సాయిభక్తుల అనుభవమాలిక 1034వ భాగం....

---

ఈ భాగంలో అనుభవాలు:

1. బాబా దయతో సుఖమయమైన ప్రయాణం - వచ్చిన పాస్‌పోర్టు

2. బాబాని తలచుకోగానే దొరికిన సర్టిఫికెట్

3. చెడు కలలు రాకుండా అనుగ్రహించిన బాబా

---

బాబా దయతో సుఖమయమైన ప్రయాణం - వచ్చిన పాస్‌పోర్టు

నేను బాబా భక్తురాలిని. ముందుగా బాబా భక్తులందరికీ నమస్తే. నేను ఈరోజు బాబా నాకు ప్రసాదించిన కొన్ని అనుభవాలను మీతో పంచుకోబోతున్నాను. ఒకరోజు 'మా వదిన కొడుక్కి ఆరోగ్యం బాగాలేదని, అతని పరిస్థితి విషమంగా ఉన్నందువల్ల అతను వెంటిలేటర్ మీద ఉన్నాడ'ని మరో వదిన నాకు ఫోన్ చేసి చెప్పింది. ఈ వార్త విన్న నేను, నా భర్త చాలా కలతచెందాము. కానీ నా భర్త బిజీ షెడ్యూల్ వలన మేము వెంటనే వెళ్లడానికి కుదరలేదు. తీరా వెళదామని ట్రైన్‌ టిక్కెట్ల కోసం చూస్తే, తిరుగు ప్రయాణానికి RAC టిక్కెట్లు ఉండగా వెళ్లేందుకు మాత్రం కొన్నిరోజుల వరకు టిక్కెట్లు అందుబాటులో లేవు. అందువలన మేము కలవరపడి తప్పనిసరై బస్సుకి టిక్కెట్లు బుక్ చేసుకున్నాము. అయితే వాంతుల సమస్య వలన బస్సు ప్రయాణం నాకు చాలా ఇబ్బందికరంగా ఉంటుంది. అయినా వేరే దారిలేక నేను 13 గంటల ప్రయాణం ఎలా చేస్తానని ఆందోళనపడ్డాను. అదలా ఉంటే, దురదృష్టవశాత్తు ప్రయాణమవ్వాల్సినరోజున అజీర్తి కారణంగా వాంతులు, విరోచనాలతో నేను అనారోగ్యం పాలయ్యాను. ఇంక ఆ స్థితిలో ఎలా ప్రయాణం చేస్తానని చాలా కలతచెందాను. మావారికి ఫోన్ చేసి, "మధ్యాహ్నం 2 గంటలలోపు నా పరిస్థితి బాగుంటేనే నేను వస్తాను. లేదంటే నేను రాలేను" అని చెప్పాను. అందుకాయన బాధతోనే సరే అన్నారు. ఆ తర్వాత నేను మందులు వేసుకుని, నిరంతరాయంగా బాబా నామాన్ని జపిస్తూ, ఊదీనీళ్లు తీసుకుంటూ, "బాబా! నేను ఈ పరిస్థితి నుండి సరిగా మధ్యాహ్నం రెండు గంటలకల్లా బయటపడాలి" అని బాబాను ప్రార్థించాను. కాసేపు పడుకుని లేచి మా ప్రయాణం కోసం పెరుగన్నం తయారుచేశాను. కానీ నాకు నీరసంగా, మగతగా ఉంది. ఓ.అర్.ఎస్ లిక్విడ్ తీసుకున్నప్పటికీ నా పరిస్థితి మెరుగుపడినట్లు నాకు అనిపించలేదు. అయినప్పటికీ ప్రయాణానికి నన్ను నేను సన్నద్ధపరుచుకుని కొద్దిగా పెరుగన్నం తిన్నాను. బాబా దయవలన నెమ్మదిగా నా పరిస్థితి మెరుగవడంతో మేము వెళ్లి బస్సు ఎక్కాము. నేను నిరంతరాయంగా బాబాను స్మరిస్తూ, "రైలు ప్రయాణానికి టిక్కెట్లు దొరకని కారణంగా వాంతులు, విరోచనాలతో నా పరిస్థితి బాగాలేకపోయినప్పటికీ బస్సు ఎక్కాను బాబా. నన్ను జాగ్రత్తగా చూసుకోండి బాబా" అని బాబాను ప్రార్థించసాగాను. నేను రాత్రంతా నిద్రపోలేదు. కానీ బాబా దయతో నేను ఏ సమస్యనీ ఎదుర్కోలేదు. ఒకచోట డిన్నర్‍కి బస్సు ఆపినప్పుడు మాత్రమే నేను వాష్‍రూమ్‍కి వెళ్ళొచ్చాను. ఆ తర్వాత 12 గంటల ప్రయాణంలో నాకు వాష్‍రూమ్ అవసరం అస్సలు రాలేదు. ఇదంతా బాబా దయవల్లనే సాధ్యమైంది. తరువాత తిరుగు ప్రయాణంలో RAC టిక్కెట్లు బాబా దయవల్ల కన్ఫర్మ్ కావటంతో హాయిగా పడుకుని వచ్చాము. నిజానికి మా ప్రయాణానికి రెండురోజుల ముందు అటుఇటు తిరగడం వలన నిద్రలేక బాగా నీరసంగా ఉన్నాము. కేవలం బాబా దయవల్ల మేము సౌకర్యవంతంగా ప్రయాణం ముగించుకుని మా గమ్యస్థానానికి చేరుకున్నాము. "థాంక్యూ బాబా". చివరిగా, మా అనుభవాలను పంచుకోవడానికి ఈ వేదికను ఇచ్చిన భయ్యాకు చాలా కృతజ్ఞతలు.

2019, ఆగస్టు 29న మా అమ్మాయి మైనర్ పాస్‌పోర్ట్ ఎక్స్‌పైర్ అయింది. కాబట్టి తనకి పద్దెనిమిది సంవత్సరాలు నిండాక 2019, సెప్టెంబరులో కొత్త పాస్‌పోర్ట్ కోసం దరఖాస్తు చేసుకోవాల్సి ఉంది. కానీ మాకు సరైన చిరునామా లేదు. కారణం మేము నాగపూర్‍కి చెందినవాళ్ళం. మా ఆధార్ కార్డు కూడా నాగపూరుకి చెందినదే. కాబట్టి మేము ముందుగా ఆధార్‍లో చిరునామా మార్పు కోసం దరఖాస్తు చేసి, డ్రైవింగ్ లైసెన్స్‌కి కూడా దరఖాస్తు చేశాము. ఈ రెండు కార్డుల ప్రక్రియ పూర్తయ్యేసరికి దాదాపు 2, 3 నెలలు పట్టింది. ఆ రెండు కార్డులు(ఆ అనుభవాలు ఇదివరకు పంచుకున్నాను) ప్రస్తుత చిరునామాతో రాగా వాటిని అడ్రస్ ధ్రువీకరణ పత్రాలుగా సమర్పించి పాస్‌పోర్టుకి దరఖాస్తు చేద్దామనుకున్నాము. కానీ 2019, డిసెంబరు, 2020, జనవరిలలో మా అమ్మాయికి JEE, మెయిన్స్ ప్రవేశ పరీక్షలు ఉన్నందున పాస్‌పోర్టుకి దరఖాస్తు చేయలేదు. తీరా 2020, మార్చిలో దరఖాస్తు చేయాలనుకుంటే కరోనా మొదలై అంతటా లాక్‍డౌన్ విధించారు. అందుచేత మేము పాస్‌పోర్ట్ కోసం దరఖాస్తు చేయలేకపోయాము. తరువాత ఈ సంవత్సరం ఎలాగైనా తొందరగా పాస్‌పోర్ట్ కోసం దరఖాస్తు చేద్దామనుకున్నాము. ఎందుకంటే, కాలేజీలు తెరిచాక మా అమ్మాయి తన చదువుకోసం వేరే ఊరు వెళ్తే పాస్‌పోర్ట్ రావడం కష్టమైపోతుంది. కారణం పాస్‌పోర్ట్ వెరిఫికేషన్‍కి వచ్చినప్పుడు దరఖాస్తు చేసుకున్న మా అమ్మాయి ఇంట్లోనే ఉండాలి. అయితే అంతలోనే మా అమ్మాయి చదివే కాలేజీ నుండి 2021, అక్టోబరు 25 నుండి కాలేజీ మొదలవుతుందని మెయిల్ వచ్చింది. దాంతో మేము అక్టోబరు 19న రెండు, మూడు రోజులల్లో వచ్చేస్తుందని తత్కాల్ పాస్‌పోర్ట్‌కి దరఖాస్తు చేశాము. దురదృష్టవశాత్తు మా అమ్మాయి జ్వరంతో బాధపడుతుండటంతో మేము అక్టోబరు 22కి పాస్‌పోర్ట్ స్లాట్‌ను రీషెడ్యూల్ చేశాము. బాబా దయవల్ల రీషెడ్యూల్డ్ పాస్‌పోర్ట్ స్లాట్ దొరికింది. అంతలో అకస్మాత్తుగా కాలేజీ అక్టోబర్ 26 నుండి తెరవబడుతుందని మాకు తెలిసింది. మేము సహాయం కోసం బాబాను ప్రార్థించి పాస్‌పోర్ట్ ఆఫీసుకి వెళ్ళాము. మా అమ్మాయి అన్ని ఫార్మాలిటీస్ పూర్తిచేసాక పాస్‌పోర్ట్ ఆఫీసువాళ్ళు మరుసటిరోజు పాస్‌పోర్ట్ వస్తుందని చెప్పారు. కానీ మరుసటిరోజు పాస్‌పోర్ట్ మా ఇంటికి రాలేదు. ఆ మరుసటిరోజు కూడా పోస్టల్ పనివేళలు ముగిసినప్పటికీ పాస్‌పోర్ట్ మాకు చేరలేదు. దాంతో మళ్ళీ నేను సహాయం కోసం బాబాను ప్రార్థించాను. ఆ తరువాత మేము సాయంత్రం ప్రత్యక్ష ప్రసారంలో ఆరతి వింటుండగా పోస్ట్‌మ్యాన్ వచ్చి పాస్‌పోర్ట్ డెలివరీ ఇచ్చి, మా అమ్మాయి సంతకం తీసుకున్నాడు. మరుసటిరోజు మేము వెరిఫికేషన్ ఆఫీసర్ కోసం ఎదురుచూసాము. ఎందుకంటే, ఆ మరుసటిరోజే మా అమ్మాయి కాలేజీకి మేము ప్రయాణమవ్వాల్సి ఉంది. బాబా దయవల్ల ఆరోజు సాయంత్రం వెరిఫికేషన్ ఆఫీసర్ వచ్చి సర్టిఫికెట్స్ చూసి, సాక్షి సంతకం అడగకుండానే వెళ్లారు. మాకు చాలా సంతోషంగా అనిపించింది. ఇది చిన్న సంఘటన కావొచ్చు కానీ మాకు ఇది పెద్ద అద్భుతం. ఎందుకంటే, మేము బదిలీ మీద తిరిగే ఉద్యోగస్థులం. మాకు శాశ్వత చిరునామా అంటూ లేదు. అలాంటిది మేము మా అమ్మాయి పాస్‌పోర్ట్ పొందాము అంటే అది కేవలం బాబా దయే. "ధన్యవాదాలు బాబా. నా అనుభవాన్ని ఆలస్యంగా పంచుకున్నందుకు క్షమించండి".

---

బాబాని తలచుకోగానే దొరికిన సర్టిఫికెట్

ఓం శ్రీసాయినాథాయ నమః!!! నా పేరు తిలోత్తమ్మ. శ్రీసాయినాథుని దివ్యపాదాలకు శిరస్సు వంచి నమస్కరిస్తూ సాయిబాబా మాపై చూపిన ప్రేమ, కరుణలను సాటి సాయిభక్తులతో పంచుకుంటున్నాను. ముందుగా సాయిబంధువులకు, 'సాయి మహారాజ్ సన్నిధి' నిర్వహిస్తున్న సాయికి నా నమస్కారాలు. మావారు ఒకసారి తప్పనిసరై ఒక సర్టిఫికెటును స్కూల్లో ఇవ్వాల్సి వచ్చి దాన్ని ఉంచిన ఫైలులో చూస్తే అది కనిపించలేదు. ఎంత వెతికినా ఆ సర్టిఫికెట్ దొరకలేదు. ఆ తరువాత మా ఇంట్లో దీపం వెలిగించారు. అప్పుడు నేను ఆ సర్టిఫికెట్ దొరకాలని బాబాని వేడుకున్నాను. తరువాత చివరిసారిగా మావారు స్కూలుకి వెళ్ళేటప్పుడు ఆ ఫైలు తెరచిచూశారు. అద్భుతం! ఫైల్ తెరవగానే పైననే  ఆ సర్టిఫికెట్ కనిపించింది. అంతవరకు కనిపించని ఆ సర్టిఫికెట్ బాబాని తలచుకోగానే దొరికింది. "ధన్యవాదాలు బాబా. మాకు వివాహమై కొన్ని సంవత్సరాలవుతున్నా సంతానం కలగలేదు బాబా. కరోనా కారణంగా ట్రీట్మెంట్ ఆపేసిన మేము మీ దయతో మళ్లీ మొదలుపెట్టాము. మాకు సంతానం కలిగేలా అనుగ్రహించండి బాబా. నా కోరిక నెరవేరితే, 'సాయి మహరాజ్ సన్నిధి' బ్లాగ్ ద్వారా సాటి సాయిభక్తులతో నా అనుభవాన్ని పంచుకుంటాను. మా మీద దయచూపండి బాబా. మా తమ్ముడి ఉద్యోగం కోసం ఒకరికి డబ్బులిచ్చి మోసపోయాం బాబా. పోలీసు స్టేషన్, కోర్టుల చుట్టూ తిరుగుతున్నా సమస్య పరిష్కారం కావడం లేదు బాబా. దయతో ఆ డబ్బు మా నాన్నకి అందేలా చేయండి సాయీ. ఆ డబ్బులు మాకు అందితే, ఆ అనుభవాన్ని బ్లాగులోని సాయిభక్తులతో పంచుకుంటాను".

సర్వం శ్రీ సాయినాథార్పణమస్తు!!!

---

చెడు కలలు రాకుండా అనుగ్రహించిన బాబా

నా పేరు ఉదయకుమారి. మేము విజయవాడలో ఉంటాము. ముందుగా ఈ బ్లాగు నిర్వహిస్తున్న సాయికి నా నమస్కారం. సాయి నాకు ప్రసాదించిన అనుభవాన్ని బ్లాగులో పంచుకున్నందుకు చాలా సంతోషంగా ఉంది. నాకు ఈమధ్య మావారి ఆరోగ్యం గురించి చాలా చెడ్డ కలలు వస్తుండేవి. అందువల్ల నాకు చాలా భయంగా ఉంటుండేది. అప్పుడు మా వదిన ద్వారా నాకు ఈ బ్లాగ్ గురించి తెలిసి, "బాబా! నాకు చెడు కలలు రావడం ఆగిపోవాలి" అని బాబాకి దణ్ణం పెట్టుకుని, "అలా జరిగితే నా అనుభవాన్ని బ్లాగులో పంచుకుంటాను బాబా" అని అనుకున్నాను. బాబా నా కోరిక తీర్చారు. చెడు కలలు రావడం ఆగిపోయింది. అందుకే నా అనుభవాన్ని ఇలా తోటి సాయిబంధువులతో పంచుకున్నాను. "బాబా! నా అనుభవం పంచుకోవడంలో కొంచం ఆలస్యమైనందుకు క్షమించండి. మీ కృప ఎప్పుడూ మా అందరిమీదా ఇలాగే ఉండాలని కోరుకుంటున్నాను బాబా. త్వరలో కరోనా పూర్తిగా అంతమై ప్రపంచమంతా శాంతిసౌఖ్యాలతో ఉండేలా అనుగ్రహించండి బాబా".

ఓంసాయి శ్రీసాయి జయజయ సాయి!!!

---