బాబా అప్పుడే కాదు ఇప్పుడు కూడా తమ భక్తులు కష్టంలో ఉంటే ఊదీ అందిస్తున్నారు

---

శ్రీ సచ్చిదానంద సద్గురు సాయినాథ్ మహారాజ్ కీ జై

శ్రద్ధ  -  సబూరి

జామ్నేర్ లో నానా చాందోర్కర్ కుమార్తై మైనతాయి ప్రసవ వేదన పడుతున్న సందర్భంలో బాబా రామ్ గీర్  బువా ద్వారా సరైన సమయానికి ఊదీ పంపిన లీల సాయి భక్తులందరికీ విదితమే. బాబా అప్పుడే కాదు ఇప్పుడు కూడా తమ భక్తులు కష్ట సమయాలలో ఉన్నప్పుడు ఎవరో ఒకరి ద్వారా ఊదీ అందించే ఏర్పాటు చేస్తున్నారు. అటువంటిదే మీరు ఇప్పుడు చదవబోయి ఈ సాయి బంధువు అనుభవం.

గతవారం "ఒక సాయిబంధువు షిరిడీ పర్యటనకు సంబంధించిన వాట్సాప్ సత్సంగం" గురించి మీరంతా చదివి వున్నారు కదా! అదే సాయిబంధువుకి నిన్న, అనగా 2018, ఆగష్టు 20 సాయంత్రం 5.30 సమయంలో జరిగిన ఒక అనుభవాన్ని ఇలా తెలియజేస్తున్నారు..

అందరికీ సాయిరామ్

నేను ఊదీకి సంబంధించిన ఒక అనుభవాన్ని ఇప్పుడు మీకు చెప్తాను. నేను ఉద్యోగం చేస్తున్న ఆఫీసులో ఒక సహోద్యోగిని ఉన్నారు. తనతో నాకు కేవలం ముఖపరిచయం మాత్రమే ఉంది. నిజానికి తను నా స్నేహితురాలికి స్నేహితురాలు. రెండు మూడు వారాల క్రిందట తను వాళ్ళ అమ్మగారికి ఆరోగ్యం బాగలేదని నా స్నేహితురాలితో చెబుతుండగా నేను విన్నాను. ఇది విన్నాక నేను షిర్డీ నుండి తెచ్చిన బాబా ప్రసాదం, ఊదీ తనకి ఇవ్వాలని అనిపించింది. కానీ మళ్ళీ తను ఎలా తీసుకుంటుందో ఏమో అని ఆలోచించాను. చివరిగా తనకి ఎలాగైనా ప్రసాదాన్ని అందజేయాలని సంకల్పించాను. కానీ గతవారమంతా తను నాకు ఆఫీసులో కనిపించలేదు.

ఈరోజు సాయంత్రం తను కనిపిస్తే,  "మీ అమ్మగారు ఎలా ఉన్నారు?" అని అడిగాను. "ఆవిడ రొమ్ముక్యాన్సర్ తో బాధపడుతున్నారు. దానివలన ఆవిడ చాలా వీక్ గా అయిపోయారు. గతవారమంతా ఆవిడకు కీమోథెరపీ చేయించాము. అందుకే నేను గతవారమంతా సెలవులో ఉన్నాను" అని చెప్పి, "పైగా గతవారంలో మా మేనత్త కూడా మరణించారు. కుటుంబమంతా చాలా కష్టంలో ఉన్నామ"ని చెప్పింది. అప్పుడు నేను, "నేను ఈమధ్యనే షిర్డీకి వెళ్లి వచ్చాను. అక్కణ్ణించి తెచ్చుకున్న ఊదీ నా దగ్గర ఉంది. ఈ ఊదీ తీసుకొని రోజూ అమ్మకు ఇవ్వండి" అని చెప్పాను. తను సైలెంట్ గా ఊదీ తీసుకుంది. నేను తనతో, "ఊదీ తీసుకోవడం వలన ఎన్నో సందర్భాలలో ఎందరో భక్తులకు మేలు జరిగింది. ఊదీ వలన వాళ్లు తమ బాధల నుండి ఉపశమనం పొందారు. అందువలన దయచేసి అమ్మకు రోజూ ఊదీ ఇవ్వండి, ఆమెకు మేలు జరుగుతుంది" అని చెప్పాను. అప్పుడు తను ఒక ఆసక్తికరమైన విషయం చెప్పింది. తను కూడా బాబా భక్తురాలినని చెప్పి, "నిన్న రాత్రి నేను చాలా ఏడ్చాను. ఆ బాధలో బాబాతో మాట్లాడుతూ, "బాబా! నాకు ఇంక ధైర్యం లేదు. రేపు మీరు ఉన్నట్లు నాకు నిరూపణ ఇవ్వండి, లేకపోతే నేను మీయందు నమ్మకాన్ని కోల్పోతాను. ఇకపై నేను మిమ్మల్ని నమ్మలేను" అని చెప్పుకున్నాను" అని చెప్పింది. నేడు అనుకోకుండా ఈ విధంగా ఊదీ ఇవ్వడంతో ఆయన తన ఉనికిని చాటుకున్నారు. పరమాద్భుతం కదా!

బాబా అదృశ్యంగా తీగలను కదుపుతూ ఎక్కడెక్కడి భక్తులను ఎలా కలుపుతారో! ఆయన లీలలో నన్ను కూడా భాగస్వామిని చేసినందుకు బాబాకు నా హృదయపూర్వక కృతజ్ఞతలు. ఇదంతా ఈరోజు సాయంత్రం 5:30 గంటల సమయంలో జరిగింది. అనుకోకుండా "సాయిమహరాజ్ సన్నిధి బ్లాగు" లో ఈరోజు పోస్టింగ్ చూస్తే ఆ అనుభవం కూడా బాబా యొక్క ఊదీ మహిమ గురించే. బాబా! మీ లీలలు అనూహ్యములు. ఆమె తల్లిని బాబా జాగ్రత్తగా చూసుకుంటారని, త్వరలోనే ఆమె కోలుకుంటారని ఆశిస్తున్నాను.

సాయిరామ్ !!

గురువుగారు(శరత్ బాబూజీ గారు) ఊదీ గురించి చాలా అద్భుతంగా  చెప్పారు. ఆ వీడియో క్రింద ఇస్తున్నాను చూసి ఆనందించి, మీ అవగాహన పెంచుకోండి.

---