సాయిభక్తుల అనుభవమాలిక 970వ భాగం.... ~ Sai Devotees Experiences In Telugu- Shiridi Saibaba Miracles in Telugu

ఈ భాగంలో అనుభవాలు:

1. సమస్య ఏదైనా బాబా ప్రేమతో అనుగ్రహిస్తారు

2. మనకై మనం బాబా భక్తులం కాము - బాబానే మనల్ని తమ భక్తులని చేసుకుంటారు

3. బాబా ప్రసాదించిన సంతోషం

సమస్య ఏదైనా బాబా ప్రేమతో అనుగ్రహిస్తారు

సాయి భక్తులకి నా హృదయపూర్వక నమస్కారాలు. నా పేరు వీణ. మాది హైదరాబాదు. నాకు ఏ చిన్న కష్టమొచ్చినా బాబా ఉన్నారని బాబాకే చెప్పుకుంటాను. నేనిప్పుడు బాబా నాకు ప్రసాదించిన రెండు అనుభవాలను మీతో పంచుకుంటున్నాను. 2021లో మా కజిన్‍‍కి కరోనా వచ్చింది. తన ద్వారా 80 సంవత్సరాల వాళ్ల అమ్మకి కూడా కరోనా వచ్చి ఐదు రోజుల తర్వాత ఆవిడ చనిపోయారు. తల్లి మరణంతో కల్గిన బాధ వలన మా కజిన్ చాలా ఒత్తిడికి గురయ్యాడు. ఇంకా కరోనా కూడా ఉపిరితిత్తులపై ప్రభావం చూపడం వలన తన పరిస్థితి చాలా ఇబ్బందికరంగా అయింది. దాంతో తను హాస్పిటల్లో జాయిన్ అయ్యాడు. ఒక పక్క తల్లి చనిపోయింది, మరోపక్క కరోనాతో హాస్పిటల్లో ఒంటరిగా ఉన్న అతనికి ఫోన్ చేసి దైర్యం చెప్పడం తప్ప ఎవరూ ఏం చేయలేని పరిస్థితి. అటువంటి స్థితిలో నేను తనకి ఫోన్ చేసి, "నీకు ఏమీ కాదు, భయపడకు. నీకు ఎవరూ లేరనుకోవద్దు. నీ పక్కన సాయిబాబా ఉన్నారు. నువ్వు 'సాయిరామ్ సాయిరామ్' అని నామజపం చేస్తూ ఉండు. నీకోసం మేము కూడా చేస్తూ ఉంటాము. నీకు తప్పకుండా నయమైపోతుంద"ని చెప్పాను. అతను అలాగే చేసాడు. నేను కూడా తన గురించి బాబాని వేడుకున్నాను. బాబా దయ చూపించారు. మూడు రోజుల్లో అతను హాస్పిటల్ నుంచి డిశ్చార్జ్ అయ్యాడు. మాకు చాలా సంతోషంగా అనిపించి బాబాకు కృతజ్ఞతలు చెప్పుకున్నాము.

ఒక వేసవికాలంలో నేను సంవత్సరం నిల్వ ఉండే మామిడికాయ పచ్చడి పెట్టాను. నిజానికి నాకు పచ్చడి పెట్టడం సరిగా తెలీదు. మరుసటిరోజు ఉదయానికి పచ్చడి బాగానే ఉంది కానీ మూడురోజులు తర్వాత కలుపుదామని మూత తీస్తే, పైన అంతా నురగలు నురగలుగా ఉంది. అది చూసి, 'ఇదేమిటి ఇలా పాడైపోయినట్లు అయిపోయింది, మొత్తం పారేయాల్సిందేనా' అని భయపడ్డాను. వెంటనే బాబా గుర్తుకు వచ్చారు. "బాబా! నువ్వే ఇది పాడవకుండా మంచిగా ఉండేలా చూడు" అని బాబాతో చెప్పుకుని, ఆయన నామం చేసుకుంటూ కొద్దిగా ఊదీ పచ్చడిలో వేసి కలిపాను. అంతే, బాబా దయవలన పచ్చడి చాలాకాలం వరకు చాలా బాగుంది. ఇంత చిన్న దాన్ని కూడా అనుభవాల్లో వ్రాయాలా అని అందరూ అనుకోవచ్చు. కానీ సమస్య వచ్చినప్పుడు, దాన్ని అనుభవించేవారికి అది పెద్దగా అనిపిస్తుంది, ఏం చేయాలో తోచక టెన్షన్‍గా ఉంటుంది. అయినా సమస్య ఎంత చిన్నదైనా బాబా ప్రేమతో అనుగ్రహిస్తారు. "బాబా! మీకు చాలా చాలా ధన్యవాదాలు".

మనకై మనం బాబా భక్తులం కాము - బాబానే మనల్ని తమ భక్తులని చేసుకుంటారు

సాయికుటుంబానికి నమస్కారం. నా పేరు నవీన్. నా జీవితంలో బాబా ప్రసాదించిన ఒక చక్కని అనుభవాన్ని పంచుకోవాలనుకుంటున్నాను. మేము బ్రాహ్మణులం. నేను 9వ తరగతిలో ఉన్నప్పుడు నాకు ఉపనయనం జరిగింది. మా పక్కింటివాళ్ళు సాయి భక్తులు. వాళ్ళు నా ఉపనయనానికి కొన్ని రోజుల ముందు నా ఉపనయనంలో కట్టుకోమని బాబా మందిరంలో బాబాకి కట్టిన ఒక పంచెని తెచ్చి నాకు ఇచ్చారు. అయితే అప్పటికి నేనింకా సాయిభక్తుడిని కానందున నేను దానిని అంతగా పట్టించుకోలేదు. కానీ ఉపనయనంలో మాత్రం చాలావరకు నేను ఆ పంచెనే కట్టుకున్నాను. ఉపనయనం చాలా బాగా జరిగింది. తరువాత నేను ఆ విషయం గురించి పూర్తిగా మర్చిపోయాను. ఇన్ని సంవత్సరాల తరువాత నేను బాబాకి భక్తుడినయ్యాక ఇటీవల ఒకరోజు నా ఉపనయనం గురించి ఆలోచిస్తుంటే, ఆ పంచె విషయం గుర్తుకువచ్చి చాలా చాలా సంతోషంగా అనిపించింది. నేను వారి భక్తుడిని కాకమునుపే బాబా నన్ను ఏ రీతిన అనుగ్రహించారో గుర్తించాక వెంటనే బాబా ప్రసాదించిన ఈ అనుగ్రహాన్ని బ్లాగులో పంచుకోవాలనిపించి ఇలా మీతో పంచుకున్నాను. ఈ అనుభవం ద్వారా నాకు తెలిసింది ఏమిటంటే, 'మనకై మనం బాబా భక్తులం కాము. బాబానే మనల్ని తమ భక్తులని చేసుకుంటారు. తమ వాళ్ళు ఎవరో బాబాకి మనం పుట్టినప్పటినుంచే తెలుసు. సరైన సమయం వచ్చినప్పుడు ఆయన మనల్ని తమ భక్తులుగా మలుచుకుంటారు. ఇంకో విషయం బాబా తమ భక్తుల శుభకార్యాలకు ఏదో ఒక రూపంలో హాజరై తమ ఆశీర్వాదాన్ని అనుగ్రహిస్తారు' అని. నా విషయంలో అదే జరిగింది. "బాబా! నన్ను మీ భక్తుడిగా స్వీకరించినందుకు ధన్యవాదాలు. ఎప్పటికీ మీరు నాతోనే ఉండండి. నా చేయి ఎప్పుడూ వదలకండి బాబా. నన్నే కాదు, సాయిబంధువులందరిని మంచి మార్గంలో నడిపించండి. నేను శిరిడీకి చాలా చిన్నపుడు వచ్చాను బాబా. నాకు ఇప్పుడు శిరిడీ చూడాలని, మీ దర్శనం చేసుకోవాలని చాలా కోరికగా ఉంది బాబా. నాకు తొందరగా శిరిడీ దర్శన భాగ్యాన్ని ప్రసాదించండి సాయి".

ఓం శ్రీ సాయినాథాయ నమః!!!

బాబా ప్రసాదించిన సంతోషం

నా పేరు సాహిత్య. సాయిబంధువులందరికీ నా నమస్కారాలు. 2021, జులై నెలలో నేను మావారికి జీతంలో పెరుగుదల లేదా వేరే కంపెనీలో అధిక జీతంతో ఉద్యోగం రావాలని ఏడు రోజులు సచ్చరిత్ర పారాయణ చేశాను. బాబా దయవలన నెలరోజుల్లో మావారికి ప్రమోషన్ వచ్చి జీతం పెరిగింది. నేను ఆశించినంత జీతం కాకపోయినప్పటికీ జీతం పెరిగినందుకు నేను చాలా సంతోషించాను. తరువాత సరిగ్గా నేను పారాయణ పూర్తిచేసిన మూడు నెలలకి అక్టోబర్ నెలలో మావారికి అత్యధిక జీతంతో ఒక పెద్ద కంపెనీలో ఉద్యోగం వచ్చింది. ఇదంతా బాబా దయవల్లే. "థాంక్యూ సో మచ్ బాబా. మీ మేలు ఎన్నడూ మరువము సాయి".

2021, అక్టోబర్ 21న మా అన్నయ్య పెళ్లి జరిగింది. బాబా దయవలన అన్నయ్య పెళ్లి చాలా వైభవంగా, సంతోషదాయకంగా జరిగింది. తర్వాత 2021, అక్టోబర్ 24న మా అమ్మ, వదినకు పెట్టాల్సిన చీర ఒకటి కనిపించలేదు. అప్పుడు నేను 'ఓం శ్రీసాయి సూక్ష్మాయ నమః' అనే మంత్రాన్ని చెప్పుకున్నాను. బాబా దయవలన కొన్ని నిమిషాల్లో చీర కనిపించింది. "అన్నిటికి మీకు చాలా చాలా ధన్యవాదాలు బాబా".

ఓం శ్రీ సచ్చిదానంద సమర్థ సద్గురు సాయినాథాయ నమః!!!