సాయి వచనం:-

- శ్రీబాబూజీ.

సాయిభక్తుల అనుభవమాలిక 969వ భాగం....


ఈ భాగంలో అనుభవాలు
:

1. బ్లాగు నిలువెత్తు బాబా రూపానికి సజీవసాక్ష్యం
2. బాబా కృపతో అందరికీ ఆరోగ్యం
3. బాబా సదా కాపాడుతుంటారు

బ్లాగు నిలువెత్తు బాబా రూపానికి సజీవసాక్ష్యం


ఓంసాయి శ్రీసాయి జయజయ సాయి. శ్రీ సాయినాథుని దివ్య పాదాలకు శిరసు వంచి నమస్కరిస్తూ నా అనుభవాలను పంచుకోబోతున్నాను. 'సాయి మహారాజ్ సన్నిధి' బ్లాగు నిర్వహిస్తున్న సాయికి మరియు సాయిబంధువులకు నా నమస్కారాలు. నా పేరు సంధ్య. ఆర్థిక ఇబ్బందులతో, కష్టనష్టాలతో, అనారోగ్యసమస్యలతో మావారు బాధపడుతున్నప్పుడు, మావారి బాధ చూడలేక దిక్కుతోచని స్థితిలో ఉన్నప్పుడు, బంధు బలం దూరమైనప్పుడు అసలు బంధం 'సాయే'నని 'సాయి మహారాజ్ సన్నిధి' బ్లాగు నా కంటపడింది. కాదు, బాబానే 'సాయి మహారాజ్ సన్నిధి' బ్లాగు రూపంలో నాకు దర్శనమిచ్చి ధైర్యాన్ని, సాయిబంధువుల అనుభవాల ద్వారా వారి ప్రేమను ప్రసాదించారు. ఇంకా నేను పొందిన వారి ప్రేమను పంచుకునేలా నన్ను అనుగ్రహించారు. బ్లాగులోని భక్తుల అనుభవాలు చదువుతున్నప్పుడు నా కళ్లలో ఆనందాశ్రువులు పొంగిపొర్లుతాయి. నిజంగా భక్తుల అనుభవాలు రూపంలో సాయి లీలలు చదవడం బాబా మనకిచ్చిన గొప్ప వరం. 'సాయి మహారాజ్ సన్నిధి' బ్లాగు ఈతరం భక్తులకు నిలువెత్తు బాబా రూపానికి సజీవసాక్ష్యం. బ్లాగులోని సాయి వచనాలు, సందేశాలు చాలా ధైర్యాన్ని, 'బాబా ఉన్నారు, తప్పక మేలు జరుగుతుంద'న్న నమ్మకాన్ని ఇస్తున్నాయి.


మేము ఆర్థిక ఇబ్బందులను ఎదుర్కొంటున్న సమయంలో పిల్లల చదువులకోసం కొంత డబ్బు అప్పుగా తీసుకున్నాము. ఒకరోజు ఆ అప్పు ఎలా తీర్చాలని వేదనపడుతూ నేను కూడా ఏదైనా ఆదాయం వచ్చే పని చేస్తే, మావారికి కొంత సహాయంగా ఉంటుందని బాబాని తలచుకుంటూ నిద్రలోకి జారుకున్నాను. ఇంకా పూర్తిగా నిద్రలోకి జారుకోక ముందే కాస్త మెలుకువ ఉన్న స్థితిలో, "కూర్చుని తిను" అన్న మాట వినబడింది. అది నా సాయిబాబా స్వరమని నేను నిశ్చింతగా ఉండిపోయాను. అదే సమయంలో మేము అదివరకు కొన్న ఒక పొలం అమ్మకానికి పెట్టాము. మేము ఆ పొలం కొన్నప్పుడు లేని సమస్యలు అమ్మకానికి పెట్టినప్పుడు తలెత్తాయి. అంత క్లియర్‍గా ఉన్న ఆ పొలం గతంలో హరిజనులది. వాళ్ళు మాకు పొలంలో హక్కు ఉంది, అది మా తాతల ఆస్తి. గతంలో మేము తక్కువ ధరకు మీకు అమ్మాము. కాబట్టి మాకు ఇప్పుడు పెద్ద మొత్తం డబ్బులు కావాలని మమ్మల్ని పొలం దగ్గరకు కూడా రానివ్వక చాలా ఇబ్బందులకు గురి చేశారు. మేము నిస్సహాయస్థితిలో బాబాను ప్రార్థించాము. అప్పుడు బ్లాగులో "నీవు నా వద్ద ఊరకే కూర్చో! చేయవలసిందంతా నేను చేస్తాను" అన్న సాయి వచనం మాకెంతో సంతోషాన్ని ఇచ్చింది. ఆ మాటలు బాబా మాకే చెప్తున్నారనిపించి మేము ధైర్యంగా ఉండసాగము. తరువాత నేను భూమి అమ్మడంలో బాబా సహాయం కోరుతూ సచ్చరిత్ర పారాయణ చేశాను. ఐదవరోజు పారాయణ పూర్తికాగానే బాబా అద్భుతం చేసారు. ఆరోజు భూమి కొనుగోలుదారులు వచ్చి ఒప్పంద పత్రం వ్రాసుకున్నారు. ఈ మొత్తం ప్రక్రియలో ఎంతో శ్రమపడాల్సిన మాకు చాలామంది వ్యక్తుల సహాయం అందింది. వాళ్ళంతా బాబా ఏర్పాటు చేసిన వ్యక్తులని మా విశ్వాసం. వారి సహాయంతో ఎటువంటి శ్రమ లేకుండా పొలం అమ్మకం జరిగింది. ఇంకో విషయం ఆ కష్ట సమయంలో ఒకసారి వచ్చిన "నీకు చాలా డబ్బులు ఇస్తాను" అన్న బాబా వచనం నాకు ఎంతో సంతోషాన్ని, ధైర్యాన్ని ఇచ్చింది. బాబా చెప్పినట్లే పొలం అమ్మగా వచ్చిన డబ్బులతో మా అవసరాలన్నీ తీర్చుకున్నాము. ఇది బాబా అద్భుతలీల. "ధన్యవాదాలు సాయితండ్రి".

 

ఇప్పుడు మేము మా పిల్లల భవిష్యత్తు దృష్టిలో ఉంచుకుని మళ్ళీ భూమి కొనాలని అనుకుంటున్నాము. ఆ ప్రయత్నాలలో మాకు ఒక పొలం నచ్చింది. అప్పుడు మేము, "బాబా! ఆ భూమి సరైనదైతే మాకు ఇప్పించండి" అని బాబాను ప్రార్థించి చీటీల ద్వారా బాబా నిర్ణయాన్ని అడిగితే, బాబా తీసుకోమన్నారు. సరేనని సిట్టింగ్ ఏర్పాటు చేసి భూమి ధరను నిర్ణయిస్తుంటే దళారులు మార్కెట్ రేటు కంటే ఎక్కువ మొత్తానికి పెంచేశారు. "బాబా! మీరే దగ్గరుండి ఆ భూమిని మేము కొనుగోలు చేసేలా అనుగ్రహించండి. న్యాయంగా ఎంతవరకు పెట్టవచ్చో అంత సెటిల్ చేయండి. మళ్ళీ భూమి కొన్నామనే ఆనందాన్నిచ్చి, భూమి అమ్మకున్నామన్న వేదనను నుండి రక్షించండి. గతంలో భూమి కొన్నప్పుడు జరిగిన పొరపాట్లను దృష్టిలో ఉంచుకుని క్లియర్ టైటిల్ ఉన్న భూమిని కొందామని చాలా ప్రయత్నిస్తున్నాము. మాకు మీ సహాయం, ఆశీస్సులు కావాలి సాయీశ్వరా! సచ్చరిత్ర పారాయణ చేస్తున్నాను బాబా, నన్ను ఆశీర్వదించండి, నాపై దయ ఉంచండి. మాకు మీరే దిక్కు తండ్రి. మీ దయతో మేము భూమిని కొనుక్కుంటే మీ అపారప్రేమను 'సాయి మహారాజ్ సన్నిధి' బ్లాగులో పంచుకుంటాను సాయితండ్రి". 


సద్గురు చరణం భవభయ హరణం, శ్రీసాయినాథ శ్రీచరణం.


బాబా కృపతో అందరికీ ఆరోగ్యం


సాయిబంధువులందరికీ నమస్కారం. నా పేరు గోష్టేశ్వరి. బాబా ప్రసాదించిన కొన్ని అనుభవాలను పంచుకుంటున్నాను. ఒకరోజు డబ్బులు డ్రా చేద్దామని నా ఏటీఎం కార్డు కోసం చూస్తే, అది కనిపించలేదు. ఎంత వెతికినా కార్డు దొరకలేదు. అప్పుడు నేను, "బాబా! మీ దయతో నా ఏటీఎం కార్డు దొరికితే, నా అనుభవాన్ని బ్లాగులో పంచుకుంటాన"ని బాబాకి మ్రొక్కుకున్నాను. అలా నేను బాబాని ప్రార్థించిన ఐదు నిముషాల్లో కార్డు నా హ్యాండ్ బ్యాగులోనే దొరికింది. నిజానికి ఎప్పుడూ మావారి వద్దనుండే ఆ కార్డు నా బ్యాగులోకి ఎలా వచ్చిందో అర్థం కాలేదు. "ధన్యవాదాలు బాబా".


ఇటీవల ఒకసారి మా పాపకి జ్వరం వచ్చింది. అప్పుడు నేను, "బాబా! పాపకి జ్వరం తగ్గితే, నా అనుభవాన్ని బ్లాగులో పంచుకుంటాన"ని బాబాకి మొక్కుకున్నాను. బాబా దయవలన రెండురోజుల్లో పాపకి జ్వరం పూర్తిగా తగ్గిపోయింది. "ధన్యవాదాలు బాబా". తరువాత దసరా ముందురోజు నాకు కూడా జ్వరమొచ్చింది. జ్వరంతోపాటు దగ్గు, ఒళ్లునొప్పులు ఉండేసరికి నేను చాలా ఇబ్బందిపడుతూ మాట్లాడలేకపోయాను కూడా. నా పరిస్థితి చూసి మా అమ్మగారు, "బాబా! జ్వరం తగ్గితే, ఈ అనుభవాన్ని బ్లాగులో పంచుకుంటాన"ని బాబాకి మొక్కుకున్నారు. అంతే, జ్వరం, దగ్గు అన్నీ తగ్గి నేను బాగున్నాను. మూడునెలల వయస్సున్న మా చెల్లెలి కూతురుకి ఈమధ్య నాలుగురోజులైనా విరోచనం కాలేదు. అన్ని చిట్కాలు ప్రయత్నించినప్పటికీ ప్రయోజనం లేకపోయింది. అప్పుడు కూడా మా అమ్మగారు, "పాపకు విరోచనం అయితే బ్లాగులో పంచుకుంటాన"ని బాబాకి మొక్కుకున్నారు. అంతేకాదు బాబా ఊదీ పాపకు పెట్టారు. అరగంటలో పాపకు విరోచనమైంది. "ఇలా మా జీవితాలలో అడుగడుగునా మాకు తోడుంటూ మమ్మల్ని ముందుకు నడిపిస్తున్నారు బాబా. మీకు చాలా చాలా ధన్యవాదాలు బాబా. అమ్మ మీకు మాటిచ్చినట్లు ఆ అనుభవాలను పంచుకున్నాను. నాకు ఉన్న మనోవేదనను సాధ్యమైనంత త్వరగా తొలగించి, ఆ అనుభవాన్ని కూడా పంచుకునేలా అనుగ్రహించమని మనస్ఫూర్తిగా కోరుకుంటున్నాను బాబా".


అఖిలాండకోటి బ్రహ్మాండనాయక రాజాధిరాజా యోగిరాజా పరబ్రహ్మ శ్రీ సచ్చిదానంద సద్గురు సాయినాధ్ మహరాజ్ కీ జై.


బాబా సదా కాపాడుతుంటారు


ఓం శ్రీసచ్చిదానంద సద్గురు సాయినాథ్ మహరాజ్ కి జై. నాపేరు సుమ. ఇటీవల మా బాబుకి జ్వరం వచ్చింది. ప్రస్తుత సమయంలో జ్వరమంటే చాలా భయమేస్తుంది. అయినా నేను బాబా ఉండగా భయమెందుకని, "బాబా! మా బాబుకి జ్వరం తగ్గేలా చూడండి. మీ దయతో జ్వరం తగ్గితే, 'సాయి మహారాజ్ సన్నిధి' బ్లాగులో పంచుకుంటాన"ని బాబాకి మ్రొక్కుకున్నాను. బాబా దయవల్ల వెంటనే బాబుకి జ్వరం తగ్గింది. మరుసటిరోజు నాకు జ్వరం వచ్చిందికానీ, బాబా దయవల్ల తొందరగానే తగ్గిపోయింది. "బాబా! మీరు ఉండగా మాకు భయమేల? తల్లి ఉండగా బిడ్డలు భయపడతారా? మీరే మాకు సర్వం. మీ భక్తులందరినీ సదా కాపాడుతుండమని నేను మిమ్మల్ని కోరుతున్నాను. నా మనసులో కోరికలు మీకు తెలుసు బాబా. వాటిని మీరు తొందరలో తీరుస్తారని నమ్ముతున్నాను. మీ పాదాలకి శతకోటి వందనాలు".



సాయి మహారాజ్ సన్నిధి సోషల్ మీడియా లింక్స్:

Subscribe Here

బ్లాగ్ అప్డేట్ నోటిఫికేషన్స్ నేరుగా మీ మెయిల్ కే వచ్చేందుకు క్రింద బాక్సులో మీ మెయిల్ ఐడి టైపు చేసి subscribe పై క్లిక్ చేసి, తరువాత స్టెప్స్ పూర్తీ చేయండి.

Delivered by FeedBurner

Followers

Recent Posts


Blog Logo