సాయి బంధువు 'రిట్జ్' గారు నిన్న గురుపౌర్ణమి రోజు తనకు బాబా ఇచ్చిన చక్కని అనుభవాన్ని ఒక వాట్సాప్ గ్రూపులో తెలియజేసారు. చూడడానికి చిన్న అనుభవమైన అది నా మనస్సుకెంతో హత్తుకుంది. అందుకే సాయి బంధువులందరికి ఆ ఆనందాన్ని అందించాలని తెలుగులోకి అనువదించి మీకు అందిస్తున్నాను. తన మాటలలోనే చదివి ఆనందించండి.
అందరికీ సాయిరామ్
నాకు గురుపౌర్ణమి రోజు బాబా ఇచ్చిన ఒక చక్కటి అనుభూతిని మీ అందరితో పంచుకోవాలనుకుంటున్నాను. అది చిన్నదే అయినా చాలా అందమైనది, మధురమైనది. అందుకే మనస్సు ఆపుకోలేక వెంటనే మీ అందరికీ తెలియజేస్తున్నాను. బాబా నేను చేసే చిన్న సేవని, ఆయనపట్ల నాకున్న ప్రేమని ఆయన స్వీకరిస్తున్నానని ఈ అనుభవం ద్వారా తెలియజేసారు.
ఈరోజు గురుపూర్ణిమ బాబా! అని చిన్నగా బాబాతో మాట్లాడుకుంటూ ఆయన పాదాలను ఉహించుకొని శిరస్సు వంచి నమస్కరిస్తూ "ఓ గురుదేవా! మీ పాదాలకు సమర్పించుకుంటున్న ఈ నమస్కారాలను స్వీకరించండి" అని బాబాతో సవినయంగా చెప్పుకున్నాను. మీరు నేను చెప్పేది నమ్మరు! ఆశ్చర్యం. మరుక్షణంలో నా మొబైల్లో ఒక పాట ప్లే అవ్వడం మొదలుపెట్టింది. గురుపూర్ణిమ రోజుకి తగిన అలాంటి పాట నా మొబైల్ లో దానంతట అదే ప్లే అవ్వడం మొదలుపెట్టింది. అంతటి అంద్భుతమైన పాట నా మొబైల్లో సేవ్ చేసి ఉందని కూడా నాకు తెలియదు.
ఆ పాట మీకోసం
"కోయి శిష్య్ జబ్ గురు చరణో మై షీష్ ఝుకత హై పరమాత్మా ఖుద్ ఆకార్ ఆశిష్ లుటతా హై"
భావం: "ఎప్పుడైతే శిష్యుడు తన గురువు పాదాలపై తన శిరస్సు ఉంచుతాడో... మరుక్షణం దేవుడు అతనిని ఆశీర్వదించటానికి స్వయంగా వస్తాడు"
నేను బాబా పాదాలపై శిరస్సు ఉంచిన మరుక్షణం ఈ పాట ప్లే అయ్యింది. ఇంతకన్నా అందమైన అనుభవం ఏమి ఉంటుంది. ఆవిధంగా బాబా 'నా పాదాల మీద నీకున్న ప్రేమను మరియు నీ నమస్కారాలను స్వీకిరిస్తున్నానని' తెలియజేసారు. అదీ నా బాబా చెప్పే పద్దతి. ఆయన పద్ధతులే వేరు. "మా సంప్రదాయమే వేరు" అని స్వయంగా బాబాయే చెప్పారు కదా!
ప్రియమైన సాయిబాబా, నా దేవా, నా సద్గురు సాయినాధ మిమ్మల్ని నేను ఎంతగానో ప్రేమిస్తున్నాను.
ఓం సాయి రామ్.
Very lucky to get such a marvellous experience. Very lucky.
ReplyDelete🕉 sai Ram
ReplyDelete