ఈ భాగంలో అనుభవం:
- శ్రీసాయి అనుగ్రహ లీలలు - 22వ భాగం
నా పేరు సాయిబాబు. 2019లో దీపావళి పండగకి బెంగుళూరు నుండి మా అమ్మాయి, అల్లుడు, మనువడు మా ఇంటికి వచ్చారు. మేము "పండగ బాగా చేసుకోవాల"ని బాబాని వేడుకున్నాము. మేము మా ఇంటిని ‘బాబా గుడి’ అని భావిస్తాం గనక ప్రతి సంవత్సరం దీపావళికి ఇంటికి లైటింగ్ పెడతాము. ఆ పని మా స్టూడెంట్ల సహకారంతో మేమే స్వయంగా చేసుకుంటాము. కానీ ఆ సంవత్సరం పనుల ఒత్తిడి వల్ల లైటింగ్ పెట్టడానికి మాకు కుదరలేదు. అందువల్ల బయటవాళ్ళని పిలిస్తే వాళ్ళు పైనా, క్రింద లైటింగ్ పెట్టడానికి 16,000/- అని, పైన మాత్రమే అయితే 12,000/- అని చెప్పారు. మేము 'అంత రేటా? చాలా ఎక్కువ' అని, “బాబా గుడికి పెడుతున్నామనుకొని పెట్టి వెళ్ళండి. 3000/- ఇస్తాము" అని చెప్పాము. వాళ్ళు ఏదో మైకంలో ఉన్నట్లు, "సరేనండీ పెడతాము" అని అన్నారు. మేము కొంచెం ఆశ్చర్యపోయాం. ఎందుకంటే, 16000/- ఎక్కడ? 3000/- ఎక్కడ? ఏదేమైనా బాబానే వాళ్ళ మనసుని సమాధానపరిచి లైటింగ్ పెట్టిస్తున్నారని మేము భావించాము. వాళ్ళు చాలా అందంగా లైటింగ్ పెట్టారు. ఫోటోలు, వీడియోలలో మా ఇల్లు(బాబా గుడి) చాలా బాగా కన్పించింది. అవి చూసుకుని మేము చాలా ఆనందించాము. తరువాత ఒకరోజు నేను అనుకోకుండా అమ్మవారి దర్శనానికని విజయవాడ వెళ్ళాను. అప్పుడు మా అమ్మాయి ఫోన్ చేసి, "ప్రతిసారీ లైటింగ్వాళ్ళను పిలిపించటం ఎందుకు? మన బాబా గుడికి మనమే స్వయంగా లైటింగ్ కొనుక్కొని, ప్రతి సంవత్సరం వేసుకుందాం. కొత్త లైట్లు, దానికి కావల్సిన మెటీరియల్ తీసుకోండి" అని చెప్పింది. సరేనని, షాపుకి వెళ్ళాను. అది హోల్సేల్ షాపు కావటాన బాబా దయవలన చాలా తక్కువ ధరకే లైటింగ్ సామాగ్రి దొరికింది. అమ్మాయి ఫోన్ పే ద్వారా షాపువాళ్ళకు డబ్బు పంపింది. అలా మా బాబా గుడికి సొంత లైటింగ్ అమరింది. అలాగే చాలా తక్కువ ధరకు చాలా క్రాకెర్స్ కూడా ఇప్పించారు బాబా. వరుసగా ఐదురోజులు కాల్చిన తరువాత కూడా మరుసటి సంవత్సరానికి మిగిలిపోయాయి.
తర్వాత ఒక బుధవారం రాత్రి మా అమ్మాయికి బాబా స్వప్న దర్శనమిచ్చారు. ఆ కలలో తను బాబాతో మాట్లాడుతూ తనకున్న చిన్న చిన్న సందేహాలను ఆయనకి చెప్తుంటే, ఆయన ఓపికగా విని వాటికి సమాధానాలిచ్చారు. మా అమ్మాయికి ఎంతో మనశ్శాంతిగా అనిపించింది. తెల్లవారితే గురువారం. ఉదయం 4 గంటలకు నిద్రలేచి స్నానాలు ముగించుకుని అభిషేకం చేద్దామని నా భార్య బాబా విగ్రహానికి ఉన్న వస్త్రాలు తొలగిస్తూ "వెంటనే రండి" అని నన్ను పిలిచింది. నేను వెళ్లి విగ్రహాన్ని చూస్తూనే మా అమ్మాయిని, అల్లుడిని, మనవడిని పిలిచి త్వరగా స్నానం చేసి రండి అన్నాను. అందరూ వచ్చాక అందరం ఆనందాశ్చర్యాలతో, ముకుళిత హస్తాలతో బాబాకి నమస్కరిస్తూ తన్మయత్వం చెందాము. విషయమేమిటంటే, బాబా విగ్రహం మీద పలు చోట్ల ఊదీ ప్రకటమై ఉంది. ఆవిధంగా రాత్రి మా అమ్మాయికి నిజంగానే దర్శనమిచ్చి, మాట్లాడమని బాబా తెలియజేసారు. మేమందరం చుట్టూ కూర్చొని మద్యలో బాబాని పెట్టుకొని ఆయనకి అభిషేకం చేశాము. "రాత్రి బాబా దర్శనమివ్వడం. ఊదీ ప్రకటమవడం, మనమందరం కలిసి బాబాకి అభిషేకం చేయడం చాలా ఆనందంగా వుంది" అని మా అమ్మాయి అంది. పూజయ్యాక అందరం కొంచెం ఊదీ నుదుటన ధరించి, కొంచెం నోటిలో వేసుకున్నాము. మా మనవడు, "ఇది అచ్చం శిరిడీ ఊదీలానే వుంది" అని అన్నాడు. బాబా ఎక్కడున్నా శిరిడీ బాబానే. ఏ ఊదీ అయినా శిరిడీ ఊదీయే. ఇలా ఊదీ ప్రకటమవడం ఇది రెండోసారి(ఇదివరకు పంచుకున్న అనుభవాలలో చిన్న విగ్రహం నుంచి ఊదీ రావడం గురించి తెలియజేశాను).
దీపావళి పండగ అయ్యాక మా అమ్మాయివాళ్ళు తిరిగి బెంగుళూరు వెళ్ళడానికి బయలుదేరారు. వాళ్ళు వెళ్ళేది ఎలాగూ కారులోనే కాబట్టి నేను కూడా వాళ్ళతో బయలుదేరాను. మేము ముందుగా శ్రీశైలం వెళ్ళి, అక్కడ స్వామివారి దర్శనం చేసుకొన్ని వెళ్లాలనుకున్నప్పటికీ కొంతదూరం వెళ్ళాక, ‘ఈ సమయంలో శ్రీశైలం వెళితే, మరుసటిరోజు మా అల్లుడు ఆఫీసుకి, మనవడు స్కూలుకి సమయానికి చేరుకోలేమ’ని నేరుగా బెంగళూరు మార్గంలో వెళ్ళాము. మధ్యాహ్నం 12 గంటలకి 'శ్రీకాళహస్తి' చేరుకున్నాం. గుడి దగ్గర చాలా కార్లు కనిపించడంతో చాలా రద్దీగా ఉందేమోనని 'కాళహస్తీశ్వరుని దర్శనం చేసుకోవాలా? వద్దా?' అని బాబాని అడిగాము. 'దర్శనానికి వెళ్ళమ'ని బాబా సెలవిచ్చారు. ఇంకా వెళ్లి దర్శనం చేసుకుని, అమ్మవారిని కూడా దర్శించుకొని ప్రసాదం తీసుకుని బయలుదేరాము. 'పోనీలే, శ్రీశైలం దర్శించకపోయినా కాళహస్తీశ్వరుని దర్శనం చేయించారు బాబా' అని అనుకున్నాము. తిరుపతి దాటాక సాయంత్రం 5 గంటల సమయంలో ఎదురుగా బాబా అద్భుతం, అమోఘం అయిన ఒక దృశ్యాన్ని చూపించారు. మాకు ఎదురుగా ఎటువంటి మేఘాలు లేకుండా చాలా నిర్మలంగా వున్న ఆకాశంలో వరుసగా శ్రీశైల క్షేత్ర గోపురం, పానపట్టం మీద శివలింగం, నందీశ్వరుడు చాలా సృష్టంగా దర్శనమిచ్బాయి. చీకటిపడేవరకూ అలా కన్పిస్తూనే వున్నాయి. అలా శ్రీశైలం వెళ్ళలేకపోయామే అనే భాధ మాకు లేకుండా శ్రీశైలక్షేత్రాన్ని ఆకాశంలో దర్శింపజేశారు బాబా.
 ముందు భాగం కోసం బాబా పాదుకలు తాకండి. |
|
 తరువాయి భాగం కోసం బాబా పాదాలు తాకండి.
|
