1. అసాధ్యాన్ని సుసాధ్యం చేసి కొత్తకారు అనుగ్రహించిన బాబా
2. బాబా మాట ఎన్నటికీ అసత్యం కాదు
3. ఉన్న ఊరికే డిప్యూటేషన్ వచ్చేలా దయ చూపిన బాబా
అసాధ్యాన్ని సుసాధ్యం చేసి కొత్తకారు అనుగ్రహించిన బాబా
సాయి మహారాజ్‌‌కి, సాయిబంధువులకి నమస్కారం. నేను ఒక సాయి భక్తురాలిని. బాబా అసాధ్యాన్ని సుసాధ్యమెలా చేశారో నేనిప్పుడు మీతో పంచుకుంటున్నాను. నేను ఒక ప్రతిష్ఠాత్మక సంస్థలో ఉద్యోగం చేస్తున్నాను. నేను రోజూ ఆఫీసుకి మా ఇంటి నుండి 40 నిమిషాల ప్రయాణం చేయాల్సి ఉండగా మాకున్న పాత కారులో వెళ్లొస్తుంటాను. నా సహోద్యోగులు కొంతమంది చాలా మంచి కార్లలో ఆఫీసుకు వస్తుంటారు. ఆ విషయంలో నేనెప్పుడూ వాళ్లతో పోల్చుకుని బాధపడలేదు, అప్పుడప్పుడు సరదాగా ఎవరైనా నా కారు గురించి జోకులు వేసినా నేను ఏమీ ఫీల్ కాలేదు. ఎందుకంటే, మేము ఉన్న పరిస్థితిలో కారు మార్చడం కుదరదు. కాబట్టి నేను కారు మార్చే ఆలోచన కూడా చేయలేదు. ఇలా ఉండగా 2023, అక్టోబర్ నెలలో ఒకరోజు మా సీనియర్ ఆఫీసర్ ఒకరు వేరొకరితో నా కారు మీద కామెంట్ చేశారు. అంత పెద్ద వయసున్న సార్ చేసిన కామెంట్‌‌కి నాకు చాలా బాధేసింది. ఇంటికి వచ్చాక విషయం మా అమ్మతో చెప్తుంటే, నాకు తెలియకుండానే నా కళ్ళ నుండి నీళ్ళు వచ్చాయి. అప్పుడు కూడా నేను బాబాను ఏమీ అడగలేదు. కానీ 2023, అక్టోబర్ 23, దసరా రోజున కారు పూజకు వెళ్ళినప్పుడు నేను మా పిల్లలితో యధాలాపంగా, "వచ్చే దసరా నాటికల్లా బాబా మనకి కొత్త కారు ఇస్తారులే" అని అన్నాను. బాబా మాత్రం తన బిడ్డ కంట నీరు చూడలేకపోయారు కాబోలు! తమ పని తాము మొదలుపెట్టారు.
.
రెండు, మూడు రోజుల తర్వాత కారు ఏదో శబ్దం చేస్తుందని నేను, మావారు కారుని షోరూంలో చూపెట్టాలని వెళ్ళాము. వాళ్ళు కొద్దిగా ఖర్చు ఎక్కువవుతందని అన్నారు. వెంటనే మావారు, "దీనిని ఎక్స్చేంజ్ చేస్తే, ఎంత డబ్బులు వస్తాయ"ని అని అడిగారు. వాళ్ళు కొంత మొత్తం చెప్పారు. అది విని మావారు కొత్త కారు తీసుకోవడానికి నిర్ణయం చేశారు. మా ఆర్థిక పరిస్థితి వలన నేను ఇంకోసారి ఆలోచించమని అన్నాగానీ కొత్త కారు కొనడం మంచిదని అన్నారు. వెంటనే అడ్వాన్స్ కూడా ఇచ్చారు. ఆరోజు గురువారం. మేము తిరిగి వచ్చేటప్పుడు బాబా పల్లకి ఎదురైంది. నేను దండం పెట్టుకుంటే, వాళ్ళు నాకు ఊదీ, స్వీట్ ఇచ్చారు. నాకు శుభసూచకంగా అనిపించింది. మనం కారు కొనగానే ఆనందంతో స్వీట్ పంచుతాం కదా! అలా బాబా అడ్వాన్స్ ఇవ్వగానే కారు తప్పక వస్తుందని ఆశీర్వదించి స్వీట్ ఇచ్చారనిపించింది నాకు. పనులు అన్నీ చకచకా జరిగి సరిగ్గా నెలరోజులకు అంటే 2023, నవంబర్ 23, గురువారం మా కొత్తకారు వచ్చింది. నేను నమ్మలేకపోయాను. అదేరోజు రాత్రి బాబా గుడిలో పూజ చేయించాం. ఇదంతా బాబా కరుణ తప్ప మరేం కాదు. ఆయన అసాధ్యాన్ని సుసాధ్యం చేసారు. నేను బాబాను నా తండ్రి అనుకుంటాను. అలాగే ఆయన కూడా తండ్రీ స్థానంలో ఉండి నా బాధ్యత తీసుకున్నారు. చాలా తక్కువ సమయంలో నాకోసం ఎన్నో చేశారు. ఆయనకు నేను ఏమి ఇవ్వగలను? మనస్ఫూర్తిగా ఒక నమస్కారం చేయడం తప్ప! "సాయిదేవా! మీకు శతకోటి నమస్కారాలు. మీ పాదాలను నమ్ముకుని ఉండేలా మమ్మల్ని ఆశీర్వదించు సాయితండ్రీ".
సమర్థ సద్గురు సాయినాథ్ మహరాజ్ కి జై.
బాబా మాట ఎన్నటికీ అసత్యం కాదు
సాయి బంధువులందరికీ నమస్కారం. 2023, సెప్టెంబర్ 25, సోమవారం సాయంత్రం నేను కాలు జారి పడిపోయాను. ఎడమ కాలు పూర్తిగా వెనక్కి వెళ్ళిపోయి వేళ్ళు, చీలమండ బెణికాయి. అసలే నేను బరువు మనిషిని. నేను పడ్డ వేగానికి ఇంకా పెద్ద దెబ్బలే తగలాలి. కానీ నేను పడుతూనే 'బాబా' అని గట్టిగా సహాయం కోసం అర్థిస్తూ, "నన్ను పైకి లేపమ"ని బాబాను అడిగాను. నిజంగా అద్భుతం. నేను లేవగలిగాను, నెమ్మదిగా నడవగలిగాను కూడా. రెండురోజుల తర్వాత ఎక్స్-రే తీయిస్తే వేలికి చిన్న ఎయిర్ క్రాక్ అయింది అన్నారు. అది కూడా అనుమానమే అని, "విశ్రాంతి తీసుకుంటే సరిపోతుంద"ని డాక్టర్ చెప్పారు. చివరిగా ఒక ముఖ్య విషయం చెప్పాలి. నేను పడిపోయే ముందురోజు 'నీ రేపటి దినాన్ని నేను కాచుకుంటాను' అని సాయి సందేశం వచ్చింది. చెప్పినట్లుగానే కాచి కాపాడారు. బాబా మాట ఎన్నటికీ అసత్యం కాదు. "థాంక్యూ సో మచ్ బాబా. నువ్వున్నావు, రక్షించావు. ఏదో పెద్ద కర్మను చిన్నగా తీసేసావు".
ఓం సచ్చిదానంద సమర్థ సద్గురు సాయినాథ్ మహారాజ్ కీ జై.
ఉన్న ఊరికే డిప్యూటేషన్ వచ్చేలా దయ చూపిన బాబా
