సాయిభక్తుల అనుభవమాలిక 1289వ భాగం....

---

ఈ భాగంలో అనుభవాలు:

1. అనుభవాలలో లుప్తమైపోతున్న బాబా ప్రేమ కొరకు ఆవేదన - సాయిభక్తులందరికీ మా హృదయ నివేదన

2. బాబాకి లేఖ - మానసిక ఒత్తిడి నుండి ఉపశమనం

3. ఎప్పుడు, ఏ నిమిషాన తలచుకున్నా దయచూపే సాయి

---

అనుభవాలలో లుప్తమైపోతున్న బాబా ప్రేమ కొరకు ఆవేదన - సాయిభక్తులందరికీ మా హృదయ నివేదన

సాయిభక్తులకు నమస్కారం! ముందుగా, బాబా ఎంతో ప్రేమతో ప్రసాదించిన ఈ ‘సాయి మహరాజ్ సన్నిధి’ బ్లాగులో తమ తమ అనుభవాలను పంచుకుంటున్న సాయిభక్తులందరికీ మనసారా మా ధన్యవాదాలు. ఈ బ్లాగులో అనుభవాలు పంచుకునే విషయంలో సాయిభక్తులందరికీ ఒక చిన్న మనవి. అసలు ఈ బ్లాగ్ ప్రారంభించడంలోని మా ప్రధాన ఉద్దేశ్యం.. బాబా మనకి ప్రసాదించే అనుభవాలను ప్రచురించే క్రమంలో ఆ అనుభవాలలోని బాబా ప్రేమను మేము ఆస్వాదిస్తూ, ఆ ప్రేమను సాటివారితో పంచుకుంటూ, బాబా స్మరణలో అందరమూ ఆనందంగా ఉండాలని. అందుకోసం మీ అనుభవాలను వివరంగా వ్రాయమని ఈ బ్లాగ్ వేదికగా మిమ్మల్ని ఇదివరకు ఒకసారి అభ్యర్థించాము. కొంతమంది మా అభ్యర్థనను మన్నించి వారి అనుభవాలను చక్కగా వివరంగా వ్రాసి పంపుతున్నారు. వారికి మా హృదయపూర్వక కృతజ్ఞతలు. అయితే, కొంతమంది భక్తులు ఇప్పటికీ తమ అనుభవాలను క్లుప్తంగానే వ్రాస్తున్నారు. ముఖ్యంగా చాలామంది భక్తులు తమ సమస్యలు తీరితే ఈ బ్లాగులో పంచుకుంటామని బాబాకు మ్రొక్కుకొని, వాటిని పంచుకుంటున్నారు. అలా మ్రొక్కుకోవద్దని చెప్పడం మా ఉద్దేశ్యం కాదు. నిజానికి, చాలామంది సాయిభక్తుల అనుభవాలలో, వారు ఎంతోకాలం సమస్యలతో సతమతమై, చివరికి ఈ బ్లాగులో పంచుకుంటానని మ్రొక్కుకున్న తరువాతనే బాబా దయతో వారి సమస్యలు తీరాయని వ్రాస్తున్నారు. అంటే, బాబానే ఈ బ్లాగ్ మాధ్యమంగా ఆయా భక్తులను అనుగ్రహిస్తున్నారన్నది స్పష్టం. కాబట్టి అటువంటి అనుభవాలను కాదనటానికి మాకు ఎటువంటి అర్హతా లేదు. కానీ, బాబా ప్రసాదించిన అనుభవాలను ఏదో మ్రొక్కుబడిగా, చాలా క్లుప్తంగా వ్రాసి పంపిస్తుంటే, ఎందుకోసమైతే ఈ బ్లాగును ప్రారంభించామో ఆ బాబా ప్రేమ ఆ అనుభవాలలో కనిపించక మా మనసులు తల్లడిల్లిపోతున్నాయి. బాబా పట్ల ఎంతో ప్రేమతో ప్రారంభించిన ఈ బ్లాగ్ చివరికి మ్రొక్కుబడులు తీర్చుకునే వేదికగా మారుతున్నందుకు మా ప్రాణాలు విలవిలలాడిపోతున్నాయి. ఇది ఇలాగే కొనసాగితే ఈ బ్లాగును నిలిపివేయాల్సి వస్తుందేమోనని మేమంతా ఎంతో వేదనకు గురవుతున్నాము. కానీ, బాబా ఎంతో ప్రేమతో అనుగ్రహించిన ఈ బ్లాగును నిలిపివేయడం మా అభిమతం కాదు. కాబట్టి, నిజంగా మీ అనుభవాలను ఈ బ్లాగులో పంచుకుంటామని బాబాకు మ్రొక్కుకున్నట్లయితే, వాటిని బ్లాగులో ప్రచురించాలని హృదయపూర్వకంగా కోరుకున్నట్లయితే, దయచేసి మా వేదనను మీరంతా సహృదయంతో అర్థం చేసుకుని, బాబా మీకు ప్రసాదించిన అనుభవాలను ఏదో మ్రొక్కుబడిగా కాకుండా వివరంగా పంచుకోవడానికి ప్రయత్నించండి. అప్పుడే ఆ అనుభవాలలో బాబా ప్రేమ వ్యక్తమవుతుంది. నిజానికి అనుభవాన్ని పంచుకోవడమంటే బాబా ప్రేమను పంచుకోవడమే. అందుచేత, అనుభవాన్ని పొందే క్రమంలో మీకు ఎదురైన సమస్య, దానివల్ల మీరు పొందిన ఆందోళన, ఆ సమస్య తీరడం కోసం బాబాపై ఆధారపడిన విషయం, బాబా అనుగ్రహించిన తీరు, ఆ అనుభవం ద్వారా మీరు పొందిన ఆనందానుభూతిని వివరిస్తూ బాబా ప్రేమ తెలిసే విధంగా వ్రాయడానికి ప్రయత్నించండి. అలా వ్రాస్తే, వ్రాసే మీరు, ప్రచురించే మేము, మనతోపాటు సాటి సాయిభక్తులు కూడా ఆ ఆనందాన్ని, బాబా ప్రేమను ఆస్వాదిస్తారు. అంతేకాదు, బాబా చేసిన ఏ లీల అయినా ఎంతో ప్రబోధాత్మకంగా ఉంటుంది. మీరు పొందిన అనుభవాలలో మీరు బాబా బోధను గ్రహించగలిగితే ఆ వివరాన్ని కూడా పంచుకోవడానికి ప్రయత్నించండి. ఆ అనుభవం ఎంతోమంది సాయిభక్తులకు స్ఫూర్తిదాయకంగా ఉంటుంది. అలా కాకుండా అనుభవాలను క్లుప్తంగా, బాబా ప్రేమను వ్యక్తపరచకుండా వ్రాసి పంపితే మాత్రం ఇకపై బ్లాగులో ప్రచురించలేమని ఈ సందర్భంగా అందరికీ విన్నవించుకుంటున్నాము. నిజానికి అలా చేయడం మా మనసులకి కష్టంగానే ఉంటుంది. అందుచేతనే ఇప్పటివరకు అలాంటి వాటిని కూడా ప్రచురించాము. కానీ ఈ బ్లాగు మ్రొక్కుబడులు తీర్చుకునే వేదికగా మిగిలిపోకుండా బాబా ప్రేమకు నిలయంగా ఉంచడానికి ఈ నిర్ణయం మాకు తప్పనిసరైంది. దయచేసి ఎవ్వరూ అన్యథా భావించకండి.

అలాగే, అందరికీ మరొక్క మనవి.. మీరంతా శ్రీహేమాడ్‌పంత్ రచించిన శ్రీసాయిసచ్చరిత్ర, శ్రీబి.వి.నరసింహస్వామి రచించిన భక్తుల అనుభవాలు మొదలైన సద్గ్రంథాలు, ఈ బ్లాగులో ప్రచురించిన బాబా సమకాలీన భక్తుల అనుభవాలు చదివే ఉంటారు. వాటిలో ప్రచురించిన భక్తుల అనుభవాలలోనూ, అలాగే ఈనాటి సాయిభక్తులలో కొంతమంది పంచుకున్న అనుభవాలలోనూ, వారు బాబా వద్దకు ప్రప్రథమంగా ఎలా వచ్చారో, ఆ ప్రథమ దర్శనంతోనే వారు ఎంతగా బాబా పట్ల ఆకర్షితులయ్యారో, బాబా ప్రసాదించిన అనుభవాల వల్ల వారి జీవితాలు ఎంత చక్కగా మార్పు చెందాయో, ఆయా అనుభవాల ద్వారా వారి ప్రవర్తనలో ఎలాంటి మార్పు వచ్చిందో మనం తెలుసుకున్నాం. ఆయా భక్తులు ఈ విషయాలన్నీ వివరంగా చెప్పకపోయుంటే బాబా ప్రేమను మనం ఇంతగా అనుభూతి చెందేవాళ్ళం కాదేమో! కాబట్టి మీరంతా కూడా కేవలం ప్రస్తుత అనుభవాలను, ఈ బ్లాగులో పంచుకుంటామని బాబాకు మ్రొక్కుకున్న అనుభవాలనే కాకుండా, అసలు మొట్టమొదట బాబా మీ జీవితాలలోకి ఎలా ప్రవేశించారో, మీరు బాబా పట్ల ఎలా ఆకర్షితులయ్యారో, మీ జీవితాలను బాబా ఎలా చక్కగా తీర్చిదిద్దారో, ఆ అనుభవాల ద్వారా మీ జీవితాలలో ఎలాంటి పరివర్తన కలిగిందోనన్న విషయాలను కూడా వివరంగా పంచుకుంటే మీతో పాటు మేమంతా కూడా బాబా ప్రేమలో ఓలలాడతాము. మా మనవిని అర్థం చేసుకుని మీరంతా బాబా మీపై చూపిన ప్రేమను మాతో పంచుకుంటారని ఆశిస్తూ..

- 'సాయి మహరాజ్ సన్నిధి' బ్లాగ్ టీం.

---

బాబాకి లేఖ - మానసిక ఒత్తిడి నుండి ఉపశమనం

సాయిభక్తులందరికీ నమస్కారం. నేనొక సాయిభక్తురాలిని. బాబా నాకు ప్రసాదించిన ఒక అనుభవాన్ని నేనిప్పుడు మీతో పంచుకుంటున్నాను. ఈమధ్య ఒక నెలరోజులపాటు నేను విపరీతమైన వ్యాకులతతో మానసిక ఒత్తిడికి గురయ్యాను. ఒత్తిడి ఎంత తీవ్రంగా ఉండేదంటే, "ఇలా బతకడం ఎందుకు?" అని అనిపించేది. నాకు అలా ఒత్తిడి ఉండటం మొదటిసారి ఏమీ కాదు. ప్రస్తుత నా జీవితం ఎంత బాగున్నా గత అనుభవాల దృష్ట్యా నేను ఏదో చింతిస్తూ బాధపడుతూ ఉంటాను. దీనివల్ల మానసింగానే కాదు, జీర్ణ సమస్య, గ్యాస్, గుండెల్లో మంట వంటి శారీరక సమస్యలు కూడా ఎక్కువయ్యాయి. దానినుండి బయటపడటానికి నేను చేసే ప్రయత్నం అంతా ఇంతా కాదు. ఆ క్రమంలో నా భర్త కూడా నాకు చాలా సహాయం చేస్తుంటారు. కానీ ఏం చేసినా నేను దీనినుంచి బయటికి రాలేకపోయాను. పోనీ, ఫిజియోథెరఫీ చేయించుకుందామంటే ఒక్క సెషన్‌కే చాలా డబ్బులు అడుగుతున్నారు. అట్టి స్థితిలో నా మనసుకి బాబాకి ఒక లేఖ వ్రాసుకోవాలనిపించింది. గతంలో నాకు ఏదైనా మొండిసమస్య వస్తే, నేను బాబాకి ఒక లేఖ వ్రాసుకునేదాన్ని. అలా వ్రాస్తే నా సమస్య పరిష్కారమయ్యేది. అందువల్లనే మళ్ళీ బాబాకి ఒక లేఖ వ్రాద్దామనుకుని, "ఈ మానసిక ఒత్తిడి నుంచి నన్ను బయటపడేయండి బాబా. అలా జరిగితే, బ్లాగులో నా అనుభవం పంచుకుంటాన"ని వ్రాసుకున్నాను. అలా వరుసగా మూడురోజులు బాబాకి లేఖ వ్రాసాను. కేవలం మూడురోజుల్లో అంత ఒత్తిడి నుండి బయటపడేశారు బాబా. నేను ఇప్పుడు చాలావరకు కోలుకున్నాను. ఇంకా కొద్దిగా ఒత్తిడి వస్తోంది. వెంటనే నేను బాబాకి లేఖ వ్రాస్తున్నాను. "బాబా! ఉన్న ఆ కాస్త ఒత్తిడిని కూడా తగ్గించి నా భర్తని బాగా చూసుకునే శక్తిని నాకివ్వు. ఈ సమస్య వల్ల తిండి తినడం లేదు. కనీసం రోజువారీ పనులు కూడా చేసుకోలేకపోతున్నాను. ఇకనైనా నన్ను ఈ సమస్య నుంచి పూర్తిగా బయటపడేయండి బాబా, ప్లీజ్...".

---

ఎప్పుడు, ఏ నిమిషాన తలచుకున్నా దయచూపే సాయి

ఓం శ్రీ సాయినాథాయ నమః!!! సాయిబంధువులందరికీ నా హృదయపూర్వక నమస్కారం. తలచినంతనే పలికే దైవం మన సాయినాథుడు. నేను ఆయన భక్తురాలిని. బాబా గురించి ఎంత పంచుకున్నా తరగదు. నేను ఇంతకుముందు నా అనుభవాలు కొన్ని పంచుకున్నాను. ఇప్పుడు మరికొన్ని పంచుకుంటున్నాను. ఈమధ్య కాలికి వేసుకునే చెప్పుల వలన మావారి కాలివేలికి గాయమైంది. ఆయనకి షుగర్ ఉండటం వలన గాయం తొందరగా మానలేదు, బాగా చీము పట్టింది. అప్పుడు నేను, "బాబా! ఇబ్బంది లేకుండా ఆ గాయం మానిపోతే, నా ఆనందాన్ని 'సాయి మహరాజ్ సన్నిధి' బ్లాగులో పంచుకుంటాను" అని బాబాతో చెప్పుకున్నాను. బాబా దయవలన పెద్దగా ఇబ్బంది లేకుండా ఆ గాయం మానిపోయింది. ఇకపోతే, మా చిన్నమ్మాయి ఇంటి విషయంలో బాబా ఎంతో దయ చూపించి అన్నీ మంచిగా జరిగేటట్లు చేశారు. ప్రస్తుతం మా పెద్దమ్మవాళ్లు ఇల్లు తీసుకున్నారు. ఆ ఇంటికి సంబంధించిన పనులు కొంచెం చికాకు పెట్టడంతో నేను, "బాబా! మీ దయతో ఆ ఇంటి గృహప్రవేశం మంచిగా జరిగితే, మీ కృపను  అందరితో పంచుకుంటాను" అని బాబాను వేడుకున్నాను. ఆయన దయవల్ల గృహప్రవేశం చాలా బాగా జరిగింది. "ఇలా ఎన్నో విషయాలలో ఎప్పుడు, ఏ నిమిషాన తలచుకున్నా మీరు దయచూపించారు సాయీ. మీకు చాలా చాలా ధన్యవాదాలు బాబా. ఆలస్యంగా నా అనుభవాన్ని పంచుకున్నందుకు, అలాగే ఏవైనా తప్పులున్నా క్షమించండి బాబా. మా పెద్దమ్మవాళ్ళు ఎలాంటి ఇబ్బందీ లేకుండా కొత్త ఇంటిలోకి చేరిపోతే మళ్ళీ నా అనుభవాన్ని పంచుకుంటాను సాయిదేవా. మా బాధలు మీకు తెలియనివి కావు. దయచేసి అందరికీ మంచి ఆరోగ్యం ప్రసాదించు తండ్రీ".

---