సాయిభక్తుల అనుభవమాలిక 968వ భాగం....

---

ఈ భాగంలో అనుభవాలు:

1. ఆరోగ్యాన్ని అనుగ్రహించిన బాబా

2. నమ్మకమనే విత్తనాన్ని నాటి ప్రేమతో ఆదరిస్తున్న బాబా

3. డాక్టరు నోట ఉపశమనాన్నిచ్చే మాటలు పలికించిన బాబా

---

ఆరోగ్యాన్ని అనుగ్రహించిన బాబా

సద్గురు శ్రీ సాయినాథ్ మహారాజ్ కీ జై. నాపేరు శ్రీకాంత్. ఆ సాయినాథుని దయవల్ల నేను, నా కుటుంబ సభ్యులు ఎలాంటి ఇబ్బందులు లేకుండా ఆరోగ్యంతో ఉన్నామని చెప్పడానికి చాలా ఆనందంగా ఉంది. ఏ సమస్య వచ్చినా కళ్ళు మూసుకుని మన బాధను, ఇబ్బందిని తెలుపుకుని, కష్టాన్ని తొలగించమంటే వెంటనే అనుగ్రహించే మన ఇలవేల్పైన శ్రీ సాయినాథుని పాదపద్మములకు సాష్టాంగ నమస్కారాలు తెలుపుకుంటూ ఆయన ప్రసాదించిన అనుభవాలను పంచుకుటున్నాను. ఈమధ్యనే మా అత్తమ్మగారు చనిపోయారు. ఆమె అంత్యక్రియలకు సంబంధించిన కార్యక్రమాలలో పాల్గొన్న తర్వాత ఎందుచేతనోగాని నాకు నిద్ర సరిగా రాకపోవడం, గుండె దగ్గర కొంచెం ఇబ్బందిగా ఉండటం, ఒళ్ళంతా ఊపుతున్నట్లు ఉండటం వంటి లక్షణాలుండేవి. ఏం జరుగుతుందో అర్థంకాక నేను చాలా భయాందోళనలకు గురయ్యాను. వెంటనే సాయినాథుని ముందు కూర్చొని, "నాకున్న ఇబ్బందిని తొలగించి, ఆరోగ్యంగా ఉండేలా అనుగ్రహించమ"ని వేడుకున్నాను. తరువాత ఆ సాయినాథునికి సాష్టాంగ నమస్కారము చేసుకుని, "నేను ఆరోగ్యంగా ఉన్నట్లయితే, ఈ అనుభవాన్ని బ్లాగు ద్వారా సాయిబంధువులందరితో పంచుకుంటాన"ని మొక్కుకున్నాను. ఆ శిరిడీ సాయినాథుని కృపాకటాక్షాల వలన గుండె దడ, ఒళ్ళు ఊపడం తగ్గి ఆరోగ్యం చేకూరింది.

ఇకపోతే ఈమధ్యకాలంలో నా శ్రీమతి శ్రీవాణికి హఠాత్తుగా ఒకరోజు రాత్రి విపరీతమైన తలనొప్పి, తీవ్రమైన గ్యాస్ట్రిక్ సమస్య వచ్చాయి. నేను వెంటనే ఆ సాయినాథుని ఊదీ నా భార్య నుదుటన పెట్టి, మరికొంత ఊదీ నీటిలో వేసి ఇచ్చాను. కొద్దిక్షణాల్లో ఆమె హాయిగా నిద్రపోయింది, తెల్లవారేసరికి తలనొప్పి, ఆయాసం అదృశ్యమయ్యాయి. ఇలా ఆ సాయినాథుని ఊదీ ఎంత మహిమ గలదో నేను, నా కుటుంబం చాలాసార్లు ప్రత్యక్షంగా అనుభవించాం. కృతజ్ఞతాపూర్వకంగా ఆ సాయినాథునికి సాష్టాంగ నమస్కారాలు అర్పించుకుని, వారి కృపను మీతో ఇలా పంచుకున్నాను. "బాబా! నాకు, నా కుటుంబానికి సద్భుద్ధిని, మంచి ఆరోగ్యాన్ని, మీ పట్ల దృఢమైన భక్తిని ప్రసాదించమని కోరుకుంటున్నాను తండ్రి".

---

నమ్మకమనే విత్తనాన్ని నాటి ప్రేమతో ఆదరిస్తున్న బాబా.

ప్రియమైన సాయిబంధువులారా! నా పేరు సుచిత్ర చంద్రబోస్. నేను సినీరంగంలో కొరియోగ్రాఫర్ ని. నేను హైదరాబాదులో నివాసముంటున్నాను. బాబాతో నాకున్న అనుబంధాన్ని మీతో పంచుకోవడం బాబా ఆశీర్వాదంగా భావిస్తున్నాను. చిన్నతనంలో నాకు అమ్మానాన్న తెలుసుగానీ దేవుడు ఎలా ఉంటాడు?, దేవుడంటే ఏంటో? అస్సలు తెలీదు. ఆ వయస్సులో నాకు పెద్దగా జ్ఞాపకశక్తి ఉండేది కాదు. ఆ కారణంగా నేనెప్పుడూ చదువులో వెనకబడి ఉండేదాన్ని. నాకు తెలిసి అప్పుడప్పుడు నాకు 2, 3 మార్కులు వచ్చినా ఎక్కువగా సున్నా మార్కులే వచ్చేవి. నా రిపోర్టు షీటు ఎప్పుడూ ఎరుపుగా రెడ్ ఇంకుతో నిండిపోయి ఉండేది. అందరూ బాగా చదువుకుంటున్నారు, నేను మాత్రమే ఎందుకు చదువుకోలేకపోతున్నానని నాకు అనిపించేది. సరే, ఏదోరకంగా నాకు కూడా మంచి పేరు రావాలి, అందరిచేత ప్రశంసింపబడాలి అని ఎంతో తపన పడేదాన్ని. ఆ తపనతో స్కూల్లో నాకు మంచి పేరు రావాలంటే ఏం చేయాలని ఆలోచించాను. నాకు స్పోర్ట్స్ అంటే చాలా ఆసక్తి. నా స్నేహితులంతా నేను గనక వాళ్ళ జట్టులో ఉంటే వాళ్ళ జట్టే గెలుస్తుందని చాలా బలంగా నమ్మేవారు. అందువలన నేను స్పోర్ట్స్ లో ఛాంపియన్ అవ్వాలనుకున్నాను. అప్పట్లో మేము చెన్నైలో ఉండేవాళ్ళం. మా అమ్మ తరచూ మైలాపూర్‍లోని బాబా మందిరానికి వెళ్తుండేది. ఒకసారి నేను కూడా `అమ్మతో వెళ్ళాను. అప్పుడు నాకు అందరూ బాబాను కోరికలు కోరుతున్నారు గదా మనం కూడా కోరుకుందామనిపించి, "బాబా! సూపర్ సీనియర్స్ గర్ల్స్ లో నేను ఛాంపియన్ అవ్వాలి. మీ వల్ల ఎట్లాగైనా నాకు కప్పు రావాలి. స్కూలు బోర్డులో నాపేరు లిఖించబడాలి" అని బాబాకి దణ్ణం పెట్టుకున్నాను. తరువాత నావంతు కృషి నేను చేసి నా స్నేహితులంతా నామీద నమ్మకం పెట్టుకుంటే, నేను బాబా మీద నమ్మకం పెట్టాను. బాబా దయవల్ల మా జట్టు గెలిచి నాకు కప్పు వచ్చింది. బాబా వల్ల మొదటిసారి నాకు దేవుడంటే మన కోరిక నెరవేరుస్తాడనే నమ్మకం కుదిరింది. అంతేకాదు నా మీద నాకే నమ్మకం కలిగేలా చేసారు బాబా. అలా చిన్నతనంలో మొదలైన బాబాపై నమ్మకంతో నా జీవనప్రయాణం సాగుతూ ఉంది. ఇప్పటికీ బాబా నా చేయి వదలలేదు. ప్రతి కష్టంలో బాబా వెంటే ఉంటున్నారు. వంటిట్లో వెల్లుల్లి దగ్గర నుంచి ఏం కావాలన్నా, ఏది కనపడలేదన్నా, 'బాబా ప్లీజ్..' అనుకుంటే వెంటనే అది కనపడుతుంది. అదే చీర కట్టుకుంటున్నప్పుడు ఒక సేఫ్టీ పిన్ కావాలన్నా 'బాబా ప్లీజ్.. ఒక్కటన్న సేఫ్టీ పిన్ అందివ్వు బాబా' అనుకుంటే, సరిగ్గా ఒక పిన్ కనిపిస్తుంది. కాలప్రవాహంలో మా అమ్మగారు బాబాలో ఐక్యమయ్యారు. ప్రస్తుతం మా నాన్న M. పూర్ణచంద్రరావుగారికి 92 ఏళ్ళు. ఆయన ఒంటరిగా బయటకు వెళ్ళేటప్పుడు ఎక్కడైనా పడిపోతారేమో, దెబ్బ తగులుతుందేమోనని ఆయనకి బాబాలా వస్త్రధారణ చేసి బయటకి పంపేదాన్ని. ఎందుకంటే, ఆయన ఎవరినైనా లిఫ్ట్ అడిగితే ఆ దైవమే సహాయం కోరుతున్నారన్న భావం జనాలకు కలుగుతుంది, తద్వారా ఆయనను క్షేమంగా ఇంటికి తీసుకొచ్చి దింపేస్తారన్న నమ్మకం. సరిగ్గా అదే జరిగేది. మా నాన్న ఎక్కడ, ఎవరిని లిఫ్ట్ అడిగినా వాళ్ళు ఇంటివరకూ తీసుకొచ్చి ఆయనను ఇంట్లో దింపేవారు. అలా ప్రేమగా బాబా నా ఆలోచనను ఎప్పుడూ కాదనరు. ఇకపోతే బాబా మంత్రం విషయంలో పుస్తకంలో చూసి చదవడం కాకుండా నేనే సొంతంగా వ్రాసేసుకోవాలనిపించి నా బాబాకి ప్రేమతో ఈ క్రింది మంత్రం వ్రాసుకున్నాను.

'సాయిరామ్ సాయిరామ్ సత్యం సాయిరామ్. సాయిరామ్ సాయిరామ్ నిత్యం సాయిరామ్. సదా సాయిరామ్. సర్వం సాయిరామ్. సగర్వం సాయిరామ్. దిశ సాయిరామ్. దశ సాయిరామ్. జనం సాయిరామ్. భోజనం సాయిరామ్'.

శ్రీ శిరిడీ సాయినాథ్ మహారాజ్ కీ జై!!!

---

డాక్టరు నోట ఉపశమనాన్నిచ్చే మాటలు పలికించిన బాబా.

ముందుగా ప్రియమైన సాయిబంధువులకు మరియు బ్లాగు నిర్వాహకులకు నమస్తే. బాబా మాకు ప్రసాదించిన అనుభవాలను, భావాలను పంచుకునేందుకు అనువుగా ఈ వేదికను ఏర్పాటుచేసిన వారికి ధన్యవాదాలు. నా పేరు మాధవిరెడ్డి. మాది హైదరాబాద్. సాయి తన ఉనికిని, అద్భుతాలను అనేక విధాలుగా చూపిస్తారు. ఆయన ఎప్పుడూ నాతో ఉన్నారు, నేను దేని గురించి అనుకున్నా ఆ విషయంలో నాకు ఒక మార్గాన్ని చూపుతారు. ఈ రోజు నేను ఒక అతిముఖ్యమైన అనుభవాన్ని పంచుకోవాలనుకుంటున్నాను. అదేమిటంటే, ఈమధ్య మా అమ్మగారికి క్యాన్సర్ అని నిర్ధారణ అయింది. అయితే ఏ మేరకు సమస్య ఉందో, డాక్టరు ఏమి చెప్తారో మాకు తెలియకముందే నేను, "బాబా! అమ్మని కాపాడండి. బాధాకరమైన పెద్ద చికిత్సలు అవసరం లేకుండా తేలికైన పద్ధతుల ద్వారా తనకి చికిత్స జరిగేలా చూడండి" అని బాబాను ప్రార్థించాను. బాబా నేను కోరుకున్నట్లే అనుగ్రహించారు. మేము డాక్టరుని కలిసినప్పుడు ఆయన, "క్యాన్సర్ ప్రారంభ దశలో ఉంది. చిన్న శస్త్రచికిత్స చేస్తే సరిపోతుంది. కీమోథెరపీ అవసరం లేదు" అని చెప్పారు. మా అందరికీ ఎంతో ఉపశమనాన్నిచ్చిన మధురక్షణాలవి. బాబా అనుగ్రహానికి, వారి సంరక్షణకు నేను ఎల్లప్పుడూ కృతజ్ఞురాలినై ఉంటాను. "బాబా! అన్నిటికి మీకు చాలా చాలా ధన్యవాదాలు. నాకు మీ సహాయసహకారాలు అందించండి. ఇంకా ఎప్పుడూ మీ మార్గాన్ని అనుసరించగలిగేలా నాకు, నా కుటుంబానికి మార్గనిర్దేశం చేయండి. నేను శిరిడీ సందర్శించాలని ఆశపడుతున్నాను. దయచేసి నాకు అనుమతివ్వండి బాబా. మీ ఆశీస్సులు మాపై కుమ్మరించండి బాబా".

---