సాయిభక్తుల అనుభవమాలిక 784వ భాగం....

---

ఈ భాగంలో అనుభవాలు:

1. దక్షిణ స్వీకరించి అనుగ్రహాన్ని వర్షిస్తున్న శ్రీసాయి
2. ఒకేరోజు మూడు అనుభవాలను ప్రసాదించిన బాబా

---

దక్షిణ స్వీకరించి అనుగ్రహాన్ని వర్షిస్తున్న శ్రీసాయి 

హైదరాబాదు నుండి సాయిభక్తుడు వెంకటేశ్వరరావు తనకు బాబా ప్రసాదించిన అనుభవాలను మనతో పంచుకుంటున్నారు.

ముందుగా శ్రీసాయినాథునికి సాష్టాంగ నమస్కారములు. ఈ బ్లాగ్ నిర్వహిస్తున్న సాయికి నమస్కారములు. నా పేరు మిరియాల వెంకటేశ్వరరావు. మేము హైదరాబాదులో ఉంటాము. ఇంతకుముందు నేను కొన్ని  అనుభవాలను ఈ బ్లాగ్ ద్వారా సాటి సాయిభక్తులతో పంచుకున్నాను. ఇప్పుడు మరికొన్ని అనుభవాలను పంచుకుందామని మీ ముందుకు వచ్చాను.

మొదటి అనుభవం: ఇది దాదాపు ఇరవై సంవత్సరాల క్రిందట జరిగినది. ఆరోజు గురువారం. శ్రీసాయి సచ్చరిత్ర సప్తాహపారాయణ పూర్తిచేసి, శ్రీసాయికి పూజ చేసి, పదకొండు రూపాయలు దక్షిణ సమర్పించి పూజ ముగించాను. ఇంతలో డోర్ బెల్ మ్రోగింది, తలుపు తీశాను. ఎదురుగా పరిచయంలేని మనిషి. నన్ను చూడగానే, “సార్! మేము సాయిబాబా గుడిలో అన్నదానం చేస్తున్నాము. మీ ఇష్టమున్నంత చందా ఇవ్వండి” అని, మళ్ళీ అంతలోనే, “పదకొండు రూపాయలు ఇవ్వండి” అన్నాడు. నేను లోపలికి వెళ్ళి అంతకుముందే పూజలో బాబాకు సమర్పించిన దక్షిణను తీసుకొచ్చి అతనికి ఇచ్చి, ‘బాబా గుడి ఎక్కడుంద’ని అడిగాను. అతను అడ్రస్ చెప్పి వెళ్ళిపోయాడు. అంతలోనే, అన్నదానానికి మరికొంత డబ్బు ఇవ్వాలనిపించి అతని కోసం వెతికాను, ఎక్కడా కనిపించలేదు. చుట్టుప్రక్కల వాళ్ళను కూడా అతని గురించి వాకబు చేశాను. “చందా కోసం ఎవరూ రాలేదు” అన్నారందరూ. ఎంత ప్రయత్నించినా అతను చెప్పిన బాబా గుడి అడ్రస్ నాకు గుర్తుకురాలేదు. ఏదో మాయలాగా అనిపించింది. తరువాత నిదానంగా ఆలోచిస్తే, శ్రీసాయియే ఆ రూపంలో వచ్చి దక్షిణ స్వీకరించారని అర్థమై ఎంతో సంతోషించాను. మరి నన్ను మాత్రమే చందా అడిగి, ఇంకెవరింటికీ వెళ్ళకుండా, ఎవరినీ చందా అడగకుండా కళ్ళముందే మాయమైతే, ఇది సాయిలీల కాక మరేమిటి? ఇన్ని సంవత్సరాల తరువాత ఈ లీలను మీతో పంచుకోవడం చాలా సంతోషంగా ఉంది. 

రెండవ అనుభవం: ఇది ఇటీవలే (2021) జరిగింది. నేను మార్చి 8న కోవిడ్ వ్యాక్సిన్ తీసుకున్నాను. ఆ మరునాడు బాగా జ్వరం వచ్చింది. నేను చాలా భయపడ్డాను. ‘జ్వరం త్వరగా తగ్గిపోయేలా అనుగ్రహించమ’ని బాబాను ప్రార్థించి, బాబా ఊదీని పెట్టుకుని, కొంతసేపు ‘శ్రీసాయి ఆరోగ్య క్షేమదాయ నమః’ మంత్రం జపించి పడుకున్నాను. బాబా దయవల్ల మరునాటికల్లా జ్వరం తగ్గిపోయి నార్మల్ అయ్యాను. శ్రీసాయిని తలచుకుంటే చాలు, మన ప్రక్కనే ఉండి కాపాడుతారు. 

మూడవ అనుభవం: మా చిన్నమ్మాయికి ఫిబ్రవరిలో డెలివరీ అయింది. తనకు పాప పుట్టింది. పాపకు తల్లిపాలు సరిపోయేవికావు. దాంతో మేము బాబాకు నమస్కరించుకుని, పాపకు తల్లిపాలు సమృద్ధిగా లభించేలా ఆశీర్వదించమని మనసారా ప్రార్థించి, బాబాకు పాలాభిషేకం చేయిస్తామని మ్రొక్కుకున్నాము. తరువాత మేము బాబా గుడికి వెళ్ళి బాబాకు పాలాభిషేకం చేయించాము. ఆ తరువాత నుంచి పాపకు పోతపాలు త్రాగించాల్సిన అవసరం లేకుండా తల్లిపాలు సమృద్ధిగా వచ్చేలా శ్రీసాయి ఆశీర్వదించారు. ఎంతో సంతోషంతో బాబాకు మనసారా కృతజ్ఞతలు తెలుపుకున్నాము.

---

ఒకేరోజు మూడు అనుభవాలను ప్రసాదించిన బాబా 

విజయవాడ నుంచి సాయిభక్తుడు ఉపేంద్ర తనకు బాబా ప్రసాదించిన అనుభవాలను మనతో పంచుకుంటున్నారు.

ఓం శ్రీ అద్భుతానంతచర్యాయ నమః. సాయిభక్తులందరికీ నమస్కారం. నా పేరు ఉపేంద్ర. మేము విజయవాడలో ఉంటున్నాము. గతంలో ఈ బ్లాగులో నా అనుభవాన్ని పంచుకునే అవకాశం లభించింది. గత నెలలో నాకు కుడిచేయి మణికట్టు విరిగిన సందర్భంలో బాబాను వేడుకొనడం వలన త్వరగా నయం అయ్యేలా చేశారు బాబా. చేతికట్టు తీసిన తర్వాత ఫిజియోథెరపీ అవసరమవుతుందని అనుకున్నాను. అయితే, ఈ కరోనా సమయంలో హాస్పిటల్‌కి వెళ్లడం భయంగా అనిపించి, బాబాను తలచుకొని, “బాబా! ఫిజియోథెరపిస్ట్ దగ్గరికి వెళ్లాల్సిన అవసరం లేకుండా ఇంట్లోనే ఎక్సర్‌సైజ్ ద్వారా నా మణికట్టు నొప్పి తగ్గిపోయేటట్లు చూడు తండ్రీ” అని వేడుకున్నాను. గత మూడు వారాలుగా ఇంట్లోనే ఎక్సర్‌సైజ్ చేస్తున్నాను. నా చేయి దాదాపు 80% మామూలు స్థితికి వచ్చింది. బాబా దయవలన కొద్దికాలంలోనే పూర్తిస్థాయిలో మామూలు స్థితికి వస్తుందని నా ప్రగాఢ నమ్మకం. జై శ్రీ సాయి!  

ప్రస్తుతం, బాబా కరుణ వలన ఒకేరోజు (2021, ఏప్రిల్ 29) నాకు కలిగిన మూడు అద్భుత అనుభవాలను మీతో పంచుకోబోతున్నాను.

మొదటి అనుభవం: గతంలో ఒకసారి నాకు ఛాతీలో నొప్పి వచ్చి బాబా దయవలన తగ్గిపోయిందని నా గత అనుభవంలో పంచుకున్నాను. అయితే గత మంగళవారంనాడు (2021, ఏప్రిల్ 27) మళ్లీ స్వల్పంగా ఛాతీలో నొప్పి వచ్చింది. దాంతో నేను మానసికంగా ఆందోళనకు గురై, వెంటనే బాబాను స్మరించుకుని, “బాబా! గురువారంనాటికి నాకు ఈ నొప్పి, ఆందోళన తగ్గిపోయేలా అనుగ్రహించండి” అని ప్రార్థించాను. మరుసటిరోజు (బుధవారం) రాత్రి స్వప్నంలో నేను ఒక హోటల్ సమీపంలో ఉండగా ఒక వృద్ధుడు వచ్చి నన్ను భిక్ష అడిగారు. నేను నా దగ్గర ఉన్న చిల్లర 9 రూపాయలు అతనికి ఇచ్చాను. తరువాత ఆయన, “నాకు ఆకలిగా ఉంది” అని అడిగారు. హోటల్ దగ్గర ‘భోజనం ధర 60 రూపాయలు’ అని ఉంది. నేను వెంటనే నా పర్సులో డబ్బు ఎంత ఉందో చూశాను. అందులో సరిగ్గా 60 రూపాయలు మాత్రమే ఉన్నాయి. ఆ డబ్బులు తీసి ఆ వృద్ధుడికి ఇవ్వబోతూ ఆయన ముఖం చూశాను. అద్భుతం, ఆశ్చర్యం, ఆనందం ఒక్కసారిగా కలిగాయి. ఆ వృద్ధుడిలో నాకు బాబా దర్శనం కలిగింది. ‘దీనికి అర్థం ఏమిటి?’ అని నేను ఆలోచనలో ఉండగా, బాబా అష్టోత్తరాలలోని "కామాది షడ్వైరి ధ్వంసినే" అనే నామం నాకు గుర్తుకు వచ్చింది. వెంటనే మెలకువ వచ్చింది. ఇలా స్వప్నంలో దర్శనమిచ్చి బాబా నాకు చాలా ఆనందాన్ని కలిగించారు. తెల్లవారితే గురువారం (ఏప్రిల్ 29). బాబా దయవల్ల గురువారంనాటికి నాకు ఛాతీనొప్పి, ఆందోళన తగ్గిపోయాయి. “బాబా! మీకు నా కృతజ్ఞతలు. మీ ప్రేమ, కరుణ ఎల్లవేళలా మీ బిడ్డలందరిపై ఉండాలని ప్రార్థిస్తున్నాను తండ్రీ”.

రెండవ అనుభవం: గత సంవత్సరకాలం నుండి నా భార్యకు పాన్ కార్డు కొరకు ప్రయత్నం చేస్తుంటే ఏదో ఒక కారణంతో ఆ ప్రయత్నం సఫలం కాలేదు. గతవారం బాబాను తలచుకుని పాన్ కార్డుకు దరఖాస్తు చేశాము. సరిగ్గా ఈరోజు (గురువారం, ఏప్రిల్ 29) ఉదయం e-పాన్ కార్డు మెయిల్ వచ్చింది. ఎంతో సంతోషంతో బాబాకు మనసారా కృతజ్ఞతలు తెలుపుకున్నాము. 

మూడవ అనుభవం: గత కొంతకాలం నుంచి మా ఇంట్లో సీలింగ్ ఫ్యాన్ పనిచేయడం లేదు. ఎండాకాలం అవడం వల్ల ఫ్యాన్ లేక చాలా ఇబ్బందిగా ఉండటంతో మెకానిక్ కోసం ప్రయత్నం చేసినప్పటికీ ఫలితం లేకుండా పోయింది. ఒక మెకానిక్ దొరికినప్పటికీ అతను ప్రతిరోజూ వస్తానని చెబుతూ ఆ పనిని వాయిదా వేస్తూ వస్తున్నారు. మేమిక ఆయన రారని అనుకున్నాము. అయితే ఈరోజు (గురువారం, ఏప్రిల్ 29) ఉదయాన్నే ఆయన ఫోన్ చేసి, “సార్, నేను ఈరోజు ఫ్యాన్ రిపేర్ చేయడానికి మీ ఇంటికి వస్తున్నాను” అని చెప్పారు. చెప్పినట్లుగానే వెంటనే అరగంటలోనే వచ్చి ఫ్యాన్ రిపేర్ చేసి వెళ్లిపోయారు. మాకు చాలా ఆనందంగా అనిపించింది. “ధన్యవాదాలు బాబా!” 

సాయినాథుని దయవలన కరోనా వైరస్ ప్రభావం పూర్తిగా తగ్గిపోయి ప్రపంచంలోని ప్రజలందరూ ఆరోగ్యంగా సుఖశాంతులతో ఉండాలని సాయినాథుని ప్రార్థిస్తూ...

జై శ్రీ సమర్థ సద్గురు సాయినాథ్ మహరాజ్ కీ జై!

---