తురాలిని. 2023, ఏప్రిల్ 9న బాబా నాకు ప్రసాదించిన ఒక అనుభవాన్ని మీతో పంచుకుంటున్నాను. 2023, ఏప్రిల్ 10న మా కోడలి శ్రీమంతం ఉండగా ముందురోజు 10వ తరగతి పరీక్షల డ్యూటీలో ఉన్న నేను మా MEO, CS గార్లను, "రేపు మా కోడలి శ్రీమంతానికి వెళ్లేందుకు అనుమతినివ్వమ"ని అడగాలని అనుకున్నాను. కానీ ఎంతలా అడిగినా మా MEO అనుమతి ఇవ్వలేదు. మా CS అయితే ఫోన్ కూడా లిఫ్ట్ చేయలేదు. చివరికి నేను నా తండ్రి బాబాను, "ఎవరన్నా నా డ్యూటీ చేయడానికి ఒప్పుకుంటే, మీ అనుగ్రహాన్ని బ్లాగులో పంచుకుంటాను" అని వేడుకున్నాను. ఆశ్చర్యంగా కొద్దిసేపటికి మా CS నాకు ఫోన్ చేసి, "నీకు బదులుగా ఎవరైనా రిలీవర్‌ని చూపిస్తే అనుమతి ఇస్తామ"ని చెప్పారు. అయితే ఎవరిని అడిగినా నా బదులు డ్యూటీకి రామని చెప్పారు. కొద్దిసేపటికి బాబా దయవలన నా సహోద్యోగి ఫ్రెండ్ ఒకరు డ్యూటీ చేస్తానని ఒప్పుకున్నారు. వెంటనే నేను ఆ విషయం మా MEO, CS గార్లకి చెప్పగా నాకు అనుమతి ఇచ్చారు. అనుమతి లభిస్తుందని నేను అస్సలు అనుకోలేదు. అలాంటిది మా కోడలు ఫంక్షన్‌కి వెళ్ళడానికి ఎటువంటి ఇబ్బందీ లేకుండా చేశారు నా తండ్రి బాబా. ఇది ఆయన మహిమ వల్లే సాధ్యమైంది. "ధన్యవాదాలు తండ్రి".

---