శ్రీ సచ్చిదానంద సద్గురు సాయినాథ్ మహారాజ్ కీ జై
శ్రద్ధ - సబూరి
నేను సదాశివ. ముందుగా సాయిబాబా దివ్య చరణకమలాలకు కోటి కోటి ప్రణామములు సమర్పించుకుంటున్నాను. తప్పులుంటే మన్నించమని బాబాను ప్రార్థిస్తున్నాను. నమ్మిన వాళ్లకు ఆపద్బాంధవుడు, అనాథరక్షకుడు ఆయన. బాబా ఎలా నన్ను రక్షించారో చెప్పబోతున్నాను.
కలియుగంలో 'నామ సంకీర్తన'కు చాలా ప్రాధాన్యం ఇచ్చారు. "ఒక్క నామం చాలు భవసాగరాన్ని దాటడానికి" అన్నారు పెద్దలు. భగవంతుని నామస్మరణతోనే ఎంతోమంది తరించారని మనం రోజూ వింటూ వుంటాము. నేను, "ఇది ఎలా సంభవం?" అనుకునేవాడిని. అందుకేనేమో, నాలాంటి వాడికి తెలియచేయాలని బాబా వేసిన ప్రణాళికేమో నాకు జరిగిన ఈ సంఘటన.
2018 జులై 20వ తారీఖున నేను నా డ్యూటీ అయిపోయిన తరువాత మధ్యాహ్నం 2గంటల సమయంలో మోటార్ సైకిల్ పై సాయిబాబా నామస్మరణ చేసుకుంటూ ఇంటికి వెళ్తున్నాను. బాగా ఎండగా ఉండటంవల్ల రోడ్డు పూర్తిగా నిర్మానుష్యంగా ఉంది. ఇంతలో నా వెనకాల నుండి ఒక పెద్ద ట్రక్ వచ్చి(ఎలా వచ్చిందో నాకు ఇప్పటికీ తెలీదు) నా మోటార్ సైకిల్ని గుద్దేసింది. హఠాత్తుగా జరిగిన ఆ పరిణామంతో నాకు ఒక్క క్షణం ఏమి జరిగిందో అర్థం కాలేదు. కానీ, ఓ నా సాయి బంధువులారా! నన్ను నమ్మండి. చావు, బ్రతుకుల మధ్య వున్న నన్ను సాయిబాబా ఎలా రక్షించారో చెప్పనలవి కాదు నాకు. అంతపెద్ద యాక్సిడెంట్ నుంచి నన్ను గట్టున పడేసారు బాబా. నాకు ఏమీ కాలేదు. ఒక్క చిన్న మచ్చ కూడా పడలేదు. నా మోటార్ సైకిల్ వెనకాల లైట్స్ విరిగిపోయినాయి, అంతే.
అప్పుడు అర్థం అయ్యింది - నామస్మరణ మహిమ. ఆ సాయిబాబా నామమే నన్ను కాపాడింది. అప్పుడు నేను ఇంటికి పోకుండా, కళ్ళలో నీళ్లతో ముందు బాబా గుడికి వెళ్ళాను. "బాబా! ఈరోజు నువ్వు నన్ను కాపాడకపోతే నా పరిస్థితి ఎంత దారుణంగా ఉండేది? నన్నే కాదు, నీ స్మరణలో వుండే ప్రతి భక్తుడికి నీవే రక్ష ప్రభూ!" అని నమస్కరించుకొని, ధన్యవాదాలు చెప్పుకొని ఇంటికి వెళ్ళాను. ఏదో పూర్వజన్మలో చేసిన కర్మను బాబా కొంచెంలో తీసేశారు. నన్ను కాపాడి బాబా "ఆపదలో ఆపద్బాంధవుడు" (ఆపద్బాంధవాయ నమః) అని నిరూపించుకున్నారు.
ఓం సాయిరాం.
No comments:
Post a Comment