సాయిభక్తుల అనుభవమాలిక 1460వ భాగం....

---

ఈ భాగంలో అనుభవాలు:

1. ఎంత కాపలా కాశారో బాబా!

2. ఐదు నిమిషాల వ్యవధిలో రెండు ప్రమాదాల నుండి కాపాడిన బాబా

---

ఎంత కాపలా కాశారో బాబా!

సాయిబంధువులందరికీ నా నమస్కారములు. నా పేరు రాజేశ్వరి. 2023, జనవరి 27న బాబా మా కుటుంబంపై చూపించిన అద్భుత అనుగ్రహాన్ని మీతో పంచుకోవడానికి చాలా సంతోషిస్తున్నాను. ఆరోజు ఉదయం నేను మా చిన్నబ్బాయిని స్కూల్లో దింపటానికి తీసుకువెళ్తూ నిద్రలో ఉన్న మా పెద్దబ్బాయితో, "తమ్ముడిని స్కూలుకి తీసుకువెళ్తున్నాను. డోర్ లాక్ చేసి వెళ్తాను" అని చెప్పాను. వాడు నిద్రలోనే 'సరే' అన్నాడు. నేను మా చిన్నబ్బాయిని స్కూలుకి తీసుకువెళ్లి, దింపేసి ఒక 20 నిమిషాల్లో ఇంటికి తిరిగి వచ్చాను. చూస్తే, ఇంటి తలుపు తీసి ఉంది. ‘మా పెద్దబ్బాయి లేచాడేమో’ అనుకుని తనను పిలిచాను. కానీ వాడు మంచి నిద్రలో ఉన్నాడు. ‘వాడు నిద్ర లేవకపోతే తలుపెలా తీసి ఉంది?' అని ఒక్క నిమిషం నాకు ఏమీ అర్థం కాలేదు. కంగారుగా గట్టిగా మా అబ్బాయిని నిద్ర లేపి, "తలుపు నువ్వేనా తీసి ఉంచావు?" అని అడిగాను. వాడు, "అసలు నేను లేస్తే కదా తలుపు తీయడానికి? నువ్వే కదా డోర్ లాక్ చేసుకుని వెళ్తున్నానని చెప్పావు" అన్నాడు. అంటే, నేను మెయిన్ డోర్ లాక్ చేయకుండానే మా చిన్నబ్బాయిని తీసుకుని వెళ్ళిపోయానన్నమాట. అసలు అప్పటివరకు ఎప్పుడూ అలా జరగలేదు. ఎందుకంటే, నేను బయటికి వెళ్ళేటప్పుడు డోర్ లాక్ వేసి ఒకటికి పదిసార్లు డోర్‌ని చెక్ చేసుకుంటాను. మా వాళ్ళందరూ, "డోర్‌ని అన్నిసార్లు చెక్ చేసి నువ్వే విరగగొడతావు" అంటారు. ఇంకా చిత్రం ఏమిటంటే, నేను చెక్ చేశాక మా చిన్నబ్బాయి కూడా ఒక పదిసార్లు చెక్ చేస్తాడు. మా ఇద్దరికీ ఆ అలవాటు చాలా ఎక్కువ. అటువంటిది ఇద్దరమూ అలా ఎలా వదిలేసి వెళ్ళామో నాకు ఇప్పటికీ అర్థం కాలేదు. సరే, ఎప్పుడైతే డోర్ వెయ్యలేదని నాకు అర్థమైందో నా బుర్ర పనిచేయడం మానేసింది. నా టెన్షన్ చూసి మా అబ్బాయి నన్ను కూర్చోబెట్టి, "అమ్మా! కంగారుపడకు. అన్నీ చెక్ చేసుకుందాం" అని అన్నాడు. అసలు విషయమేమిటంటే, డబ్బు రూపేణా, బంగారం రూపేణా 20 లక్షల రూపాయల విలువగల సొత్తు ఇంట్లో ఉంది. మరో నాలుగురోజుల్లో మా ఇంట్లో జరగబోయే ఫంక్షన్ కోసం అంతా తెచ్చిపెట్టుకున్నాను. ఇప్పుడు మీరే ఆలోచించండి, నా పరిస్థితి ఎలా ఉంటుందో! ఇదంతా వ్రాస్తుంటే, ఇప్పుడు కూడా నాకు వణుకు వస్తోంది. ఏడుస్తూనే గబగబా గదిలోకి వెళ్లి జాగ్రత్తగా చూసుకుంటే, అన్నీ ఉన్నాయి. ఆ 20 నిమిషాల వ్యవధిలో ఇంట్లో చీపురుపుల్ల కూడా పోలేదు. అంతా బాబా దయ. ఆయనే మా ఇంటిని మాకు ప్రసాదించింది. నేను ఎప్పుడూ, "అయ్యా! ఈ ఇంటి యజమాని మీరు. ఈ ఇంటిలో ఉండడానికి మాకు మీరు అవకాశం కల్పించారు. ఈ ఇంటిని, ఈ ఇంటిలో ఉంటున్న మమ్మల్ని ఎప్పుడూ మీరే కాపాడుతూ ఉండాలి" అని రోజూ బాబాను ప్రార్థించుకుంటాను. మేము బయటికి వెళ్ళినప్పుడల్లా, "స్వామీ! ఇల్లు జాగ్రత్త" అని బాబాకి చెప్తాను. నేను ఇంటికి వచ్చేదాకా బాబా ఇంటికి ఎంత కాపలా కాశారో చూడండి. ఆ 20 నిమిషాల సమయం తలుపు పూర్తిగా తీసివుంది, అన్ని గదుల తలుపులూ తీసివున్నాయి. లాకర్ తాళాలు లాకర్ పైనే ఉన్నాయి. మీరే ఆలోచించండి - బాబా దయ లేకపోతే, ఎవరన్నా తలుపులు తీసి ఉండటం చూసి, ఇంట్లో ఏ అలికిడీ లేదని గమనించి ఇంట్లోకి చొరబడి ఉంటే? ఈరోజుల్లో చిన్న వస్తువు పోయినా తిరిగి కొనటానికి చాలా సమయం పడుతుంది. అటువంటిది అంత విలువైన వస్తువులు ఏమైనా అయివుంటే మా పరిస్థితి ఎలా ఉంటుంది? కానీ నేను మర్చిపోయి వెళ్ళిపోయినా తిరిగి వచ్చేదాకా గుమ్మం దాటి ఎవరినీ ఇంటి లోపలికి రానివ్వలేదు ఆ సాయినాథుడు. ఆయన ప్రతి నిమిషం మా కుటుంబాన్ని కాపాడుతూ ముందుకు నడిపిస్తున్నారు. అందుకే ఈ అనుభవాన్ని మీతో పంచుకోవాలనిపించింది. "మమ్మల్నందరినీ సర్వకాల సర్వావస్థలలోనూ కరుణించి కాపాడుతున్నందుకు మీకు కోట్లానుకోట్ల వందనాలు సాయితండ్రీ".

---

ఐదు నిమిషాల వ్యవధిలో రెండు ప్రమాదాల నుండి కాపాడిన బాబా

నేను ఒక సాయి భక్తురాలిని. ముందుగా, దైనందిన జీవితంలో బాబా మమ్మల్ని ఏ విధంగా అనుగ్రహించి కాపాడి, తమ లీలలను చూపారో, ఆ లీలావైభవాన్ని సాటి సాయిబంధువులతో పంచుకొనే అవకాశాన్ని కల్పించిన సాయినాథునికి నా నమస్కారాలు. 2023, జనవరి 27, ఉదయం బాబా మమ్మల్ని రెండు ప్రమాదాల నుండి కాపాడారు. ఆరోజు ఉదయం నేను మా ఆడపడుచును తీసుకొని ఆటోలో హాస్పిటల్‌కి బయలుదేరాను. బెంగళూరులో ఎంతో రద్దీగా ఉండే రహదారిలో వెళుతుండగా ఒక పెద్ద ఆయిల్ ట్యాంకర్ యూటర్న్ తీసుకొని వేగంగా కుడివైపు నుండి మా ఆటోకు చాలా దగ్గరగా వచ్చింది. ఆ ట్యాంకర్ మా ఆటోకు తగులుతుందన్న సందర్భంలో నేను, 'సాయిరామ్' అని అనుకున్నాను. అంతే, ట్యాంకర్ ఆటో ప్రక్కగా ముందుకు వెళ్ళిపోయింది. మా ముందు వెళుతున్న కారుపై స్టిక్కర్ రూపంలో బాబా నవ్వుతూ 'నేనున్నాను' అని దర్శనమిచ్చారు. మరికాస్త ముందుకు వెళ్ళాక, అదివరకటిలాగే ఒక లారీ ఎడమవైపు నుంచి వచ్చింది. సాయి స్మరణ చేయగానే లారీ ఎడమవైపు నుంచి ముందుకు వెళ్ళడం, మా ఆటో ముందు వెళుతున్న మరో కారుపై 'ద్వారకామాయి' అన్న అక్షరాలు, త్రిశూలం కనిపించాయి. ఆవిధంగా ఐదు నిమిషాల వ్యవధిలో రెండుసార్లు వెంట్రుకవాసిలో పెద్ద ప్రమాదాల నుండి కాపాడి, 'నాతో తామున్నామ'న్న ధైర్యాన్ని ఇచ్చారు సాయి. "ధన్యవాదాలు సాయీ".

---