1. ఎంతోకాలంగా ఎదురుచూస్తున్న ప్రమోషన్ను అనుగ్రహించిన బాబా2. సాయి నామమే రక్ష - ఊదీయే పరమ ఔషధం
ఎంతోకాలంగా ఎదురుచూస్తున్న ప్రమోషన్ను అనుగ్రహించిన బాబా
సాయి మహరాజ్కు, సాయిబంధువులకు నా నమస్కారాలు. నేను ఒక సాయి భక్తురాలిని. మా కుటుంబమంతా సాయి భక్తులం. ఒక సంవత్సరం నుండి మాకు బాబాతో అనుబంధం ఏర్పడింది. బాబా మాకు ఎన్నో లీలలు చూపారు, ఎన్నో బాధలు తీర్చారు. ఇప్పుడు నా ప్రమోషన్ విషయంలోని బాబా అనుగ్రహాన్ని మీతో పంచుకుంటున్నాను. నేను 11 సంవత్సరాలుగా ఒక ప్రతిష్టాత్మక సంస్థలో ఉద్యోగం చేస్తున్నాను. ఆ సంస్థలో చేరిన మూడేళ్ళకి నాకు ప్రమోషన్ వచ్చింది కానీ, తరువాత 7 ఏళ్లలో ఇంక్రిమెంట్లు తప్ప ప్రమోషన్ లేదు. ఆ కాలంలో నాపై ఇద్దరు హెడ్ ఆఫీసర్స్ మారారు. వాళ్ళు నా వర్క్ విషయంలో హ్యాపీగా ఉన్నట్టే ఉండేవారు కానీ, ప్రమోషన్కు రికమెండ్ చేసేవారు కాదు. అందువలన నేను బాధపడుతూ ఉండేదాన్ని. అలా ఉండగా 2022 ఆరంభంలో అప్రయిజల్స్ తీసుకున్నప్పుడు మా హెడ్ "ఈసారి తప్పకుండా నీ ప్రమోషన్కి రికమెండ్ చేస్తాను" అన్నట్టు మాట్లాడితే నేను చాలా సంతోషపడ్డాను. కానీ 4, 5 నెలలు గడిచాక ఒకరోజు ఆమె, "ఈసారి కూడా నీకు ప్రమోషన్ రావడం కష్టం. నీ జూనియర్కి స్కిల్ లెవెల్లో ఎక్కువ పాయింట్స్ వస్తున్నాయి" అంది. అది విని నేను ఎంత బాధపడ్డానో మాటల్లో చెప్పలేను. నాకైతే ఇక నాకు ప్రమోషన్ రావడం అసాధ్యమనిపించింది. అట్టి స్థితిలో, 'ఇప్పుడు బాబా తప్ప నన్ను ఎవరూ ఆదుకోలేర'ని ఆయననే వేడుకున్నాను. వేడుకున్నాననే కంటే వేదించానంటే బాగుంటుందేమో! ఎందుకంటే, రాత్రీపగలూ తేడా లేదు. నేనూ నిద్రపోలేదు, బాబానూ నిద్రపోనిలేదు. "బాబా! నాకు ప్రమోషన్ ఇవ్వు.. ఇవ్వు" అంతే వేరే మాట లేదు. క్వశ్చన్ ఆన్సర్ సైట్లో చూస్తే సానుకూలంగా సమాధానాలు వచ్చినప్పటికీ ఏదో భయం. బాబా గుడికి వెళితే, "ప్రమోషన్ రాకపోతే జూనియర్స్ ముందు నాకు చాలా ఇబ్బందిగా ఉంటుంది. నా తండ్రి నన్ను కాపాడు" అని వేడుకోవడం, ధునిలో కొబ్బరికాయ వేసినా అదే కోరుకోవడం చేసేదాన్ని. మహాపారాయణలో జాయిన్ అయ్యాను. స్తవనమంజరి, సచ్చరిత్ర, గురుచరిత్ర చదివాను. ఏం చేసినా ప్రమోషన్ రావాలనే బాబాని అడిగేదాన్ని. చివరికి అప్రయిజల్స్ తీసుకున్న ఒక సంవత్సరానికి 2023, ఫిబ్రవరిలో బాబా, దత్తాత్రేయస్వామి దయతో నాకు ప్రమోషన్ వచ్చింది. "నా కోరిక తీర్చినందుకు మీకు శతకోటి నమస్కారాలు దేవా. ఇంతకంటే నేను మీకేం ఇవ్వగలను?".
ఒక సంవత్సరం నుండి మా బాబుకి స్కిన్ అలెర్జీ ఉంది. మందు రాస్తున్నప్పుడు తగ్గటం, మానేయగానే మళ్ళీ అలెర్జీ పెరగటం జరుగుతుండేది. మేము బాబానే వేడుకుంటూ బాబుని గాణ్గాపురం తీసుకెళ్ళి, అక్కడ భస్మంతో స్నానం చేయించి తీసుకొచ్చాం. ఆపై బాబా ఊదీ రాస్తూ ఉండగా ఇప్పుడు బాబుకి అలెర్జీ చాలావరకు తగ్గింది. "ధన్యవాదాలు దత్తదేవా, సాయిదేవా. అందరినీ రక్షించు సాయి".
సాయి నామమే రక్ష - ఊదీయే పరమ ఔషధం
సాయిబంధువులందరికీ నమస్కారం. నా పేరు శ్రీదేవి. నా స్నేహితురాలి పేరు కూడా శ్రీదేవి. సాయి భక్తురాలైన తను రోజూ మందిరంలో బాబా సేవ ఎంతో శ్రద్ధగా చేసుకుంటుంది. ఈమధ్య ప్రేగుల్లో ఇన్ఫెక్షన్ అయి వాంతులు, విరేచనాలతో తను హాస్పిటల్లో అడ్మిట్ అయ్యింది. తను అనుభవిస్తున్న తీవ్రమైన బాధను చూడలేక నేను బాబాను, "నా స్నేహితురాలిని పూర్తి ఆరోగ్యవంతురాలిని చేయండి బాబా. తను త్వరగా డిశ్చార్జ్ అయి క్షేమంగా ఇంటికి వస్తే మీ అనుగ్రహాన్ని మీ బ్లాగులో పంచుకుంటాన"ని బాబాను ప్రార్థించాను. తను కూడా హాస్పిటల్లో ఉన్నన్ని రోజులు ఊదీ సేవిస్తూ, నుదుటన ధరిస్తూ నిరంతరం సాయి నామస్మరణలో గడిపింది. బాబా దయవల్ల తను గురువారం క్షేమంగా ఇంటికి తిరిగి వచ్చింది. ఏ సమస్య వచ్చినా 'బాబా! ఈ కష్టాన్ని తొలగించు. మీ అనుగ్రహాన్ని బ్లాగులో పంచుకుంటాను' అని ప్రార్ధించగానే సమస్య తీరిపోతుందంటే నిజంగా ఈ బ్లాగు బాబా అనుగ్రహానికి చిహ్నం. మనందరికీ సాయి నామమే రక్ష. ఊదీయే పరమ ఔషధం. పిలిస్తే పలికే నా సాయితండ్రికి నా హృదయపూర్వక శతకోటి వందనాలు.
