- దక్షిణ స్వీకరణ - చూపిన దయ
దక్షిణ స్వీకరణ - చూపిన దయ
అందరికీ నమస్కారం. నా పేరు సాయిసంహిత. 2021, ఏప్రిల్ 14, బుధవారంరోజున నేను సచ్చరిత్ర పారాయణ పూర్తి చేశాను. అదేరోజు ‘సాయి మహరాజ్ సన్నిధి’ వాట్సాప్ గ్రూపులో ఒక సాయిభక్తురాలు పంచుకున్న అనుభవం చదివాను. అందులో, ‘తన పారాయణను ఆమోదిస్తే తన వద్దనుండి 100 రూపాయలు దక్షిణ స్వీకరించాలని బాబాను ప్రార్థించాననీ, తన ప్రార్థనను మన్నించి బాబా తన వద్దనుండి దక్షిణ స్వీకరించారనీ’ ఆ భక్తురాలు పంచుకున్నారు. ఆ అనుభవం చదివిన నాకు చాలా సంతోషంగా అనిపించింది. దాంతో నేను కూడా మనసులోనే, “బాబా నా పారాయణ ఆమోదిస్తే నా వద్ద దక్షిణ స్వీకరిస్తే బాగుండు” అనుకున్నాను. ఇంక ఆ విషయాన్ని అంతటితో మర్చిపోయాను. తరువాత నేను డ్యూటీకి వెళ్ళిపోయాను. డ్యూటీ నుంచి ఇంటికి తిరిగి వచ్చేటప్పుడు బస్టాపుకి వస్తుంటే ఒక పాప నా వద్దకు వచ్చి, “అక్కా, ఒక రూపాయి ఇవ్వవా?” అని అడిగింది. నేను వెంటనే ఆ పాపకు ఒక రూపాయి ఇచ్చాను. కానీ ఆ సమయంలో ‘నా వద్దనుండి దక్షిణ స్వీకరించమ’ని నేను బాబాను అడిగిన విషయం మర్చిపోయాను. రెండు రోజుల తర్వాత, ఏప్రిల్ 16వ తేదీన, సచ్చరిత్రలో 14వ అధ్యాయంలోని ‘దక్షిణ’ గురించి చదువుతున్నప్పుడు, బాబా ఆ పాప రూపంలో నా దగ్గర దక్షిణ స్వీకరించిన విషయం గుర్తొచ్చి చాలా సంతోషంగా అనిపించింది. ఆ ముందురోజు కూడా ఆ భక్తురాలి అనుభవం ఊరికే గుర్తొచ్చింది, కానీ బాబాను అడిగిన విషయం మాత్రం గుర్తుకురాలేదు. “నా పారాయణను ఆమోదించి నా దగ్గర దక్షిణ స్వీకరించినందుకు, నేను మర్చిపోయిన విషయాన్ని గుర్తుచేసినందుకు థాంక్యూ సో మచ్ బాబా!”
2021లో నాకు, నా స్నేహితునికి గొడవ అయి ఇద్దరం మాట్లాడుకోలేదు. పని ఒత్తిడిలో ఉన్న తనని అర్థం చేసుకోకుండా నేను తనతో గొడవ పెట్టుకున్నాను. దాంతో తను నాతో మాట్లాడటం మానేశాడు. నాకు బాధగా అనిపించి బాబాకు నమస్కరించుకుని, “సారీ బాబా! నేనే తనను అర్థం చేసుకోకుండా గొడవ పెట్టుకున్నాను. నన్ను క్షమించండి. ఇంకెప్పుడూ తనతో గొడవపెట్టుకోను. తను నాతో మాట్లాడేలా దయ చూపండి” అని చెప్పుకున్నాను. బాబా దయవల్ల నా స్నేహితుడు నాతో మునుపటిలా మాట్లాడసాగాడు. “తెలిసీతెలియక నేను చేసిన తప్పులను క్షమించండి బాబా. నన్ను సరైన దారిలో నడిపించండి. మీ నామమే నాకు ఊపిరి. సచ్చిదానందా! ఎల్లప్పుడూ మా తోడుగా ఉండండి”.
