1. అబద్ధాలు చెప్తే శిక్ష తప్పదన్న గుణపాఠం నేర్పిన బాబా
2. బాబా బ్లెస్సింగ్స్
3. నార్మల్ రిపోర్టు వచ్చేలా అనుగ్రహించిన బాబా
అబద్ధాలు చెప్తే శిక్ష తప్పదన్న గుణపాఠం నేర్పిన బాబా
సాయిభక్తులకు నమస్కారం. నా పేరు నిరంజనరెడ్డి. నేను ఒక సాఫ్ట్వేర్ కంపెనీలో సెక్యూరిటీ గార్డుగా పని చేస్తున్నాను. ఒకసారి ఒక వారం రోజుల పాటు ఇద్దరు క్యాబ్ డ్రైవర్లు పనిగట్టుకొని పనివేళ్లలో నేను నిద్రపోతున్నట్లు ఫోటోలు తీసి మా సెక్యూరిటీ ఆఫీసరుకి పంపారు. నిజానికి నాకు నిద్ర రావడమే తక్కువ. అటువంటి నాపై అనవసరంగా అలాంటి పిర్యాదులు వస్తుంటే నాకు చాలా బాధేసింది. నేను ఎంత చెప్పినా నాతోపాటు విధులు నిర్వహించేవాళ్ళు కూడా నమ్మలేదు. మా సెక్యూరిటీ ఆఫీసర్, "నీపై పిర్యాదులు వస్తున్నాయి రెడ్డి. అడ్మిన్ టీమ్‌కి తెలిస్తే బాగుండదు" అని సీరియస్‌గా అన్నాడు. నేను ప్రతి విషయంలో బాబా ముందు చెప్పుకుంటూ ఉంటాను, 'ఓంసాయి శ్రీసాయి జయజయసాయి' అని స్మరిస్తూ ఉంటాను. అలాగే ఈసారి కూడా దిగులుగా బాబాను స్మరిస్తూ ఉంటే, నాకు ఒక ఆలోచన వచ్చి, నేను చేసిన తప్పేమిటో నాకు అర్థమైంది. అదేమిటంటే, నేను ఈమధ్య అప్పుడప్పుడు కొన్ని విషయాలలో అబద్ధం చెప్పడం అలవాటు చేసుకున్నాను. నా క్లోజ్ ఫ్రెండ్‌తో కూడా కొన్ని విషయాలలో అబద్ధాలు చెప్పాను. నా ఫ్రెండ్ నన్ను నమ్మేవాడు, "నువ్వు సాయి భక్తుడవ"ని పొగిడేవాడు. అదంతా గుర్తొచ్చి అందువల్లే నేను చేయని తప్పుకి నాపై అనవసరంగా నిందలు వచ్చాయనిపించి వెంటనే మనసులోనే బాబాకు క్షమాపణలు చెప్పుకున్నాను. ఈ అనుభవం ద్వారా అబద్ధాలు చెప్తే శిక్ష తప్పదన్న గుణపాఠం నేర్చుకున్నాను. కాబట్టి 'అబద్ధాలు చెప్పి కష్టాలు తెచ్చుకోకండి. అసత్యం పలకడం, అనవసర విషయాలలో తలదూర్చడం సాయినాథునికి ఇష్టం ఉండదు. తప్పు చేస్తే ఏదో రకంగా ఆయన దాన్ని మనకి అర్థం అయ్యేటట్లు చేస్తారు. సాయి భక్తులు ఎవరైనా సరే మానవత్వంతో ఆలోచించి అడుగేస్తే బాబా మన వెంట ఉంటారు. ఇది అక్షర సత్యం. అందుకే నేను ఏ గుడికిపోయినా గుడి ముందుండే అనాధ బిక్షకులకు తోచినంత సహాయం చేస్తాను. తర్వాత దేవుడి దర్శనం చేసుకుంటాను. మనం భిక్షకులకు ఇచ్చింది దేవుని హుండీలో వేసినట్లే అవుతుంది. ముఖ్యంగా మనం చేసే మంచి పనికి బాబా సంతోషిస్తారు. బాబా స్మరణ చేస్తూ ఉండండి. ఆయన పిలిస్తే పలికే దైవం. ఏ కష్టమొచ్చినా మన వెంట ఉంటారు. ఆయన దయతో మనకు అన్ని అనుకూలంగా ఉంటాయి.
బాబా బ్లెస్సింగ్స్
నార్మల్ రిపోర్టు వచ్చేలా అనుగ్రహించిన బాబా
నా పేరు సుమ. నాకు పెళ్ళై తొమ్మిది సంవత్సరాలైంది. మాకు 8 సంవత్సరాల బాబు ఉన్నాడు. బాబా పుట్టిన ఏడు సంవత్సరాల తర్వాత మళ్ళీ నేను గర్భవతినయ్యాను. ప్రెగ్నెన్సీ నిర్ధారణ అయినప్పటి నుంచి నాకు ఏడు స్కానింగ్లు అయ్యాయి. మాములుగా అందరికీ నాలుగు స్కాన్లే చేస్తారు. కానీ నాకు బీపీ ఉండడం వల్ల అదనంగా ఇంకో స్కాన్ వ్రాస్తూండేవారు డాక్టర్. నాకు ప్రతి విషయానికి చాలా భయం. అందువల్ల డాక్టర్ దగ్గరకి వెళ్ళినప్పుడు బీపీ ఎక్కువైపోతుండేది. నాకు బాబా మీద నమ్మకం. ఆయన తప్ప నాకు వేరే ఆలోచన ఉండదు. అందుచేత ఊదీ ప్యాకెట్‌తో హాస్పిటల్‌కి వెళ్తుండేదాన్ని. ఎందుకంటే, బాబా నాతో ఉన్నారన్న ఒక భరోసా. 2023, నవంబర్ 21న డాప్లర్, బ్లడ్ టెస్టులకి వెళ్ళేముందు, "బాబా! మీ దయవల్ల రిపోర్టులు నార్మల్ వస్తే, మీ అనుగ్రహం బ్లాగు ద్వారా తోటి భక్తులతో పంచుకుంటాను" అని బాబాను వేడుకొని వెళ్ళాను. బాబా దయవల్ల రిపోర్టులు నార్మల్ వచ్చాయి. "ధన్యవాదాలు బాబా. నా కాన్పుకి జనవరిలో డేట్ ఇచ్చారు. ఇప్పటివరకు ఎలా తోడుగా ఉన్నారో సిజేరియన్ జరిగే సమయంలో తోడుగా ఉండండి. నా బీపీ నార్మల్ ఉండేలా చేసి ఎటువంటి సమస్యలు లేకుండ ఆరోగ్యవంతమైన బిడ్డని ప్రసాదించండి. నన్ను, నా కుటుంబాన్ని సంరక్షించండి. ప్లీజ్ బాబా".
