సాయిభక్తుల అనుభవమాలిక 787వ భాగం....

---

ఈ భాగంలో అనుభవాలు:

1. ఎలాంటి కోరికనైనా బాబా మాత్రమే తీర్చగలరు
   
2. వెన్నంటే ఉండి కాపాడే సాయి
3. జ్వరం తగ్గించి కాపాడిన బాబా

---

ఎలాంటి కోరికనైనా బాబా మాత్రమే తీర్చగలరు

సాయిభక్తులందరికీ నా నమస్కారాలు. నా పేరు అరుణ. వృత్తిరీత్యా నేనొక డాక్టర్ని. బాబా నాకు ప్రసాదించిన అనుభవాలలో నుండి కొన్నింటిని ఇంతకుముందు ఈ బ్లాగ్ ద్వారా మీతో పంచుకున్నాను. ఇప్పుడు మరికొన్ని అనుభవాలను పంచుకోబోతున్నాను. 

మొదటి అనుభవం: ఈ మధ్యకాలంలో ఒకసారి నేను అనారోగ్యంతో బాధపడుతూ హాస్పిటల్లో చేరి, నాలుగు రోజుల పాటు ట్రీట్మెంట్ తీసుకుని ఆరోగ్యం చేకూరిన తరువాత ఇంటికి వచ్చాను. కానీ 20 రోజుల తరువాత మళ్ళీ ఆరోగ్య సమస్య మొదలైంది. ఈ కరోనా సమయంలో హాస్పిటల్‌కి వెళ్ళాలంటే చాలా భయమేసింది. అందుకని నేను బాబాకు నమస్కరించుకుని, "నాకు ఆరోగ్యాన్ని ప్రసాదించమ"ని మనస్ఫూర్తిగా వేడుకుని, ‘నా ఆరోగ్య సమస్య రేపటిలోగా తగ్గితే నా అనుభవాన్ని బ్లాగులో పంచుకుంటాను’ అని మ్రొక్కుకున్నాను. బాబాను ప్రార్థించిన 24 గంటల లోపే నా ఆరోగ్యం మెరుగుపడింది. నేను హాస్పిటల్‌కి కూడా వెళ్ళలేదు. కేవలం బాబాను ప్రార్థించి, నీళ్ళలో బాబా ఊదీ వేసుకుని త్రాగాను, అంతే. ఎలాంటి సమస్యైనా బాబాకు చెప్పుకుంటే బాబా వెంటనే తీరుస్తారు. “బాబా! మీ ఆశీస్సులు ఎప్పటికీ మా మీద ఇలానే ఉండాలి. నాకు విపరీతమైన కోపం వస్తోంది బాబా. ఆ కోపాన్ని తగ్గించండి. నాకు అన్నివేళలా మీరే దిక్కు. మీ అనుగ్రహం వల్లనే ఈరోజు నేను ఇలా ఉన్నాను”. 

రెండవ అనుభవం: ఇటీవల ఒకరోజు రాత్రి మా ఆడపడుచువాళ్ళ అత్తయ్యకి కోవిడ్ పాజిటివ్ వచ్చింది. అంతకుముందు ఒక వారం ఇంట్లోవాళ్ళందరూ ఆవిడతో సన్నిహితంగా మెలిగారు. అంతేకాకుండా, మా ఆడపడుచు పిల్లలిద్దరూ ఆవిడతోనే పడుకున్నారు. అందువలన ఆవిడకి పాజిటివ్ అని తెలిసి మేమంతా చాలా టెన్షన్ పడ్డాము. తరువాత రోజు ఇంట్లో అందరూ కోవిడ్ టెస్ట్ చేయించుకున్నారు. అందరూ రిజల్ట్ ఎలా వస్తుందోనని టెన్షన్‌ పడుతుంటే నేను మనసులోనే బాబాకు నమస్కరించుకుని, “బాబా! మా వాళ్ళందరికీ నెగెటివ్ అని రిపోర్టు వస్తే ఈ అనుభవాన్ని బ్లాగులో పంచుకుంటాను” అని అనుకున్నాను. నా బాబా నన్ను ఎప్పుడూ నిరాశపరచలేదు. అందరికీ నెగిటివ్ అని రిపోర్ట్ వచ్చింది. దాంతో అందరం రిలాక్స్ అయ్యాము. “థాంక్యూ బాబా! మీ ఆశీస్సులు మాపై ఇలానే ఉండనివ్వండి బాబా. లవ్ యు బాబా! ప్లేగు వ్యాధిని అంతమొందించినట్లే ఈ కరోనాని కూడా తొందరగా అంతమొందించండి బాబా! ఇది కేవలం మీ వల్ల మాత్రమే సాధ్యం బాబా.”

మూడవ అనుభవం: ఎన్నో సంవత్సరాలనాటి నా కోరిక ఇటీవల నెరవేరింది. అది పూర్తిగా బాబా దయవల్ల మాత్రమే జరిగింది. ఆ అనుభవాన్నే ఇప్పుడు మీతో పంచుకోబోతున్నాను. ఈమధ్య జరిగిన సాయి అనుభవాలలో ఇది చాలా ముఖ్యమైన అనుభవం. మా తల్లిదండ్రులకి మేము ముగ్గురు ఆడపిల్లలం. అందరికీ వివాహాలయ్యాయి. మా అక్కలిద్దరికీ అమ్మాయిలే పుట్టారు. నాకు కూడా మొదటి కాన్పులో పాప పుట్టింది. పాపకిప్పుడు 5 సంవత్సరాలు. ‘అందరికీ అమ్మాయిలే’ అని మా అమ్మగారు బాధపడనిరోజు లేదు. నేను రెండవసారి గర్భం దాల్చినప్పుడు, ‘ఈసారి అబ్బాయే పుడతాడు’ అని అందరూ నా మీద ఎన్నో ఆశలు పెట్టుకున్నారు. కానీ అమ్మాయి పుడుతుందో, అబ్బాయి పుడతాడో మనం చెప్పలేము కదా. అందువల్ల, ఈసారైనా అమ్మానాన్నల కోరిక తీర్చగలనో లేదో అనే భయంతో నా ప్రెగ్నెన్సీ సమయంలో నేను ఆనందంగా ఉండలేకపోయేదాన్ని. మనసంతా ఎప్పుడూ ఇవే ఆలోచనలతో నిండివుండేది, నిద్రపట్టేది కాదు. ఇలాంటి సమయంలో మావారు నాకు చాలా సపోర్టివ్‌గా ఉండేవారు. ‘ఎవరు పుట్టినా పరవాలేదు, ఎక్కువ ఆలోచించకు’ అని ఎంతగానో సర్దిచెప్పేవారు. కానీ నా మనసు కుదుటపడేది కాదు. నాకు మూడవ నెల రాగానే స్కానింగ్ చేయించాము. అందులో బేబీ హార్ట్ బీట్ 150 వచ్చింది. నాకున్న మెడికల్ నాలెడ్జ్‌లో, ‘హార్ట్ బీట్ 145 కంటే ఎక్కువ ఉంటే అమ్మాయి పుట్టే అవకాశాలు ఎక్కువ’ అని తెలుసు. అందువల్ల ఆ స్కానింగ్ రిపోర్టు చూసి చాలా భయం వేసింది. కానీ నాకున్న ఒకే ఒక్క ధైర్యం నా బాబా మాత్రమే. ఎందుకంటే, ఇంతకుముందు ఎన్నో విషయాలలో బాబా నాకు అండగా ఉన్నారు. ‘రిపోర్టు ఎలా వున్నా బాబా చూసుకుంటారు’ అని అనుకున్నాను. 

కొంతకాలం తరువాత మళ్ళీ చెకప్ కోసం డాక్టర్ వద్దకు వెళ్ళేముందు బాబాకు నమస్కరించుకుని, “బాబా! ఈరోజు హాస్పిటల్‌కి వెళుతున్నాను, మీరు నాకు తోడుగా ఉన్నారని నాకేదైనా నిదర్శనం ఇవ్వండి” అని ప్రార్థించి, హాస్పిటల్‌కి బయలుదేరాము. హాస్పిటల్లో డాక్టర్ నన్ను పరీక్షించి, స్కానింగ్ చేయించుకోమన్నారు. స్కానింగ్ కోసం హాస్పిటల్ నుండి బయటికి రాగానే, సాయిబాబాను తీసుకుని అన్ని ఊర్లూ తిరిగే వాహనం నా ముందు వచ్చి నిలబడింది. బాబాను చూడగానే అవధులు లేని ఆనందంతో కన్నీటిపర్యంతమయ్యాను. వెంటనే బాబాకు నమస్కరించుకుని, 11 రూపాయలు దక్షిణ సమర్పించి, స్కానింగ్ సెంటరుకి వెళ్ళాము. అక్కడికి వెళ్ళాక స్కానింగ్ రూములో పెద్ద ఫోటో రూపంలో బాబా దర్శనమిచ్చారు. ఆ ఫోటోలోంచి బాబా నా వైపే చూస్తున్నట్లుగా అనుభూతి చెందాను. ఇలా ఒకేరోజు బాబా నాకు రెండుసార్లు దర్శనమిచ్చారు. ఈసారి కూడా నా స్కానింగులో బేబీ హార్ట్ బీట్ 152 ఉంది. కాస్త భయం వేసినప్పటికీ బాబా మీదే భారం వేశాను. 5వ సారి స్కానింగ్ చేయించుకుంటున్నప్పుడు, నేను కూడా డాక్టర్ని కావడం వల్ల అక్కడ స్కానింగ్ చేసే డాక్టర్ నాతో ‘పుట్టబోయేది పాప’ అని ఇన్‌డైరెక్ట్‌గా చెప్పారు. (లింగనిర్ధారణ పరీక్షలను మన దేశంలో అనుమతించరు కదా!) అది విన్న తరువాత ఒక్కసారిగా నా ఆశలన్నీ ఆవిరైపోయాయి. ఇంక ‘నాకు ఎవరు రాసిపెడితే వాళ్ళే పుడతారు’ అని మనసుకి సర్దిచెప్పుకునేదాన్ని. అప్పటినుంచి ప్రతిరోజూ బాబాకు నమస్కరించుకుని, “మీరు తలచుకుంటే ఏదైనా సాధ్యమే కదా బాబా! నా కడుపులో బిడ్డను కూడా నేను కోరుకునేలా మార్చండి బాబా” అని మ్రొక్కుకుని, బాబా ఊదీ పెట్టుకుని, నీళ్ళలో కాస్త ఊదీ కలుపుకుని త్రాగేదాన్ని. నేను పుట్టబోయే బిడ్డ గురించి క్వశ్చన్ & ఆన్సర్ వెబ్‌సైట్‌లో బాబాను అడిగితే ప్రతిసారీ నాకు అనుకూలమైన సమాధానాలే వచ్చాయి. అలాగే, శిరిడీ నుండి బాబా దర్శనం ప్రత్యక్ష ప్రసారం చూసే సమయంలో ముందుగానే ‘బాబా ఫలానా డ్రెస్సులో ఈరోజు కనిపిస్తారు’ అనుకుంటే బాబా నాకు అలానే కనిపించేవారు. అలా దాదాపు ఒక 15 సార్లు నేను అనుకున్న డ్రెస్సులో బాబా దర్శనం ఇచ్చారు. దాంతో, నాకు పుట్టబోయే బిడ్డ విషయంలో పూర్తిగా బాబా మీదనే భారం వేశాను. నెలలు నిండాయి. బాబా అద్భుతం చేశారు. ఏప్రిల్ నెలలో బాబా అనుగ్రహంతో నాకు పండంటి బాబు పుట్టాడు. బాబును చూడగానే బాబా మాపై చూపిన అపార కరుణకు అంతులేని ఆనందంతో, కృతజ్ఞత నిండిన హృదయంతో బాబాకు మనస్ఫూర్తిగా ధన్యవాదాలు తెలుపుకున్నాను. బాబు పుట్టాడని తెలియగానే కుటుంబసభ్యులంతా అంతులేని ఆనందంలో మునిగిపోయారు. మెడికల్ రిపోర్టులలో ఏదీ నాకు అనుకూలంగా రానప్పటికీ, నా కోరికని గ్రహించిన బాబా ఎంతో ప్రేమతో అన్నీ నాకు అనుకూలంగా మార్చేశారు.

సాయిభక్తులందరికీ నా మనవి ఏమిటంటే, ఎలాంటి కోరికైనా సరే మీ భారమంతా బాబా మీద వేయండి, ఆయన తప్పకుండా నెరవేరుస్తారు. ఎలాంటి కోరికనైనా బాబా మాత్రమే తీర్చగలరు. మనకు ఉండాల్సిందల్లా శ్రద్ధ, సబూరి. దానికి నా అనుభవాలే నిదర్శనం. నాకు అనుభవాలు సరిగా రాయటం రాదు. బాబా ఇచ్చిన ఆనందాన్ని అనుభవించగలనే గానీ ఆ ఆనందాన్ని మాత్రం మాటల్లో చెప్పలేను. “బాబా! నీ కరుణ నాపై ఎప్పటికీ ఇలాగే ఉండాలి. ఇలాగే నేను మరిన్ని అనుభవాలు పంచుకోవాలి. నేను మీ విషయంలో ఏమైనా తప్పులు చేసివుంటే నన్ను క్షమించండి బాబా”.

---

వెన్నంటే ఉండి కాపాడే సాయి

సాయిభక్తులందరికీ నా నమస్కారం. నా పేరు యామిని. మేము హైదరాబాదులో ఉంటున్నాము. నేను ఇంటర్మీడియట్ చదువుతున్నప్పటినుంచి సాయిభక్తురాలిని. అప్పటినుంచి బాబా నన్ను ప్రతి ఆపద నుంచి కాపాడుతూ వస్తున్నారు. ఇటీవల బాబా ప్రసాదించిన అనుభవాన్ని నేను మీతో పంచుకోవాలనుకుంటున్నాను. స్కూల్స్ మూతపడటంతో 2021, మార్చి నెలలో మేము మా ఊరికి వచ్చాము. నన్ను, పిల్లల్ని మా పుట్టింట్లో వదిలిపెట్టి మావారు మా అత్తయ్య దగ్గరకు వెళ్ళారు. అప్పటికే తనకు జలుబుగా ఉండటంతో కోవిడ్ టెస్ట్ చేయించుకున్నారు. అందులో తనకు కరోనా పాజిటివ్‌గా నిర్ధారణ అయింది. అది తెలిసి మేము చాలా కంగారుపడ్డాము. దానికి తోడు మరుసటిరోజు నుంచి నాకు, మా చిన్నమ్మాయికి కూడా కొంచెంగా కరోనా లక్షణాలు కనపడుతూ వచ్చాయి. ఇంట్లో మాతోపాటు మా అమ్మా, నాన్న కూడా ఉన్నారు. అందువల్ల నాకు చాలా భయమేసి, 'సాయీ, సాయీ' అని సాయిని ప్రార్థిస్తూ, మమ్మల్నందరినీ కాపాడమని ఆర్తిగా వేడుకున్నాను. బాబా దయవల్ల మరో రెండు రోజులకల్లా మాకు కరోనా లక్షణాలు తగ్గిపోయాయి. తరువాత మావారు కూడా మళ్ళీ టెస్ట్ చేయించుకున్నారు. బాబా అనుగ్రహంతో ఈసారి తనకు కరోనా నెగిటివ్‌గా నిర్ధారణ అయింది. అదీ గురువారం రోజున. బాబా ఎంతో కరుణతో మమ్మల్నందరినీ కాపాడారు. శ్రద్ధ, సబూరిలను నమ్ముకుంటే సాయి మన వెన్నంటే ఉండి అందరినీ కాపాడుతారని నమ్మండి. “ఓ సద్గురు సాయీ! మీ దయ మా పైన, సాయిభక్తులందరి పైనా ఉండాలని మనసారా కోరుకుంటున్నాను”.

---

జ్వరం తగ్గించి కాపాడిన బాబా

ఓం సమర్థ సద్గురు శ్రీ సాయినాథాయ నమః

ముందుగా ఈ బ్లాగ్ నిర్వహిస్తున్న సాయిబంధువులకు నమస్కారములు. నా పేరు యశోదమ్మ. మాది అనంతపురం. నాకు బాబాతో దాదాపు నలభై సంవత్సరాలుగా అనుబంధం ఉంది. ఈ బ్లాగ్ గురించి రెండు నెలల క్రిందటే నాకు తెలిసింది. ఇటీవల నాకు వచ్చిన ఒక సమస్యను బాబా తీర్చారు. ఆ అనుభవాన్ని నేనిప్పుడు మీతో పంచుకుంటున్నాను. 2021, ఏప్రిల్ 27వ తేదీన నేను కరోనా వ్యాక్సిన్ రెండవ డోస్ వేయించుకున్నాను. రెండు రోజుల తర్వాత నాకు తీవ్రంగా జ్వరం వచ్చింది. అసలే కరోనా సమయమైనందున నాకు చాలా భయం వేసింది. వెంటనే బాబా ఊదీని నీళ్ళలో కలుపుకుని త్రాగి, "బాబా! మీ అనుగ్రహంతో రేపు ఉదయానికల్లా జ్వరం తగ్గిపోతే నా అనుభవాన్ని తోటి సాయిభక్తులతో పంచుకుంటాను" అని బాబాకు మ్రొక్కుకున్నాను. బాబా దయవల్ల మరుసటి ఉదయానికల్లా జ్వరం తగ్గింది. నాకు ఏ కష్టం లేకుండా బాబా నన్ను రక్షించారు. అందుకే వెంటనే ఈ అనుభవాన్ని మీతో పంచుకుంటున్నాను. "ధన్యవాదాలు సాయి తండ్రీ!"

---