1. సొంతింటి కోరికను నెరవేర్చిన బాబా
2. నమ్మినవారి వెంట బాబా ఉంటారు
3. అడిగినంతనే అనుగ్రహించిన బాబా
సొంతింటి కోరికను నెరవేర్చిన బాబా
శ్రీ సచ్చిదానంద సద్గురు సాయినాథ్ మహరాజ్ కీ జై!!!
సాయిభక్తులకు నా హృదయపూర్వక నమస్కారాలు. నా పేరు రమ్య. మాది చిత్తూరు జిల్లాలోని బంగారుపాలెం. నేను సాయిభక్తురాలిని. నేను ఇప్పటివరకు ఈ బ్లాగులో ఇతరుల అనుభవాలు ఎన్నో చదివాను. ఈరోజు నా అనుభవాన్ని సాటి సాయిబంధువులతో పంచుకుంటున్నందుకు నాకు చాలా సంతోషంగా ఉంది. మా నాన్నగారి పేరు కె.రంగయ్య. ఆయన ఎలక్ట్రిసిటీ డిపార్ట్మెంటులో పనిచేస్తున్నారు. మా అమ్మ లక్ష్మమ్మ. ఆమె గృహిణి. మేము 20 సంవత్సరాలుగా ఒక అద్దెఇంటిలో నివసిస్తున్నాము. ఆ ఇల్లు చాలా చిన్నదిగానూ, ఇరుకుగానూ ఉండటం వల్ల చదువుకోవడానికి, నిద్రపోవడానికి, వంట చేయడానికి ఇబ్బందిగా ఉంటుంది. అన్నయ్య పెళ్లి తరువాత కుటుంబం పెద్దదవడంతో ఇంకా ఇబ్బందైంది. అది చాలదన్నట్లు ఇరుగుపొరుగు వల్ల కూడా ఇబ్బందులు వస్తుండేవి. మేము చాలా బాధలు పడ్డాము. ఎన్నోసార్లు ఇల్లు మారాలని ప్రయత్నించినప్పటికీ ఏ ప్రయోజనం లేకుండా పోయింది. దాంతో సొంతిల్లు తీసుకోవాలని నిర్ణయం తీసుకున్నాము. కానీ అది కూడా ముందుకు పోలేదు. అలా ఉండగా నేను 'సాయి మహరాజ్ సన్నిధి' బ్లాగులోని భక్తుల అనుభవాలు ప్రతిరోజూ చదువుతుండేదాన్ని. నెమ్మదిగా సాయి సద్గురునిపై నా నమ్మకం, విశ్వాసం బలపడింది. నా మనసులో, "ఓ సాయి సద్గురూ! ఈ ఊరిలో మా బడ్జెట్లో మేము ఒక ఇల్లు కొనుక్కునేలా అనుగ్రహించండి" అని బాబాకి మొక్కుకున్నాను. బాబా దయ చూపారు. మాకు ఒక మంచి ఇల్లు దొరికింది. మా కల నెరవేర్చిన బాబాకి చాలా చాలా కృతజ్ఞతలు. బాబా దయ ఆయన్ను నమ్ముకున్న అందరిపైనా ఇలాగే ఉండాలని కోరుకుంటున్నాను.
మా అన్నయ్య పేరు లక్ష్మీనారాయణ. తను గవర్నమెంట్ టీచర్. ఈ సంవత్సరం ప్రారంభం నుంచి తనకి ఒంట్లో నలతగా ఉంటుండేది. అందుబాటులో ఉన్న చిన్న డాక్టర్ల దగ్గరకి వెళితే జ్వరం తగ్గడం, మళ్ళీ రావడం జరుగుతుండేది, కానీ పూర్తిగా తగ్గేది కాదు. ఆ కారణంగా అన్నయ్య క్రమంగా బలహీనపడిపోయాడు. దాంతో ఇంట్లో మేమంతా ఎంతో బాధపడి పెద్ద డాక్టరు దగ్గరకి తీసుకెళ్లి టెస్టులు చేయిస్తే, టైఫాయిడ్ తొలిదశలో ఉందని తెలిసింది. మేము చాలా కంగారుపడ్డాం. నేను, "సాయీ! అన్నయ్యకి తొందరగా జ్వరం తగ్గిపోయి తను తిరిగి స్కూలుకి వెళ్తూ హాయిగా ఉండాలి" అని బాబాకి మ్రొక్కుకున్నాను. బాబా దయవల్ల వారంరోజులలో అన్నయ్యకి జ్వరం తగ్గిపోయింది. "ధన్యవాదాలు బాబా. అన్నయ్య, వదిన, పిల్లల్ని సదా రక్షించు సాయీ. నా తప్పేదైనా ఉంటే నన్ను క్షమించి మంచి మార్గంలో నడిపించండి. అందర్నీ కాపాడు సాయీ".
శ్రీ సచ్చిదానంద సద్గురు సాయినాథ్ మహరాజ్ కీ జై!!!
