సాయిభక్తుల అనుభవమాలిక 967వ భాగం....

---

ఈ భాగంలో అనుభవాలు:

1. ఎక్కువ కష్టం లేకుండా చేసిన బాబా

2. సాయిబాబా దయ నాపై ఉందన్న నమ్మకం కుదిర్చిన అనుభవం

3. బాబా దయతో ఇంటిల్లిపాదికి కోవిడ్ నెగిటివ్

---

ఎక్కువ కష్టం లేకుండా చేసిన బాబా

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై!!!

సమస్త సాయిబంధువులకు మరియు బ్లాగు నిర్వహిస్తున్న సాయికి వందనాలు. నా పేరు అనూజ. మాది నిజామాబాద్. 1996కి ముందే నాకు బాబా గురించి తెలుసు. కానీ బాబా దయవల్ల ఆ సంవత్సరం మాకు బాబు పుట్టాక నేను ఎక్కువగా బాబాను నమ్మసాగాను. బాబుకి కూడా సాయి సిద్దార్థ్ అని పేరు పెట్టుకున్నాను. ఇప్పుడు తనకి జరిగిన ఒక సంఘటన గురించి బాబాకి మొక్కుకున్న విధంగా మొదట పంచుకుంటున్నాను. నిజానికి దీనికన్నా ముందు ఒక మ్రొక్కు మ్రొక్కుకుని అది తీరేదాకా ఈ బ్లాగులో ఈ అనుభవం పంచుకోను అనుకున్నాను. కానీ మొదటి మ్రొక్కు విషయంలో నాకు బాబా అనుగ్రహం లభించలేదు. ఇంతలో ఇప్పుడు పంచుకోబోయే సంఘటన జరగడంతో ముందు ఈ అనుభవాన్ని పంచుకుంటానని బాబాకి  మ్రొక్కుకున్నాను. ఇక అసలు విషయానికి వస్తే.. 

2021, అక్టోబర్ 6న బాస్కెట్ బాల్ ఆడుతున్నప్పుడు అనుకోకుండా మా బాబు ముక్కుకి ఫ్రాక్చర్ అయ్యి చాలా రక్తం పోయింది. బాబు ఇంటికొచ్చి తన ముక్కుకి ఇలా జరిగిందనగానే నాకు చాలా భయమేసి వెంటనే, "బాబా! బాబుకి పెద్ద సమస్య కాకుండా, ఆపరేషన్ అవసరం లేకుండా ఉంటే నవగురువార వ్రతం చేస్తానని, 'సాయి మాహారాజ్ సన్నిది' బ్లాగులో పంచుకుంటాన"ని బాబాకి మ్రొక్కుకున్నాను. తరువాత డాక్టరుకి చూపిస్తే, "ఫ్రాక్చర్ అయ్యింది, అయితే మెయిన్ బోన్‍కి కాకుండా సైడ్ బోన్‍కి అయ్యింది. రెండునెలల్లో తగ్గిపోతుంది. ఆపరేషన్ అవసరం లేదు. ఒకవేళ మీకు ముక్కు వంకర అనిపిస్తే, అప్పుడు చేసుకోవచ్చు" అని అన్నారు. అప్పుడు నేను, "అటువంటి సమస్యలేమీ లేకుండా చేయమ"ని బాబాను వేడుకున్నాను. ఇప్పుడు మా బాబు ఏ ఇబ్బంది లేకుండా క్షేమంగా ఉన్నాడు. అంతా బాబా దయవల్లే. ఆయన ఎక్కువ కష్టం లేకుండా బాధను తీసేసారు. ముక్కు కొద్దిగా వంకర ఉన్నప్పటికీ చెప్తేనే తెలిసేంత స్వల్పంగా ఉంది. అందుకే ఆపరేషన్ చేయించలేదు. ఆ నిర్ణయం తీసుకోవడానికి ఒక వారం పట్టింది. అందుకే వారం ఆలస్యంగా ఈ అనుభవాన్ని పంచుకున్నాను. "దయచేసి క్షమించండి బాబా": మా బాబుకి సాయి అండదండలు ఎప్పటికీ ఇలాగే ఉంటాయని నమ్ముతాను. ఎందుకంటే బాబా అనుగ్రహంతోనే బాబు మాకు పుట్టాడు. ఆ అనుభవాన్ని మరోసారి పంచుకుంటాను. "బాబా! ఇదే మొదటిసారి కావడం వల్ల ఏదైనా తప్పుగా వ్రాసి ఉంటే క్షమించండి. మా అందరిపైన మీ చల్లని చూపు, ఆశీస్సులు ఉండాలని కోరుకుంటున్నాను. ధన్యవాదాలు బాబా. శతకోటి వందనాలు బాబా".

---

సాయిబాబా దయ నాపై ఉందన్న నమ్మకం కుదిర్చిన అనుభవం

నాపేరు సుభాష్. బాబా నాకు ప్రసాదించిన ఒక అనుభవాన్ని నేనిప్పుడు మీతో పంచుకుంటున్నాను. 17సంవత్సరాల క్రితం చలికాలంలో నేను, నా మిత్రుడు ఏ.ఎన్.ఆర్ కలిసి శిరిడీ వెళ్ళాము. పది నిమిషాలలో తయారై బాబా దర్శనానికని బయలుదేరాము. నా దగ్గర ఒక్క రూపాయి కూడా లేనందున నా మిత్రుడు దర్శనానికి వెళ్లేముందు నా జేబులో ఇరవై రూపాయలు పెట్టాడు. అయితే, నేను బాబాను చూస్తూ ఆ డబ్బులు హుండీలో వేయలేదు. దర్శనానంతరం బయటకు వచ్చి ఎండలో నిలబడి ఉండగా రైల్లో పరిచయమైన వాళ్ళు కలిస్తే వాళ్లతోపాటు నా మిత్రుడు వెళ్ళాడు. నేను మాత్రమే అక్కడే నిలబడి ఉన్నాను. కొంత సమయం తరువాత నేను ఎడమవైపు తిరిగి చూస్తే, డొనేషన్ కౌంటర్ కనపడింది. దగ్గరకు వెళ్లి కౌంటర్లో ఉన్న అతన్ని, "ఇరవై రూపాయలిచ్చినా తీసుకుంటారా?" అని అడిగాను. అందుకు అతను, "ఇరవైరెండు రూపాయలు మొదలు మీరు ఎంత డబ్బు ఇచ్చిన తీసుకుంటాం" అని అన్నాడు. కానీ నా దగ్గర నా మిత్రుడు నా జేబులో పెట్టిన ఇరవై రూపాయలకు మించి పైసా కూడా లేదు. అందుచేత నాకు ఏమి చేయాలో అర్థం కాలేదు. అలాగే ఐదు నిముషాలు నిలబడ్డాను. టక్కున రెండు రూపాయల నాణెం ఒకటి ఎండలో మెరిసిపోతూ నా కంటపడింది. అప్పటివరకూ ఆ చోటలేని నాణెం హఠాత్తుగా కనపడేసరికి అది సాయిబాబా మహిమ అనిపించింది. వెంటనే వెళ్ళి ఆ నాణెం తీసుకుని వెళ్ళి కౌంటర్లో ఇరవైరెండు రూపాయలు ఇచ్చాను. అతను నా ముఖం అలాగే చూసి రిసిప్ట్ ఇచ్చాడు. నెల రోజుల తర్వాత పోస్టులో ఊదీ, ప్రసాదం మా ఇంటికి వచ్చాయి. సాయిబాబా దయ నాపై ఉందన్న నమ్మకం కుదిరింది. అప్పటినుండి నా జీవితం సాయిబాబా అనుగ్రహంతోనే నడిచిపోతుంది. ఎన్ని కష్టాలొచ్చినా బాబా దయతో దూదిపింజల్లా ఎగిరిపోతున్నాయి.

సర్వం శ్రీ సాయినాథార్పణమస్తు!!!

---

బాబా దయతో ఇంటిల్లిపాదికి కోవిడ్ నెగిటివ్

నాపేరు కవిత. ముందుగా శ్రీసాయిబాబాకు కోటి పాదనమస్కారాలు తెలుపుకుంటూ నా అనుభవాన్ని పంచుకుంటున్నాను. ఇటీవల మా ఇంటిల్లిపాదికి కరోనా వచ్చింది. పిల్లలు, ఒక పెద్ద వ్యక్తి మినహా మిగతా అందరమూ కోవిడ్‍తో పదిరోజులపాటు ఎంతో బాధపడ్డాము. ఆ సమయంలో నేను బాబాను గట్టిగా ప్రార్థించి, "మాకు నయమైతే ఆలస్యం చేయకుండా నా అనుభవాన్ని మీ బ్లాగులో పంచుకుంటాన"ని చెప్పుకున్నాను. బాబా దయవలన ఈరోజు (2021, అక్టోబర్ 18న) మా అందరికీ కోవిడ్ నెగిటివ్ వచ్చింది. "నాకు చాలా సంతోషంగా ఉంది బాబా. ఎల్లప్పుడూ ఇలాగే మాకు తోడునీడగా ఉంటూ రక్షణనివ్వండి. మీకు చాలా చాలా ధన్యవాదాలు బాబా".

ఓం శ్రీ సాయినాథాయ నమః!!!

                                                                                                                           

---