1. ప్రేమతో సమస్యలు తీర్చే బాబా
2. బాబా చల్లని దృష్టి
3. తలచుకుంటే చాలు - సమస్యలన్నీ పరిష్కరిస్తారు బాబా
ప్రేమతో సమస్యలు తీర్చే బాబా
సాయిబంధువులందరికీ నా నమస్కారాలు. నా పేరు గోష్ఠేశ్వరి. నా అనుభవాలను పంచుకునే అవకాశమిచ్చిన బాబాకు, ఈ బ్లాగ్ నిర్వాహకులకు నా నమస్కారాలు. ఈమధ్యకాలంలో మా పాప అదివరకు చదివిన స్కూలు కరోనా కారణంగా సరిగా నడపలేకపోతున్నందువలన బాబా అనుమతి తీసుకుని పాపని స్కూలు మార్చాలని నిర్ణయం తీసుకున్నాము. మా పాప కూడా మేము అనుకున్న కొత్త స్కూల్లో చదవడానికి చాలా ఉత్సాహం కనబరిచింది. వరలక్ష్మీవ్రతం రోజున పాపని కొత్త స్కూల్లో జాయిన్ చేయడం కోసంగా మేము ఇంటినుండి బయలుదేరే సమయానికి బాబా ఫోటో రూపంలో మాకు ఎదురొచ్చారు. నాకు చాలా ఆనందంగా అనిపించింది. ఆ సంతోషంలో పాపని జాయిన్ చేసి వచ్చాము. అయితే, పాప రెండురోజులు స్కూలుకి వెళ్లి, తరువాత కొత్త వాతావరణం నచ్చకనో ఏమోగానీ స్కూలుకి వెళ్లనని మారాం చేయడం మొదలుపెట్టింది. నేను, నా భర్త ఇద్దరమూ టీచర్లమే. సరిగ్గా మేము స్కూలుకి వెళ్లేందుకు బయలుదేరే సమయానికి పాప స్కూలుకి వెళ్ళనంటూ రోజూ అల్లరి చేస్తుండేది. దాంతో మాకు స్కూలుకి వెళ్లడం ఆలస్యం అయిపోతుండేది. నాకు చిరాకొచ్చి పాపను కొట్టేదాన్ని. తరువాత మనసుకి కష్టంగా అనిపించి, "బాబా! మీ అనుమతితోనే కదా పాపను కొత్త స్కూల్లో జాయిన్ చేశాను. చక్కగా చదివే పిల్ల ఇలా స్కూలుకి వెళ్ళనంటుంటే నేను ఏం చేయాలి?" అని బాబాతో చెప్పుకుని బాధపడేదాన్ని. ఇలా ఉండగా ఒకరోజు పాపకి విపరీతంగా జ్వరం వచ్చింది. నేను కొట్టడం వల్లనే పాపకు జ్వరం వచ్చిందేమోనని నాకు చాలా బాధగా అనిపించి, "బాబా! పాపకు తొందరగా జ్వరం తగ్గి, తను చక్కగా స్కూలుకి వెళ్ళినట్లైతే నా అనుభవాన్ని బ్లాగులో పంచుకుంటాన"ని బాబాకు మ్రొక్కుకున్నాను. బాబా దయవల్ల రెండు రోజుల్లో పాపకి జ్వరం తగ్గింది. అంతేకాదు ఇప్పుడు పాప చక్కగా స్కూలుకి వెళ్తూ, మంచిగా చదువుకుంటోంది. "థాంక్యూ బాబా. థాంక్యూ సో మచ్".
మరో అనుభవం: ఇటీవల కొన్నిరోజుల క్రితం మావారికి జ్వరం వచ్చింది. "బాబా! ఆయన జ్వరం తగ్గితే, ఈ అనుభవాన్ని బ్లాగులో పంచుకుంటాన"ని బాబాకి మొక్కుకున్నాను. బాబా దయవల్ల ఒక్కరోజులోనే ఆయన జ్వరం తగ్గిపోయింది. "ధన్యవాదాలు బాబా".
ఇంకో అనుభవం: ఇటీవల మావారు, "ఇంట్లో మనశ్శాంతి ఉండటం లేదు కదా, సింహాచలం వెళ్ళొద్దామ"ని అన్నారు. సరేనని 2021, సెప్టెంబర్ 26, ఆదివారంనాడు వెళ్ళడానికి కారు బుక్ చేసుకున్నాము. తరువాత మేము వెళ్ళేరోజు తుఫాను ఉందని తెలిసింది. అయినాసరే అనుకున్నట్లే ఆరోజు బయలుదేరాము. బాబా దయవల్ల ఎలాంటి ఇబ్బంది లేకుండా వరాహలక్ష్మీనరసింహస్వామి వారి దర్శనం చాలా చక్కగా జరిగింది. అయితే ఆ రోజంతా వర్షం పడుతున్న కారణంగా మేము కాస్త తడిసాము. "మాకు, మాతో స్వామి దర్శనానికి వచ్చిన వారెవ్వరికీ జ్వరం, జలుబు రాకుండా ఉన్నట్లయితే ఈ అనుభవాన్ని బ్లాగులో పంచుకుంటాన"ని బాబాకు మొక్కుకున్నాను. అలా మ్రొక్కిన కాసేపటికి బాబా ఫోటో రూపంలో దర్శనమిచ్చారు. బాబా దయవలన ఎవరికీ జ్వరం, జలుబు రాలేదు. అందరూ బాగానే ఉన్నారు. నేను ఏ పని మీద, ఎక్కడికి వెళ్లినా సాయిగణేషుడిని మొక్కుకొనే బయలుదేరుతాను. నేను వెళ్లే ప్రతీచోటా బాబా ఫోటో రూపంలో నాకు ఎదురొచ్చి ఆశీర్వదిస్తారు. "ధన్యవాదాలు బాబా. ఎన్ని జన్మలెత్తినా మీ ఋణం తీర్చుకోలేను తండ్రీ".
అఖిలాండకోటి బ్రహ్మాండ నాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు శ్రీ సాయినాథ్ మహరాజ్ కీ జై!
బాబా చల్లని దృష్టి
సాయిబంధువులందరికీ నమస్కారం. నా పేరు లత. బాబా ప్రసాదించిన కొన్ని అనుభవాలను ఇంతకుముందు మీతో పంచుకున్నాను. ఇప్పుడు మరికొన్ని అనుభవాలను పంచుకోవాలనుకుంటున్నాను. కొన్నిరోజుల క్రితం నా చేతివేళ్ళు(జాయింట్స్) బాగా నొప్పి పెట్టసాగాయి. డాక్టరు దగ్గరకి వెళితే, "కీళ్ల నొప్పులేమో! బ్లడ్ టెస్టు చేయించ"మన్నారు. నేను బాబాకు నమస్కరించుకుని, "రిపోర్టు నార్మల్ అని వస్తే, ఈ అనుభవాన్ని 'సాయి మహారాజ్ సన్నిధి' బ్లాగులో పంచుకుంటాన"ని బాబాకు మొక్కుకున్నాను. బాబా దయవల్ల రిపోర్టు నార్మల్ అని వచ్చింది. "చాలా చాలా కృతఙ్ఞతలు బాబా".
ఒకసారి మా వారికి తరచూ రాత్రుళ్ళు వాంతులవుతూ ఉండేవి. అలా సుమారు నాలుగైదు నెలల వరకు అవుతుండేసరికి మాకు చాలా భయమేసింది. ఇక డాక్టరుని సంప్రదిస్తే, 'హెర్నియా' అని చెప్పారు. అయితే మా వారికి ఈ సమస్య రావడానికి మూడు నెలల ముందే బైపాస్ సర్జరీ అయినందున మళ్ళీ ఆపరేషన్ అవసరమవుతుందేమోనని నేను చాలా భయపడి, "ఇంతలోనే మళ్ళీ ఇదేమిటి బాబా?" అని బాబాకి దణ్ణం పెట్టుకున్నాను. బాబా దయవలన డాక్టరు, "టాబ్లెట్స్ వాడితే సరిపోతుంద"ని చెప్పారు. దాంతో నా మనసు కుదుటపడింది. "బాబా! మీ దయ, చల్లని దృష్టి ఎల్లప్పుడూ మాపై ఉండాలని కోరుకుంటున్నాను తండ్రి".
నాకు ఈమధ్య జుట్టు ఎక్కువగా రాలిపోతుండేది. దానికి కారణం ఏమిటో అర్థం కాలేదు. కొంతమంది థైరాయిడ్ వల్లనేమో, ఒకసారి టెస్టు చేయించుకోండి అన్నారు. కానీ నాకు హాస్పిటల్ అన్నా, టెస్టులు అన్నా చాలా భయం. అందువలన నేను, "తండ్రీ నీవే నాకు రక్ష, ఏం చేస్తావో ఏమో నాకు తెలియదు. నా ఈ సమస్య తగ్గిస్తే, ఈ అనుభవాన్ని 'సాయి మహారాజ్ సన్నిధి' బ్లాగులో పంచుకుంటాన"ని బాబాకు చెప్పుకున్నాను. ఆశ్చర్యకరంగా అలా చెప్పిన వారం రోజులకే జుట్టు రాలడం అదుపులోకి వచ్చింది. "హే సాయి భగవాన్! ఏమి మీ లీలలు? ఎంత దయామయుడవి, ఎంత కరుణామూర్తివి తండ్రి. మిమ్మల్ని ఎప్పుడూ విసిగిస్తూనే ఉంటాము సాయీ, అయినా ప్రేమతో మమ్మల్ని ఆదరిస్తూ ఉంటావు. అనుకున్న ప్రకారం వారం రోజుల్లో 'శ్రీసాయి సచ్చరిత్ర' పారాయణ నాచేత చేయించి, నాకెంతో ఆనందాన్ని కలిగించావు. అందుకు మీకు సదా ఋణపడి ఉంటాను తండ్రి. ఎప్పుడూ నా చేయి వదలకుండా పట్టుకుని కాపాడు తండ్రి".
అందరికీ వందనాలు. సాయి రక్ష.
తలచుకుంటే చాలు - సమస్యలన్నీ పరిష్కరిస్తారు బాబా
నేను ఒక సాయిభక్తురాలిని. ముందుగా సాయిబంధువులందరికీ నా నమస్కారాలు. ఈ బ్లాగు నిర్వాహకులకు నా ధన్యవాదాలు. గత కొన్నినెలలుగా ఈ బ్లాగులోని సాయి లీలలను క్రమం తప్పకుండా చదివే అవకాశం బాబా నాకు కల్పించారు. ఇందులో ప్రచురింపబడ్డ సాయిభక్తుల అనుభవాలను ప్రేరణగా తీసుకుని నేను కూడా నా అనుభవాన్ని పంచుకోవాలనుకుంటున్నాను. 2020, ఆగస్టులో నా భర్త చనిపోయారు. భర్తలేని నాకు తల్లి, తండ్రి, గురువు, దైవం అన్నీ ఆ సాయిబాబానే. ప్రతి విషయంలో ఆయన మాకు తోడుగా ఉన్నారు. ఇక ముందు కూడా ఇలాగే తోడుగా ఉంటారని నమ్ముతున్నాను. ఆ బాబా దయవల్లే మేము ఇప్పుడు ప్రశాంతంగా ఉన్నాము. ఇకపోతే, నా కూతురు పెళ్లి వద్దని మొండిపట్టు పట్టింది. నేను ఈ విషయంలో, "సహాయం చేయమ"ని బాబాను కోరాను. అద్భుతం! బాబా సహాయాన్ని అర్థించిన వారం రోజులకు మా అమ్మాయి, "నీ ఇష్టం అమ్మా" అని చెప్పింది. ఇదేవిధంగా మా అమ్మాయికి మంచి సంబంధం కుదిరేలా అనుగ్రహించమని ఆ సాయిబాబాను వేడుకుంటున్నాను. ఈ బ్లాగు ద్వారా మేము బాబాకు ధన్యవాదాలు తెలుపుకుంటున్నాము.
శ్రీసచ్చిదానంద సమర్థ సద్గురు సాయినాథ్ మహరాజ్ కి జై! సద్గురు సాంబశివ మహరాజ్ కి జై!
