సాయిభక్తుల అనుభవమాలిక 1705వ భాగం....

---

ఈ భాగంలో అనుభవాలు:

1. అంతా సవ్యంగా జరిగేలా అనుగ్రహించిన బాబా

2. బాబా దయతో కనిపించిన భార్యాపిల్లలు

---

అంతా సవ్యంగా జరిగేలా అనుగ్రహించిన బాబా

సాయినాథాయ నమః!!! ముందుగా బాబాకు నా నమస్కారాలు. నేను ఒక సాయి భక్తురాలిని. నేను నా గత అనుభవంలో భూసంబంధిత సమస్యను బాబా ఎలా పరిష్కరించారో పంచుకున్నాను. తర్వాత ఆ భూమి రిజిస్ట్రేషన్ దసరా మరుసటిరోజు చేయాలని నిశ్చయించారు. అందువల్ల మేము దసరాకి మా ఊరు వెళ్లి రిజిస్ట్రేషన్ పూర్తి చేసుకొని వద్దామని అన్ని ఏర్పాట్లు చేసుకున్నాము. అయితే మాకు ఒక చిన్న పప్పీ(కుక్కపిల్ల) ఉంది. అది మా దగ్గర తప్ప ఇంకెవరి వద్ద ఉండదు. అందువల్ల దాన్ని కూడా మాతో తీసుకొని వెళ్లాలని అనుకున్నాము. అయితే ప్రైవేట్ బస్సులో దాన్ని తీసుకెళ్లడానికి అనుమతించరేమోనని, "బాబా! ఎలాగైనా దాన్ని తీసుకెళ్లాలి. బస్సువాళ్ళు అనుమతించాలి. అలాగే మా ప్రయాణం సాఫీగా జరిగేలా చూడు తండ్రీ. అంతా మంచిగా జరగాలి బాబా" అని బాబాను వేడుకున్నాను. బాబా దయవల్ల బస్సువాళ్ళు స్లీపర్ బస్సులో పప్పీని అనుమతించారు. మేము బస్సు ఎక్కిన దగ్గర్నుండి బయట ఎటు చూసినా నామం, ఫోటోలు, ప్రతిమల రూపాలలో చీకట్లో అంతటా దర్శనమిస్తూ అడుగడుగునా మా వెంట ఉండి, మా పప్పీ బస్సులో గొడవ చేయకుండా మౌనంగా ఉండేలా చేసి మా ప్రయాణం ఎలాంటి ఒడిదుడుకులు లేకుండా సాగేలా అనుగ్రహించారు నా బాబాతండ్రి. అలాగే దసరా మరుసటిరోజు రిజిస్ట్రేషన్ ఆఫీసుకి వెళితే, అక్కడ మెయిన్ ఎంట్రన్స్‌లో నా బాబా ఫోటో రూపంలో దర్శనమిచ్చి రిజిస్ట్రేషన్ మంచిగా జరిపించారు. "ధన్యవాదాలు బాబా. మా పాపకి బీటెక్ మొదటి సెమిస్టర్‌లో మంచి మార్కులు వచ్చేలా దీవించండి. నా బిడ్డ భవిష్యత్తు మీ చేతుల్లో పెడుతున్నాను. మా అన్ని పనుల్లో పెద్ద దిక్కుగా ముందుండి నడిపించండి బాబా. కస్టమర్లు బాగా వచ్చి నా బిజినెస్ మంచిగా జరిగేలా చూడు తండ్రీ. రెండోసారి సాయి దివ్యపూజ చేస్తున్నాను. నేను అనుకున్నవి జరిగేలా చూడు బాబా. ఎప్పుడూ మేము మీ బిడ్డలుగా బతికేలా చూడు బాబా".

---

బాబా దయతో కనిపించిన భార్యాపిల్లలు

సాయిభక్తులందరికీ నమస్కారాలు. నా పేరు వెంకటేశ్వరరావు. నేను 2011 నుండి సాయిబాబా భక్తుడిని. బాబా నా జీవితంలో ఎన్నెన్నో సహాయాలు చేసారు. నాకు పెళ్ళైన 5 ఏళ్ల వరకు పిల్లలు లేరు. ఆ తర్వాత బాబా కరుణ వల్ల మాకు ఒక పాప పుట్టింది. "ఇలాగే మాకు ఇంకో బాబు పుడితే బాగుంటుంద"ని బాబాని రోజూ ప్రార్థిస్తుండేవాడిని. అలా 8 ఏళ్ళు గడిచాయి. ఇక మాకు బాబు పుట్టాడులే అనుకున్న సమయంలో నా భార్య మళ్ళీ గర్భవతి అయింది. నేను రోజూ బాబాని, "బాబు కావాల"ని ప్రార్థిస్తూ ఉండేవాడిని. బాబా దయవల్ల నేను కోరుకున్నట్లు మాకు బాబు పుట్టాడు. బాబుకి 11వ నెల వచ్చాక పుట్టు వెంట్రుకలు తీయించదలచి 2023, నవంబర్ 5న తిరుపతి వెళ్లాలని అనుకున్నాం. అప్పుడు, "బాబా! స్వామివారి దర్శనం టికెట్లు, గదులు దొరికేలా దయచూపు తండ్రీ" అని బాబాను వేడుకున్నాను. బాబా దయవలన దర్శనం టికెట్లు, గదులు దొరకడంతో, "బాబా! మీ దయవలన తిరుపతి ప్రయాణం బాగా జరగాలి" అని అనుకొని తిరుపతికి ప్రయాణమయ్యాం. నవంబర్ 5, ఆదివారం మధ్యాహ్నం దర్శనానికి వెళ్ళినప్పుడు క్యూలో చెక్ చేసే చోట ముందు ఆడవాళ్ళని చెక్ చేసి, తరువాత మగవాళ్ళని చెక్ చేసారు. నా చెకింగ్ అయినా తర్వాత చూస్తే నా భార్యాపిల్లలు కనిపించలేదు. నా భార్యకి తిరుమలలో ఎలా వెళ్ళాలో, ఎటు వెళ్లాలో తెలియదు. అలాంటి తను మా పాప, బాబుని తీసుకొని ముందుకు వెళ్ళిపోయింది. అందువల్ల నేను, 'అయ్యో.. వాళ్ళకి ఏమీ తెలియదు. ఇప్పుడు ఎలా?' అని అనుకుంటూనే దర్శనం అయినా తర్వాత చూద్దామని క్యూలో వెళ్ళాను. దర్శనానంతరం గుడి లోపల అంతా చూసానుగాని నా భార్యాపిల్లలు కనిపించలేదు. "బాబా! బాగా రద్దీగా వుంది. చిన్న పిల్లలు గుడి లోపల కనిపించలేదు. మీ దయవలన వాళ్ళు నాకు కనిపిస్తే, మీ అనుగ్రహం తోటి భక్తులతో పంచుకుంటాను" అని బాబాతో చెప్పుకున్నాను. నా మనసుకి గుడి బయట చూస్తే బాగుంటుదనిపించి బయటకు వెళ్లి చూసాను. బాబా దయవలన నా భార్యాపిల్లలు కనిపించారు. "చాలా చాలా ధన్యవాదాలు బాబా".

---