సాయిభక్తుల అనుభవమాలిక 790వ భాగం....

---

ఈ భాగంలో అనుభవాలు:

1. అడుగడుగునా మమ్ము కాపాడే చల్లని తండ్రీ!

2. ఎటువంటి బాధా లేకుండా కోవిడ్ నుండి బయటపడేసిన బాబా

---

అడుగడుగునా మమ్ము కాపాడే చల్లని తండ్రీ!

పేరు వెల్లడించని ఒక సాయిభక్తురాలు తనకు బాబా ప్రసాదించిన అనుభవాలను ఇలా పంచుకున్నారు.

రాజాధిరాజ యోగిరాజ శ్రీ సచ్చిదానంద సమర్థ సద్గురు శ్రీ సాయినాథ మహరాజుకి నా కోటానుకోట్ల పాదాభివందనాలు. ఈ బ్లాగ్ నిర్వాహకులైన సాయికి, బాబా భక్తులందరికీ నా నమస్కారములు. ప్రతిరోజూ సాయిభక్తుల అనుభవాలు చదివి బాబా పట్ల భక్తిని, నమ్మకాన్ని వేయింతలు పెంచుకొనేలా, నిరంతరం బాబా పాదపద్మాలను స్మరించేలా చేస్తున్న ఈ బ్లాగుకి నిరంతరం ధన్యవాదాలు తెలుపుకుంటున్నాను. నాకు బాబా చూపించిన మహిమలు కొన్నిటిని ఈరోజు మీతో పంచుకుంటాను. 

నేను సాయి భక్తురాలిని. ఉపాధ్యాయినిగా పనిచేస్తున్న నేను 2021, ఫిబ్రవరి నుండి వరుసగా కొన్ని రోజుల పాటు ఎన్నికల విధులు నిర్వర్తించాల్సి వచ్చింది. వెళ్లిన ప్రతిచోటా ఏ ఇబ్బందీ కలుగకుండా నన్ను జాగ్రత్తగా చూసుకున్నారు నా సాయితండ్రి. అత్యంత సమస్యాత్మక ప్రాంతాల్లో కూడా అవలీలగా విధులు నిర్వర్తించానంటే అది బాబా నాకు తోడుగా ఉండబట్టే. అంతేకాదు, కోవిడ్ ఇంత తీవ్రంగా ఉన్నరోజుల్లో జనసమ్మర్ధం ఎక్కువగా ఉండే ఎన్నికలలో డ్యూటీ చేసినప్పటికీ కోవిడ్ బారినపడకుండా నన్ను రక్షించారు బాబా.

ఒకరోజు నేను పంచాయతీ ఎన్నికల్లో P.O (ప్రిసైడింగ్ ఆఫీసర్) గా పనిచేసి, పోలింగ్ పూర్తయిన తరువాత అన్నీ డిపాజిట్ చేసేటప్పటికి రాత్రి 12 అయింది. అసలు అప్పటికే నేను ‘ఇంటికి ఎలా వెళ్ళాలా’ అని ఆందోళనపడుతున్నాను. ఆరోజు సాయంత్రం ప్రక్కనున్న పోలింగ్ బూత్‌లో విధులు నిర్వర్తిస్తున్న P.O. మేడమ్‌తో మాట్లాడుతూ, “మీతో కలిసి వైజాగ్ రావడానికి మీ కారులో నాకోసం ఖాళీ ఉంటుందా?” అని రిక్వెస్ట్ చేశాను. కానీ, డ్యూటీకి వచ్చేటప్పుడు ఆ కారులో నలుగురు టీచర్లు కలసి వచ్చారు కాబట్టి కారులో ఇంక ఖాళీ లేదన్నారు. కానీ, రాత్రి 12 గంటలకు ఆ టీచరుగారే నన్ను పిలిచి, ‘తనతో వచ్చినవారు వారి పని త్వరగా ముగించుకొని ఇంటికి వెళ్లిపోయారనీ, తమ కారులో ఖాళీ ఉంద’నీ చెప్పి నన్ను తమ కారులో ఎక్కించుకుని వైజాగ్ తీసుకొచ్చారు. దాదాపు 80-90 కిలోమీటర్ల దూరం హాయిగా కారులో ప్రయాణం చేసిన తరువాత వారు నన్ను ఒకచోట డ్రాప్ చేశారు. మావారు అక్కడికి వచ్చి నన్ను ఇంటికి తీసుకెళ్లారు. నన్ను డ్రాప్ చేసిన చోట సాయినాథుని దేవాలయం ఉంది. అది చూసి, “నేనుండ భయమేల?” అంటూ సాయినాథుడు నాకు అభయమిస్తున్నట్లుగా అనిపించి ఎంతో ఆనందంతో బాబాకు నమస్కరించుకున్నాను. కారులో ప్రయాణిస్తున్నప్పుడు కూడా, ‘ఇంత రాత్రివేళ నన్ను భద్రంగా తీసుకొస్తున్నది నా సాయితండ్రే’ అనుకుంటూ, మనస్సులోనే బాబాకు కృతజ్ఞతలు తెలియజేసుకుంటూ ఉన్నాను.

మరో అనుభవం: ఈ కోవిడ్ కాలంలో మా పాపకి, మా చెల్లి బాబుకి జ్వరం వచ్చింది. నేను మనసులోనే బాబాకు నమస్కరించి, “బాబా! మీ దయతో పిల్లలిద్దరికీ త్వరగా జ్వరం తగ్గిపోవాలి. వారికి వచ్చిన జ్వరం కోవిడ్‌కి సంబంధించినది కాకుండా చూడండి. మీ అనుగ్రహంతో పిల్లలిద్దరూ ఆరోగ్యంగా ఉంటే ఈ అనుభవాన్ని బ్లాగులో పంచుకుంటాను” అని మరీ మరీ ప్రార్థించి, పిల్లలిద్దరికీ బాబా ఊదీ పెట్టి, నోట్లో కొంచెం ఊదీ వేసి బాబాపైన భారం వేశాను. ఆ చల్లని తండ్రి ఎంతో దయతో పిల్లలిద్దరికీ నయం చేశారు. బాబా అనుగ్రహంతో ఇద్దరూ త్వరగా కోలుకుని ఆరోగ్యంగా ఉన్నారు.

ఒక్కోరోజు నేను బాబా కోసం అనుకున్న విషయాలు, ఆయన కోసం చేసిన పనులు వేరేవారి అనుభవాలుగా ఆ మరుసటిరోజే బ్లాగులో రావడం చాలా ఆనందంగా, విచిత్రంగా ఉంటుంది. ఉదాహరణకు, కొద్దిరోజుల క్రితం నేను ‘మా కుటుంబాలు బాగుండాలనీ, గృహనిర్మాణం పూర్తవ్వాలని, గృహప్రవేశం చక్కగా జరిపించాలని’ బాబాను మరీ మరీ ప్రార్థించి 9 రూపాయలు ముడుపు కట్టాను. ఆ మరుసటి ఉదయం సాయిభక్తుల అనుభవాలు చదువుదామని బ్లాగ్ ఓపెన్ చేస్తే, ఒక సాయిభక్తుడు తమ ఇంటి పునర్నిర్మాణం జరిపించి, గృహప్రవేశం, హోమం చేసుకొని, నవగురువారవ్రతం చేయ సంకల్పించి మరచిపోవడం, బాబా ఆయనకు కలలో కనిపించి “నాకు తొమ్మిది నాణేలు కావాలి” అని తన మ్రొక్కును గుర్తుచేయడం, వెంటనే ఆయన 9 రూపాయలు ముడుపు కట్టి పూజలు ప్రారంభించడం జరిగిందని తన అనుభవాన్ని పంచుకోవడం కనిపించింది. ఇది నాకు బాబా ఇచ్చిన అభయంగా భావిస్తున్నాను. “మీ తల్లిగారి ఇంటినిర్మాణము, గృహప్రవేశము నిర్విఘ్నంగా జరుగుతుంది” అని బాబా చెప్పినట్లు నేను భావిస్తున్నాను. అదేవిధంగా, ఆ భక్తుని అనుభవం ద్వారా ‘9 గురువారాల వ్రతం చేయమ’ని బాబా నన్ను ఆదేశించినట్లు భావిస్తూ, బాబా ఆజ్ఞను శిరసావహించాలని సంకల్పించాను. అలాగే, ఒకరోజు మేము రొట్టెలు చేసుకుంటూ మా రోడ్డులో ఉండే ఒక కుక్క కోసం కూడా ఒక రొట్టె చేశాను. పాపం, ఆ కుక్క ఆకలితో ఉంటుందని ఎందుకో నాకు అనిపించింది. వెనువెంటనే ఆ మరుసటిదినమే బాబా తన సందేశంలో, “నీవు పెట్టిన భోజనంతో నాకు ఎంతో తృప్తి కలిగింది. ఎప్పుడూ ఇలాగే చేస్తూ ఉండు” అనే సందేశం రావడం నన్ను ఆశ్చర్యచకితురాలిని చేసింది. ఇటువంటి అనుభవాల ద్వారా బాబా పట్ల భక్తివిశ్వాసాలు నాలో రోజురోజుకీ మరింతగా పెంపొందుతున్నాయని చెప్పడానికి ఎంతో సంతోషిస్తున్నాను.

బాబాను నేను కొన్నిసార్లు మూర్ఖంగా ప్రశ్నించేదాన్ని. ఒకసారి నా స్నేహితులలో కొంతమందికి ప్రమోషన్ వచ్చి, నాకు రానప్పుడు, అందులో నా అశ్రద్ధ వున్నప్పటికీ, “మీరెందుకు నన్ను సరైన దారిలో పెట్టి నాకు ప్రమోషన్ వచ్చేలా చూడలేదు?” అంటూ బాబాపై అలిగి ఏడ్చేశాను. బాబా ఎంతో కరుణతో ఆ తరువాతి విడత కౌన్సెలింగుకి నన్ను పీజీ డిగ్రీతో సిద్ధం చేశారు. కానీ అప్పటికింకా పరీక్షా ఫలితాలు రాలేదు. ఇంతలో టీచర్స్ ప్రమోషన్ కౌన్సిలింగ్ తేదీలు ప్రకటించారు. దాంతో ఈసారి కూడా నాకు ప్రమోషన్ రాదేమోనని బాధపడుతూ బాబాకు చెప్పుకుని, “అయ్యో, ఇప్పుడు కూడా ప్రమోషన్ ఇవ్వవా తండ్రీ” అంటూ భోరుమన్నాను. ఇక చూడండి బాబా లీలలు. అకస్మాత్తుగా మున్సిపల్ కార్పొరేషన్ ఎన్నికలు ప్రకటించారు. ఎలక్షన్ కోడ్ అమల్లోకి వచ్చింది. దాంతో ప్రమోషన్ కౌన్సెలింగ్ వాయిదాపడింది. ఈలోపు నా పీజీ పరీక్షా ఫలితాలు రావడం, సర్టిఫికెట్లు తెచ్చుకోవడం, సీనియారిటీ జాబితాలో నా పేరు నమోదు చేసుకోవడం జరిగింది. వెనువెంటనే ప్రమోషన్ ఇచ్చి చక్కని అనుకూలమైన స్కూలులో నాకు పోస్టింగ్ ఇచ్చి భక్తుల పట్ల తమ వాత్సల్యాన్ని చాటారు బాబా. నాకన్నా ముందు ప్రమోట్ చేసిన స్నేహితుల కన్నా ఎక్కువ పే స్కేల్‌లో నా జీతం నిర్ణయించబడింది. ఇది బాబా లీల కాక మరి ఇంకేంటి?

ఇటీవల ఒకరోజు మా అమ్మకి జ్వరం వచ్చింది. తన వయసు డెబ్భై నాలుగు సంవత్సరాలు. జ్వరంతో ఆమె విపరీతంగా నీరసించిపోయారు. భోజనం కూడా మానేశారు. కోవిడ్ తీవ్రంగా ఉన్న ఈ పరిస్థితుల్లో అమ్మను డాక్టర్ వద్దకు తీసుకువెళ్ళడానికి భయమేసి, నేను డాక్టర్ వద్దకు వెళ్లి అమ్మకు వచ్చిన జ్వరం లక్షణాలు చెప్పి మందులు రాసివ్వమని అడిగితే, ఆయన కోవిడ్ టెస్టుతో పాటు మరికొన్ని టెస్టులు చేయించమని చెప్పారు. అది విని విపరీతమైన ఆందోళనతో బాబాకు నమస్కరించుకుని, అమ్మ ఆరోగ్యంగా ఉండేలా చూడమని ప్రార్థించి, ‘కోవిడ్ టెస్ట్ రిపోర్టు నెగిటివ్ వస్తే నా అనుభవాన్ని బ్లాగులో పంచుకుంటాన’ని మ్రొక్కుకున్నాను. ఆ తరువాత, ‘ఓం శ్రీ సాయి ఆరోగ్య క్షేమదాయ నమః’ మంత్రం పఠించుకుంటూ అమ్మకు కోవిడ్ టెస్ట్ చేయించాను. బాబా దయవల్ల అందులో అమ్మకు నెగిటివ్ అని రిపోర్టు వచ్చింది. ఇది ముమ్మాటికీ బాబా అనుగ్రహమే. “నా చల్లని తండ్రీ! అందరూ బాగుండాలి. అందరం క్షేమంగా, ఆరోగ్యంగా ఉండాలని మిమ్ము మరీ మరీ వేడుకుంటున్నాను. బాబా! నూతన గృహ నిర్మాణం పూర్తయి, గృహప్రవేశం చేసి, క్రొత్త ఇంట్లో అందరం ఆనందంగా ఉండేలా ఆశీర్వదించండి. మా అమ్మకి దెబ్బ తగిలి నడవలేకపోతే తనని మీరే తిరిగి నడిచేలా చేశారు. తనకి ఆరోగ్యం బాగుండేలా ఆశీర్వదించండి. నా అనారోగ్య సమస్యలు కూడా తగ్గించు బాబా. అందరూ బాగుండాలి. పిల్లలు చక్కగా చదువుకోవాలి. ఇంటికి చాలా దూరంలో ఉద్యోగం చేస్తున్నాను. నన్ను కరుణించి ఇంటికి దగ్గరలో మంచి స్కూల్లో నాకు పోస్టింగ్ ఇప్పించండి సాయినాథా! అడుగడుగునా మమ్ము కాపాడండి చల్లని తండ్రీ!”

 ఓం శ్రీ సచ్చిదానంద సద్గురు సాయినాథ్ మహరాజ్ కీ జై!

---

ఎటువంటి బాధా లేకుండా కోవిడ్ నుండి బయటపడేసిన బాబా

 

నేను సాయిభక్తురాలిని. నా భర్త పనిచేసే కార్యాలయంలో ప్రతి ఇరవై రోజులకు ఒకసారి కోవిడ్ పరీక్షలు నిర్వహిస్తారు. అలా ఒకసారి కోవిడ్ పరీక్షలు చేసినప్పుడు నా భర్తకి పాజిటివ్ అని తెలిసింది. నిజానికి ఆయనకి కోవిడ్ లక్షణాలు ఏవీ లేవు. తరువాత ఎందుకైనా మంచిదని నేను, మా బాబు కూడా కోవిడ్ పరీక్ష చేయించుకున్నాము. నాకు కొద్దిపాటి లక్షణాలతో పాజిటివ్ వచ్చినప్పటికీ బాబా దయవల్ల మా బాబుకి నెగెటివ్ వచ్చింది. అప్పుడు నేను బాబాను తలచుకుని, "ఎటువంటి బాధా లేకుండా మేము ఈ కష్టం నుండి బయటపడితే నా అనుభవాన్ని బ్లాగులో పంచుకుంటాన"ని వేడుకున్నాను. నేను, మావారు హోమ్ క్వారంటైన్‌లో ఉండి, 14 రోజుల తరువాత మళ్ళీ పరీక్ష చేయించుకుంటే, బాబా కృపవలన మా ఇద్దరికీ నెగెటివ్ వచ్చింది. మేము ఎటువంటి బాధా లేకుండా కోవిడ్ నుండి బయటపడ్డామంటే అది కేవలం బాబా దయవలనే సాధ్యమైంది. నేను నా భావాలను సరిగా వ్యక్తపరచలేకపోయాను. కానీ బాబా పట్ల నాకున్న ప్రేమ అనంతం. "థాంక్యూ సో మచ్ బాబా. మీ అనుగ్రహం మీ భక్తులందరిపై సదా ఉండాలి తండ్రీ!"

---