సాయిభక్తుల అనుభవమాలిక 1022వ భాగం....

---

ఈ భాగంలో అనుభవాలు:

1. 'బాబా బాబా' అనుకుంటే సమస్య లేకుండా చేస్తారు బాబా

2. బాబా ప్రసాదమైన చిన్న అనుభవాలు

3. బాబా ఊదీ మహిమ

---

'బాబా బాబా' అనుకుంటే సమస్య లేకుండా చేస్తారు బాబా

రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు శ్రీ సాయినాథ్ మహరాజ్ కి జై!!!

నేను ఒక సాయిభక్తురాలిని. ముందుగా సాయిబంధువులకు నమస్కారం. "బాబా! ఈ బ్లాగు నిర్వహిస్తున్న సాయికి మీ సహకారం ఎప్పుడూ ఉండాలి. మీ ఆశీర్వాదంతో ఈ బ్లాగు దినదినాభివృద్ధి చెందాల"ని బాబాను కోరుకుంటూ ఆయన నాకు ప్రసాదించిన ఒక చిన్న అనుభవాన్ని మీతో పంచుకుంటున్నాను. మేము గ్రామంలో ఉంటాము. మా అబ్బాయి సిటీలో ఉంటాడు. తను రోజూ ఉదయం ఆఫీసుకి వెళ్ళేటప్పుడు నాకు ఫోన్ చేస్తాడు. ఆలాగే ఈమధ్య ఒకరోజు ఫోన్ చేస్తే నేను మాములుగా, "టిఫిన్ అయిందా?" అని అడిగాను. అందుకు తను, "అమ్మా! ఉదయం ముఖం కడుక్కునేటప్పుడు గొంతులో మంటగా అనిపించి చాక్లెట్ రంగులో వాంతి అయింది" అని చెప్పాడు. నేను, "రాత్రి ఏమి తిన్నావు?" అని అడిగాను. తను, "బిస్కెట్లు, ఖర్జూరం, ఆమ్లెట్, గారెలు, ఇంకా బోర్నవిటా కూడా త్రాగాను" అని భయంభయంగా చెప్పాడు. నేను గ్యాస్టిక్ సమస్య వల్ల జీర్ణం కాలేదేమో అని అన్నప్పటికీ తనకి భయంపోలేదు. ఏ చిన్న సమస్య వచ్చినా వెంటనే సాయిని స్మరించుకునే నేను 'సాయి సాయి' అనుకుంటూ డాక్టరైన మా మావయ్య కొడుకుకి ఫోన్ చేసి విషయం చెప్పి, మా అబ్బాయి పంపిన ఫోటోలు పంపాను. తను ఆ ఫొటోలు చూసి, "అన్న తిన్న పదార్థాల రంగులోనే వాంతి చేసుకున్నాడు. తనకి అస్సలు జీర్ణం కాలేదు. మరేం పర్వాలేదు" అని అన్నాడు. ఆ విషయం నేను మా అబ్బాయికి ఫోన్ చేసి చెప్పాను. కానీ తన భయం పోలేదు. అప్పుడు నేను, "బాబా! మా పెద్దబ్బాయి చాలా సున్నితస్తుడు, ఏ కొంచం కష్టమొచ్చినా భయపడతాడు. తనకి మళ్ళీ వాంతి కాకుండా ఉండాలి. అలా అయితే ఈరోజే మీ అనుగ్రహాన్ని బ్లాగులో పంచుకుంటాను" అని బాబాను వేడుకున్నాను. ఆ రాత్రి నేను బాబా చాలీసా చదివి, 'బాబా బాబా' అని నామస్మరణ చేస్తూ ఎక్కువ భాగం మెలుకువగా ఉన్నాను. మరునాడు ఆదివారం ఉదయం మా అబ్బాయి ఫోన్ చేసాడు. తన నుంచి ఏం వింటానో అని నేను భయంగా ఫోన్ లిఫ్ట్ చేశాను. వాడు ఆనందంతో మాట్లాడుతూ ఉంటే, ఆనందం నిండిన గొంతుతో తగ్గిందా అని అడిగాను. తను తగ్గింది అమ్మా అని చెప్పాడు. ఏ చిన్న సమస్య వచ్చినా 'బాబా బాబా' అనుకుంటే సమస్య లేకుండా చేస్తారు బాబా. నేను కోరుకున్నది ఏదైనా నాకు ఏ విధమైన బాధ కలగకుండా నన్ను అనుగ్రహిస్తారు బాబా. ఇలా ఎన్నోసార్లు నాకు టెన్షన్ లేకుండా చేసారు బాబా. "ధన్యవాదాలు బాబా. మమ్మల్ని అనుగ్రహించు స్వామి. మమ్ము, మా కుటుంబాన్ని సర్వదా కాపాడు బాబా. నాకున్న రెండు కోరికలు నెరవేరితే ఆ అనుభవాలను కూడా పంచుకుంటాను".

---

బాబా ప్రసాదమైన చిన్న అనుభవాలు

నా పేరు అభి. ముందుగా సాయిబంధువులందరికీ మరియు ఈ బ్లాగు నిర్వహిస్తున్న సాయికి నా నమస్కారాలు. నేను 6వ తరగతి చదవుతున్నప్పటినుంచి సాయిబాబా భక్తురాలిని. నాకు పెళ్ళైన తరువాత నా భర్త ముస్లిం కావడం వల్ల బాబాను పూజించడానికి సాధ్యపడలేదు. ఈమధ్య మాకు చాలా కష్టాలు వచ్చినప్పుడు మా ఫ్రెండ్ అయిన రమేష్ అన్న ప్రతిరోజూ బాబాని తలచుకోమని చెప్పారు. ఆయన ప్రతిరోజూ వాట్సప్‍లో సాయిభక్తుల అనుభవాలు పంపుతుంటే చదువుతున్నాను. ఇక నా అనుభవాల విషయానికి వస్తే... నేను టైలరింగ్ చేస్తాను. ఒకసారి ఒకామె బ్లౌజులు గురించి గొడవపడి వేరే వాళ్ళని నాకు బ్లౌజులు ఇవ్వకుండా చేయసాగింది. అప్పుడు నేను బాబాను తలచుకున్నాను. ఆయన దయవల్ల ఆమె మళ్లీ నాకు బ్లౌజులు ఇవ్వడం మొదలుపెట్టింది.

నాకు ముగ్గురు ఆడపిల్లలు. వాళ్ళలో ఇద్దరికీ ఫ్రీ సీటు రావాలని బాబాను కోరుకున్నాను. ఆయన దయతో నేను కోరుకున్నట్లే నా ఇద్దరు కూతుళ్లకి 6వ తరగతి ఫ్రీ సీటు వచ్చేలా అనుగ్రహించారు.

ఒకరోజు నేను బాబా సమాధి చెందిన తరువాత వారిని ఎక్కడ సమాధి చేయాలన్న విషయం గురించి చదువుతున్నప్పుడు ఇంకా కొంచం ఉందనగా నేను నిద్రపోయాను. అప్పుడు ఎవరో నన్ను కర్రతో తట్టి లేపినట్టు అనిపించి కళ్ళు తెరవగానే బాబా కనిపించారు. ఆయనే తమ చేతిలో ఉన్న కర్రతో నన్ను తట్టి లేపారని అర్థమైంది. ఆయన, "నువ్వు పూర్తిగా చదువు" అని చెప్పి మరుక్షణంలో అదృశ్యమయ్యారు. అది నా జీవితంలో మరిచిపోలేని అనుభవం. ఇలా చాలా అంటే చాలా అనుభవాలు నాకు ఉన్నాయి. "బాబా! మీకు చాలా చాలా కృతజ్ఞతలు. నా తప్పులు ఏవైనా ఉంటే క్షమించండి బాబా".

---

బాబా ఊదీ మహిమ

బాబాకి మరియు బాబా బిడ్డలందరికీ నా నమస్కారం. నా పేరు దేవి. నాకు బాబా అంటే ప్రాణం. 1983లో శిరిడీ దర్శనంతో మానాన్నగారు ఇచ్చిన నా జీవితంలోనే ఉత్తమమైన కానుక బాబా పరిచయం. అప్పటినుంచి ఈరోజు వరకు బాబానే నా సర్వస్వం. నాకు, నాకూతురికి మూగ జీవులన్నా, ముఖ్యంగా గాయపడిన జంతువులన్నా చాలా చాలా జాలి. అయితే కేవలం జాలిపడితే సరిపోదు కదా! బాబా భక్తులుగా చేతనైన సహయం చేసి వాటి బాధను తీర్చాలి. రాత్రివేళల్లో మా ఇంటికి చాలా పిల్లులు, కుక్కలు అన్నం తినడానికి వస్తాయి. వాటిలో ఒక కుక్కకి బాగా దెబ్బ తగిలి పైచర్మం ఊడిపోయి లోపల మాంసం బయటకు వచ్చి చీముకారడమేకాక వాసన రాసాగింది. దాన్ని వెటర్నరీ డాక్టరు దగ్గరకు తీసుకుపోదామంటే మావల్ల కాలేదు. దాని బాధ చూడలేక, ఏం చేయడానికి నాకు తోచక అది తినే అన్నంలో బాబా ఊదీ కలిపి రోజూ దాని బాధను తీర్చమని బాబాను అడిగేదానిని. అంతే మూడు వారాలలో దానికైన గాయం నెమ్మదిగా మానిపోయింది. ఇదంతా మన బాబా ఊదీ మహిమ. ఆయన మహిమకు నిదర్శనమైన ఈ క్రింద ఫోటోలు చూడండి.

---