1. బాబాను గట్టిగా మనసునిండా ప్రార్థించడం వల్ల జరిగిన మహిమ
2. బాబా ఉన్నారు - నిజంగా బాబా ఉన్నారు
3. అనుకున్న కార్యక్రమాన్ని చక్కగా జరిపించిన బాబా
బాబాను గట్టిగా మనసునిండా ప్రార్థించడం వల్ల జరిగిన మహిమ
నేను సాయిభక్తురాలిని. ముందుగా సాయిభక్తులందరికీ నమస్తే. ఈ బ్లాగు నిర్వాహకులకు వినయపూర్వక ధన్యవాదాలు. ప్రతి ఉదయం 'సాయిభక్తుల అనుభవమాలిక' చదవకపోతే ఆరోజు పరిపూర్ణం కాదు. వయసులో పెద్దవారైన మా అమ్మగారు అనారోగ్యాలను జయించి ఆరోగ్యంగా మాతో ఉండేలా దయతో అనుగ్రహించిన బాబాకు శతకోటి పాదాభివందనాలు. నేను మా అమ్మతో, "సచ్చరిత్ర, ఊదీలను నీకు రక్షగా ఉంచి, నిన్ను కాపాడుతున్నది సాయేన"ని చెప్పి, "సాయి నామజపం చేస్తుండమ"ని చెప్పాను. సాయిబాబాని మన హృదయంలో నిరంతరం కొలుస్తూ ఉందాం. ఇక నా అనుభవానికి వస్తే..
నేను నా గత అనుభవం ఒకదానిలో మా స్థలానికి సంబంధించిన వివాదంలో కోర్టు తీర్పు మాకు అనుకూలంగా వచ్చేలా బాబా అనుగ్రహించారని మీతో పంచుకున్నాను. అయితే ఆ జడ్జిమెంటుకు సంబంధించిన ఒరిజినల్ డాక్యమెంట్లను కోవిడ్ కారణంగా కోర్టులు నడవకపోవడం వంటి పలురకాల కారణాలతో మా న్యాయవాది మాకు ఇవ్వకుండా వాయిదా వేస్తుండేవారు. చాలాసార్లు ఫోన్ చేసినా, వ్యక్తిగతంగా కలిసినా 2019, ఏప్రిల్ నుండి ఇప్పటి వరకు కోర్టు కాగితాలు మాకు చేరలేదు. నేను నిరంతరం ఆ డాక్యూమెంట్ల కోసం సాయిని అడిగి విసిగిస్తూ ఉండేదాన్ని. ఆ సమస్యకాక నా ఉద్యోగరిత్యా దూరప్రయాణం వంటి ఇతర సమస్యలు నన్ను మానసిక ఒత్తిడికి గురిచేస్తుంటే ఒకరోజు సాయంత్రం నేను బాబాని చూస్తూ, "బాబా! గత రెండున్నర సంవత్సరాలుగా ఒరిజినల్ డాక్యూమెంట్స్ లేకపోవడం వల్ల మేము ఏవిధంగానూ ముందడుగు వేయలేకపోతున్నాం. నేను ఇప్పుడు న్యాయవాదికి ఫోన్ చేస్తాను. ఏదేమైనా మీరు కొంతైనా సానుకూల సమాధానం వచ్చేలా చేయండి బాబా" అని బాబాతో చెప్పుకుని ఫోన్కి, నా నుదుటికి బాబా ఊదీ పెట్టుకుని మరికొంత ఊదీ నోట్లో వేసుకుని ఫోన్ చేశాను. బాబాను గట్టిగా మనసునిండా ప్రార్థించడం వల్ల ఎంత విచిత్రం, ఎంత మహిమ జరిగిందో చూడండి. ఎప్పుడూ ఎదో ఒక కారణంతో కాగితాల కోసం విసిగిస్తున్నామని మాట్లాడే న్యాయవాది, "మీ కాగితాలు తీసుకోడానికి సోమవారం రండి, ఇప్పటికే ఆలస్యం అయ్యింది" అని అన్నారు. నేను సంతోషంతో మనసులోనే సాయినాథుని పాదాలను కన్నీటితో కడిగి ధన్యవాదాలు చెప్పుకున్నాను. తరువాత సోమవారం కోర్టుకి వెళ్తూ నా బ్యాగులో ఊదీ ప్యాకెట్ వేసుకుని మనసులో 'ఓం శ్రీసాయి మార్గబాంధవే నమః' (ఆటంకాలు తొలగించు తండ్రి) అని సాయి జపం చేస్తూ ఓపికగా ఉంటే సాయంత్రం నాలుగు గంటలకు మా ఒరిజినల్ డాకుమెంట్స్ మాకు ఇప్పించారు బాబా. "శతకోటి వందనాలు సాయీ! మా ఇంటి విషయంలో ముందడుగు పడేలా, నీ చల్లనిచూపులు మాపై నిరంతరం వర్షిస్తూ మా పిల్లలు చక్కగా చదువుకుని ఉన్నత స్థితిని పొందేలా, సుఖమయమైన చక్కని జీవితం గడిపేలా ఆశీర్వదించండి సాయి! ఆరోగ్య సమస్యల నుండి కాపాడు సాయినాథా! నా కష్టాలు నీకు తెలుసు, వాటిని పరిష్కరించు బాబా. నాకు దగ్గరలో ఉండే స్కూలుకి బదిలీ అయి, నీ నామజపం మరింతగా చేసుకునే అదృష్టం కలిగించు తండ్రి! శిరిడీ వచ్చే అదృష్టం కలిగించు తండ్రి. అందరినీ కాపాడు తండ్రి. అన్నింటికన్నా ముఖ్యంగా కలలో కూడా మీ స్మరణ, పాదసేవకు మేము దూరం కాకుండా కాపాడు తండ్రి".
బాబా ఉన్నారు - నిజంగా బాబా ఉన్నారు
నా పేరు సాహిత్య. ముందుగా ఈ బ్లాగు నిర్వాహకులకు, సాటి సాయిబంధువులకు నా నమస్కారాలు. "ఆలస్యంగా నా అనుభవాన్ని పంచుకుంటున్నందుకు నన్ను క్షమించండి బాబా". మాకు పాప పుట్టి నెలరోజులు అయ్యింది. తనకి పుట్టుకతోనే హార్ట్ ప్రాబ్లమ్ ఉన్నందున మేము మానసిక ఆందోళనలో ఉన్న ప్రస్తుత పరిస్థితుల్లో అకస్మాత్తుగా ఒకరోజు పాప ఉన్నట్టుండి బాగా ఏడవడం మొదలుపెట్టింది. ఎంత ఎత్తుకున్నా, పాలు పట్టినా ఏడుపు ఆపలేదు. ఈ నెల రోజుల్లో ఎప్పుడూ తను అలా ఏడవనందున నాకు చాలా చాలా భయమేసి బాబాని ఒక్కటే ప్రార్థించాను: "ప్లీజ్ బాబా, పాప ఏడుపు ఆపాలి. పాప ఏడుపు అపి హాయిగా నిద్రపోతే నా అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను" అని. అప్పుడే మా అమ్మకి 6నెలల బాబు ఉన్న మా వదిన గుర్తొచ్చి, తనకేమైనా చిట్కాలు తెలుసేమోనని తనకి ఫోన్ చేసింది. మా వదిన ఒక మందు చెప్పింది. ఆ మందు కొని తెచ్చి, వెయ్యగానే పాప ఏడుపు ఆపి హాయిగా బజ్జుంది. దాంతో నేను, మా అమ్మ హాయిగా ఊపిరి పీల్చుకున్నాం. ఆ క్షణాన మా ఆనందం మాటల్లో చెప్పలేనిది. అసలే సమస్య ఉన్న పిల్ల, అలా ఏడుస్తుంటే చూసి మేము తట్టుకోలేకపోయాం. సమయానికి బాబానే మా అమ్మకి వదిన గుర్తొచ్చేలా చేసారు. "థ్యాంక్యూ సో మచ్ బాబా. దయచేసి మా పాప మంచి ఆరోగ్యంతో కలకాలం బాగుండేలా దీవించండి బాబా"
నేను గర్భవతిగా ఉన్న రోజుల్లో ఉద్యోగం మానేసి ఇంట్లో(అత్తగారిల్లు) ఉన్నందున మా పనిమనిషి నాకు బాగా దగ్గరై తన విషయాలన్ని నాతో పంచుకోవడం మొదలుపెట్టింది. వాళ్ళ చిన్నకూతురికి పెళ్లయి 4 సంవత్సరాలైనా పిల్లలు లేరు. ఒక ట్రీట్మెంట్ అని కాదు చాలారకాల ట్రీట్మెంట్స్ తీసుకున్న తరువాత కూడా ఏం లాభం లేకపోవడంతో వాళ్ళు ఆశలు వదులుకున్నారట. ఆ విషయం తెలిసి నేను, "బాబా! ఆ అమ్మాయి గర్భవతి అయితే ఆ అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను" అని అనుకున్నాను. అద్భుతం ఏంటంటే, ఇప్పుడు ఆమెకి 4వ నెల. 4వ నెల వచ్చేవరకు ఆ విషయం ఆమెక్కూడా తెలియదట. ఆమె గర్భవతి అని మా పనిమనిషి ఎంతో సంతోషంగా నాతో చెప్పినప్పుడు నేను ఏదో తెలియని అవధులు లేని ఆనందానికి లోనయ్యాను. బాబా ఉన్నారు, నిజంగా బాబా ఉన్నారు. కాకపోతే అప్పుడప్పుడు మనల్ని పరీక్షిస్తారు. అయినా చివరికి మనకు ఆనందాన్ని ఇస్తారు. ఇది నిజంగా నిజం. "అన్నిటికీ థాంక్యూ సో మచ్ బాబా. మా తప్పులన్నింటికీ క్షమాపణ వేడుకుంటున్నాను బాబా, ముఖ్యంగా నా మొక్కులు తీర్చుకోకపోయినందుకు. త్వరలోనే తీర్చుకుంటాం బాబా. ప్లీజ్ క్షమించండి. మళ్లీ మళ్లీ ఆ తప్పులు చెయ్యను బాబా. మీ మీద భక్తివిశ్వాసాలు పెంపొందేలా మమ్మల్ని అనుగ్రహించి సన్మార్గంలో మమ్ము నడిపించండి బాబా". బాబా దయవల్ల త్వరలో నా పాపకి నయమై, తను ఆరోగ్యంగా ఉందన్న శుభవార్తతో మళ్లీ మీ ముందుకు రావాలని ఆశిస్తున్నాను.
ఓం శ్రీ సచ్చిదానంద సమర్ధ సద్గురు సాయినాథాయ నమః!!!
అనుకున్న కార్యక్రమాన్ని చక్కగా జరిపించిన బాబా
'సాయి మహారాజ్ సన్నిధి' బ్లాగును ప్రసాదించిన 'సాయి మహారాజ్'కు, బ్లాగును నిర్వహిస్తున్న బృందానికి నా హృదయపూర్వక నమస్కారాలు. నాపేరు రాధారాణి. మాది గుంటూరు జిల్లా, మల్లిఖార్జునపేట. మేము బాబా భక్తులం. మా ఇంటి దగ్గర బాబా గుడి ఉంది. మేము బాబా సేవలో నిమగ్నమై ఉంటాము. మాకు ఏ ఆపద వచ్చినా బాబా మాకు అన్యాయం చేయరనే ధైర్యంతో ఉంటాము. 2004వ సంవత్సరం నుండి బాబా ఎన్నో విధాలుగా మమ్మల్ని కాపాడుతూ ఉన్నారు. మేము 2021, అక్టోబరు 27న 'పంచ నాగేంద్రస్వామి' విగ్రహ ప్రతిష్ట చేయుటకు సంకల్పించుకోగా హఠాత్తుగా అక్టోబరు 15న మా నాన్నగారికి జ్వరం వచ్చి చాలా నీరసించిపోయారు. నేను, 'ఏమిటి ఇట్లా జరుగుతుంది?' అని అనుకుని, "బాబా! ఈ ఆపదను తొలగించండి తండ్రి. నా అనుభవాన్ని 'సాయి మహారాజ్ సన్నిధి'లో పంచుకుంటాను" అని బాబాతో చెప్పుకున్నాను. బాబా నా మొర ఆలకించారు. ఆయన కృపవలన 27వ తేదీన మేము అనుకున్న కార్యక్రమం చక్కగా జరిగింది. మన సాయినాథ్ మహారాజ్ కి శతకోటి వందనాలు.
