సాయిభక్తుల అనుభవమాలిక 1750వ భాగం....

---

ఈ భాగంలో అనుభవాలు:

1. ఎటువంటి సమస్యనైనా సులభంగా పరిష్కరించే బాబా

2. అడిగితే కాదనకుండా దయ చూపే బాబా

---

ఎటువంటి సమస్యనైనా సులభంగా పరిష్కరించే బాబా

ఓంసాయి శ్రీసాయి జయజయసాయి. ఓం సాయినాథాయ నమః. నా పేరు రమాదేవి. 2023, అక్టోబర్ 1, ఆదివారంనాడు మావారు తన ఆఫీసులో ఒక ప్రెజెంటేషన్ ఇచ్చారు. ఆ తరువాత మావారి హెడ్ కొన్ని విషయాలు ప్రస్తావించకుండా ఉండాల్సింది అన్నారు. ఆ విషయంగా మాట మాట పెరిగి గొడవ అయింది. దాంతో ఆ హెడ్ మావారి విషయం HRతో మాట్లాడుతాను అన్నారు. మావారు విషయం ఎంతవరకు వెళుతుందో తెలియదని నాతో అన్నారు. మేము అప్పటికి మూడేళ్లుగా చాలా సమస్యలు అనుభవిస్తూ ఆప్పుడుప్పుడే బాబా దయవల్ల కొద్దిగా కుదుటపడ్డాము. అలాంటిది కొత్త సమస్య వచ్చేసరికి నేను కంగారుపడి, "మళ్ళీ ఏమవుతుంది బాబా?" అని బాధపడ్డాను. తర్వాత క్వశ్చన్&ఆన్సర్ సైట్‌లో చూస్తే, 'సచ్చరిత్ర చదువు సమస్య తొలగిపోతుంది' అని వచ్చింది. నేను ఆ విషయం మావారితో చెప్పానుగానీ ఆయన చదువుతారని అనుకోలేదు. మరుసటిరోజు సోమవారం గాంధీజయంతి కారణంగా సెలవు వచ్చింది. బాబా దయవల్ల ఆరోజు మావారు పారాయణ మొదలుపెట్టి 11 అధ్యాయాలు చదివారు. మరుసటిరోజు ఉదయం 2 అధ్యాయాలు చదివారు. తర్వాత ఆయన ఆఫీసుకి వెళ్తుంటే నేను మావారికి ఊదీపెట్టి, "బాబాను మీటింగ్‌లో కూర్చోమని వేడుకోండి" అని చెప్పాను. ఆయన అలాగే బాబాను వేడుకున్నారు. బాబా చేసిన అద్బుతం చూడండి. మీటింగ్‌లో HR మావారితో, "అలా కోపంగా నీ హెడ్‌తో మాట్లాడకుండా ఉండాల్సింది" అని మాత్రమే అన్నారు. అంతకుమించి ఏమీ అనలేదు. సమస్య అంత సులభంగా పరిష్కారమవుతుందని మేము అస్సలు అనుకోలేదు. అంతా బాబా దయ. ఆయన ప్రత్యక్షంగా ఆ మీటింగ్‌లో ఉన్నారని నా నమ్మకం. "బాబా! మీకు ఎన్నిసార్లు ధన్యవాదాలు చెప్పినా తక్కువే తండ్రీ. ఇంతగా కాపాడుతున్న మీకు నేను ఏమి ఇవ్వగలను? మీకు శతకోటి  కృతజ్ఞతలు సాయిదేవా".

2023, అక్టోబర్ నెల రెండో వారంలో రెండురోజులు నాకు నీరసంగా ఉండి కళ్ళు తిరుగుతుంటే హాస్పిటల్‌కి వెళ్ళాను. డాక్టర్ చాలా టెస్టులు వ్రాసారు. అందులో ఈసీజీ కూడా ఉండేసరికి నాకు భయమేసి, "ఇదేంటి బాబా? ఏదో ORS త్రాగితే తగ్గిపోయేదానికి వీళ్ళు ఇన్ని టెస్టులు వ్రాసారు. ఏమైంది నాకు? సరే, రిపోర్టులు నార్మల్ రావాలి బాబా" అని అనుకున్నాను. బాబా దయవలన రిపోర్టులన్నీ నార్మల్ వచ్చాయి. దాంతో "ఏ సమస్యా లేదు. మంచి ఆహారం తీసుకోండి" అని చెప్పి పంపారు. "మీ దయకి ధన్యవాదాలు బాబా".

---

అడిగితే కాదనకుండా దయ చూపే బాబా

సాయిబంధువులందరికీ నమస్కారం. నా పేరు నిర్మల. 2023, అక్టోబర్ నెల రెండో వారం చివరిలో నాకు బాగా నీరసంగా, తల తిరుగుతున్నట్టుగా, ఆహారం ఎంత తిన్నా ఇంకా ఆకలి వేస్తున్నట్లుగా ఉంటుండేది. తగ్గిపోతుందిలే అని బాబాను తలుచుకుంటూ మూడు రోజులు అలానే ఉన్నాను. కానీ తగ్గలేదు. అప్పుడు ఊదీ నీళ్లు త్రాగి, "ఉదయానికి మామూలు అవ్వాలి బాబా" అని బాబాకి దణ్ణం పెట్టుకున్నాను. బాబా దయవల్ల ఉదయానికి నా పరిస్థితి సాధారణమైంది. "ధన్యవాదాలు బాబా".

మేము 2023, జనవరిలో కొల్లూరు వెళ్ళాము. ఆ సమయంలో అమ్మవారి రథోత్సవం జరుగుతుంది. అనంతరం అమ్మవారి వద్ద ఉన్న నాణేలు భక్తుల మీదికి విసురుతారని నేను బాబాను, "బాబా! మాకు నాణెం లభించేలా అనుగ్రహించండి" అని వేడుకున్నాను. బాబా దయతో నాకు ఒక నాణెం దొరికింది. అయితే 2023, అక్టోబర్ 15, ఉదయం నేను దేవుడి విగ్రహాలు శుభ్రపరుస్తున్నప్పుడు చూస్తే, బాబా ఆశీర్వాదంతో కొల్లూరు మూకాంబికా గుడిలో లభించిన రెండు రూపాయలు నాణెం కనిపించలేదు. ఎంత వెతికినా దొరకలేదు. అప్పడు, "బాబా! ఆ నాణెం దొరికేలా దయ చూపండి" అని వేడుకున్నాను. అప్పటిదాకా దొరకనిది వెంటనే దొరికింది. "ధన్యవాదాలు బాబా".

---