1. హాస్పిటల్‌కి వెళ్లకుండా, ఏలాంటి మెడిసిన్ వాడకుండానే కంటి సమస్య తగ్గించిన బాబా2. స్వప్న దర్శనంతో దైర్యనిచ్చి వడ్డీ భారాన్ని తీసేసిన బాబా
హాస్పిటల్‌కి వెళ్లకుండా, ఏలాంటి మెడిసిన్ వాడకుండానే కంటి సమస్య తగ్గించిన బాబా
సాయిభక్తులందరికీ నమస్కారం. నా పేరు అనూష. సాయి తనని నమ్ముకున్నవాళ్ళకి అడుగడుగునా తోడుంటారన్నది సత్యం. బాబా నన్ను ప్రతి సమస్య నుండి కాపాడుతున్నారని, ఎలాంటి ఇబ్బంది ఎదురైనా నాకు అండగా నిలుస్తారని నాకు చాలా నమ్మకం. నా పెద్దకొడుకుకి 6 సంవత్సరాలు ఉంటాయి. 2023, జూన్ నెలలో వాడి కంటి పైరెప్ప లోపలి భాగంలో చిన్న చిన్న గుల్లలు ఏర్పడి చూస్తేనే భయమేసేలా కన్ను అంత ఎర్రగా మారిపోయింది. కంటిపైన కూడా గుల్ల ఉంది, కన్ను బాగా వాచిపోయింది. అది చూసి నేను ఏమైందో అని చాలా కంగారుపడ్డాను. బాబా దగ్గర ఏడుస్తూ, "బాబా! వాడు చాలా బాధపడుతున్నాడు. తన కంటి సమస్య తగ్గిపోయేలా చూడండి" అని చెప్పుకొని కంటిపైన ఊదీ రాసి బాబా తగ్గించేస్తారని నమ్మకంతో ఉన్నాను. కానీ తర్వాత రోజుకి కన్ను ఇంకా ఎర్రగ్గా అయిపోయి మరింత వాచిపోయింది. నేను అది చూసి, "తగ్గట్లేదు. హాస్పటల్‌కి తీసుకెళదామ"ని మావారితో అన్నాను. ఆయన, "ఈరోజు చూసి, తగ్గకుంటే రేపు వెళ్దాం" అన్నారు. ఆ రోజు సాయంత్రం బాబు స్నాక్స్ తింటుంటే వాటికున్న కారం తన చేతికి అంటుకుంది. అనుకోకుండా వాడు ఆ చేతిని కంటిలో పెట్టుకున్నాడు. అసలే చిన్న చిన్న గుల్లలున్నాయి కదా! వాటికి కారం తగిలేసరికి విపరీతమైన మంట పుట్టి బాబు తట్టుకోలేకపోయాడు. ఏమి చేసిన కూడా మంట తగ్గలేదు. 10 నిమిషాలు అలాగే ఉంది. అప్పుడు బాబా దగ్గరకు వెళ్లి, "ప్లీజ్ బాబా! వాడికి చాలా మంటగా ఉంది. దయచేసి తగ్గించు తండ్రీ" అని వేడుకొని బాబు కంటిపై ఊదీ రాసాను. అంతే, ఏదో అద్భుతం జరిగినట్టు బాబు, "మంట తగ్గిపోయింది" అన్నాడు. నేను సంతోషంగా బాబాకి ధన్యవాదలు చెప్పుకున్నాను. తర్వాత రోజుకి కంటిలోని గుల్లలు, ఎర్రదనం కూడా తగ్గిపోవడం గమనించాను. బాబా దయతో హాస్పిటల్‌కి వెళ్లకుండా, ఏలాంటి మెడిసిన్ వాడకుండానే రెండురోజుల్లో బాబు సమస్య తగ్గిపోయింది. ఇదంతా బాబా కృప. "ధన్యవాదాలు సాయి. మీరు ఎప్పుడూ నాకు తోడుగా ఉండండి బాబా. అలాగే నా బిడ్డలకు ఎలాంటి అనారోగ్యం రాకుండా చూసుకో తండ్రీ. బాధల్లో ఉన్నవారిని ఆదుకో సాయి. నా కోరికలు తీర్చు తండ్రీ".
ఓంసాయి శ్రీసాయి జయజయసాయి!!!
స్వప్న దర్శనంతో దైర్యనిచ్చి వడ్డీ భారాన్ని తీసేసిన బాబా
నా పేరు మేఘన. నేను హైదరాబాద్‌లో ఉంటాను. నాకు అందరి దేవుళ్ళతోపాటు బాబా అంటే కూడా ఇష్టం. నేను మా తమ్ముడి వల్ల చాలా ఆర్థిక సమస్యల్లో ఇరుక్కున్నాను. 2 లక్షల రూపాయలకి 30,000 రూపాయల వడ్డీ ఎలాగో 6 నెలలు కట్టాను. కానీ నాకొచ్చే జీతానికి ప్రతినెలా అంత వడ్డీ కట్టలేక 2023, జూలై నెలలో 2 లక్షల రూపాయలు సర్దుబాటు అయితే నెలనెలా అంత పెద్ద మొత్తం వడ్డీ కట్టాల్సిన పని ఉండదని ఆ డబ్బు సర్దుబాటు చేయడానికి చాలా ప్రయత్నాలు చేసాను. ఆ సమయంలో ఒకరోజు కలలో ధ్యానావస్థలో బాబా నాకు దర్శనం ఇచ్చారు. అప్పుడు నా సమస్యను బాబా తీరుస్తారని చాలా ధైర్యం వచ్చి, "బాబా! ఈ నెలలో ఆ 2 లక్షల రూపాయలు ఏర్పాటు చేసి నా సమస్య తీర్చండి. నేను మీ కృపను 'సాయి మహారాజ్ సన్నిధి' బ్లాగులో పంచుకుంటాను" అని బాబాను వేడుకున్నాను. బాబా కరుణించారు. డబ్బు సర్దుబాటై నేను ఆ అప్పు తీర్చగలిగాను. "ధన్యవాదాలు బాబా. మీరు ఎప్పుడూ ఇలానే నాకు అండగా ఉండాలి బాబా. నాకున్న సమస్యలు మీకు తెలుసు. వాటన్నిటి విషయంలో మీరు నా వెనకే ఉండి నన్ను కాపాడుతారని నమ్ముతున్నాను బాబా".
