సాయిభక్తుల అనుభవమాలిక 1550వ భాగం....

---

ఈ భాగంలో అనుభవం:

• ప్రతి కష్టంలో తోడుగా ఉన్నానని నిరూపిస్తున్న సాయితండ్రి

---

సాయి బంధువులకు నా హృదయపూర్వక నమస్కారాలు. నా పేరు చంద్రకళ. 2022, అక్టోబర్ 5, విజయదశమికి ముందు ఒకరోజు మావారు పనిమీద బ్యాంకు మేనేజర్‌ని కలవడానికి వెళ్లారు. అప్పుడు ఆ మేనేజర్, "మీకు క్రెడిట్ స్కోర్ బాగా ఉంది. ఏమైనా లోన్ కావాలంటే ఇస్తాము" అని అన్నారు. మావారు ఇంటికి వచ్చి నాతో, "మనం చాలా రోజులుగా కారు తీసుకుపోవాలనుకుంటున్నాము కదా! మేనేజర్ లోన్ ఇస్తామన్నారు. కారు తీసుకుందామా?" అని అన్నారు. నేను, "తీసుకొనేటట్లయితే దసరా పండుగరోజు తీసుకుందాం. లేదంటే జనవరి వరకు వద్దు" అని అన్నాను. మావారు మేనేజర్ దగ్గరకి వెళ్లి, "దసరా పండగ ఐదు రోజుల్లో ఉంది. ఈలోగా మీరు లోన్ ఇచ్చేటట్లయితే తీసుకుంటామ"ని అన్నారు. అందుకు ఆ మేనేజర్, "ప్రూఫ్స్ అన్నీ ఇవ్వండి. ఇస్తాము" అన్నారు. ఇటు మూడు రోజుల్లో మేము ప్రూఫ్స్ ఇవ్వడం, బ్యాంకు ఓకే చేయడం జరుగుతుండగా అటు షోరూంవాళ్ళు, "బ్యాంక్ లోన్ ఓకే అయితే వెంటనే కారు డెలివరీ ఇస్తాము. పండగ ముందు నాలుగవ తేదీన రండి. అమౌంట్ మా అకౌంట్‌లో పడుతూనే బండి షెడ్‌లో నుండి బయటకు తీసి పెడతాము. ఐదవ తేదీన మీరు డెలివరీ తీసుకోండి" అని అన్నారు. సరేనని మేము నాల్గవ తేదీన షోరూంకి వెళ్లి కావాల్సన అన్ని ప్రూఫ్స్ ఇస్తే వాళ్ళు, "అన్ని సరిగా ఉన్నాయని బ్యాంకు నుంచి అమౌంటు అకౌంట్‌లో పడుతూనే కారు తెస్తామ"ని అన్నారు. కానీ అరగంట తర్వాత వచ్చి "మీ ఆధార్ మరియు బ్యాంకు అడ్రస్ వేరుగా ఉన్నాయి. అమౌంట్ ట్రాన్స్ఫర్ కష్టమవుతుంది. అందువల్ల ఈరోజు పని కాదు. రేపు షోరూం హాలిడే కాబట్టి తర్వాత చూద్దాం" అన్నారు. మావారు, "రెండురోజులు ముందే మీకు అన్ని సబ్మిట్ చేస్తే, మీరు ఓకే అని చెప్పి ఇప్పుడు కాదంటే ఎలా?" అని గట్టిగా వాళ్లతో వాదనకు దిగారు. నాకు ఏం చేయాలో తెలియక, "తండ్రీ ఈ సమస్యను మీరే తీర్చి ఏ సమస్యా లేకుండా రేపు దసరా పండగనాడు మాకు కారు ఇప్పించండి" అని బాబాను వేడుకొని బయటకి వచ్చి కూర్చున్నాను. 10 నిమిషాల్లో మావారు, "సమస్య పరిష్కారమైంది. వచ్చి సంతకం చేయి" అన్నారు. ఆ మాట వింటూనే నా కళ్ళ ముందు బాబా రూపం కనిపించినట్లనిపించి కళ్ళ నిండా నీళ్లు తిరిగాయి. చూసారా! ఆ తండ్రిని తలుచుకుంటే సమస్య ఎంత సులువుగా పరిష్కారమైందో! అలా దసరా పండుగరోజు మాకు కారు అనుగ్రహించారు బాబా.

మా పాప పీజీ పూర్తి చేసి తెలంగాణ సెట్‌కు ప్రిపేర్ అయింది. ఆ సమయంలో తను, "కాంపిటీషన్ చాలా ఉంటుంది. అదీకాకుండా ఏపీకి చెందిన మనం నాన్ లోకల్ కిందకు వస్తాము. ఎగ్జామ్ క్వాలిఫై అవుతానా" అని చాలా టెన్షన్ పడింది. నేను తనకి సచ్చరిత్రలోని షేవడే వృత్తాంతం చెప్పి, "నువ్వు గట్టిగా ప్రయత్నం చేసి బాబాపై విశ్వాసం ఉంచి ఫలితం ఆ తండ్రికి వదిలిపెట్టు" అని చెప్పాను. నేను చెప్పినట్లే తను బాబాపై విశ్వాసముంచి పరీక్షకి ప్రిపేర్ అయి 2023, ఏప్రిల్ 18న ఎగ్జామ్స్ సెంటర్‌కి వెళితే, సెంటర్లోకి అడుగుపెడుతూనే తనకి బాబా నవ్వుతూ దర్శనం ఇచ్చారు. ఇంకా సమయముందని తను గార్డెన్లో ఒక చోట చెట్టు కింద కూర్చుని పైకి చూస్తే, అది బిల్వవృక్షం. వెంటనే తను నాకు ఫోన్ చేసి, "బాబా, శివుడు నాకు ఆశీస్సులు ఇచ్చారు. పరీక్ష బాగా వ్రాస్తాన"ని చెప్పింది. నాకు చాలా సంతోషమేసింది. పాప పరీక్ష బాగా వ్రాసి మంచి మార్కులతో టీఎస్ సెట్ క్వాలిఫై అయింది. చూశారా! ఆ తండ్రి మీద నమ్మకం ఉంచితే ఏదైనా తీరుతుంది.

మా ఆడపడుచుకి భర్త లేరు. ఆమెకు ఇద్దరు అబ్బాయిలు. వాళ్లకు పెళ్లి చేయవలసిన బాధ్యత మాపై ఉంది. పెద్దబ్బాయికి పెళ్లి చేయాలని నాలుగు సంవత్సరాల నుంచి అమ్మాయికోసం వెతుకుతుంటే ఎన్ని సంబంధాలు చూసినా ఏవీ కుదరలేదు. ఈలోగా అబ్బాయికి 29 సంవత్సరాలు వస్తుండటం వల్ల, 'ఇంకా ఆలస్యమైతే మంచి పిల్లలు దొరకర'ని మాకు, అబ్బాయికి చాలా టెన్షన్‌గా ఉండేది. ఆ సమయంలో నేను ఒకరోజు అబ్బాయితో, "బాబా గుడికి పోయి, బాబా కళ్ళల్లోకి చూస్తూ నీ మనసులోని బాధలన్నీ చెప్పుకొని నాకు ఈ రోజుతో అన్ని తీరిపోయాయి అనుకొని రా" అని చెప్పాను. తను అలానే చేశాడు. నేను కూడా, "అబ్బాయికి పెళ్లి సంబంధం కుదిరిన వెంటనే మీ అనుగ్రహాన్ని బ్లాగు ద్వారా తోటి సాయి భక్తులతో పంచుకుంటాన"ని బాబాను వేడుకున్నాను. ఆ తండ్రి అనుగ్రహంతో పది రోజుల్లోనే మేము ఊహించిన దానికంటే మంచి సంబంధం వచ్చింది. 2023, జూన్ 1, గురువారంనాడు పెళ్లి ముహూర్తం నిశ్చయమైంది. మాకు చాలా సంతోషమేసింది. బాబా దయతో పెళ్లి మంచిగా జరగాలని కోరుకున్నాము. అయితే పెళ్ళికి మా పాప పీరియడ్స్ సమస్య వచ్చింది. ఆ విషయంగా నేను బాబాను, "బాబా! గురువారంలోపు పీరియడ్స్ వచ్చి పెళ్లికి సమస్య లేకుండా చేయండి. ఈ సమస్య తీరితే మీ అనుగ్రహాన్ని బ్లాగులో పంచుకుంటాన"ని వేడుకున్నాను. ఆ సమస్యను ఒక వారం ముందే తీర్చి ప్రతి నిమిషం నా వెంటే ఉంటూ నన్ను ముందుకు నడిపిస్తున్న నా తండ్రి సాయిశ్వరుడికి నేను ఎలా కృతజ్ఞతలు చెప్పుకోవాలి?

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహారాజ్ కీ జై!!!

---