సాయి మా జీవితాన్నే మార్చేసారు

---

శ్రీ సచ్చిదానంద సద్గురు సాయినాథ్ మహారాజ్ కీ జై

శ్రద్ధ  -  సబూరి

సాయి సోదరి పల్లవి గారు తన అనుభవాలను మనతో ఇలా పంచుకుంటున్నారు.

నా పేరు పల్లవి, నేను బెంగళూరులో ఉంటాను. మొదటగా, ఇంతటి సాయికార్యాన్ని దిగ్విజయంగా నడుపుతున్నందుకు మీ అందరికీ కృతజ్ఞతలు. ఇది ఎంతోమందికి సాయిపై ఉన్న నమ్మకాన్ని రెట్టింపు చేస్తుంది. ఇప్పుడు నేను చెప్పబోయేది సాయి నాకు ప్రసాదించిన మొదటి అనుభవం. సాయి నాకు తల్లి, తండ్రి, స్నేహితుడు. సాయే నాకు అన్నీ. సాయి నన్ను, మా సిస్టర్ ని తన చేతులలోకి తీసుకోవడం నిజంగా ఒక అద్భుతమైన సాయి లీల. దానిని ఇప్పుడు మీకు వివరిస్తాను.

2014 డిసెంబర్ లో మా సిస్టర్ పెళ్లి ఆగిపోయిన సమయంలో బాబా మా జీవితంలోకి ప్రవేశించారు. మా సిస్టర్ IT జాబ్ చేస్తూ ఉండేది. తనకి మేము 4 సంవత్సరాలుగా పెళ్లి సంబంధాలు చూస్తుండగా, చివరికి ఒక మంచి కుటుంబంలోని అబ్బాయితో ఆగష్టులో తన పెళ్లి కుదిరింది. ఇన్ని సంవత్సరాలుగా మేము ఎదురు చూస్తున్న సమయం  రావడంతో అందరం చాలా సంతోషంగా ఉన్నాము. అదే సమయానికి మా బ్రదర్ కి కూడా ఒక బాబా భక్తురాలితో పెళ్లి కుదిరింది. ఇద్దరి వివాహం మార్చి 9వ తేదీనాడు జరపాలని నిర్ణయించారు. నేను కూడా IT జాబ్  చేస్తూ ఉన్నాను. సిస్టర్, బ్రదర్ ఇద్దరికీ ఒకేసారి సంబంధాలు కుదిరి జీవితంలో స్థిరపడుతున్నందుకు నేను చాలా సంతోషించాను. నాకు కూడా పెళ్లి చేయాలని మా నాన్నగారు అనుకొని, ఆ పనులలో నిమగ్నమై ఉన్నారు. కానీ ఒకసారి మా సిస్టర్ బాధపడతుండడం నేను గమనించాను. అప్పుడే తెలిసింది మా సిస్టర్ అతనితో సంతోషంగా లేదని, వారిద్దరివీ భిన్నమైన స్వభావాలు అని. ఇదే ఆలోచిస్తూ తను ప్రతిరోజూ ఏడ్చేది, చాలా డిప్రెస్డ్ గా ఫీల్ అయ్యేది. కొద్ది రోజులకి పరిస్థితి మరీ దారుణంగా మారిపోయింది. ఆ అబ్బాయికి పెళ్లి చేసుకోవడం అసలు ఇష్టం లేదు. 2నెలల వ్యవధిలో ఎప్పుడో ఒకసారి మాత్రమే ఫోన్ చేసేవాడు, ఒక్కసారి కూడా మా సిస్టర్ ని కలవడానికి రాలేదు. చివరికి పెళ్లి ఆగిపోయింది.

దానితో మా ఇంట్లో అందరి సంతోషం ఒక్కసారిగా ఆవిరైపోయింది. సరిగ్గా ఆ సమయంలోనే మన బాబా మా జీవితంలోకి ప్రవేశించారు. ముందు ఎన్నడూ సాయిని ఎరుగని మాకు స్వప్నంలో దర్శనం ఇచ్చారు. ఇక మేము గుడ్డిగా బాబాని విశ్వసించటం మొదలుపెట్టాము. అలా మా జీవితాలలోకి బాబా ప్రవేశించిన తరువాత బాబా మాకు ఎన్నో లీలలు చూపించారు. మా సిస్టర్ పెళ్లిని సాయి సరైన సమయంలో కుదిరేలా చేసి మమల్ని అందరినీ సంతోషంలో ముంచారు. ఆ సాయి లీలనే నేను ఇప్పుడు మీతో పంచుకోబోతున్నాను. నేను, మా సిస్టర్ 'సాయి గురువార వ్రతం' మొదలుపెట్టాము. ప్రతి గురువారం సాయి మందిరానికి వెళ్లేవాళ్ళం. ఆఖరి గురువారం వచ్చేసరికి మనసు చాలా ప్రశాంతంగా, నిర్మలంగా అనిపించింది. ఇంట్లో కూడా అందరూ బాబా దయవల్ల ఏ గొడవలు లేకుండా సంతోషంగా ఉన్నారు. సాయి ఊదీ, సాయి సచ్చరిత్ర పుస్తకం ఆ సమయంలోనే మాకు లభించాయి. నేను ఒక సప్తాహం, మా సిస్టర్ రెండు సప్తాహాలు పారాయణ పూర్తి చేసాం. మా జీవితంలో చాలా సానుకూలమైన మార్పులు వచ్చాయి. మా సిస్టర్ కి స్వప్నంలో సాయి తన మెహంది ఫంక్షన్ లో ఉన్నట్లుగా దర్శనం ఇచ్చి, తన పెళ్లి దగ్గరుండి జరిపిస్తానని అభయం ఇచ్చారు. తరువాత కొన్ని మంచి సంబంధాలు వచ్చినా ఏదీ ముందుకి పోవడంలేదు. ఇలా కొన్ని నెలలు గడచిపోయాయి. మా సిస్టర్, 'సాయి question & answer వెబ్సైటు' లో చూడగా, 'తన పెళ్లి శ్రీరామనవమి సమయానికి కుదురుతుంది' అని వచ్చింది.

ఆరోజు రానే వచ్చింది. ఒక మంచి కుటుంబం వాళ్ళు మా సిస్టర్ ని చూడడానికి వచ్చారు. అబ్బాయి కూడా చాలా మంచిగా అనిపించాడు. వాళ్ళు మాతో సంబంధానికి అంగీకరించారు కూడా. సాయి ముందుగా చెప్పినట్టే నిశ్చితార్ధానికి సంబంధించిన చర్చ రామనవమి రోజున జరిగింది. మా సిస్టర్  పెళ్లి సాయి దగ్గరుండి చూసుకుంటారని మాకు సాయిపై 100% నమ్మకం ఉంది. మా సిస్టర్ పెళ్లిని మే25వ తేదీ నాటికి నిశ్చయమయ్యేలా చూడమని సాయిని ప్రార్ధించాను. ఎందుకంటే ఆ రోజు నా పుట్టినరోజు. అందువలన ఆ సంతోష వార్త సాయి నాకు ఇచ్చే పుట్టినరోజు కానుకగా భావించాను. సాయి నా ప్రార్థనని మన్నించి మా సిస్టర్ పెళ్లి తేదీని నా పుట్టినరోజునాడు నిశ్చయం చేసారు. మా బ్రదర్, సిస్టర్ ఇద్దరి పెళ్లిళ్ళు జూన్15వ తేదీనాడు జరిగేలా నిశ్చయించారు. మా సిస్టర్ మాత్రం పెళ్లికి చాలా తక్కువ సమయం ఉన్నందున హ్యాపీగా ఫీల్ కాలేకపోయింది. పెళ్లికి కేవలం మూడు వారాలు మాత్రమే సమయం ఉండడంతో ఆ అబ్బాయిని అర్ధం చేసుకోవడానికి అవకాశం తక్కువగా ఉంది. పైగా పెళ్ళికి కావాల్సిన షాపింగ్ ఏమీ చేసుకోలేదు. పెళ్ళికి ముందు వాళ్ళిద్దరూ రెండుసార్లు మాత్రమే కలుసుకున్నారు. ఒక్కసారి కూడా బయటకి పోలేదు, అంతా హడావిడిగా సాగింది. తను పెళ్లికి ముందు దిగులుగానే ఉండేది.

ఆ సమయంలోనే తన ఉద్యోగంలో కూడా ఆందోళనకర పరిస్థితులు ఎదురయ్యాయి. తనని ఉద్యోగానికి రాజీనామా చేయమని వార్నింగ్ మెయిల్ కూడా పంపారు. పరిస్థితులు చాలా దారుణంగా అనిపిస్తున్నా బాబా స్వప్న దర్శనాలు, స్వప్నంలో బాబా చెప్పిన పలుకులు ఎప్పుడూ అసత్యం కావు కనుక బాబా ఏమి చేస్తారా అని నేను సాయిపై నమ్మకంతో ఎదురు చూస్తున్నాను. ఆ క్రమంలోనే సాయి మాకు విష్ణు సహస్ర నామాలు చదవమని సూచించారు. నేను ప్రతి రోజు శ్రీనివాసుని టెంపుల్ కి, సాయి మందిరానికి వెళ్ళి మా సిస్టర్ జీవితం సంతోషంగా సాగాలని వేడుకునేదాన్ని. చివరికి మా సిస్టర్ పెళ్లి జూన్15వ తేదీ నాడు చాలా వైభవంగా, సంతోషకరంగా జరిగింది. కానీ నాకు మాత్రం తన వైవాహిక జీవితం ఎలా ఉంటుందో అని చాలా దిగులుగా ఉండేది. కాని సాయి ఎప్పుడూ మమ్మల్ని విడిచి పెట్టలేదు. మా సిస్టర్ పెళ్ళైనరోజే తన భర్త ఇంటికి వెళ్ళిపోయింది. రెండు రోజుల తర్వాత తను నాకు ఫోన్ చేసి తన భర్త తనని చాలా బాగా చుసుకుంటున్నారని, అతను చాలా మంచి వాడని, అత్తమామలు కూడా చాలా మంచివారు అని, తనని అందరూ రాణిలా చుసుకుంటున్నారని చాలా సంతోషంగా మాట్లాడింది. ఈ మాటలు తన నుండి వినాలని నేను చాలా రోజులుగా ఎదురుచూస్తున్నాను. ఇప్పుడు ఇంట్లో అందరం చాలా సంతోషంగా ఉన్నాము. సాయి నా కోరిక నెరవేర్చి, మా కుటుంబంలో సంతోషాన్ని మరల తీసుకొచ్చారు. సాయి లేని మా జీవితాల్ని అసలు ఉహించుకోలేము. సాయి సదా మాతోనే ఉండాలని ఎప్పటికీ ప్రార్థిస్తాను.

ఓం సాయిరాం.

---