సాయిభక్తుల అనుభవమాలిక 1723వ భాగం....

---

ఈ భాగంలో అనుభవం:

• బాబా అనుగ్రహం

---

అనంతకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహారాజ్ కి జై.

నా పేరు హాసిని. 2023, నవంబర్ నెల చివరి వారంలో నాకు అసిడిటీ ప్రాబ్లెమ్ వచ్చింది. నాకు అది అసిడిటీ అని తెలియక అలాగే నొప్పిని భరించాను. కానీ తర్వాత బాధను తట్టుకోవడం నావల్ల కాక అసిడిటీ ఏమోనని ENO తీసుకున్నాను. కానీ తగ్గలేదు. ఇక అప్పుడు బాబా ఊదీ తీసుకోవడం మొదలుపెట్టాను. బాధ కొంచెంకొంచెంగా తగ్గింది. కానీ, మంట మాత్రం అలానే వుండింది. అప్పుడు నేను ఊదీ తీసుకొని నా కడుపు మీద రాసుకోవడం మొదలుపెట్టి వరుసగా మూడురోజులు రాసుకున్నాను. అద్భుతం! మంట అస్సలు లేకుండా పోయింది. నా ఒంట్లో ఉన్న వేడిని కూడా ఊదీ తగ్గించింది. ఈ అనుభవం ద్వారా బాబా ఊదీకి అతంటి శక్తి ఉందని నాకు మరింత గట్టి నమ్మకం ఏర్పడింది.

ఒకసారి మా ఇంట్లో పవర్ బ్లింక్ అవుతూ ఉండేది. ఆ సమస్య మాకు మాత్రమే. అలా ఉండగా ఒకరోజు పవర్ పోయింది. ఇరుగుపొరుగు అందరికీ ఉంది. నేను, "బాబా! పవర్ వచ్చేలా చేయండి" అని బాబాని అడిగాను. కానీ రాలేదు. అప్పుడు నేను, 'బాబా మాత్రం ఏం చేస్తారులే!' అని అనుకున్నాను. కానీ నేను అనుకున్నది చాలా తప్పు. ఆయన తలుచుకుంటే ఏమైనా చేస్తారని నాకు తెలుసు. కానీ ఆ సమయంలో ఆ చెడు ఆలోచన ఎలా వచ్చిందో నాకే తెలీదు. సరే, 30 నిముషాల తర్వాత పవర్ వచ్చింది. మరుసటిరోజు కూడా మా ఇంటికి మాత్రమే పవర్ పోతే, "బాబా! పవర్ వచ్చేలా చేయండి" అని బాబాను అడిగాను. బాబా దయవల్ల పవర్ వచ్చింది. తర్వాత అదేరోజు రాత్రి 10 గంటలకి పవర్ పోయి మరుసటిరోజు ఉదయం 8 వరకు రాలేదు. అప్పుడు నేను "ఈరోజు అంతా ఇలానే ఉండాలా బాబా?" అని అనుకున్నాను. ఇక్కడొక విషయం చెప్పాలి. మా డాడీకి కరెంట్ సంబంధిత పని వచ్చు. కాని ఆయనకు, మాకు మధ్య మాటలు లేవు. ఆ కారణంగా ఫ్యూజ్ దగ్గర సమస్య ఉందని తెలిసి కూడా ఆయన బాగు చేయలేదు. ఇంకా నేను బాబా గుడికి వెళ్లి, "బాబా! మా డాడీ కరెంట్ సమస్యను బాగు చేసేలా చేయండి" అని బాబాను అడిగాను. ఇక బాబా అనుగ్రహాన్ని చూడండి. నేను గుడి నుండి ఇంటికి వెళ్లిన 5 నిముషాలకి డాడీ లేచి రిపేరు చేసారు, కరెంట్ వచ్చింది. "ధన్యవాదాలు సాయి నాన్నా".

2023, అక్టోబర్ 28న నేను సాయిబాబాకి సంబంధించిన ఒక పాత సినిమా చూసాను. అందులో బాబాని చూస్తుంటే, ఆయన మాటల్ని వింటుంటే నాడు శిరిడీలో జరిగింది జరిగినట్లు చూపించినట్టుగా అనిపించి మనసుకి చాలా ఆనందమేసింది. అంతే, నా గుండెల్లో బాధ మొదలైంది. ‘ఎలాగైనా బాబాని చూడాలి, ఆనాడు బాబా ఉన్నప్పుడు నేను జన్మించి ఉంటే బాబాని చూసి ఉండేదాన్ని కదా!’ ఇలా ఏవేవో ఆలోచనలతో నాకు చాలా బాధపడి బాబాను ఒక్కటే అడిగాను, "సాయినాన్నా! 'సాయీ' అంటే పలుకుతానన్నావు కదా! నాకు ఎందుకో మిమ్మల్ని చూడాలనిపిస్తుంది. మీ లీలలు ఇంకా వినాలనిపిస్తుంది" అని. తర్వాత యూట్యూబ్‌లో 'మన సాయి అమృతం' అని ఒక ఛానల్ కనిపించింది. అందులో అన్ని సాయిబాబా లీలలే చెప్తున్నారు. అవి విన్నాక నాకు చాలా ప్రశాంతంగా అనిపించింది. అంతకుముందు నేను ఎన్నిసార్లు యూట్యూబ్‌లో సెర్చ్ చేసినా నాకు ఆ ఛానల్ కనిపించలేదు. అలాంటిది మనసులో బాధతో బాబాని మీ లీలలు వినాలని ఉందని అడిగినంతనే ఆ ఛానల్‌ని చూపించారు. ఇకపోతే బాబాని చూడాలన్న కోరిక విషయంలో బాబాని, "నాకు స్వప్న దర్శనం ఇవ్వండి బాబా. మిమ్మల్ని చూడాలని ఉంద"ని అడిగి, బాబా ఫోటోని పక్కన పెట్టుకొని పడుకున్నాను. అద్భుతం! బాబా స్వప్న దర్శనం ఇచ్చారు. ఆ కలలో ఒక బాబా ఫోటో, ఆ ఫొటోలో బాబా నిలుచుని తమ రెండు చేతులతో నన్ను ఆశీర్వదిస్తూ దర్శనమిచ్చారు. సత్చరిత్రలో బాబా, “నాకు, నా ఫోటోకి భేదం లేద”ని చెప్పారు కదా! అలానే ఆయన నాకు ఫోటో రూపంలో దర్శనం ఇచ్చారు. కల అంతా గుర్తులేదుగాని బాబా కనిపించరు. అది ఆయన అనుగ్రహమే కదా! నిద్రలేచాక నాకు చాలా ప్రశాంతంగా, సంతోషంగా అనిపించింది. పిలిస్తే పలికి మరీ దర్శనం ఇచ్చారు సాయినాన్న అనుకున్నాను. తర్వాత బ్లాగు ఓపెన్ చేయగానే కింది మెసేజ్ వచ్చింది. అది చూసి మరింత ఆశ్చర్యానందాలలో మునిగిపోయాను. "చాలా చాలా ధన్యవాదాలు బాబా".

2023, అక్టోబర్ 28, రాత్రి ఒంటిగంట, 2 మధ్యలో చంద్రగ్రహణం ఏర్పడింది. గ్రహణ సమయంలో ఎలాంటి మంత్రాలు చదివిన ఫలితం అధికంగా ఉంటుందని గ్లోబల్ మహాపారాయణ గ్రూపులో చెప్పారు. కానీ పడుకున్నాక మధ్యలో లేవడం ఆంటే చాలా కష్టం. అందుకని నేను, "బాబా! నేను ఒంటిగంటకు అలారం పెట్టుకున్నాను. ఆ అలారం మోగిన శబ్దానికి లేచేలా మీరే చేయండి. అలాగే మీ బిడ్డని మంత్రం జపించేలా చేయండి. ఇదంతా జరిగితే నేను మీ అనుగ్రహం గురించి బ్లాగు ద్వారా తోటి సాయిభక్తులతో పంచుకుంటాను బాబా" అని బాబాకి మొక్కుకున్నాను. ఇక అద్భుతం చూడండి. నేను అలారం మోగగానే నిద్ర లేచాను. నిజానికి నేను ఎప్పుడూ అలారంకి లేవను. అందువల్ల అలారంకి బాబాయే నన్ను లేపారని నాకు అనిపిస్తుంది. ఇకపోతే, నేను అనుకున్నట్లే సంతోషంగా బాబా మంత్రం జపించి పడుకున్నాను. అడిగింది నెరవేర్చారు బాబా. ఇంతకంటే అదృష్టం ఏముంది? "ధన్యవాదాలు బాబా. మీ మిరకిల్స్‌ని అనుభవిస్తే వచ్చే ఆనందం అంతాఇంతా కాదు. ఇలానే నన్ను అనుగ్రహిస్తూ వుండండి బాబా"

నేను నవరాత్రులు నుండి అమ్మవారి గుడికి వెళ్లాలనుకుంటున్నా వెళ్ళలేకపోయాను. చివరికి నేను మా అక్కని గుడికి తీసుకెళ్లామని అడిగితే, "నాకు పని వుంది. నేను తీసుకెళ్ళను" అని అంది. అప్పుడు నేను, "బాబా! అక్క నన్ను గుడికి తీసుకెళ్లాలా మీరే చూడండి" అని బాబాను అడిగాను. మనం భక్తితో అడిగితే బాబా కాదనరు కదా!. అక్క నన్ను గుడికి తీసుకెళ్ళింది. ఇది బాబా దయవల్లే సాధ్యమైంది. ఎందుకంటే, మా అక్క ఒక్కసారి నో చెప్పిందంటే, ఇక ఆపని చేయద్దు. "చాలా చాలా ధన్యవాదాలు బాబా".

2023, ఆగష్టు చివరిలో లేదా సెప్టెంబర్ నెల ఆరంభంలో నేను 2000 రూపాయలు ఎక్కడో పెట్టి మర్చిపోయాను. ఎక్కడ పెట్టానో చూద్దాం చూద్దాం అనుకుంటూనే నిర్లక్ష్యం చేశాను. ఇంకా ఒకరోజు మా అమ్మ ఆ డబ్బులు ఎక్కడున్నాయి అని అడిగింది. నాకు ఏం చేయాలో తెలియక సాయినాన్నని, "సహాయం చేయమ"ని అడిగి, "అవి కనిపిస్తే, మీ అనుగ్రహం బ్లాగు ద్వారా తోటి భక్తులతో పంచుకుంటాను" అని మొక్కుకున్నాను. ఇక బాబా అనుగ్రహం చూడండి. నేను ఎప్పుడూ చూసే ఫైల్‌లోనే ఆ డబ్బులు కనిపించాయి. అవే కాకుండా మర్చిపోయిన మరో 500 రూపాయలు కూడా కనిపించాయి. తర్వాత అదేరోజు మా అమ్మ ఇంట్లో పెట్టిన వెండి పట్టీలు, బంగారు చెవి రింగులు పెట్టిన చోట కనిపించలేదు. అది ఎవరూ వెళ్లే చోటు కూడా కాకపోవడంతో అమ్మా బాగా ఏడ్చి నీరసించిపోయింది. అప్పుడు నేను, "బాబా! ఇవి కూడా దొరికితే, మీ అనుగ్రహం బ్లాగులో పంచుకుంటాను" అని బాబాకి మొక్కుకున్నాను. అంతే, 'అంతా వెతకాలి' అని నాకు ఆలోచన వచ్చి వెతికితే కనిపించాయి. అంతా బాబా దయ. ఒకప్పుడు తోటి భక్తుల అనుభవాల చదువుతున్నప్పుడు వీళ్ళు బంగారం పొతే ఇలా స్పందిస్తున్నారేంటి? అవి ఎక్కడో ఓ చోట ఉంటాయి కదా! ఎక్కడికి పోతాయని అనుకునేదాన్ని. కానీ ఈరోజు అదే పరిస్థితి నాకు వచ్చేసరికి ఎదుటివాళ్ళ బాధ మనకి చిన్నదిగా ఉంటుందని అర్థమైంది. "చాలా ధన్యవాదాలు సాయినాన్న. నిజంగా బాబా నా జీవితంలో లేకపోతే ఈరోజు నా జీవితం కష్టాల కడలిలో ఉండేది. మీరు లేకపోతే నేను నిజంగా ఉండేదాన్ని కాదు".

---