సాయి వచనం:-

- శ్రీబాబూజీ.

సాయిభక్తుల అనుభవమాలిక 947వ భాగం....


ఈ భాగంలో అనుభవాలు:

1. ఆరోగ్య సమస్యలను పరిష్కరించిన బాబా
2. ముందు నుండి హెచ్చరిస్తూ జాగ్రత్తపరిచి కాపాడిన బాబా
3. బాబా దయార్ద్రహృదయం వలన కోరుకున్న ఉద్యోగం

ఆరోగ్య సమస్యలను పరిష్కరించిన బాబా


అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు శ్రీ సాయినాథ్ మహరాజ్ కీ జై. 


సాయిబంధువులకు మరియు ఈ బ్లాగు నిర్వాహకులకు నా హృదయపూర్వక నమస్కారాలు. నా పేరు సంగీత. నేను బాబా భక్తురాలిని. నేను ప్రతిరోజూ ఈ బ్లాగులో ప్రచురితమయ్యే 'సాయిభక్తుల అనుభవమాలిక'ను చదువుతుంటాను. బాబా ప్రసాదించిన కొన్ని అనుభవాలను నేను ఇంతకుముందు మీతో పంచుకున్నాను. ఇప్పుడు మరికొన్ని అనుభవాలను పంచుకుంటున్నాను. ఒకసారి నా ఆరోగ్యం బాగాలేక డాక్టరు దగ్గరకి వెళితే, పదిహేను రోజులకు మందులిచ్చి, థైరాయిడ్ తోపాటు మరికొన్ని పరీక్షలు చేయించుకుని పదిహేనురోజుల తర్వాత రమ్మన్నారు. నేను వెంటనే అన్ని పరీక్షలు చేసుకున్నాను. డాక్టరు దగ్గరకి వెళ్లడానికి ఇంకా పన్నెండు రోజులు ఉండటంతో మావారు నా రిపోర్టులు తీసుకుని వెళ్లి తనకి తెలిసిన ఒక ఫిజియోథెరపిస్ట్‌కి చూపించారు. ఆ ఫిజియోథెరపిస్ట్ నా రిపోర్టులు చూసి థైరాయిడ్ బోర్డర్ లైన్‌లో ఉందని అన్నారు. అది తెలిసి నాకు చాలా భయమేసింది. ఎందుకంటే, థైరాయిడ్ ఒక్కసారి వచ్చిందంటే, జీవితాంతం ఉంటుందంటారు. వెంటనే నేను, "బాబా! నేను డాక్టరు దగ్గరకి వెళ్ళినప్పుడు, నాకు థైరాయిడ్ లేదని చెప్పాలి. అలా జరిగినట్లయితే నా అనుభవాన్ని బ్లాగులో  పంచుకుంటాన"ని బాబాకి మొక్కుకున్నాను. నేను కోరుకున్నట్లే డాక్టరు థైరాయిడ్ గురించి ఏమీ మాట్లాడలేదు. అంటే నాకు థైరాయిడ్ సమస్య లేకుండా బాబా అనుగ్రహించారు. "చాలా చాలా ధన్యవాదాలు బాబా".

 

ఒకరోజు నేను చెప్పులతో కొంచం వేగంగా నడిచాను. ఆ రోజు ఏమీ అనిపించలేదు కానీ, మరుసటిరోజుకి కాలునొప్పులు, వాపు మొదలయ్యాయి. డాక్టరు దగ్గరకి వెళితే, ఎక్స్-రే తీసి, కొంచెం కాల్షియం లోపం ఉందని చెప్పి ట్యాబ్లెట్లు ఇచ్చారు. ఆ ట్యాబ్లెట్లు వాడినా నొప్పి తగ్గలేదు. చాలారోజుల వరకు నొప్పి అలాగే ఉంది. వాపు మాత్రం అప్పుడప్పుడు రావడం, తగ్గడం జరుగుతుండేది. అలా కొన్నిరోజులు చూసాక నొప్పి తట్టుకోలేక, "బాబా! మీ దయవల్ల నా కాలునొప్పి తగ్గిపోవాలి. అదే జరిగితే ఈ అనుభవాన్ని బ్లాగులో పంచుకుంటాన"ని బాబాకి మ్రొక్కుకున్నాను. బాబా దయవల్ల నొప్పి చాలావరకు తగ్గింది. "ధన్యవాదాలు బాబా. ఉన్న ఆ కాస్త నొప్పి కూడా తగ్గిపోయేలా అనుగ్రహించండి బాబా. మీకు మాటిచ్చి ఈ  అనుభవాన్ని పంచుకోవడం మర్చిపోయినందువల్ల చాలా ఆలస్యంగా పంచుకున్నాను. దయచేసి నన్ను క్షమిచండి బాబా".


సర్వం శ్రీసాయినాథార్పణమస్తు!!!


ముందు నుండి హెచ్చరిస్తూ జాగ్రత్తపరిచి కాపాడిన బాబా


ఓం శ్రీసాయి ఆపద్బాంధవాయ నమః. సాయిబంధువులకు, బ్లాగ్ నిర్వాహకులకు నమస్కారం. నేను ఒక సాయిభక్తురాలిని. నేను ఇదివరకు బాబా ప్రసాదించిన అనుభవాలు కొన్ని మీ అందరితో పంచుకున్నాను. ఇప్పుడు మహాపారాయణ చేస్తున్న ఒక భక్తురాలు తన అనుభవాన్ని అందరితో షేర్ చేయమని చెప్పినందువల్ల మళ్లీ మీ ముందుకు వచ్చాను. ఆ అనుభవాన్ని ఆమె మాటల్లోనే వివరిస్తాను.


'అందరికీ నమస్కారం. మాది పెద్ద కుటుంబం. నలుగురు అన్నదమ్ములు నాలుగు కుటుంబాలుగా ఒకే భవనంలో కింద రెండు కుటుంబాలు, పైన రెండు కుటుంబాలు ఉంటున్నాము. 20 ఏళ్లుగా మా కుటుంబంలోని అందరమూ బాబా భక్తులం. సాయి మాకు ఎన్నో అనుభవాలు, ఆశీస్సులు ఇచ్చారు, అపదల నుంచి గట్టెక్కించారు. నేను ఇప్పుడు 2021, సెప్టెంబర్ 27న బాబా మమ్మల్ని కాపాడిన ఒక అనుభవాన్ని మీతో పంచుకుంటున్నాను. సెప్టెంబర్ నెల చివర్లో నాలుగైదు రోజులపాటు మావారికి రోజూ కలలో మండ్రగబ్బ కనిపిస్తుండేసరికి, 'ఎపుడూ లేనిది, ఇప్పుడు ఎందుకిలా కనిపిస్తుంద'ని మేమంతా చాలా భయపడ్డాము. 'ఏదైనా అపశకునమా?' ఇలా కల వస్తుందని అనుకున్నాము. దాంతో మావారు పువ్వులు కోయటానికి వెళ్ళేటప్పుడు, ఇంకా ఇతరత్రా సమయాల్లో చాలా జాగ్రత్త వహించసాగారు. అలాగే మేమంతా భయపడుతూ ఇంట్లో చాలా జాగ్రత్తగా వ్యవహరించసాగాము. ఒక్క మాటలో చెప్పాలంటే, కలలు రావటం మొదలైన దగ్గరనుంచీ ఇంట్లో అందరూ జాగ్రత్తగా ఉంటున్నారు. సెప్టెంబర్ 26 రాత్రి కూడా కలలో మండ్రగబ్బ కనిపించింది. మరుసటిరోజు ఉదయం పైన వంటగదిలో ఏదో పనిలో ఉన్న నేను ఫోన్ మాట్లాడుతూ బయటకి రాబోతుండగా అప్పుడే బయటనుంచి వచ్చిన మావారు నన్ను బయటకు రావొద్దని గట్టిగా అరిచారు. ఏమైందని కంగారుగా చూస్తే, సరిగ్గా వంటగది గుమ్మం దగ్గర మండ్రగప్ప ఉంది. కలలో మండ్రగప్ప కనిపించడం వెనక మర్మమేమిటో మాకు అప్పుడు అర్థమైంది. ఆ కల ద్వారా బాబా హెచ్చరిస్తూ మమ్మల్ని జాగ్రత్తపరిచి జరగనున్న ఆపద నుండి కాపాడారు. అలా కలలు రాకుండా ఉండుంటే ఇంట్లో అందరం అజాగ్రత్తగా ఉండేవాళ్ళం. అప్పుడేం జరిగేదో ఊహించటానికే భయం వేస్తుంది. ఇదంతా కేవలం అంటే కేవలం మన సాయినాథుని దయవల్ల మాత్రమే జరిగింది. అందుకు సాయికి ఎన్ని వేల కృతజ్ఞతలు చెప్పినా తక్కువే. "ఎల్లపుడూ ఇలాగే మమ్మల్ని చల్లగా చూడు తండ్రీ".'


ఈ అనుభవం ద్వారా ఆవిడకి, నాకు, ఇంకా సాయి బిడ్డలందరికీ అపశకునాలనేవేమీ ఉండవని, సాయి తల్లి చూపే ప్రేమ మాత్రమే అన్ని ఆపదల నుండి రక్షణనిస్తుందని అవగతమవుతుంది. "బాబా! మాకెన్ని జన్మలున్నా మేము మీ బిడ్డలుగానే ఉండాలి. ఎందుకంటే, నువ్వుంటే మాకు దేని గురించి భయం ఉండదు, బాధలుండవు, అన్నిటికి మించి ప్రేమకు లోటుండదు".


శుభం భవతు.

సర్వం శ్రీ సాయినాథార్పణమస్తు!!!


బాబా దయార్ద్రహృదయం వలన కోరుకున్న ఉద్యోగం


నా పేరు శివ. నేను ఇదివరకు నోయిడాలో ఉద్యోగం చేస్తున్నప్పుడు ఒక సంవత్సర కాలంపాటు హైదరాబాదులోని వేరే కంపెనీలో ఉద్యోగం కోసం ఎంతగానో ప్రయత్నించాను. ముఖ్యంగా ఆరునెలల కరోనా కాలంలో ఉత్తమ ప్రతిభను కనబరుస్తూ చాలా ఇంటర్వ్యూలకు హాజరయ్యాను. అయితే అంతలా ప్రయత్నించినప్పటికీ నాకు ఏ కంపెనీ నుండి ఉద్యోగం రాలేదు. దాంతో నేను మానసికంగా చాలా కుమిలిపోయాను. కానీ నేను ఎప్పుడూ బాబాపై విశ్వాసాన్ని కోల్పోక, “బాబా! నీవే దిక్కు. నాకు త్వరగా ఉద్యోగాన్ని ప్రసాదించండి” అని బాబాను ప్రార్థిస్తూ ఉండేవాడిని. బాబా దయార్ద్రహృదయం వలన మాకు ఎటువంటి ఆర్థిక ఇబ్బందీ లేకుండా కాలం గడిచి, చివరికి 2020 నవంబర్‌లో నాకు హైదరాబాదులో ఉద్యోగం లభించింది. అది కూడా ఎటువంటి వ్రాత పరీక్ష లేకుండా. పూర్వజన్మ కర్మఫలం వలన అంతకాలం నేను కోరుకున్నట్లు వేరే కంపెనీలో ఉద్యోగం రాకపోయినా బాబా దయార్ద్రహృదయం వలన ఇప్పుడు సంతోషంగా మా ఊరికి దగ్గరగా హైదరాబాద్‌లో ఉద్యోగం చేసుకుంటున్నాను. అంతా బాబా లీల. సద్గురు శ్రీసాయినాథుని దివ్యపాదాలకు నమస్కరిస్తూ నా కోరికను నెరవేర్చినందుకు శతకోటి ప్రణామాలు తెలుపుకుంటున్నాను. శిరిడీ దర్శించాలని నా చిరకాలవాంఛ. ఆ అవకాశం నాకు ఇప్పటివరకు రానందున బాబా పిలుపుకోసం ఎంతగానో ఎదురుచూస్తున్నాను. నా మనస్సులో ఒక విన్నపం ఉంది. దాన్ని బాబా వింటారని ఆశిస్తున్నాను. “బాబా! చాలా చాలా ధన్యవాదాలు. నాకు అండగా నిలిచి నా జీవితాన్ని అందంగా మలిచారు”. నా అనుభవాన్ని సాటి సాయిభక్తులతో పంచుకునే అవకాశాన్ని కల్పించిన ఈ బ్లాగు నిర్వాహకులకు మరియు నా అనుభవాన్ని చదివిన ప్రతి ఒక్కరికీ నా ధన్యవాదాలు. మనమందరం బాబా లీలలను ఎల్లప్పుడూ గుర్తుంచుకుంటూ వారి స్మరణలో సదా ఆనందంగా ఉందాం. చివరిగా "అందరినీ ఆశీర్వదించమ"ని, అలాగే "మరో అనుభవాన్ని మీ అందరితో పంచుకునే అవకాశాన్ని త్వరలోనే నాకు ప్రసాదించమ"ని బాబాను ప్రార్థిస్తూ.. సెలవు. 


శ్రీ సాయినాథ్ మహరాజ్ కీ జై!



సాయి మహారాజ్ సన్నిధి సోషల్ మీడియా లింక్స్:

Subscribe Here

బ్లాగ్ అప్డేట్ నోటిఫికేషన్స్ నేరుగా మీ మెయిల్ కే వచ్చేందుకు క్రింద బాక్సులో మీ మెయిల్ ఐడి టైపు చేసి subscribe పై క్లిక్ చేసి, తరువాత స్టెప్స్ పూర్తీ చేయండి.

Delivered by FeedBurner

Followers

Recent Posts


Blog Logo