బాబా దయతో గర్భవతినయ్యాను

---

ఒక అజ్ఞాత సాయి భక్తురాలు తన అనుభవాన్నిలా పంచుకుంటున్నారు:

సాయిరాం. సాయి నాకు ఇచ్చిన ఈ అనుభవం ద్వారా, బాబా తన  పిల్లలమైన మనం బాధపడుతుంటే చూస్తూ ఉండలేరని, అమితమైన తమ ప్రేమని మనపై ఎప్పుడూ చూపిస్తూనే ఉంటారని తెలుసుకోవచ్చు. ఇలా బ్లాగ్ ద్వారా భక్తుల అనుభవాలు షేర్ చేసుకోవడం వలన పాఠకులందరిలో బాబా పట్ల భక్తి విశ్వాసాలు రెట్టింపు అవుతాయి.

నాకు 8 సంవత్సరాల వయస్సు ఉన్నప్పటి నుండి బాబా నాకు తెలుసు. కాని నేను డిగ్రీ చదువుతున్నప్పటి నుండే సాయిని ప్రార్థించడం మొదలుపెట్టాను. గ్రాడ్యుయేషన్ పూర్తవగానే నాకు ఒక మంచి వ్యక్తితో వివాహం జరిగింది. వివాహం అయిన తరువాత ఆలస్యం చేయకుండా వెంటనే పిల్లలు కావాలి అని అనుకున్నాం. కానీ ఒక సంవత్సరం 5 నెలలు గడిచినా అదృష్టం కలిసి రాలేదు. ఇంక హాస్పిటల్ లో చూపించుకోవడం మొదలుపెట్టాం. ఒక వారానికి రిపోర్ట్స్ వచ్చాయి. అందులో నా భర్తకి సమస్య ఉందని తెలిసింది. తను అందుకు ట్రీట్మెంట్ తీసుకున్నారు. అయినా ఈసారి కూడా అదృష్టం లేదు. ఇంక చేసేది లేక ఇన్ఫెర్టిలిటీ సెంటర్ కి వెళ్లి అక్కడ IUI ట్రీట్ మెంట్ తీసుకుంటూ బాబా ఆశీస్సుల కోసం ప్రార్ధించాం. నాకు ఎప్పుడూ ఒక అలవాటు ఉండేది. ఏదైనా సమస్య వచ్చి‌నప్పుడు బాబా ముందర రెండు చీటీలు వేసి, తద్వారా బాబా నిర్ణయం తెలుసుకుంటూ ఉంటాను. అలా నేను ఎప్పుడు పిల్లల గురించి చీటీలు వేసినా ప్రతికూలమైన సమాధానాలే వచ్చేవి. Question & Answer సైట్ లో కూడా అలాగే వ్యతిరేక సమాధానాలు వచ్చేవి. నేను పూర్తిగా కృంగిపోయి సాయి ముందు ఏడ్చేదాన్ని. "నాకే ఎందుకు ఇలా అవుతుంది?" అని ఎన్నోసార్లు అడిగి గొడవ పెట్టుకునేదాన్ని, తిట్టేదాన్ని, కాని ఏనాడూ ఆయన చేయి విడువలేదు. అలాగే, సాయి కూడా నా చేయి విడువరు అనే నమ్మకంతో ఉండేదాన్ని.

ఈ క్రమంలోనే మరోవైపు 4 సార్లు IUI ట్రీట్ మెంట్ తీసుకున్నాను, అయినా ఫలితం దక్కలేదు. సాయి సచ్చరిత్ర సప్తాహ పారాయణం, సాయి దివ్య పూజ, సాయి లీలామృతం పారాయణ చేశాను. ఆ సమయంలో మొదటిసారిగా నాకు సాయి స్వప్నంలో దర్శనం ఇచ్చి నన్ను ఆశీర్వదిస్తున్నారు. అంత అద్భుతమైన సాయి రూపాన్ని నేను ఎప్పటికీ మరువలేను. తరువాత ఒక నెలకి మా బ్రదర్ షిరిడీ వెళ్లి నాకోసం సచ్చరిత్ర పుస్తకం, దానితోపాటుగా ఒక చిన్న సాయి ఫోటో కూడా తెచ్చి‌ ఇచ్చాడు. ఆ ఫోటోలో సాయి నాకు స్వప్నంలో దర్శనం ఇచ్చినట్టే ఉన్నారు. నాకు చాలా సంతోషంగా అనిపించింది. నేను ఊదీ నీళ్ళలో కలుపుకొని రోజూ తాగేదాన్ని. పెళ్ళై 5 సంవత్సరాలు అయ్యింది, కానీ పిల్లలు కలగలేదు. ఆ 5 సంవత్సరాలుగా మేము వాడిన మందులతో బాగా విసిగిపోయి, కొద్దిరోజులు ఆపేసాము.

నాకు రోజూ వెబ్ సైటులో సాయిభక్తుల అనుభవాలు చదవడం బాగా అలవాటు. జూలై 27వ తేదీ నాడు కూడా భక్తుల అనుభవాలు చదివిన తరువాత, Question&Answer సైట్ లోకి వెళ్లి బాబాని అడిగాను. చాలా రోజుల తరువాత సాయి నుండి నాకు అనుకూలంగా సమాధానం వచ్చింది. "బాధలన్నీ 3 నెలలలో తీరిపోతాయి, అంతా మంచే జరుగుతుంది, శ్రీసాయిని గుర్తుపెట్టుకో” అని వచ్చింది. ఈ సందేశంతో సాయి నాలో కొత్త ఆశని కలిగించారు. సాయిపై విశ్వాసంతో అక్టోబర్ లో మళ్ళీ హాస్పిటల్ కి వెళ్ళాము. అక్కడ IVF తీసుకోమని చెప్పారు. మళ్ళీ మందులు వాడటం మొదలుపెట్టాము. ఈసారి బాబాని దృఢమైన భక్తి విశ్వాసాలతో ప్రార్ధించాను. నేను గట్టి పట్టుదలతో రోజూ హాస్పిటల్ కి వెళ్లి 3 షాట్స్ తీసుకునేదాన్ని, మొత్తం 35 నుండి 45 వరకు ఇంజక్షన్లు ఉండేవి. embryo(పిండం) ప్రవేశ పెట్టిన రెండు రోజుల తరువాత నుండి ఈసారి రిపోర్ట్ ఎలా వస్తుందో అని చాలా ఆందోళనగా ఉండేది. Question&Answer సైట్ ఓపెన్ చేసి సాయిని అడిగాను. “నువ్వు చాలా ఆనందంగా ఉంటావు, త్వరలో నీకు పిల్లలు కలుగుతారు” అని సమాధానం వచ్చింది. సాయి ఓదార్పు మాటలతో నేను చాలా నమ్మకంగా ఉన్నాను. నవంబర్ లో ప్రెగ్నెన్సీ టెస్ట్ కోసం (HCG blood test)వెళ్ళినప్పుడు నా బ్లడ్ శాంపిల్ ఇచ్చే ముందు మళ్ళీ ఒకసారి Question&Answer సైట్ చూడగా, సాయి నాకు ఇలా చెప్పారు: "4 సంవత్సరాలుగా నీ మదిలో ఉన్నది, నువ్వు కోరుకున్న విధంగానే జరుగుతుంది” అని. అలా వచ్చాక ఆనందంగా, ఎంతో ధైర్యంగా బ్లడ్ ఇచ్చాను, రిపోర్ట్ పాజిటివ్ గా వచ్చింది. మా సంతోషానికి అవధులు లేవు. బాబా దయతో నేను గర్భవతిని అయ్యాను. "బాబా! నాకు ఎప్పుడూ నీ ఆశీర్వాదాలు కావాలి, నా చేయి ఎప్పుడూ విడువకు బాబా!"

సాయి భక్తులారా! శ్రద్ధ సబూరిలు కలిగి ఉండండి. సాయి ఎప్పుడూ మనల్ని విడిచిపెట్టరు. పేదవారికి, అవసరంలో ఉన్న వారికి సహాయం చేసేవాళ్ళని బాబా ఎంతగానో ప్రేమిస్తారు.

---