సాయి ఇచ్చిన మధుర స్మృతులు - మొదటి భాగం

---

సాయిబంధువులందరికీ నమస్కారం. నేను ఒక సాయి భక్తురాలిని. నేను ఇదివరకు "ద్వారకామాయిలో అడుగుపెట్టి బాబా భక్తురాలినయ్యాను" అన్న నా మొదటి అనుభవాన్ని ఈ బ్లాగు ద్వారా మీ అందరితో పంచుకున్నాను. ఇప్పుడు నేను మరికొన్ని అనుభవాలను మీతో పంచుకోవాలని మళ్ళీ మీ ముందుకు వచ్చాను.

నా చిన్నప్పటినుండి అమ్మ, నాన్న ఇద్దరూ బాబాను ఆరాధిస్తూ ఉన్నా, నాకెందుకో బాబాపట్ల అంతటి భక్తిశ్రద్ధలు ఏర్పడలేదు. కానీ క్రిందటి సంవత్సరం ద్వారకామాయిలో అడుగుపెట్టినప్పటి నుండి నాకు ఆయనపట్ల భక్తిశ్రద్ధలు ఏర్పడ్డాయి. తరువాత ఈ "సాయి మహరాజ్ సన్నిధి బ్లాగు" ద్వారా నేను బాబాకి మరింత దగ్గరయ్యాను. "బాబా! బ్లాగుకోసం మీ వర్క్‌లో నన్ను భాగస్వామిని చేసినందుకు మీకు ఎలా కృతజ్ఞతలు తెలపాలో కూడా తెలియదు. ఈబ్లాగు కోసం మీ వర్క్ చేస్తుంటే చాలా సంతోషంగా, మనసుకి ప్రశాంతంగా అనిపిస్తుంది. ఇలాంటి అనుభూతి ముందెన్నడూ లేదు. థాంక్యూ బాబా! నాకు ఎప్పుడూ మీ సేవ చేసుకునే అవకాశం ఇవ్వండి". థాంక్స్ అన్నయ్యా! మీ వల్లే నాకు బాబా అనుగ్రహం లభించింది.

అన్నయ్యని కూడా బాబాయే ఇచ్చారు. నేను నా చిన్నప్పటినుండి భగవంతుడిని "నాకొక అన్నయ్యని ఇవ్వండి" అని అడుగుతూ ఉండేదాన్ని. ఎందుకంటే, నేను మా అమ్మానాన్నలకి ఒక్కతే అమ్మాయిని. నాకు తోడబుట్టిన వాళ్ళు ఎవరూ లేరు. నాకంటే ముందు అమ్మకి ముగ్గురు పిల్లలు పుట్టి పురిటిలోనే పోయారు. నేను 'సాయి నవ గురువారవ్రతం' మొదలుపెట్టిన వారం రోజులకే బాబా నాకు బంగారంలాంటి అన్నయ్యని ఇచ్చేసారు. నా ప్రార్థన మన్నించి బాబా నాకు అన్నయ్యనివ్వడంతో నాకు చాలా సంతోషంగా అనిపించింది.

నా మొదటి అనుభవం :

మావారు సత్యసాయి ట్రస్ట్ తరఫున ప్రతి వారం స్నాక్స్, టిఫిన్ డిస్ట్రిబ్యూట్ చేయిస్తూ ఉంటారు. అయితే అందుకు కావాల్సిన డబ్బులు ముందు మావారు పెట్టుకుంటే, ట్రస్ట్ వాళ్ళు తరువాత ఇస్తూ ఉంటారు. ఒకసారి అందుకు అవసరమైన డబ్బులు మావారి దగ్గర లేకపోవడంతో నన్ను అడిగారు. ఎలాగూ రెండు రోజుల్లో వాళ్ళు డబ్బులు వేసేస్తారు కదా అని మా నాన్నకి చెప్పకుండా ఆయన అకౌంట్ నుండి డబ్బులు డ్రా చేసి మా వారికి ఇచ్చాను. ట్రస్ట్ వాళ్ళు త్వరగానే అమౌంట్ క్రెడిట్ చేస్తారు, ఈలోగా నాన్నకి చెప్పి టెన్షన్ పెట్టడం ఎందుకని మేము చెప్పలేదు. కానీ మరునాడు నాన్న బ్యాంకుకి వెళ్ళాలని అంటుంటే, అది విని నాకు కొంచెం భయంగా అనిపించింది. ఆరోజు గురువారం. పూజ ప్రారంభించే ముందు బాబాతో, "ఏమి చేయాలి బాబా? నాకు మీరే దిక్కు" అని చెప్పుకొని, ఆ క్షణంలో వచ్చిన ఆలోచనతో వెంటనే పాస్ బుక్ దాచేసాను. తరువాత వారం రోజులకి ట్రస్ట్‌వాళ్ళు ఆ మొత్తం మా అకౌంటులో వేసారు. దానితో ఆ డబ్బులు నాన్న అకౌంటులో వేసేసి పాస్ బుక్ తీసి యథాస్థానంలో పెట్టేసాను. కానీ నాన్న బ్యాంకుకి బయల్దేరుతుంటే నాకు మళ్ళీ టెన్షన్ పట్టుకుంది. ఎందుకంటే, ఇప్పుడు నాన్న వెళ్లి పాస్ బుక్‌లో ట్రాన్సాక్షన్స్ వివరాలు ఎంట్రీ చేయించారంటే ఆ డబ్బు తీసి మళ్ళీ వేసినట్లు తేదీలతో సహా దొరికిపోతుంది. ఏమి చేయాలో అర్ధంకాక మళ్ళీ బాబాతో, "బాబా! నేను చేసింది తప్పని నాకు తెలుస్తోంది. దాన్ని కవర్ చేయడానికి ఇన్ని టెన్షన్స్ పడాల్సివస్తుంది. ఇప్పుడు మీరు బ్యాంకులో ప్రింటర్ వర్క్ కాకుండా చూడండి. అలా జరిగితే నేను చేసిన తప్పుకు ప్రాయశ్చిత్తంగా వచ్చే నెల నాకు రానున్న RD డబ్బులు నాన్నకే ఇచ్చేస్తాను" అని వేడుకున్నాను. నిజంగా ఇక్కడ సాయి చేసిన చమత్కారం చూడండి. నాన్న బ్యాంకుకి వెళ్లి వచ్చారు, బుక్‌లో ప్రింటింగ్ కూడా అయ్యింది, అయినా నాన్న చాలా కూల్‌గా ఉన్నారు. "ఇదేమిటి, అసలు ఏమి జరిగింది?" అని సందేహంతో వెంటనే నేను పాస్ బుక్ తీసి చూస్తే ప్రింట్ చాలా లైట్‌గా పడివుంది. మూడు, నాలుగుసార్లు నేను ఎంతగా చూసినా కూడా అసలు ఏమీ కనిపించలేదు. బాబా చేసిన చమత్కారానికి, ఆయన సహాయానికి సంతోషంగా కృతజ్ఞతలు చెప్పుకొని ఆ విషయం పూర్తిగా మర్చిపోయాను. కొన్నిరోజుల తర్వాత ఒకసారి బ్యాంకుకి వెళ్తూ నాన్న పాస్ బుక్ చూసి షాక్ అయ్యాను. ఆరోజు ఎన్నిసార్లు చూసినా ప్రింటింగ్ లైట్‌గా పడి స్పష్టంగా కనపడనిది, ఈరోజు ప్రింటింగ్ బాగా క్లారిటీగా ఉండి వివరాలు కనిపిస్తూ ఉన్నాయి. నేను తప్పు చేసినా అది ఒక మంచిపని కోసమే అని బాబా నన్ను కాపాడటానికి ఎంత అద్భుతం చేసారో చూశారా?

నా రెండవ అనుభవం - బాబా ఇచ్చిన "సాయిబాబా" నామం:

నాకెప్పుడూ బాబా స్వప్నదర్శనం ఇవ్వట్లేదని బాధపడేదాన్ని. అయితే ఇటీవల ఒకరోజు మంచి నిద్రలో ఉండగా నాకు ఒక కల వచ్చింది. నేను నా ఫ్రెండ్స్‌తోపాటు ఎత్తుగా ఇసుక ఉన్న ప్రదేశంలో కూర్చొని ఉన్నాను. ఎందుకో తెలియదుగాని నా ఫ్రెండ్స్ నన్ను ఆ ఇసుకలో తోసేసి వెళ్ళిపోతున్నారు. అలా వాళ్ళు వెళ్ళిపోతూ వాళ్లకు ఎదురుగా వస్తున్న ఒక ఆవును బెదిరించారు. దానితో అది చాలా కోపంగా నా మీదకి దూసుకు వస్తోంది. అదలా నా మీదకి వస్తుంటే నా ఫ్రెండ్స్ మాత్రం అదేమీ పట్టించుకోకుండా నన్ను అక్కడే వదిలేసి పరుగెత్తారు. నేను మాత్రం షాక్‌లో ఉండి పరిగెత్తలేక భయంతో అక్కడే కూర్చొని ఉండగా, బాబా నా ఎదుట కనిపించి, "నీకు ఏ ఆపద వచ్చినా 'సాయిబాబా' అని నా నామం తలచుకో!" అని చెప్పారు. వెంటనే నేను “సాయిబాబా..సాయిబాబా" అని గట్టిగా అన్నాను. అప్పుడు ఆవు ప్రక్కనే ఒక వెలుగు వచ్చి ఆవు అదృశ్యమయింది. అక్కడ సాయి మాత్రం నిలుచొని ఉన్నారు.

ఇది జరిగిన కొద్దిరోజులకి, ఒక రోజంతా మా బాబుకి వాంతులు అయ్యాయి. సాయంత్రానికి వాంతులు తగ్గాయి కానీ, వాడి ఒళ్ళు చాలా వేడిగా ఉంది. మేము హోమియో మెడిసిన్ వాడుతుంటాం. ఆ సమయంలో నాకు చాలా ఆందోళనగా అనిపించి వైద్యుడికి ఫోన్ చేస్తే అతను లిఫ్ట్ చేయలేదు. ఆ రాత్రివేళ వాడికి ఏ మందు ఇవ్వాలో అర్థంకాక అలానే వాడిని పడుకోబెట్టాను. మధ్యరాత్రిలో మెలకువ వచ్చేటప్పటికి వాడి కాళ్ళు, చేతులు బాగా వేడిగా నాకు తగిలాయి. వాడికి జ్వరం ముందు అలానే వస్తుంది. నాకు ఆ రాత్రివేళ ఏమి చేయాలో అర్థం కాలేదు. కాసేపటికి బాబా నాకు కలలో చెప్పిన నామం సంగతి గుర్తుకు వచ్చింది. వెంటనే నేను మా వాడి నుదుటిపై నా చేయిపెట్టి, “సాయిబాబా, సాయిబాబా” అని సాయి ఇచ్చిన నామాన్ని స్మరిస్తూ అలానే కాసేపు ఉన్నాను. అంతే! వేరే ఏ మందూ వాడకుండానే 5 నిమిషాలలో వాడి జ్వరం తగ్గిపోయింది. బాబా నాకు ప్రసాదించిన “సాయిబాబా” నామం యొక్క గొప్పదనమేమిటో ఈ అనుభవం ద్వారా నాకు తెలియజేసారు.

రేపు షిరిడీయాత్రకు సంబంధించిన మరికొన్ని అనుభవాలు మీతో పంచుకుంటాను.

---