1. అడిగిన వెంటనే అనుగ్రహిస్తున్న బాబా
2. మందులు లేకుండానే షుగర్ కంట్రోల్ చేసిన బాబా
3. రిపోర్టులన్నీ నార్మల్ వచ్చేలా అనుగ్రహించిన బాబా
అడిగిన వెంటనే అనుగ్రహిస్తున్న బాబా
బాబా భక్తులందరికీ నమస్కారం. నా పేరు మహేష్. నేను ఇంతకుముందు బాబా ప్రసాదించిన కొన్ని అనుభవాలను మీతో పంచుకున్నాను. ఇప్పుడు మరికొన్ని అనుభవాలు పంచుకుంటాను. ఇటీవల మా అక్క కూతురుని హైదరాబాదులోని ఒక మంచి స్కూలులో జాయిన్ చేద్దామని స్కూలుకి తీసుకెళ్తే, వాళ్ళు ముందుగా తనకొక పరీక్ష పెట్టారు. కరోనా సమయంలో స్కూలులేక పాప చదువులో వెనుకబడి ఉన్నందున తను ఏమీ వ్రాయలేకపోయింది. దాంతో ఆ స్కూలు టీచర్ మరో అవకాశమిస్తూ పరీక్ష వ్రాయడానికి ఇంకొక రోజు రమ్మన్నారు. చాలా మంచి పేరున్న అటువంటి స్కూల్లో చదివితే తన భవిష్యత్తు బాగుంటుందనిపించి నేను, "బాబా! అక్క కూతురుకి ఆ స్కూలులో ఎలాగైనా సీట్ వచ్చేలా ఆశీర్వదించండి. మీ దయవలన తనకి సీట్ వస్తే, ఈ అనుభవాన్ని మన బ్లాగులో పంచుకుంటాన"ని బాబాను మనస్ఫూర్తిగా వేడుకున్నాను. తరువాత స్కూలు వాళ్ళు రమ్మన్న రోజు పాప వెళ్లి పరీక్ష వ్రాసింది. కాసేపటికి టీచర్ వచ్చి, "పాపకి సీట్ ఓకే" అని చెప్పగానే మాకు చాలా ఆనందమేసింది. "చాలా చాలా ధన్యవాదాలు బాబా".
2021, అక్టోబరులో మా యూత్ అంతా కలిసి దేవీశరన్నవరాత్రులు జరుపుకున్నాము. ఆ ఉత్సవాలలో భాగంగా మా యూత్‍లోని వాళ్ళు రోజుకొకరు చొప్పున దేవీ పూజలు చేయాలనుకుని, ఏరోజు ఎవరు పూజ చేయాలన్న విషయంగా 9 మంది పేర్ల మీద చీటీలు వేసాము. నేను బాబాని తలుచుకుని, 'నాకు పూజ చేసే అవకాశం గురువారం నాడు రావాల'ని మనసులో అనుకుంటూ చీటీ తీసాను. అద్భుతం! బాబా అనుగ్రహం వలన నాకు గురువారమే వచ్చింది. ఆయన కృపవల్ల ఆ రోజు పూజా కార్యక్రమాలు చాలా వైభవంగా జరిగాయి. ఇంకా, "ఈసారి ఉత్సవాలు ఎలాంటి ఆటంకాలు లేకుండా బాగా జరిగినట్లైతే, బ్లాగులో పంచుకుంటాన"ని నేను బాబాతో చెప్పుకున్నాను. నేను కోరుకున్నట్లే తొమ్మిదిరోజులూ ఉత్సవాలు చాలా ఘనంగా జరిగాయి. అంతా బాబా కృప. "ధన్యవాదాలు బాబా".
పరీక్షా కేంద్రంలో ఒకసారైనా ఇన్విజిలేటర్గా పని చేయాలన్నది నా ఆశ. నేను ఇటీవల నా చదువు పూర్తిచేసి ఖాళీగా ఉంటున్నాను. ఒకసారి డిగ్రీ పరీక్షలు జరుగుతుండగా నేను మా కాలేజీ సార్‍కి ఫోన్ చేసి, "నాకు ఇన్విజిలేటర్గా చేయాలని ఉంద"ని చెప్పాను. సార్, "మళ్ళీ ఫోన్ చేసి చెప్తాను" అంటూ కాల్ కట్ చేశారు. అలా రెండు, మూడుసార్లు జరిగింది. అప్పుడు నేను ఆ విషయం గురించి బాబాతో చెప్పుకున్నాను. సరిగ్గా గురువారంనాడు బాబా పూజ పూర్తికాగానే కాలేజీ సార్ వద్దనుంచి, "ఇన్విజిలేటర్గా అవకాశం ఇస్తామ"ని మెసేజ్ వచ్చింది. సాయినాథుని అనుగ్రహంతో ఇన్విజిలేటర్గా నేను విధులు సక్రమంగా నిర్వర్తించాను. ఈవిధంగా బాబా నా చిన్న కలను నెరవేర్చారు. "థాంక్యూ సో మచ్ బాబా".
ఈ మధ్యకాలంలో ఒక అనారోగ్య సమస్య కారణంగా మా అక్కకి తప్పనిసరిగా ఆపరేషన్ చేయాలని డాక్టరు చెప్పారు. అయితే ఆపరేషన్ చేసే ముందు అక్కకి బ్లడ్ టెస్ట్ చేయించగా టైఫాయిడ్, మలేరియా రెండూ నిర్ధారణ అయ్యాయి. దాంతో డాక్టర్లు, "ఆ రెండు జ్వరాలు వల్ల టెంపరేచర్ ఎక్కువగా ఉంది. అది తగ్గితేనే ఆపరేషన్ చేస్తాము" అన్నారు. అప్పుడు నేను బాబాను, "అక్కకి రెండు జ్వరాలూ తగ్గి, విజయవంతంగా ఆపరేషన్ పూర్తయితే, కొబ్బరికాయ కొట్టి, పరమాన్నం నైవేద్యంగా సమర్పించుకుంటాను. అలాగే ఈ అనుభవాన్ని బ్లాగులో పంచుకుంటాన"ని వేడుకున్నాను. బాబా ఆశీర్వాదంతో ఒక్కరోజులో టెంపరేచర్ నార్మల్ స్థాయికి రావడంతో అక్కకి ఆపరేషన్ జరిగింది. ఈవిధంగా నా బాబా నేను అడిగిన వెంటనే అనుగ్రహిస్తున్నారు. "బాబా! నాకు ఉద్యోగం లేదు, వ్యాపారమూ లేదు. ఆర్థికంగా అభివృద్ధి లేదని చాలామంది చులకనగా చూస్తున్నారు బాబా. మీ దయవలన ఒక వ్యాపారం మొదలుపెడదామని అనుకుంటున్నాను. అందుకు సంబంధించి పూర్తి బాధ్యత మీదే బాబా. ఈ మీ భక్తుడిని మీరే ముందుకు నడిపించాలి". చివరిగా బాబా నాకు మరిన్ని మహాద్భుతమైన లీలలను ప్రసాదించాలని కోరుకుంటూ.. మరికొన్ని అనుభవాలతో మళ్ళీ మీ ముందుకు వస్తానని తెలియజేస్తూ సెలవు తీసుకుంటున్నాను.
ఓంసాయి శ్రీసాయి జయజయ సాయి!!!
మందులు లేకుండానే షుగర్ కంట్రోల్ చేసిన బాబా
బాబాకు నమస్కరిస్తూ, వారి ఆశీస్సులు మనందరికీ సదా ఉండాలని కోరుకుంటున్నాను. నా పేరు సంగీత. రోజూ బ్లాగులో వచ్చే అనుభవాలు చదువుతూ ఎంతో ఆనందాన్ని పొందుతుంటాను. నా అనుభవానికి వస్తే... నా భర్తకి షుగర్, బిపి రెండూ ఉన్నాయి. ప్రతిరోజూ షుగర్‍‍కి 850mg టాబ్లెట్ ఉదయమొకటి, రాత్రి ఒకటి వేసుకునే ఆయన వ్యాయామం చేయడం, వేపాకు తినడం చేస్తూ మందులు వేసుకోవడం మానేసారు. అప్పుడు నేను, "బాబా! మావారు చాలా కష్టపడుతున్నారు. మీ దయవల్ల షుగర్ లెవెల్స్ నార్మల్ అయితే, ఈ అనుభవాన్ని బ్లాగులో పంచుకుంటాను" అని బాబాకి మ్రొక్కుకున్నాను. బాబా దయవల్ల నేను కోరుకున్నట్లే మావారి షుగర్ లెవెల్స్ నార్మల్‍‍కి వచ్చాయి. 9 నెలలుగా మావారు మందులు వాడటం లేదు. "ధన్యవాదాలు బాబా. ఇలాగే ఎప్పుడూ మందులు వాడకుండా ఉండేలా చూసుకోండి తండ్రి. ఈ అనుభవాన్ని ఆలస్యంగా పంచుకున్నందుకు క్షమించండి బాబా".
మరొక అనుభవం: నాకు కూడా ఆరోగ్యం బాగోలేక మందులు వాడుతున్నాను. ఆ మందులు పడక కడుపులో తిప్పుతున్నట్లు, వాంతి వచ్చినట్లు ఉంటూ ఎప్పుడూ కడుపులో అదోలా ఉండేది. నా సమస్య చెప్పేందుకు చిన్నగా అనిపించినా నేను దానితో చాలా ఇబ్బందిపడ్డాను. అప్పుడు నేను, "నా ఇబ్బందిని కూడా తొలగించండి బాబా. నా అనుభవాన్ని బ్లాగులో పంచుకుంటాను" అని బాబాని వేడుకున్నాను. బాబా దయవల్ల ఇప్పుడు నేను బాగున్నాను. "ఎల్లప్పుడూ ఇలాగే అందరిపై మీ కరుణ చూపించండి బాబా. థాంక్యూ సో మచ్ బాబా".
సర్వం శ్రీ సాయినాథార్పణమస్తు!!!
రిపోర్టులన్నీ నార్మల్ వచ్చేలా అనుగ్రహించిన బాబా
సాయితండ్రికి శతకోటి నమస్కారాలు. ఈ బ్లాగు నిర్వాహకులకు నా ధన్యవాదాలు. నా పేరు నాగలక్ష్మి. నేను ఇంతకుముందు కొన్ని అనుభవాలను మీతో పంచుకున్నాను. ఇప్పుడు మరో అనుభవాన్ని పంచుకోబోతున్నాను. మావారికెప్పుడూ ఉద్యోగంలో టెన్షన్స్ ఉంటూ ఉంటాయి. పై అధికారుల వలన, కింద ఉద్యోగుల వలన ఆయన రోజూ మనఃశాంతి లేకుండా టెన్షన్ పడుతూ ఉంటారు. దానివల్ల ఆయన బీపీ బాగా అప్ అండ్ డౌన్ అవుతూ ఉంటుంది. డాక్టర్ దగ్గరకి వెళ్తే, "ఒకసారి కార్డియాలజిస్ట్ ను కలవమ"ని చెప్పారు. సరేనని, మేము హైదరాబాద్ వెళ్లి కార్డియాలజిస్ట్ ని సంప్రదిస్తే, ఆయన కొన్ని టెస్టులు చేయించుకోమన్నారు. ఆ టెస్టులు చేస్తున్నంతసేపు నేను శ్రీసాయి సచ్చరిత్ర పారాయణ చేస్తూ, "టెస్టులన్నీ నార్మల్గా వస్తే, ఈ అనుభవం బ్లాగులో పంచుకుంటాన"ని బాబాకి మొక్కుకున్నాను. ఆయన దయవలన రిపోర్టులన్నీ నార్మల్గా వచ్చాయి. ఇదంతా బాబా ఆశీర్వాదం, అనుగ్రహం మాత్రమే. "ధన్యవాదాలు బాబా. మావారి టెన్షన్లన్నీ పోయేటట్లు అనుగ్రహించండి బాబా. మా పెద్దపాప బాధ్యతను కూడా మీ పాదాల చెంత పెడుతున్నాను సాయి. మీరే తన బాగోగులు చూసుకుని మంచి భవిష్యత్తునివ్వండి తండ్రి".
