సాయిభక్తుల అనుభవమాలిక 1062వ భాగం....

---

ఈ భాగంలో అనుభవాలు:

1. అద్భుతంగా ఇంట్లోనే అనుగ్రహించిన బాబా

2. బాబా ఆశీర్వాదం ఉంటే చాలు ఏ సమస్యా ఉండదు

3. బాబా ఉండగా ఎలాంటి లోటూ ఉండదు

---

అద్భుతంగా ఇంట్లోనే అనుగ్రహించిన బాబా

నాపేరు మాధవి. మేము భువనేశ్వర్‌లో నివాసముంటున్నాము. నేను చాలా రోజుల నుంచి బాబా నాకు ప్రసాదించిన ఒక అనుభవాన్ని వ్రాయాలనుకుంటూ కూడా సమయం లేక వ్రాయలేకపోయాను. కానీ నా మనసుకి, "నా లీలలు అంటే నీకు అంత చులకనా, నా పిల్లలతో పంచుకోవా?" అని బాబా అంటున్నట్లుగా అనిపించి సమయం చేసుకుని మరీ ఈ అనుభవాన్ని వ్రాస్తున్నాను. అందరూ చదివి బాబా దివ్యత్వానికి ఆనందిస్తారని నా నమ్మకం. 2021 చివరిలో నాకు ఢిల్లీకి చెందిన సీమ అనే అమ్మాయితో పరిచయమైంది. ఆమె కూడా బాబా భక్తురాలు. తను బాబాకోసం డ్రెస్సు కుట్టి శిరిడీకి పంపుతుందట. ఈ మధ్య శిరిడీ సంస్థాన్‍‍లో నిబంధలనలు మారాయి. వాటి ప్రకారం మనం బాబాకి డ్రెస్సు ఇవ్వాలంటే శిరిడీలోని డొనేషన్ కౌంటరులో ఆ డ్రెస్సు ఇవ్వాలి. వాళ్ళు మనమిచ్చే డ్రెస్సుకు ఒక ధరని నిర్ణయించి మనకి బిల్ ఇస్తారు. ప్రతినెల 25వ తేదీన లక్కీ డ్రా తీస్తారు. ఉదాహరణకు జనవరి నెలలో ఏ రోజు, ఏ ఆరతికి, ఏ భక్తులు పంపిన డ్రెస్సు బాబా వేసుకోవాలన్నది ముందు నెల అంటే డిసెంబర్ 25న లక్కీ డ్రా ద్వారా నిర్ణయిస్తారన్నమాట. నాకు ఈ విషయాలన్నీ సీమనే చెప్పింది. అంతా విన్న నేను సీమతో, "నా తరపున నువ్వే ఒక డ్రెస్సు కుట్టి శిరిడీకి పంపు" అని చెప్పాను. శిరిడీలోని బాబాకు మూడు మీటర్లు, సమాధికోసం మూడు మీటర్లు అంటే మొత్తం ఆరు మీటర్ల వస్త్రం తీసుకోవాల్సి ఉండగా అదనంగా మరో అర మీటరు కూడా తీసుకోమని నేను సీమతో చెప్పాను. అలా ఎందుకు చెప్పానో నాకే తెలీదు. బహుశా బాబానే నాతో అలా చెప్పించి ఉంటారు. సరే, సీమ నేను చెప్పినట్లే ఢిల్లీలో ఒక వస్త్రం కొని దాన్ని చక్కగా కుట్టి శిరిడీకి పంపింది. తను నాతో, "ఆంటీ, బాబా మీ డ్రెస్సు జనవరి 1న కాకడ ఆరతికి వేసుకుంటారు" అని అంటుండేది. అదే నా మనసులో పడిపోయింది. నేను ఎంతో ఆనందపడుతూ చాలా ఆశ పెట్టుకుని, ఖచ్చితంగా లక్కీ డ్రాలో నేను పంపే డ్రెస్సు ఆరోజుకి ఎంపిక అవుతుందని అనుకునేదాన్ని. నేను ఎంత పిచ్చిదాన్నో తరువాతకానీ, నాకు తెలీలేదు. ఇకపోతే, సీమ పంపిన డ్రెస్ డిసెంబర్ 15కి శిరిడీ చేరింది. నాకు తెలిసిన ఒక అతను ఆ డ్రెస్సుని డొనేషన్ కౌంటరులో ఇచ్చాడు. ఇంకా డిసెంబర్ 25 ఎప్పుడు వస్తుందా! అని నేను ఎదురుచూసాను. చివరికి ఆరోజు రానే వచ్చింది. తీరా చూస్తే నేను పంపిన డ్రెస్సు అస్సలు ఎంపిక కాలేదు. నాకు ఆ విషయం డిసెంబర్ 29న తెలిసింది. ఇంక నా దుఃఖం వర్ణణాతీతం. నాలాంటి వాళ్ళు ఎక్కువ ఆశపెట్టుకుంటారు, జరగకపోతే అతిగా దుఖఃపడతారు. ఎన్నోసార్లు సాయిచరిత్ర చదువుతాము. అయినా ఆయన అడిగిన రెండు పైసలలో ఒకటైన 'శ్రద్ధ'నిస్తాం కానీ 'సబూరీ' అనే రెండో పైసాను ఇవ్వము. ఓపిక ఉండదు, ఆయన అనుగ్రహం కోసం అస్సలు ఎదురుచూడము. సరే, బాబా ఎంత చక్కగా అనుగ్రహించారో చూడండి!.  

2021, డిసెంబర్ 29 ఉదయం నేను సీమకి ఫోన్ చేసి "నా డ్రెస్సు ఎంపిక కాలేద"ని చెప్పాను. ఆ అమ్మాయి, "అయ్యో! అవునా ఆంటీ? అవుతుంది అనుకున్నాను" అని మౌనంగా ఉండిపోయింది. ఆరోజు మధ్యాహ్నం ఆమెకు, "నీ దగ్గర అదనంగా తీసిన అరమీటరు వస్త్రం ఉంది కదా! శిరిడీలో ఎలా ఇచ్చావో, అదేవిధంగా ఆ వస్త్రాన్ని కుట్టి పంపు" అని ఎవరో తన చెవిలో చెప్తున్నట్లు అనిపించిందట. వెంటనే ఆ అమ్మాయి ఆ అరమీటరు వస్త్రంతో మా ఇంట్లో ఉన్న బాబాకోసం శిరిడీకి పంపిన డ్రెస్సులానే కుట్టి 2021, డిసెంబర్ 30న భువనేశ్వర్‌కు పంపింది. అక్కడి పోస్టుమ్యాన్ జనవరి 2 లేదా 3 తారీఖులలో చేరుతుంది అని చెప్పారట. కానీ డిసెంబర్ 31 సాయంత్రానికే ఆ డ్రెస్సు భువనేశ్వర్ చేరింది. అంటే కేవలం ఒక్కరోజులో వచ్చేసింది. నేను ఆఫీసు నుండి ఇంటికెళ్లి చూస్తే, బాబా డ్రెస్సు మా ఇంట్లో ఉంది . ఇంకా నా ఆనందానికి అవధులు లేవు. కళ్ళ నుండి నీళ్ళు కారిపోయాయి. జనవరి 1న నేను ఇచ్చిన డ్రెస్సు బాబా వేసుకోవాలన్న నా కోరికను బాబా విన్నారు. కాకపోతే శిరిడీలో కాదు. మా ఇంట్లో నా చేతుల మీదుగా నా డ్రెస్సు వేసుకుని నన్ను కృతార్థురాలిని చేశారు బాబా. నేనిచ్చిన డ్రెస్సు ఆయన శిరిడీలో వేసుకుని ఉంటే, నేను నేరుగా చూడలేకపోయేదాన్ని. ఇప్పుడు మా ఇంట్లోనే బాబాను ఆ డ్రెస్సులో ఎప్పుడు కావాలంటే అప్పుడు నేను చూసుకోవచ్చు. "నేను శిరిడీలోనే లేను. నా విగ్రహం, నా ఫోటో ఎక్కడ ఉంటే, నేను అక్కడ ఉంటానని తెలుసుకో" అని బాబా స్వయంగా చెప్పిన మాటను ఈ లీల ద్వారా నాకు ఋజువు చేసారు. నేను పంపిన డ్రెస్సు ఎంపిక కాలేదన్న నా దుఃఖాన్ని బాబా చూడలేకపోయారు. ఆ అమ్మాయికి ప్రేరణనిచ్చి సరైన సమయానికి మా ఇంటికి చేరుకున్నారు. కరోనా కాలంలో మేము శిరిడీ పోలేకుండా ఉన్నందుకు ఆయనే మా ఇంటికి వచ్చి నన్ను సంతోషపెట్టారు. 'సహస్రశీర్షం వేదం, విశ్వాక్షం విశ్వసంభవం' అని వేదంలో చెప్పినట్లు ఆయన విశ్వమంతా వ్యాపించి ఉన్నారు. ఇంతకన్నా నా సంతోషాన్ని ఎలా పంచుకోను? బాబా కృపను తెలియపరచడానికి నాకు పదాలు కరువవుతున్నాయి.

---

బాబా ఆశీర్వాదం ఉంటే చాలు ఏ సమస్యా ఉండదు

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీసమర్థ సద్గురు సాయినాథ్ మహరాజ్ కీ జై!!!

సాయి బంధువులకు మరియు 'సాయి మహారాజ్ సన్నిధి' బ్లాగు నిర్వహిస్తున్న సాయికి నా నమస్కారాలు. నేను ఒక సాయి భక్తురాలిని. సాయి కల్పవృక్షము, పిలిస్తే పలికే దైవం. బాబా ఎప్పుడూ నా వెంటే ఉన్నట్టు అనిపిస్తుంది. బాబా నాకు ప్రసాదించిన కొన్ని అనుభవాలను నేనిప్పుడు మీతో పంచుకుంటున్నాను. రెండు సంవత్సరాలుగా నా నెలసరి విషయంలో కొంచం సమస్య ఉంది. డాక్టర్ల చుట్టూ తిరుగుతున్నాను కాని, ఆ సమస్య పరిష్కారం కావట్లేదు. ఇక బాబానే ఆ సమస్యకి పరిష్కారం చూపాలి. ఇకపోతే 2021, డిసెంబర్ నెలలో నేను ధనుర్మాసం పూజ చేయాలని అనుకున్నాను. కానీ నెలసరి సమస్య వలన నాకు నెలలో వారం, పది రోజులకి మించి పూజచేసే అవకాశం ఉండట్లేదు. అందువలన నేను బాబాను, "బాబా! ఈ ధనుర్మాసంలోనైనా వీలైనన్ని ఎక్కువ రోజులు పూజ చేసుకునే అవకాశాన్ని ప్రసాదించండి" అని వేడుకున్నాను. బాబా నాపై చాలా దయ చూపారు. నేను మొత్తం 18 రోజులు పూర్తి చేసుకోగలిగాను. "ధన్యవాదాలు సాయి. మీ ఆశీస్సులు ఉంటేనే ఎవరైనా ఏదైనా చేయగలరు బాబా".

మా పెద్దపాప రెండు నెలల నుండి నెలసరి వచ్చినప్పుడు ఐదురోజులపాటు వెన్నునొప్పితో బాధపడుతుంది. దాని వలన తనకి చదువుకోవడం కష్టంగా ఉంటుంది. 2022 జనవరిలో కూడా ఆ సమస్య మొదలైంది. అప్పుడు నేను, "బాబా! ఎలాగైనా పాపకి వెన్నునొప్పి రాకుండా చూసే భారం మీదే తండ్రి" అని బాబాను ప్రార్థించాను. తెల్లవారేసరికి పాపకి నొప్పి లేదు. మిగిలిన నాలుగు రోజులు కూడా ఎటువంటి నొప్పి రాలేదు. "థాంక్యూ బాబా. ఎప్పటికీ పాపకు నొప్పి రాకుండా దీవించండి బాబా".

2022, జనవరిలో ఒకరోజు నా భర్త తనకి జలుబు చాలా ఎక్కువగా ఉందని చాలా భయపడ్డారు. ఇంకా కోవిడ్ టెస్టు చేసుకోవాలని కిట్టు తెచ్చుకున్నారు. అప్పుడు నేను, "ఎలాగైనా సరే కోవిడ్ నెగిటివ్ వచ్చేలా చూడు సాయి" అని బాబాను వేడుకున్నాను. ఆయన దయవల్ల రిపోర్టు నెగిటివ్ వచ్చింది. "ధన్యవాదాలు బాబా".

ఓంసాయి శ్రీసాయి జయజయసాయి!!!

---

బాబా ఉండగా ఎలాంటి లోటూ ఉండదు

సాయినాథునికి నా నమస్కారాలు. ఈ బ్లాగుని ఇంత చక్కగా నడిపిస్తున్న వారికి, బ్లాగును ఆదరిస్తున్న వారికి నా కృతజ్ఞతలు. నేను సాయి భక్తురాలిని. నేను తొమ్మిదోసారి నా అనుభవాన్ని బ్లాగులో పంచుకుంటున్నాను. మా ఇంట్లో ఎప్పుడూ పూజ చేసే చనిపోయిన మా నాన్నగారి ఫోటో ఒకరోజు అనుకోకుండా పగిలిపోతే అమ్మ దాన్ని ఎక్కడో దాచారు. ఆ పోటో కాకుండా అదే సైజ్ ఫ్రేమ్ కట్టని కొత్త ఫోటో ఇంకొకటి కూడా ఇంట్లో ఉంది. ఒకరోజు నేను నాన్న ఫోటోను ఫ్రేమ్ కట్టించడానికి తీసుకెళ్తూ ఎప్పుడూ పూజించే ఫోటోను కాకుండా కొత్త ఫోటోను తీసుకెళ్ళాను. సంక్రాంతి వచ్చేవరకు నేను ఆ విషయం గుర్తించలేదు. తీరా రేపు సంక్రాంతి అనగా ముందురోజు గ్రహించి అమ్మని అడిగితే, పాత ఫోటోకోసం చాలాసేపు వెతికింది. కానీ, ఆ ఫోటో కనిపించలేదు. అది కనిపిస్తుందనే నమ్మకం కూడా లేదు. ఎందుకంటే, ఒకసారి ఇంట్లో ఏదో గొడవ జరిగినప్పుడు ఆ ఫోటోని పగలగొట్టే పరిస్థితి వచ్చింది. అటువంటి సమయంలో ఆ ఫోటోను తీసి ఎక్కడ పెట్టామో ఎవరికీ గుర్తులేదు. మేము ప్రతి సంవత్సరం సంక్రాంతి పండుగ రోజు నాన్నగారిని పూజిస్తాం. ఆరోజు ఉదయం 'ఫోటో లేకుండా పండగ రోజు పూజ ఎలా?' అని నాకు చాలా బాధేసింది. పోనీ, వెళ్లి ఫ్రేమ్ కిచ్చిన ఫోటో తెచ్చుకుందామంటే పండగ రోజు షాపు ఓపెన్ చేస్తారో, లేదో తెలియదు. అయినా అసలు వెళ్ళే పరిస్థితి కూడా లేదు. "ఇప్పుడు ఎలా బాబా? ఫోటో దొరికితే బ్లాగులో పంచుకుంటాను" అని మనసులో అనుకున్నాను. అంతే, నేను స్నానం చేసి వచ్చేలోపు అమ్మ ఫోటో పెట్టి పూజ చేస్తూ ఫోటో దొరికింది అన్నారు. ఎక్కడ అని నేను అమ్మని అడగలేదు. ఎందుకంటే, మనకి బాబా ఉండగా ఎలాంటి లోటూ ఉండదు. అన్నీ బాబా చూసుకుంటారు. మనం చేయాల్సింది అంతా బాబా మీద నమ్మకముంచి ఆయన చెప్పింది చేయడమే. "థాంక్యూ బాబా. మా నాన్నగారి ఆత్మకు శాంతిని ప్రసాదించండి".

---