సాయిభక్తుల అనుభవమాలిక 1516వ భాగం....

---

ఈ భాగంలో అనుభవాలు:

1.  బాబా రక్షణ

2. శ్రీసాయి ఆరోగ్యప్రదాత

---

 బాబా రక్షణ

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాధ్ మహారాజ్ కీ జై!!!

సాయి బంధువులందరికీ నా నమస్కారాలు. నేను ఒక సాయి భక్తురాలినని చెప్పుకోడానికి నాకు చాలా గర్వంగా ఉంది. ఎందుకంటే, సాయి భక్తులందరూ చాలా అదృష్టవంతులు. వాళ్ళు మిగతా వారి కంటే చాలా భిన్నంగా సున్నిత మనస్తత్వం కలిగి ఉంటారు. అందువల్ల వారికి సమాజంలో చాలా గౌరవం ఉంటుంది. అది బాబా దయ. పోయిన జన్మలో మంచి కర్మలు చేయడం వల్ల ఈ జన్మలో ఆయన భక్తులమయ్యాం. ఆయన మన ప్రేమను తప్ప ఏమీ ఆశించక 'బాబా' అని పిలవగానే 'ఓయ్' అని పరిగెత్తుకుంటూ వచ్చి మనకు సహాయం చేస్తారు. అటువంటి అనుభవాలు మనకు ఆయనతో ఎన్నో ఉంటాయి. మనం ఆయన నుండి పొందిన మేలును గుర్తుపెట్టుకొని ఆయన్ని స్మరించుకుంటూ 'శ్రద్ధ', 'సబూరీ' కలిగి ఉంటే చాలు. ఆయన చాలా పొంగిపోతారు. మనకి ఏది మంచిదో అది సమయానికి సమకూరుస్తారు. కరుణామయుడు, దయార్థహృదయుడు అయిన బాబా 'సాయి సాయి' అని జపిస్తే సప్తసముద్రాలు ఆవల ఉన్నా రక్షిస్తానని అభయమిచ్చారు. కాబట్టి మనం ఎల్లప్పుడూ బాబా నామస్మరణలో ఉంటే మన బాగోగులు బాబానే చూసుకుంటారు. మనం దేనికీ చింతించాల్సిన అవసరం లేదు. ఇక నా అనుభవాల విషయానికి వస్తాను.

మేము హైదరాబాద్‌లో ఉంటాము. మా అత్తయ్య, మామయ్య వేరే ఊరిలో ఉంటారు. ఒకరోజు హఠాత్తుగా, 'మామయ్యగారికి బ్రెయిన్ స్ట్రోక్ వచ్చి చేయి, మాట రావడం లేదు' అని మాకు ఫోన్ వచ్చింది. మావయ్యగారి వయస్సు 85 సంవత్సరాలు. మాకు చాలా భయమేసింది. నేను, "బాబా! మామయ్యకి ఏమీ కాకుండా ఆరోగ్యంగా ఉండేలా చూడండి" అని ప్రార్థించాను. ఆ వూరు నుండి హైదరాబాద్ రావడానికి చాలా సమయం పడుతుందని మా మావయ్యగారి బంధువులు ఆయన్ని అక్కడున్న ఒక హాస్పిటల్లో జాయిన్ చేస్తే, టెస్టులన్నీ చేసి, "బ్రెయిన్‌లో బ్లడ్ క్లాట్ అయింది. ఇంజక్షన్ ఇవ్వాల"ని చెప్పారు. ఆరోజు గురువారం. నేను ఉదయం నుంచి బాబా చరణాలకి పూజ చేశాను. మావారు బాబా ఊదీ తీసుకుని హాస్పిటల్‌కి వెళ్లి రోజూ మా మామయ్య నుదుటన మరియు చేతికి ఊదీ రాసి, మరికొద్దిగా ఊదీ ఆయన నోట్లో వేస్తుండేవారు. నేను 'శ్రీ సాయి సచ్చరిత్ర' సప్తాహ పారాయణ చేశాను. బాబా దయవల్ల రోజురోజుకి కొంచెం కొంచంగా చేయి, నోరు కదలికలు వచ్చి నాలుగు రోజులకు మంచిగా సెట్ అయిపోయింది. ఆ వయసులో ఆయన కోలుకోవడం చాలా కష్టం కానీ, బాబా కృప, ఆయన ఊదీ వల్ల అంత త్వరగా కోలుకొని ఇప్పుడు ఆరోగ్యంగా ఉన్నారు. "చాలా ధన్యవాదాలు బాబా. మా అత్తయ్య, మామయ్య ఆరోగ్యంగా ఉండేలా దీవించండి. అందరి మీద మీ కృపాదృష్టి ఉంచి అందరూ ఆయురారోగ్యాలతో చల్లగా ఉండేలా దీవించండి తండ్రి. పిల్లలకి మంచి విద్య, సద్బుద్ధి ప్రసాదించండి. మేము ఎల్లప్పుడూ మీ పాదాలు విడవకుండా ఉండేలా అనుగ్రహించండి బాబా".

ఒకరోజు హఠాత్తుగా నాకు నడుము నొప్పి, కడుపులో నొప్పి వచ్చాయి. అప్పుడు నేను బాబా ఊదీ సేవించి, 'ఓం శ్రీసాయి ఆరోగ్యక్షేమదాయ నమః' అనుకుంటూ, "బాబా! నాకు తగ్గేలా చూడండి. మీ అనుగ్రహాన్ని బ్లాగులో పంచుకుంటాను" అని బాబాను వేడుకున్నాను. ఆశ్చర్యం! ఒక గంటలో నొప్పి తగ్గిపోయింది. ఇంకోరోజు మా బాబు తలనొప్పిని అని ఏడ్చాడు. నాకు చాలా భయమేసి, "బాబా! ఏమీ కాకుండా చూడండి. బాబుకి తలనొప్పి తగ్గిపోతే, మీ అనుగ్రహాన్ని బ్లాగులో పంచుకుంటాను" అని బాబాకి చెప్పుకున్నాను. తరువాత డాక్టర్ దగ్గరకి వెళ్తే, "ఏమీ లేదు. ఎండ వల్ల వచ్చింది" అని చెప్పారు. మరొకరోజు మా బాబు స్కూలుకు వెళదామని బయలుదేరితే తన సైకిల్ తాళం కనిపించలేదు. తను స్కూలు టైమ్ అయిపోతుందని చాలా టెన్షన్ పడుతుంటే నేను, "బాబా! స్కూలుకు టైమ్ అవుతుంది. తొందరగా సైకిల్ తాళం దొరికేలా చూడండి. మీ అనుగ్రహాన్ని బ్లాగులో పంచుకుంటాను" అని అనుకొని 'ఓం శ్రీ సాయి సూక్ష్మయ నమః' అని జపించాను. అలా బాబాని తలుచుకోగానే మా బాబుకి ఆ సైకిల్ తాళం స్కూటీలో పెట్టానని జ్ఞాపకం వచ్చింది. అంతా బాబా దయ. "చాలా చాలా ధన్యవాదాలు బాబా".

---

శ్రీసాయి ఆరోగ్యప్రదాత

సద్గురు సాయిబాబాకి శతకోటి పాదాబివందనలు సాయి భక్తులకు నమస్కారాలు. నేను ఒక సాయి భక్తుడిని. నేను చాలా రోజుల నుంచి భుజము నొప్పితో బాధపడుతున్నాను. ఎన్ని మందులు వాడినా తగ్గలేదు. చివరికి నేను బాబాకి మ్రొక్కుకొని ఊదీ భుజానికి రాసుకున్నాను. బాబా దయవల్ల చాలా త్వరగా నొప్పి తగ్గింది. అలాగే నా భార్య ఒకవైపు తలనొప్పితో చాలా బాధపడుతూ విలవిలలాడిపోతుంటే నేను, "బాబా! నా భార్యకి నొప్పి తగ్గితే, మీ అనుగ్రహాన్ని బ్లాగులో పంచుకుంటాను" అని మ్రొక్కుకున్నాను. బాబా దయతో నొప్పి చాలా తొందరగా తగ్గిపోయింది. బాబా దయాసముద్రుడు, అనంత కరుణామయుడు. "బాబా! మీకు శతకోటి వందనాలు. అనంతమైన మీ దయ, కరుణలు ఎల్లప్పుడూ మీ భక్తులపై వుండాలని కోరుకుంటున్నాను తండ్రి".

---