సాయిభక్తుల అనుభవమాలిక 1544వ భాగం....

---

ఈ భాగంలో అనుభవాలు:

1. కుటుంబానికి అండగా ఉన్న బాబా

2. వేడుకున్న వారం లోపలే బుక్స్ అందేలా అనుగ్రహించిన బాబా

---

కుటుంబానికి అండగా ఉన్న బాబా

సాయిబంధువులందరికీ నమస్కారం. నాపేరు మాధవికృష్ణ. నేను ఒక సాయి భక్తురాలిని. నేను మహాపారాయణ గ్రూపు MP-2628N1లో సభ్యురాలిని. ఈ బ్లాగులోని సాయి భక్తుల అనుభవాలు చదువుతుంటే చాలా ఆనందంగా ఉంటుంది. బాబా ప్రేమకు కళ్ళంట ఆనందభాష్పాలు వస్తున్నాయి. నేను నా అనుభవాలు ఎప్పటికప్పుడు సాయి భక్తులందరితో పంచుకోవాలనుకుంటూనే ఆలస్యం చేశాను. మొదట్లో నేను అందరి దేవుళ్ళ పటాలతో పాటు బాబా విగ్రహం పెట్టుకుని నాకు చేతనైనట్లు పూజ చేసుకునేదాన్ని. దాదాపు ఆరు, ఏడు సంవత్సరాల నుంచే నాకు బాబా మీద అపారమైన భక్తి, విశ్వాసాలు కుదిరాయి. అదెలా అంటే నేను సరదగా సాయి క్వశ్చన్ అండ్ ఆన్సర్ సైట్లోకి వెళ్లి ఏదో ఒక కోరిక అనుకోని బాబా సమాధానం కోసం చూసేదాన్ని. దాదాపు ఆయన ఇచ్చే సమాధానాలు నాకు సరిగ్గా సరిపోయేవి. నెమ్మదిగా నాకు బాబా మీద నమ్మకం కుదరనారభించి ఈరోజు బాబా తప్ప మాకు వేరే దైవం లేరు అన్నంతగా మారింది. అంతలా భక్తివిశ్వాసాలు కుదిరాయి. అప్పటినుండి బాబా మాకు తల్లి, తండ్రి, గురువు, దైవం, సర్వమూ అయి మమ్మల్ని నడిపిస్తున్నారు. ఆయన మాకు చేసిన అద్భుతాలు ఎన్నో.

నా భర్త ఆర్మీ నుండి రిటైర్ అయిన తరవాత ఏవేవో చిన్న చిన్న ఉద్యోగాలు చేసారు. కానీ సరిగా స్థిరపడలేదు. దాంతో ఫ్రెండ్స్‌ని నమ్మి చిన్న బిజినెస్ మొదలుపెట్టారు. అది కూడా సెట్‌కాక ఆర్థికంగా నష్టపోయారు. ఇంకా ఆయనలో మార్పు వచ్చి సొంతిల్లు అమ్ముకోవాల్సి వచ్చి పిల్లలతో ఏకాకిగా నిలబడినప్పుడు మా వెనక ఉండి నన్ను అధైర్యపడకుండా చేసి ఒక వ్యక్తి ద్వారా ఉద్యోగం ఇప్పించి మా జీవితాలను నిలబెట్టారు బాబా. అలా ప్రతి ఆపదలో నాకు తోడుగా ఉండి పిల్లల్ని, నన్ను అక్కున చేర్చుకున్నారు. చేతిలో డబ్బులు లేని పరిస్థితిలో బాబుని అమెరికా పంపామంటే, సమయానికి డబ్బు అందేలా చేసి మా బాబు జీవితాన్ని మలుపు తిప్పింది బాబానే. ఇంకా కోరుకున్న వ్యక్తితో మా అమ్మాయి వివాహం జరిపించారు బాబా. ఇంతలో ఐదు సంవత్సరాల కాంట్రాక్ట్ అయిపోయి మావారు మరల ఉద్యోగం కోల్పోతే మేము చాలా బాధపడ్డాము. అప్పుడు, "బాబా! ఏమిటి ఈ పరిస్థితి? అంతా బాగానే ఉందనుకునేలోపు మరలా ఉద్యోగం పోయింది. మా బాధ్యతలు పూర్తిగా తీరలేదు. మా పరిస్థితి మీకు తెలుసు. మమ్మల్ని కాపాడు బాబా" అని వేడుకొని క్వశ్చన్ అండ్ ఆన్సర్స్ సైట్లో చూస్తే, "నీ పూర్వవైభం వస్తుంది" అని సమాధానం వచ్చింది. అలాగే బాబా దయవలన ముందు ఉద్యోగం ఇప్పించిన వ్యక్తి ద్వారా మావారికి మరో ఉద్యోగం వచ్చింది. బాబా చెప్పినట్లే జరిగింది. ఆయనే ఆ వ్యక్తి రూపంలో ఉద్యోగం ఇప్పించారని మా ప్రగాఢ విశ్వాసం. నాకు కరోనా వచ్చినప్పుడు చాలా తేలిగ్గా తగ్గించేశారు బాబా.

ఒకరోజు రాత్రి ఇంట్లో ఎవరూ లేరు. నేను ఒక్కదాన్నే ఉన్నాను. నిద్రపోయేముందు, "బాబా! ఒక్కసారి కనిపించు. మాకు ఇంత సహాయం చేస్తున్న నిన్ను చూడాలని ఉంది" అని అనుకుంటూ పడుకున్నాను. మధ్య రాత్రిలో నా తల దగ్గర ఎవరో నిలబడి నా చేతి మీద తట్టినట్లు అనిపిస్తే భయపడుతూ కళ్ళు తెరిచి చూశాను. ఆకుపచ్చ రంగు కఫనీ ధరించిన ఒక వ్యక్తి పక్కనే నిలబడి ఉండటం చూసి భయంతో గట్టిగా అరిచేసరికి ఆయన అదృశ్యమయ్యారు. నా అజ్ఞానానికి బాధపడ్డప్పటికీ, "పోనీలే, బాబా మమ్మల్ని కనిపెట్టుకొని ఉన్నారు" అని చాలా సంతోషించాను. నేను బాబాను నమ్మిన తర్వాత నమ్మకముందు ఎప్పుడూ ఆయన మా కుటుంబానికి అండగా ఉన్నారు, ఉంటున్నారు. భవిష్యత్తులో కూడా ఆయన మా చేయి పట్టుకుని నడిపిస్తారన్న నమ్మకం మాకుంది. ఆయన తమని నమ్మిన వారికి అన్యాయం చేయరు. ఆయనను నమ్మితే చాలు అద్భుతాలు జరుగుతాయి. మా ఇంట్లో అందరికీ ఆయన మీద పరిపూర్ణమైన భక్తి, విశ్వాసాలు. మేము మాకు చేతనైనంతలో ఆయనకి సేవ చేసుకుంటున్నాము. "ధన్యవాదాలు బాబా. బాబుకి 'హెచ్ వన్' వీసా రాలేదు. అదే కొరతగా ఉంది. ఇంకా సమయం రాలేదేమో బాబా! దయతో బాబుని జీవితంలో స్థిరపరచి మంచి అమ్మాయితో పెళ్లి జరిపించు. ఇటీవల ఒక ఇల్లు తీసుకున్నాము బాబా. ఆ విషయంలో సమస్యగా ఉంది, పరిష్కరించండి బాబా".

చివరిగా ఒక మాట, 'సచ్చరిత్ర పఠనం మన జీవితంలో మంచి మార్పు తీసుకొస్తుంది. మనం ఎలా బ్రతకలో నేర్పిస్తుంది'.

---

వేడుకున్న వారం లోపలే బుక్స్ అందేలా అనుగ్రహించిన బాబా

అనంతకోటి బ్రహ్మాండనాయకుడు, కోటి సూర్యల కాంతితో వెలుగొందు నా తండ్రి సాయినాథునికి శతకోటి వందనాలు. నా పేరు జ్యోతి. నేను చిన్నప్పటినుండి అనగా డిగ్రీ చదివేటప్పటి నుండి సాయిబిడ్డను. నా జీవితంలో బాబా నాకు ఎన్నో అనుభవాలు ప్రసాదించారు. నాకు ఈ మధ్యనే 'సాయి మహారాజ్ సన్నిధి' బ్లాగు పరిచయమైంది. ఇందులో అనుభవాలు చదివేటప్పుడు నాకు ఒక సమస్య మొదలైంది. అదేమిటంటే, మా అమ్మాయి సివిల్స్ పరీక్షలకు ప్రిపేర్ అవుతుంది. ఢిల్లీ నుండి పోస్టల్ ద్వారా తనకి రావాల్సిన పుస్తకాలు రెండు నెలలైనా, పరీక్షలు కూడా దగ్గరపడుతున్నా రాలేదు. ఆ విషయంగా నేను, "బాబా! పరీక్షలకు ముందే బుక్స్ వస్తే, మీ అనుగ్రహాన్ని బ్లాగు ద్వారా తోటి సాయి భక్తులతో పంచుకుంటాన"ని అని బాబాకి మ్రొక్కుకున్నాను. అంతే, రెండు నెలలుగా రాని  బుక్స్ ఒక వారం లోపలే వచ్చి పరీక్షల సమయానికి అందాయి బాబా ఉన్నారనడానికి ఇంతకన్నా నిదర్శనం ఏం కావాలి? "చాలా చాలా ధన్యవాదాలు బాబా".

---