1. అడిగినంతనే అన్నీ అనుగ్రహించే బాబా
2. బాబా ప్రసాదించిన అదృష్టం
అడిగినంతనే అన్నీ అనుగ్రహించే బాబా
నేను ఒక సాయి భక్తురాలిని. మాది మధ్య తరగతి కుటుంబం. నాకు తండ్రి లేడు. బాబానే నా తండ్రి. ఆయన అనుగ్రహంతో నాకు ఒక అందమైన పాప పుట్టింది. మావారు కువైట్‌లో ఉంటున్నందున పాపకి ఆరునెలల వచ్చేవరకు పేరు పెట్టలేకపోయాము. ఆరోనెల వచ్చాక 2023, ఆగష్టు 22న పాప నామకరణానికి ముహూర్తం పెట్టుకున్నాము. కానీ నేను చాలా టెన్షన్‌కి గురయ్యాను. ఎందుకంటే, నాకు సి-సెక్షన్ అయినప్పటి నుంచి నెలసరి రాలేదు. ఎప్పుడు వస్తుందో తెలియని పరిస్థితి. అందువల్ల, "బాబా! ఏ ఆటంకం లేకుండా కార్యక్రమం జరిగేలా చూడండి" అని బాబాని వేడుకున్నాను. బాబా దయ చూపారు. ఆగస్టు 14నే నాకు నెలసరి వచ్చింది. ఇక సంతోషంగా బాబా గుడిలో ఫంక్షన్ పెట్టుకొని పాపకి 'ధన్విక సాయి' అని నామకరణం చేసి, అందరికీ భోజనాలు పెట్టుకున్నాం. బాబా దయతో కార్యక్రమం చక్కగా పూర్తైంది. తర్వాత సెప్టెంబర్ 14న ఇండియా నుండి కువైట్ వెళ్లడానికి మావారు టికెట్ బుక్ చేసుకున్నారు. కానీ ఆరోజు మబ్బులు కమ్ముకొని వర్షం మొదలైంది. భారీ వర్షాలని వార్తలు వచ్చాయి. అందువల్ల నేను, "బాబా! మావారు క్షేమంగా వెళ్లాల"ని బాబాని కోరుకున్నాను. బాబా దయవల్ల మావారు క్షేమంగా కువైట్ చేరుకున్నారు. తర్వాత ఆయనకి ఆరోగ్యం అస్సలు బాగా లేకుండా పోయింది కానీ, బాబా దయవల్ల కుదుటపడింది.
బాబా ప్రసాదించిన అదృష్టం
సాయిబంధువులందరికీ నమస్కారం. నేను ఒక సాయిభక్తురాలిని. 2023, సెప్టెంబర్ నెల మూడో వారంలో నా భర్తకి గవదబిళ్ళలు వచ్చాయి. ఆ కారణంగా రెండు దవడలు వాచిపోయి నమలటానికి, మింగటానికి కష్టమైంది. హాస్పిటల్కి వెళ్తే, ఆంటిబయోటిక్స్ ఇచ్చారు కానీ, మూడురోజుల తర్వాత వాడమన్నారు. అది కూడా వాపు, నొప్పి బాగా ఎక్కువగా ఉంటేనే. మావారు మూడు రోజులు ఉదయం, సాయంత్రం దవడలకు ఊదీ రాసుకొని, మరికొంత ఊదీ నోటిలో వేసుకున్నారు. ఆశ్చర్యంగా పెద్ద సమస్య ఏమీ లేకుండా మూడు రోజుల్లో తగ్గిపోయింది. మా చిన్నపాప వయస్సు 2 సంవత్సరాలు. తనకి ఏమైనా వైరస్ సోకుతుందేమో అని చాలా భయపడ్డాను. బాబా దయవల్ల ఎవరికీ సోకలేదు. "చాలా చాలా ధన్యవాదాలు. చిన్నదైనా, పెద్దదైన అన్ని విషయాలలో మీరు మాకు తోడుగా ఉంటున్నారు తండ్రీ".
మేము ప్రస్తుతం ఉంటున్న ప్రాంతంలో హిందూ దేవాలయాలు లేవు. రెండు గంటల ప్రయాణ దూరంలో ఒక బాబా గుడి ఉంది. 2023, సెప్టెంబర్ 23, శనివారంనాడు ఆ గుడికి వెళదామనుకుని వెళ్లేముందు బాబాని, "బాబా! చాలా నెలల తర్వాత మేము మీ దర్శనానికి వస్తున్నాము తండ్రీ. ఏదైనా ఒక అద్భుతమైన అనుభవాన్ని మాకు ప్రసాదించండి. తద్వారా మీ మీద మాకు మరింత భక్తి పెరుగుతూ ఉండాలి" అని చెప్పుకొని బయలుదేరాము. మా పిల్లలు చిన్నవాళ్లు అయినందున రాత్రి 7.00 గంటల ట్రైన్‌కి తిరిగి ప్రయాణమవుదాం, 9 గంటలకల్లా ఇంటికి వచ్చేయొచ్చు అనుకున్నాము. అయితే మేము గుడికి వెళ్ళేసరికి సాయంత్రం 5.45 అయిపోయింది. 6.15కి జరగనున్న హారతి కోసం బాబా దర్శనాన్ని ఆపేసారు. హారతికి ఉంటే మేము ఎక్కాలనుకున్న ట్రైన్ తప్పిపోతోంది. అయినప్పటికీ నేను, నా భర్త, 'ఇంత దూరం వచ్చాము, హారతిలో పాల్గొనే వెళదాం' అని అనుకున్నాము. అంతలో హఠాత్తుగా పూజారి నా దగ్గరకి వచ్చి, "హారతి ఇచ్చే సమయంలో బాబాకి విసనకర్రతో విసరండమ్మా" అని అన్నారు. నేను చాలా ఆశ్చర్యపోయాను. ఎందుకంటే, అక్కడ చాలామంది ఉన్నారు. మాకంటే చాలా ముందుగా వచ్చినవాళ్ళు కూడా ఉన్నారు. బాబాని వచ్చేముందు 'నాకు ఒక మంచి అనుభవం ఇవ్వండి' అని కోరుకున్నాను కదా! బాబా నా కోరిక విని నాకీ అదృష్టాన్ని ప్రసాదించారని నాకనిపించింది. దాదాపు 20 నిమిషాలపాటు విసనకర్రతో బాబాకి విసిరాను. అప్పుడు బాబాకి చాలా దగ్గరగా ఉన్నట్లుగా అనిపించింది. ఆ అనుభూతిని మాటల్లో చెప్పలేను. చాలా చాలా బాగా అనిపించింది. బాబా దయవల్ల అంతసేపూ మా పిల్లలు ఏడవలేదు. దర్శనం బాగా జరిగింది. బాబాకి కప్పిన శాలువా కూడా నాకు ఇచ్చారు. చాలా సంతోషంగా బయలుదేరి తర్వాత ట్రైన్ ఎక్కి రాత్రి 10.30కి క్షేమంగా ఇంటికి చేరుకున్నాము. "చాలా చాలా ధన్యవాదాలు బాబా. ఎప్పుడూ మీ ఆశీస్సులు మా కుటుంబం మీద, మిమ్మల్ని నమ్ముకున్న వాళ్ళ మీద ఉండాలి తండ్రీ".
