సాయిభక్తుల అనుభవమాలిక 1030వ భాగం....

---

ఈ భాగంలో అనుభవాలు:

1. విషయమేదైనా బాబా చెవిన వేస్తే విజయం సిద్ధిస్తుంది

2. నమ్ముకున్న బాబా నిరాశపరచకుండా నా కోరిక తీర్చారు

3. ఏ ఇబ్బందీ లేకుండా విదేశం నుండి రప్పించిన బాబా

---

విషయమేదైనా బాబా చెవిన వేస్తే విజయం సిద్ధిస్తుంది

నా పేరు అనిత. నేను సాయితో నాకున్న మరికొన్ని అనుభవాలను ఇప్పుడు మీతో పంచుకుంటున్నాను. ఈమధ్య ఒకసారి మా పెద్ద అబ్బాయి తన పర్స్ ఎక్కడో పొగొట్టుకున్నాడు. అందులో డబ్బులతోపాటు బస్ పాస్ కూడా ఉంది. నేను, "బాబా! అ పర్స్ దొరికేటట్లు చేయండి స్వామి" అని బాబాను వేడుకున్నాను. ఆయన దయవల్ల మూడురోజుల తరువాత పర్సు కాలేజీలో దొరికింది. "చాలా చాలా దన్యవాదాలు బాబా".

అలాగే నాకు గుండెనొప్పిగా ఉంటే డాక్టరు దగ్గరకు వెళ్ళి చూపించుకున్నాను. డాక్టరు చెక్ చేసి, "ఏమీ లేదు, అది గ్యాస్ నొప్పి" అని చెప్పి మాత్రలు ఇచ్చారు. అయితే ఆ మాత్రలు  వేసుకుంటుంటే నాకు గుండె అంతా పట్టేసినట్లుగా ఉండి చచ్చిపోతానేమోనని నా మనసుకి అనిపించేది. అప్పుడు భయంతో, "అమ్మో.. నాకు ఏమైనా అయితే ఎలా బాబా? నా పిల్లలు చిన్నవాళ్ళు బాబా" అని బాబాను వేడుకుని, నా బాబా నాకు అన్యాయం చేయరని గొప్ప నమ్మకంతో ఉండసాగేదాన్ని. ఇంకా నేను ఒకవేళ చనిపోయేటట్లైతే నా బాబా నాకు దర్శనం ఇస్తారు. ఆ తర్వాతే నాకు ఏదైనా సంభవిస్తుంది అని అనుకునేదాన్ని. అప్పుడు సాయి అనుభవాలలో "నీ భక్తి ఫలిస్తుంది. నీకోసం నేను విమానం పంపి, దానిలో నిన్ను కూర్చండబెట్టి తీసుకుని వెళ్తాను. నీవు నిశ్చింతగా ఉండు!" అనే సాయి వచనం చదివి నా గుండె చెరువైపోయింది. నా బాబా పిలిస్తే పలికే తండ్రి. ఈ జన్మకు ఇంతకన్నా ఏం కావాలి అనిపించింది.

ఇంకొక అనుభవం ఏమిటి అంటే, "మా అబ్బాయికి 10వ తరగతిలో ఫస్టు క్లాసు వస్తే, నేను సాయిసచ్చరిత్ర పుస్తకాలు పంచుతాను" అని బాబాకి మొక్కుకున్నాను. బాబా దయవల్ల మా అబ్బాయికి 10/10 మార్కులు వచ్చాయి. అయితే నేను నా మ్రొక్కు మరచిపోయాను. దాన్ని బాబా మా ఎదురింటి ఫ్రెండ్ ద్వారా గుర్తు చేయించారు. కానీ ఆ పుస్తకాలు శిరిడీలోనే దొరుకుతాయి, ఇంకా ఎక్కడా దొరుకవు అని తెలిసింది. అప్పుడు నేను, "ఇప్పుడు ఎలా?  ఏమి చేయను బాబా?" అని బాబాను తలుచుకుని అన్ని సాయి మందిరాలలో అడిగి చూసాను. అన్నిచోట్లా పుస్తకాలు లేవు అని అన్నారు. తరువాత సచ్చరిత్ర పుస్తకాలు ఫ్లిప్ కార్ట్ లో ఉన్నాయి అని నాకు తెలిసింది. కానీ అందులో పుస్తకం అసలు ధర 75/- రూపాయలు అయితే 195/- రూపాయలకు అమ్ముతున్నారు. దాంతో ఇప్పుడు ఏంచేద్దాం అని అనుకున్నాను. బాబా దయవల్ల ఆ రాత్రి చూస్తే, ఫ్లిప్ కార్ట్ లో ఒక పుస్తకం 129/- అని, అదనంగా ఏ ఛార్జీలు లేవని ఆఫర్ పెట్టారు. వెంటనే నేను 6 పుస్తకాలు ఆర్డరు పెట్టి, "బాబా! సచ్చరిత్ర ఎవరి దగ్గర లేదో, వాళ్ళకే ఈ పుస్తకాలు అందాలి" అని అనుకున్నాను. నేను కోరుకున్నట్లే బాబా అనుగ్రహించారు. పుస్తకాలు కావాల్సిన వాళ్ళను మా ఇంటికే పంపి, పుస్తకాలను వాళ్లకి పంపిణీ చేసేలా బాబా అనుగ్రహించారు. నా తండ్రికి నేను నా జీవితాంతం ఋణపడి ఉంటాను. ఏ విషయాన్నైనా ముందుగా మనం బాబా చెవిలో వేస్తే ఆ పని యందు మనకు విజయం సిద్ధిస్తుంది.

సమర్ధ సద్గురు శ్రీ సాయినాథ్ మహరాజ్  కీ జై!!!

---

నమ్ముకున్న బాబా నిరాశపరచకుండా నా కోరిక తీర్చారు

నేను సాయిభక్తురాలిని. 2021, డిసెంబర్ నెల మొదటివారంలో బాబా ప్రసాదించిన ఒక అనుభవాన్ని నేనిప్పుడు మీతో పంచుకుంటున్నాను. కోవిడ్ సమయంలో ఎలాంటి ఆటంకాలు లేకుండా మా అబ్బాయి వివాహం బాబా జరిపించారని నేను ఇదివరకు పంచుకున్నాను. తరువాత నేను బాబాను, "వాళ్ళ సంసార జీవితం మంచిగా సాగేలా చూసి త్వరలో మాకు మనవడిని ప్రసాదించమ"ని వేడుకున్నాను. తరువాత మా కోడలి నోట 'ఎప్పుడెప్పుడు ఆ శుభవార్త వింటానా?' అని ఎదురు చూసాను. బాబా దయవల్ల పెళ్ళైన నెల రోజులకే మా కోడలు శుభవార్త చెప్పింది. నేను నమ్ముకున్న బాబా, నా తల్లితండ్రి తమ బిడ్డనైన నన్ను నిరాశపరచకుండా నా కోరిక తీర్చారు. ఈ కోరికతోపాటు నేను సాయిని ఇంకో కోరిక కోరాను. కానీ అది నెరవేరడానికి ఇంకా సమయం పడుతుంది. అందుకే ముందుగా నాకు సంతోషాన్నిచ్చిన ఈ అనుభవాన్ని మీతో పంచుకున్నాను. "చాలు సాయి. మమ్మల్ని మీ కృపా దృష్టితో చల్లగా చూడు తండ్రి. ధన్యవాదాలు సాయి". 

ఒకరోజు నేను మా పెద్దబాబు దగ్గర ఉన్నాను. నేను ఊర్లో ఉన్నా, పెద్దబాబు దగ్గర ఉన్నా మా చిన్నబాబు వీలు చూసుకుని నన్ను కలవడానికి వస్తాడు. ఆరోజు ఉదయం కూడా ఆఫీసు పని చూసుకుని దారిలో నన్ను కలుస్తానని చెపితే, నేను సరేనన్నాను. తరువాత ఉదయం 11, 12 గంటల సమయంలో నేను చిన్నబాబుకి ఫోన్ చేసి, "ఎక్కడ ఉన్నావు?" అని అడిగితే, "అమ్మా! ఇక్కడే ఉన్నాను, కాసేపట్లో వస్తాను. కానీ నాకు పైల్స్ సమస్య ఉన్నట్లు అనిపిస్తుంది. సరిగా కూర్చోలేకపోతున్నాను" అని చెప్పాడు. వాడు ఎంతో ఇబ్బంది ఉంటేనేగాని నాతో చెప్పి నన్ను ఇబ్బంది పెట్టడు. అలాంటిది అలా చెప్తుంటే నాకు చాలా భయమేసి, "బాబా! మీ దయతో బాబు తనకి తగ్గిందని చెప్పితే, నేను బ్లాగులో పంచుకుంటాను" అని బాబాను వేడుకున్నాను. తరువాత చిన్నబాబు తనకు తెలిసిన ఒక ఫ్రెండ్‍తో తన సమస్య గురించి చెపితే, అతను "నాకు కూడా అలా అయ్యింది. నాకు తెలిసిన డాక్టరు ఉన్నారు" అని చెప్పి ఆ డాక్టరు చేత మందులు ఇప్పించాడు. తరువాత నేను 2021, డిసెంబర్ 10న మా బాబుని "తగ్గిందా?" అని అడిగితే, "తగ్గిందమ్మా, మందులు అవసరం లేదు" అని చెప్పాడు. అంతా బాబా దయ. "ధన్యవాదాలు బాబా. నాకు అన్నీ మీరే సాయి. చిన్నబాబు విషయంలో నాకు ఒక కోరిక ఉంది. దాన్ని మీరే నెరవేర్చాలి సాయి".

---

ఏ ఇబ్బందీ లేకుండా విదేశం నుండి రప్పించిన బాబా

ఓం శ్రీసాయినాథాయ నమః!!! ముందుగా నా తండ్రైన సాయినాథుని పాదపద్మములకి నమస్కారములు. ఈ బ్లాగు నిర్వహిస్తున్న సాయికి ధన్యవాదాలు. నా పేరు యశోదమ్మ. మాది అనంతపురం. బాబా నాకు ప్రసాదించిన ఒక అనుభవాన్ని మీతో పంచుకుంటున్నాను. మా అమ్మాయి, అల్లుడు, మనువడు స్వీడన్‍లో ఉంటుండేవారు. వాళ్ళు ఈమధ్య ఇండియాకు తిరిగి రావాలని ప్లాన్ చేసుకున్నారు. కానీ ప్రస్తుత పరిస్థితులలో ప్రభుత్వం ఏ నిమిషంలో విదేశాల నుండి వచ్చేవారిని ఆపేస్తుందోనని చాలా భయపడుతుండేవాళ్ళం. నేను బాబాను ప్రార్థించి, "మా అమ్మాయివాళ్ళు ఏ ఇబ్బందీ లేకుండా ఇండియా వచ్చేస్తే, నా అనుభవాన్ని బ్లాగులో పంచుకుంటాన"ని మొక్కుకున్నాను. బాబా దయవలన ఎటువంటి ఆటంకాలు లేకుండా మా అమ్మాయివాళ్ళు 2021, డిసెంబర్ 8వ తేదిన ఇండియా వచ్చేసారు. ఆ సాయినాథుడు మా మీద చూపిన దయకు కోటికోటి ప్రణామాలు అర్పిస్తున్నాను. ఆయన దయ ఎప్పటికీ మా మీద, అందరి మీద ఇలాగే ఉండాలని బాబాను ప్రార్ధిస్తున్నాను.

---