సాయిభక్తుల అనుభవమాలిక 1545వ భాగం....

---

ఈ భాగంలో అనుభవాలు:

• ఆలస్యమైనా మంచిగా అనుగ్రహించిన బాబా

---

ఓం శ్రీ సచ్చిదానంద సద్గురు సాయినాథ్ మహారాజ్ కీ జై!!!

సాయి భక్తులందరికీ నా నమస్కారాలు. నేను ఒక సాయి భక్తుడిని. నా పేరు చంద్రశేఖర్. ఊరు పాతర్లగడ్డ. 2022, ఏప్రిల్ 9న నా నడుముకు ఆపరేషన్ జరిగింది. దాంతో నేను ఉద్యోగానికి వెళ్లకుండా ఇంటిలోనే విశ్రాంతి తీసుకోవాల్సి వచ్చింది. అప్పుడు నేను, "నా పరిస్థితి ఏంటి ఇలా అయిపోయింది బాబా? ఇప్పుడు నేను ఏం చేయాలి? నా కుటుంబాన్ని ఎలా పోషించికోవాలి తండ్రీ?" అని బాబాను ప్రార్థిస్తుండేవాడిని. బాబా దయవలన మా కంపెనీవాళ్ళు 5నెలలపాటు నెలనెలా జీతం నా అకౌంటులో వేశారు. నా ఆరోగ్యం బాగైనా తర్వాత అదే సంవత్సరం జూలైలో రెండు, మూడు రోజులకు ఒకసారి డ్యూటీకి వెళ్లడం మొదలుపెట్టాను. అయితే ఆగస్టు నెలలో నాకు డెంగ్యూ జ్వరమొచ్చి ప్లేట్లెట్లు 55 వేలకు పడిపోయాయి. దాంతో హాస్పిటల్లో రోజూ రెండు పూటలా నాకు సెలైన్లు ఎక్కించారు. ఆ సమయంలో నేను, "బాబా! ఇప్పటికీ నడుముకు జరిగిన ఆపరేషన్‌తో బాదపడుతున్నాను. మళ్ళీ ఇంతలోనే ఈ డెంగ్యూ జ్వరం ఏమిటి? ఈ జ్వరం తగ్గి నా ఉద్యోగం నేను చేసుకునేలా అనుగ్రహించు తండ్రీ" అని బాబాను ప్రార్థిస్తూ ప్రతిరోజూ ఆయన నామాన్ని స్మరిస్తుండేవాడిని. బాబా దయవలన 12 రోజులలో నా ప్లేట్లెట్ల సంఖ్యా 1,30,000కు పెరిగాయి. దాంతో డాక్టర్ సెలైనులు ఎక్కించడం ఆపి మందులతో చికిత్స చేసారు. బాబా దయవలన నేను తొందరగా కోలుకున్నాను. అయితే డెంగ్యూ జ్వరం వలన నేను ఒక నెల రోజుల డ్యూటీకి వెళ్ళలేదు. నాకు కొద్దిగా బాగున్న తర్వాత సెప్టెంబర్‌లో మా సార్‌కి ఫోన్ చేసి, "డ్యూటీకి వస్తాను సార్" అని చెపితే, "ఇప్పుడు వద్దు. తర్వాత వద్డువుగాని" అని ఫోన్ పెట్టేసారు. నాకు ఏమీ అర్థంకాక, "బాబా! నా పరిస్థితి ఏంటి ఇలా అయిపోయింది? నాకు మళ్ళీ ఉద్యోగమొస్తే మీ అనుగ్రహాన్ని మీ బ్లాగు ద్వారా తోటి సాయి భక్తులందరితో పంచుకుంటాను" అని బాబాకి చెప్పుకొని సాయి సచ్చరిత్ర రెండుసార్లు, సాయి లీలామృతం ఒకసారి పారాయణ చేశాను. అలా నాలుగు నెలలు గడిచాక 2023, జనవరిలో బాబా దయవలన నా ఫ్రెండ్ ఒకరు నాకు ఫోన్ చేసి, "ఏమిటి సంగతి, ఏం చేస్తున్నావు?" అని అడిగాడు. నేను తనతో నా పరిస్థితి తెలియజేయగా, "మీ కంపెనీవాళ్ళు నీకు ఫోన్ చేయకపోతే నువ్వు కడియపులంకలో మా బావగారి నర్సరీకి వచ్చి ఉద్యోగం చేసుకో" అని చెప్పాడు. అది విని నాకు చాలా సంతోషమేసింది. ఇది బాబా లీల కాకపోతే మరేంటి? ఆయన దయతో వచ్చిన ఆ ఉద్యోగంలో చేరి నా కుటుంబానికి దూరంగా ఉండసాగాను. అప్పుడు, "బాబా! దయ చూపించి మరలా పాత కంపెనీలో ఉద్యోగం చేసుకునేలా చేయండి" అని బాబాను ప్రార్థించాను. వారం తిరగకుండానే బాబా చేసిన అద్భుతం చూడండి. మా సార్ ఫోన్ చేసి, "శేఖర్ ఎక్కడున్నావు? మంచిరోజు చూసుకుని డ్యూటీకి రా" అని చెప్పారు. దాంతో నేను మళ్ళీ పాత కంపెనీకి వెళ్లి నా ఉద్యోగం చేసుకుంటున్నాను. ఇదంతా బాబా దయే. ఆలస్యమైనా మంచిగా అనుగ్రహించారు. ఇదంతా బాబా నాపై చూపుతున్న ప్రేమ. "ధన్యవాదాలు బాబా. నేను మిమ్మల్ని ఒక కోరిక కోరి రెండు నెలలవుతుంది. మేము చాలా ఆర్థిక ఇబ్బందులలో ఉన్నాము. నాయందు దయుంచి ఆ కోరిక ఈ నెలలో నెరవేర్చు తండ్రి. వెంటనే మీ బ్లాగు ద్వారా సాయి భక్తులందరితో మీ అనుగ్రహాన్ని పంచుకుంటాను సాయి".

కొన్నాళ్ళ క్రితం మా పిన్ని భర్త హార్ట్ ఎటాక్‌తో చనిపోయారు. ఆ బాధలో ఉండగా రెండు నెలలకు ఆమె కూతురు కూడా కరోనాతో చనిపోయింది. దాంతో ఆమె మానసికంగా చాలా కృంగిపోయి సరిగా భోజనం చేయకపోవడంతో ఆమె ఆరోగ్యం బాగా దెబ్బతింది. గ్యాస్టిక్ సమస్య వలన పొట్ట ఉబ్బిపోయి, మలవిసర్జన కూడా జరగక ఆమె చాలా ఇబ్బందిపడుతూ బాగా నీరసపడిపోతే హాస్పిటల్‌కి తీసుకెళ్లారు. డాక్టరు టెస్టులు చేసి, "గాల్ బ్లాడర్‌లో స్టోన్స్ ఉన్నాయి. ప్రేగులకు కూడా ఇన్స్ఫెక్షన్ అయింది. చాలా ప్రమాదం" అని ఆమెను హాస్పిటల్లో అడ్మిట్ చేసుకున్నారు. అప్పుడు నేను, "బాబా! అసలే ఆమె భర్త, కూతురు చనిపోయిన బాధలో ఉంది. దానికి తోడు ఈ ఆరోగ్య సమస్యలు ఏమిటి బాబా? ఆమె ఆరోగ్యం బాగుండాలి. తొందరగా కోలుకుని హాస్పిటల్ నుండి డిశ్చార్జ్ అయి ఇంటికి వచ్చేస్తే మీ అనుగ్రహాన్ని సాయి భక్తులందరితో ఈ బ్లాగు ద్వారా పంచుకుంటాను" అని బాబాను ప్రార్థించాను. బాబా దయవలన ఏ ప్రమాదం లేకుండా పది రోజుల్లో ఆమె ఇంటికి తిరిగి వచ్చింది. "ధన్యవాదాలు బాబా. దయతో మా పిన్నిని తన  కోడలు బాగా చూసుకునేలా చేసి, ఆమెకు ఏ ఆరోగ్య సమస్యలు లేకుండా చల్లగా ఉండేలా చూడు తండ్రి".

2023, మార్చి నెలలో మా అమ్మాయి వాళ్ళ అమ్మమ్మగారి ఊరు వెళ్ళింది. తిరిగి వచ్చేటప్పుడు తను ఒక పొట్లంలో కట్టి బ్యాగులో పెట్టిన తన చెవిరింగులను బస్సులో ఎక్కడో జారవిడుచుకుంది. ఇంటికి వచ్చిన తరువాత బ్యాగులో చూసుకుంటే చెవిరింగులు కనబడలేదు. నేను, "ఏమిటి సాయీ? ఇప్పటికే నేను ఆరోగ్యపరంగానూ, అర్దికంగాను చాలా ఇబ్బందులలో ఉన్నాను. దయ చూపి అమ్మాయి చెవిరింగులు కనబడేలా చేయి తండ్రి. అవి దొరికితే మీ అనుగ్రహాన్ని బ్లాగు ద్వారా సాయి భక్తులందరితో పంచుకుంటాను బాబా" అని ప్రతిరోజూ బాబాని ప్రార్థిస్తుండేవాడిని. తర్వాత ఏప్రిల్ నెలలో నేను శిరిడీ వెళ్ళాను. అక్కడ సమాధి మందిరంలో కూడా బాబాని, "దయ చూపించు తండ్రీ. మా అమ్మాయి చెవిరింగులు దొరికేలా ఆశీర్వదించు బాబా" అని ఎంతగానో బాబాను వేడుకున్నాను. బాబా దయచూపారు. 2023, జూన్ 12, సాయంత్రం మా అమ‌్మాయి తనకి ఏదో వస్తువు అవసరమై మా ఇంట్లో ఉన్న కప్ బోర్డులో వెతుకుతుంటే రెండు, మూడు నెలల క్రితం కనపడకుండా పోయిన ఆ చెవిరింగులు దొరికాయి. బాబా చేసిన అద్భుతం చూడండి. ఎక్కడో బస్సులో పడిపోయిన చెవిరింగులు ఇంట్లో కనపడ్డాయి. "ధన్యవాదాలు బాబా. నేను మీకిచ్చిన మాట ప్రకారం నా అనుభవాన్ని బ్లాగులో పంచుకున్నాను. నేను 5 నెలలుగా మిమ్మల్ని ఒక కోరిక కోరుతున్నాను. దయతో ఆ కోరిక కూడా తీరేలా చేయి తండ్రీ".

ఓంసాయి శ్రీసాయి జయజయసాయి!!!

---