.jpeg)
1. బాబా సర్వాంతర్యామి - మనల్ని ఎల్లప్పుడూ రక్షిస్తుంటారు
2. బాధను నివారణ చేసిన బాబా
బాబా సర్వాంతర్యామి - మనల్ని ఎల్లప్పుడూ రక్షిస్తుంటారు
అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సమర్థ సద్గురు సాయినాథ్ మహారాజ్ కీ జై!!!
శ్రీసాయినాథుని పాదపద్మాలకు నా అనంతకోటి నమస్కారాలు. నేను సాయి భక్తురాలిని. నేను శిరిడీ వెళ్లాలని చాలా రోజుల నుండి అనుకుంటుండగా ఈమధ్య అనుకోకుండా శిరిడీ ప్రయాణం పెట్టుకున్నాము. అప్పుడు నేను, "బాబా! ఎటువంటి ఆటంకాలు లేకుండా మేము శిరిడీ దర్శించి క్షేమంగా ఇంటికి తిరిగి వచ్చేలా అనుగ్రహించమ"ని బాబాను ప్రార్థించాను. తర్వాత అన్ని ముడుపులు తీసుకొని మేము శిరిడీ వెళ్ళాము. బాబా దయవల్ల ఆయన దర్శనం, సమాధి దర్శనం బాగా జరిగింది. నేను సమాధిని తాకి నమస్కరించుకున్నాను. ఇంకా బాబా తమని చాలాసేపు చూసుకొనే అవకాశం నాకు ప్రసాదించారు. మధ్యాహ్న హారతి కూడా దర్శించాము. తర్వాత శిరిడీ నుండి పండరీపురం వెళ్లి పాండురంగని దర్శించాము. ఆ తర్వాత కొల్లాపూర్ మహాలక్ష్మి అమ్మవారిని కూడా దర్శించి బాబా దయతో ఎటువంటి ఆటంకం లేకుండా క్షేమంగా మా ఇంటికి చేరుకున్నాము.
ఒకసారి మా పనిమనిషి కిందపడి కాలునొప్పి వల్ల పనికి రాలేకపోయింది. ఆమె బాగా పనిచేస్తుంది కాబట్టి, తను వస్తే బాగుంటుందని, "బాబా! ఎలాగైనా తన కాలునొప్పి తగ్గించి, తిరిగి పనికి వచ్చేలా అనుగ్రహించండి" అని బాబాను ప్రార్థించాను. ఆయన దయతో తనకి నొప్పి తగ్గి పనికి వస్తానని చెప్పింది. ఒకసారి మా అమ్మకు ఆయాసం ఎక్కువై ఆరోగ్యం బాగాలేకపోవడంతో హాస్పిటల్లో చేరింది. అప్పుడు నేను, "బాబా! అమ్మకు ఆరోగ్యాన్ని ప్రసాదించి హాస్పిటల్ నుంచి క్షేమంగా ఇంటికి చేర్చు" అని బాబాను ప్రార్థించాను. ఆయన దయవల్ల కొంచెం నీరసంగా ఉంటున్నప్పటికీ ఇప్పుడు అమ్మ ఆరోగ్యం బాగానే ఉంది. "ధన్యవాదాలు బాబా. అమ్మ కోటి రామజపం చేయాలని చేస్తుంది. ఇంకా మిగిలి ఉన్న ఐదు లక్షల జపం చేసే శక్తిని ఆమెకు ప్రసాదించు తండ్రి".
2023, మే 4, గురువారం. ఆరోజు ఉదయం నేను సాయి దివ్యపూజ చేశాను. మధ్యాహ్నం 1:30 నుండి 3:30 మధ్యలో పని ఉండటంతో ఇంటికి తాళం వేసి బయటకు వెళ్లాను. కానీ నేను వచ్చేసరికి ఇంటి తాళం తీసి ఉంది. ఇంట్లోని కప్ బోర్డులన్నీ తెరిచి ఉన్నాయి. సీసీ కెమెరాలో చూస్తే, 3 - 3:30 మధ్యలో ఇద్దరు దొంగలు మా ఇంటిలోకి దూరి తాళాలు తీసి కప్ బోర్డులన్నీ వెతికారు. అయితే బాబా దయవల్ల ఇంట్లో బంగారం ఏమీ లేదు. వాళ్ళు వెతికిన కప్ బోర్డులో వెండి వస్తువులున్నప్పటికీ అవేవీ పోలేదు. ఒక చిన్న పాత సెల్ ఫోన్ తప్ప ఇంట్లో ఏ వస్తువులూ పోలేదు. కానీ మరుసటిరోజు అమ్మవారి బంగారు బొట్టు, గాజులు దొంగలు వెతికిన కాప్ బోర్డులో ఉన్నాయని గుర్తొచ్చి, "బాబా! ఎలాగైనా అవి పోకుండా ఉండేటట్లు చూడు" అని బాబాను ప్రార్థించాను. తరువాత వెళ్లి కప్ బోర్డు తెరిస్తూనే అమ్మవారి బొట్టు, గాజులు ఉన్న పర్స్ కనిపించింది. వాటిని చూసిన నా సంతోషానికి అవధులు లేవు. అవి మా పూర్వికుల నుండి వస్తున్నవి. వాటిని దొంగల కళ్ళల్లో పడకుండా బాబా కాపాడారు. మా ఇంటినీ కాపాడారు.
మా చిన్నపాప ఇంటర్ మొదటి సంవత్సరం పరీక్షల్లో మ్యాథ్స్ పేపర్ సరిగా వ్రాయలేదని చెప్పింది. నేను భారం బాబా మీద వేశాను. ఆయన దయవల్ల పాప 96.4% మార్కులతో పాస్ అయింది. ఇలా నా విషయంలో బాబా ప్రతి నిమిషం నాతోనే ఉంటారు. నేను ఏది చెప్పినా, మాట్లాడినా వింటారు. ఆయన సర్వాంతర్యామి, మనల్ని ఎల్లప్పుడూ రక్షిస్తుంటారు. "నేను ఉండగా భయం ఎందుకు? నిశ్చింతగా ఉండు" అని నన్ను హెచ్చరిస్తుంటారు. "థాంక్యూ బాబా. మీ అనుగ్రహం ఎల్లప్పుడూ పాప మీద ఇలానే ఉండాలి. మీ కరుణ ఎల్లప్పుడూ అందరి మీద ఉండాలి".
ఓంసాయి శ్రీసాయి జయజయసాయి!!!
బాధను నివారణ చేసిన బాబా
నా పేరు మోహన్. 2023, మే నెల ఆఖరులో నేను భరించలేని తలనొప్పి మరియు స్వల్ప జ్వరంతో బాధపడ్డాను. టాబ్లెట్లు వేసుకుంటూ బాబా నామస్మరణ చేస్తున్నా ఐదురోజుల వరకు తగ్గలేదు. చివరిక 30వ తేదీ రాత్రి నేను బాధను తట్టుకోలేక, "బాబా! దయచేసి నా బాధను నివారించండి. మీ అనుగ్రహాన్ని సాయి భక్తులతో పంచుకునేందుకు వెంటనే బ్లాగుకు పంపుతాను" అని బాబాను ప్రార్థించాను. ఆయన దయతో ఒక అరగంటలో ఆ బాధ నుండి ఉపశమనం కలిగించారు, కానీ నేను నిద్రలోకి జారుకున్నందు వల్ల ఆ విషయాన్ని అప్పుడు సరిగా గుర్తించలేదు. మరుసటిరోజు ఉదయం మాత్రం బాబాకు కృపకు నేను చాలా సంతోషించాను. ఆయన దయతో నేను ఇప్పుడు బాగానే ఉన్నాను. శ్రద్ధ, సబూరీ కలిగి ఉంటే తప్పక బాబా సహాయం అందరికీ అందుతుంది. "ధన్యవాదాలు బాబా".
